توأم روحك أنا

البارت السادس

.
.
.

في نفس الايام دي علاقتي مع إسلام اتغيرت وبقت اقوى وبقينا طوالي في حالة تلفونات وونسة..
أخيراً بابا طلعوهو البيت وجهزنا ليهو اوضة قريبة من اوضة حبوبة وفرشنها وبخرناها تمام لمن نهال قالت لي كفاها حبوبة حاتجي وتقول لينا دايرين تموتو ولدي بي كترت الدخان..
ريم ورؤى جو من المدرسة يتقدلن جابهم علي قلت ليهم: برافو ياانسات انتو تمشو المدرسة ونحن ندبس في ترتيب الاوضه والنضافة، رؤى قالت وهم بضحكو اشتغلن اشتغلن قبال الديك مايجينا، ريم عجبا الحال وواصلت:ياديك ياديك كوك كوك كووك عايز ايه عايز اكلكم سببك ايه
علي: بفتنكم عندها بقول ليها قالو انتي ديك و بياكل كمان
ريم بي خوف: حرام عليك ياعلوش انا ماقصدتا حبوبة والله
رؤى قالت: انا ماقلتا شي
انا طوالي قلت ليها: انتي بي الذات كنتي قاصداها لانو مافي زول بهرشنا غيرا ولا شنو ياعلوش
طوالي احترمو نفسهم وجرو دخلو بيتهم وعلي بقى يضحك بي اعلى صوت
نهال قالت ليهو: غايتو ياود ابوي اضحك مافي زول بسألك ماأنت الحبيب عاد
في عز نضمينا ده نسمع صوت العربية حقت عمو ياسر وصلت طبعا بنعرفا لانو صوتا مميز لمن تجي تقيف بتعمل صوت زي كأنها عايزة تقح  ههه طوالي لفحنا طرحنا وعلي جرا ليهم برا عشان يساعدهم ينزلو بابا، عمو قاسم كان جا قبالهم معاهو جزار وخروف واول ماجو طوالي الجزار تكا الخروف ضبحو، حسي الخروف ده مالو ومال عيا بابا تضبحو كأنو هو السبب، المهم نططو بابا دم الخروف وانا ميتة بي الضحك لمن لمحتا وش عنتوري سكتا وجريت واطي، بعد خشو بعداك عينكم ماتشوف الا النور سلامات وبكا وضحك واي شي بتعمل عملناهو وقالو كده الجيران انكسرو فينا وسلامة سلامة والحلاوة والببسي مدورات وتاني اغلب احداث اليوم ده مامتزكراها..
قررو يعملو بكرة الكرامة عشان كده ضربتا تلفون وعزمتا اغلب الناس القراب لي في القناة ومن ضمنهم إسلام حبيبي ، وبرضو مافاكره معظم الاحداث حقت اليوم ده، بعد انفض المولد ده رجعت شغلي عادي ورجعت اشوف إسلام بشكل يومي ، بس هو كان حريص انو يخفي عن الناس حقيقة قربو مني وانا احترمتا رغبتو لأني كل همي هو وبس..
في يوم رسل لي في الواتس بعد ماخلصت من تصوير الحلقة وقال لي منتظرك في المطعم الاتقابلنا فيهو تعالي
مافكرتا طوالي طبقتا شنطتي وطلعتا ركبتا ركشة و الى المطعم طيران، وصلتا ودخلتا لقيتو قاعد، ياخ الزول ده مهما اوصف شعوري لما بشوفو مابوصل ليكم، دخلت سلمتا عليهو وقعدتا وهو من شافني ابتسم لي ابتسامتو البحبها، بعد قعدتا طلب لي الميلك شيك بي الفراولة مع فراولة اكسترا، وبعد داك دار بيناتنا الحوار التالي:
اسلام: نورهان انتي اقتحمتي حياتي وقلبي مابعرف كيف وانا مامن الساهل اميل لي زول بس انتي مختلفة واسلوبك مختلف عفوية والفي قلبك على لسانك
أنا : وانت كمان انسان مختلف شديد وعندك جاذبية غريبة
احييييي انا من لساني ومن شلاقتي، طوالي خشيت فيهو شمال وماوزنتا كلامي كالعادة
إسلام عمل فيها رايح عشان حس بي اتحرجتا وقال لي: نورهان انا ماعايز البينا يبقى طلعة وتلفونات بالليل، انا عايزك في الحلال وعايز اتقدم ليك
في اللحظة دي نانسي عجرم الجواي اتحزمت وبقت ترقص وتقول: تعالا هنا وانا حبك تررمرم عشان اعيش على حبك، ياخ فرحت فرح مابتوصف ومن كترت الاثارة الانا فيها ماقادرة اتنفس وحاولت بجهد اخفي مشاعري الجياشة لي درجة اني ابتسمتا ابتسامة جعانة مامعبرة خالص، هو ابتسم وقال لي قد يبدو ليك اني متسرع لكن انا عايز ارتبط بيك في النور
انا ماسامعاهو بقول في شنو لأنو فرقة حسب الله شغالة تعزف في معدتي وحسيت بي اني عايزة ارجع ماكنت قايلة الفرح صعب كده،  نبهني وقال :نورهان ليه سكتي
طوالي بقيت اتنحنح وبرضو عرقتا عرق السنين انا يعني لو مشيت رفعتا حديد في الجيم مابعرق قدر ده، قلت ليهو بعد بقيت منزلة راسي: فاجأتني يا إسلام بالجد
إسلام : ارجوك فكري كويس بس وافقي
من ابتسم كده قربتا انهار واقول ليهو معاك إلى نهاية العالم، وبرضو جاتني وصلة غنا وقلتا: وقُت ليهو انت روحي وانت سبب جروحي ياالنسيتني روحي وياحبي الاساسي ياالنسيتني ناسيييي... قلبت بي غنا برضو ماهو اي فنان مجاملني وقايل مقطع بناسب حالاتي الشعورية اسوي شنو يعني..
المهم بي خجل مصطنع كده قلتا ليهو طيب
بعدها اتوادعنا ومشينا كل زول في اتجاه..
جاني بتاع الترحيل ومشينا وسبحان الله كان فاتح كمال ترباس وداك شغال يقول:أنت المهم والناس جميع ماتهمني، اها غلطانة انا؟ براهم بنكشوني، وانا بس قاعدة واتبسم براي زي الهبلة كل 3ثواني..
وصلت البيت لقيت الحجة رابطة في السما، حبوبة وعمو ياسر، وبابا والباقين بتفرجو، فصلوني بالله في لحظة، قال شنو عمو ياسر داير يدي العروس متكفي من حق الشيلة لي المهر وحبوبة قالت لاااا والف لااااا عوايدنا بتقول العريس يشتري الشيلة والدهب ويجو الاهل يتفرجو حتى بعد داك يودوها للعروس في سيرة مختصرة محترمة والنقاش ده منتهي، بعجبني فيها قوة الشخصية العنتورية دي، قالت ليهو تسوق التومات وتمشو تسوقو العروس تشترو الشيلة حبة حبة لمن تخلصو بعداك نفرجا للأهل وبعدا نبدا نغلف ونرصرص ومن حسي الشيلة6/6 والريحة 2/2 اياااك تزيد فتفوتة سامع؟  يعني عمرو 40 وبقولو ليهوسامع زي الشفع الصغار، طيب عمو حايعرس انا ذنبي شنو الف على كعوب رجلي لمن يتشققو وانا على وش جواز ههه ياناس حد يفهمني..
طلعتا البيت ارتاح واغير هدومي كانت الساعة8 مسا، سمعتا صوت رسالة من الواتس طوالي جريت على تلفوني ولقيتو هو وكاتب لي(وصلتي بالسلامة؟ طمنيني عليك) طوالي نسيت ليك ام الغيار ونسيت نفسي ذاتا وانجدعتا في سريري وهاتك ياونسة في الواتس..
انتهيت خلاص من تصوير البرنامج وقعدتا في البيت اسبوع والاسبوع البعدو كنت حاانزل ازيع النشرة الاخبارية مع زميل تاني..
في فترة الاسبوع الراحة بقيت امشي انا ونهال مع عمو ياسر ومهرة نلف في الأسواق، ياخ مهرة مهيرة دي طلعت راقية بشكل اختارت حاجات بسيطة لكن رهييييبة طلعت مابتحب الكشكشة والعنكشة الماليها لزوم وساعدتني اشتري كم طقم كده لزوم شغلي، طبعا انا ونهال هزليات وكنا بنضحكا ضحك طلعت ابسط مقومات خفت الدم مابتعرفا كانت زولة جادة مافرفوشة زي عمو ياسر بالضبط
طلع شلنكح عامل شغل رهيب وجابهم بيرفكت ماتش، شكلها ماحتستحمل عنتر ابدا ابدا ..
وبرضو إسلام كان معاي على طول الخط وعارف تحركاتي وكلمتو بي عرس عمو، وطبعا كان مزرزرني عايز يعرف رايي شنو في كلامو، اخر شي قلتا ليهو موافقة بس اجل الخطوة لبعد مانخلص من عرس عمو ياسر ووافق
حب جامد الله حب جامد ايه بيحصل لما واحدة تحب واحد حب جامد ههه ياخ جنات دي صحبتي  حربية وفاهماني عديل
اها المهم اني كنت طايرة بين السحاب وماشة على الماء، نهال طبعا ميتة بي الضحك فيني وشغالة تكاويني كل مرة تغني لي ادبك وزوقك الخلاني اتكسر فوقك بردلب اقع، سغيلة خلاص، قلتا ليها بردلب دي شنو حسي مالاقتني في اللغة العربية نوهائي
قالت لي نوهائي نوهائي؟
انا: اااااااي نوهااااائي وبعدين وينو الشملول بتاعك ماشفنا ليهو اي خطوة يعني
قالت لي: اهاااا خلاص دايرة تعيشي لي الدور؟ دي ماكانت كشكرة يعني كني شوية لمن تلبسي الدبلة اول
انا: ملحوقة ياهناية الكلام على ناس
قالت لي: قلت ليك البيناتنا لسه في البداية هو ما النوع المتهور العجوول
احيي انا بتعرف تغيظني شلتا المخدة واديتا في ضهرها لبعة معتبرة وهي تضحك
انا ونهال اكتفينا بي بعض منذ نعومة اظافرنا حتى في الروضة ثم المدارس وفي المجتمعات وعند اهلنا كنا مع بعض بنلعب مع بعضنا بنتونس مع بعضنا بنقعد جمب بعضنا، في الجامعة اختلفت دراستنا لكن برضو مابعدنا عن بعض ماعندنا صاحبات انتيم عندنا بعد الصحبات من هنا وهناك لكن انا وهي انتيمات بعضنا مااتعلمنا نفترق عن بعض أبداً..
في يوم إسلام اصر يعزمني عشا وانا طبعا متحيرة كيف اطلع معاهو براي في الاخير حنستا نهال تمشي معاي وابت واصريت عليها رضت في الاخير الحيوانة، المهم قلنا ليهم ماشين مشوار السوق وبنمشي برانا يمكن نتأخر، غايتو كذب كذب كتير استغفر الله..
اتلبسنا واتشيكنا وطيران مشينا المطعم، اول ماشافنا إسلام اندهش، سلم علينا وقعدنا واول صدمة لي منو انو ماعرف انا منو بيناتنا انا ونهال قال لينا انتو كوبي بست قامت نهال قالت ليهو انا نورهان معقول فاتت عليك بس؟ ضحك ليها وقال اعمل شنو لكن في شبهك انتي واختك ده
انا مسكتني غمة، إسلام صدق انو نهال هي انا واستمرت القعدة على كده وبقينا نتونس في مواضيع عامة وكان بوجه لي اسئلة على اني نهال خليناهو عايش الدور وسكتنا، واتوادعنا اخر القعدة ومشينا انا واختي، نهال ماشاغلتني كعادتا لأنها بتعرف متين تهظر ومتين تسكت مني..
قبل مانرجع البيت غشينا السوق كل واحدة اشترت ليها شي بس عشان مانطلع كذابات في الاخير ورجعنا البيت..
بعد رقدتا جاني اتصال من إسلام شلتو بي لهفة شديدة ورديت، اتونسنا سوا وانا نسيت انو مااتعرف علي وعزرتو لانو انا ونهال فولة واتقسمت نصين
إسلام : عرس عمك متين
انا: بعد شهرين يادوب خلصنا شيلة الهدوم وفضل الدهب والريحة وديل اختصاص حبوبتي
إسلام : ماعندي حبوبات انا، حبوباتي الاتنين اتوفو واناصغير ماعشتا معاهم كتير
بقلبي قلتا ليهو لو كانو عنتوريات بكونو ريحو المجتمع، تاني انبتا نفسي على افكاري السيئة لأنو مافي اغلي من حبوباتنا هم رمز الزمن الفات ورمز ثقافاتنا الاندثرت واتبدلت
قلتا ليهو: الله يرحمهم واكيد حظك قليل لأنو الحبوبات مافي منهم ضو البيت وكبار الاسرة
اسلام: بعجبني كلامك الكبار ده يانورهان وبخليني مشدود ليك على الدوام
انا ضحكتا وقلتا ليهو الله يجبر بخاطرك يارب
كنا انا وهو بنتكلم ساعتين بالليل يوماتي وبعدها نقفل وبنوم بي نفسيات في السما
الاسبوع ده بدو في القناة عرض البرنامج بتاعي انا ومنى وكان بتعرض كل اربعاء وخميس الساعة 10 ونص تابعوهو بالله وادوني رايكم
وانا بقيت الفترة دي بزيع النشرة مع زميل اسمو محمد الريح زول هيبة كده وبناسب ازاعة الاخبار والبرامج السياسية ديك المملة المامنها فايدة كلام في الهوا مابفيدنا في شي ههههه
بقيت مابلاقي إسلام في القناة في الوقت البمشي فيهو وكان هو مشغول بي اخراج مسلسل سيت كوم من انتاج القناة..
في مره قلتا ليهو ونحن بنتونس في التلفون بالليل :في شي محيرني لي وقفنا المسلسلات السودانية الزمان وبقو يركزو في السيت كوم الكوميدي اكتر شي وين ناس الدهباية ودكين وسكة الخطر واقمار الضواحي  والخ الخ؟ اين كتاب السيناريو هل انقرضو؟ وانتو يامخرجين وين اراضيكم بالجد الموضوع ده لازمو بحث
قال لي: فعلا كلامك صاح الدراما السودانية اتراجعت في حين كان ممكن تطور  اكتر من كده
قلتا ليهو وريني شنو الما اتراجع في البلد دي الرياضة مافضل غير الكورة ودي ذاتا فشلت مافي تطور في مستوى الرياضة ككل، الصحة في تدهور مستمر الفن والغنا بقو في الهابط بي استمرار
قال لي وهو بضحك شكلك حاقدة على الوضع كلو
قلتا ليهو اي لكن صوتي انا براي مابوصل ومابعمل شي
قال لي انا حاأصارحك بي خبر انا من فترة بحضر لي مسلسل ضخم وبي إنتاج ضخم عشان نحاول نرجع الدراما للسياق الصحيح، حبيت كلامك القلتيهو ده وبفكر اديك دور في المسلسل  رايك شنو تقري النص وتديني رايك؟
انا بقيت اضحك واضحك وقلتا ليهو انا امثل؟ انا كفاي امسك مايك وارغي وبس
قال لي بالعكس انا شايفك تنفعي في شخصية واحدة من الكاست اسمها سحر، بجيب ليك النص واقريهو نحن لسة بنفتش للممثلين وحايكون في ممثلين قديرين وافقو يتعاونو معانا
قلت ليهو إسلام ماتخوفني تمثيل شنو البمثلو انا
قال لي هس ولا كلمة اقري النص وبعدين قولي كلامك الاخير
قفلنا بعد وعدتو اني اقرا النص، انا بقيت مابقدر ارفض كلمة بقولا لي ابدا حتى لو حاولتا اتراجع مابقدر حبي ليهو حاكمني انفذ كل البقولو لي..
كلمتا نهال بي الحاصل وطبعا ماسكتت مني تاني مشغلاها لي وتضحك فيني، لكن تاني قالت لي ماترفضي الفكرة شوفي النص القال عليهو ده وبعديين قرري
قلتا ليها فكرك لو انا وافقتا بابا وماما برضو لي؟ ولو رضو هل عنتر حاتسكت؟ ماتنسي انها مسموعة الكلمة وبي كلمة ممكن بابا مايوافق لي
قالت لي كلو ده سابق لي اوانو انتي يمكن ماتعجبك الفكرة حقت النص من الاساس
قلتا ليها طيب بتريس وبشوف الامور حاترسا على شنو
بعد يومين اتلاقيت مع إسلام وسلمني النص بتاع المسلسل الإسم  كان (صوت من الماضي) والإسم براهو حمسني. حسيت اني حا أوافق خصوصاً انو إسلام كان بعاين لي بي إستعطاف لخبط كيان ام قلبي ذاتو..
الايام دي حبوبة عاملة استنفار في موضوع الريحة والدهب والحجج ماليه البيت وفي الاخير كلاما هي البمشي في الاخير، اخدت كل الريحة المطلوبة واتنين اتنين ذي ماحددت لكن الدهب جابت طقم محترم شديد سلسل تقيل بي حلقو وحباستين وخاتميين، ماقصرتي تب ياحبوبة، وطبعاً كلمت كل الاهل يجو يشوفو شيلت ولدا وكان اسبوع مرهق شديد مالقيت طريقة اقرا حرف من النص..
حبوبة بعد فرجت الاهل والجيران  كلفت علي ورامي يسكو موضوع التغليف ده وخلت بابا يدفع حق التغليف كلو والشنط حقات الهدوم والسباته الحانشيل فيهم الريحة والحلاوة والذي منو وحددت مع ناس العروس حاتجيب ليهم الشيلة الخميس الجاي ده يعني بعد اسبوع..
جا اليوم الموعود ومرقنا في سيرة مختصرة بس على ناس البيت وبيت عمو قاسم واتنين من جاراتنا في الفريق صاحبات حبوبة الانتيم وبت خال حبوبة وبتها فقط، قالت ماعايزه تخم ليها كوتة وتهجم الناس، عسل عسل قسمة دي والله..
وصلنا على انغام البوري والزغاريد فقط قالت مافي زول يغني ولايصفق ويفرج فينا خلق الله الفي الشوارع عشان كده من اتحركنا من البيت نحنا ساكتيين لحد مادخلنا شارع بيت ناس العروس حتى قالت ليهم اضربو البوري وقالت لينا زغردو، مهمة في تل ابيب بس ماشيلة دي..
يلا نزلنا ونزلنا الحاجات الخفيفة معانا سباته فيها الريحة والصندل وطبق فيهو المهر مزين جبنا ليها 50مليون وعلب الحلاوة وسبتين فيهم الريحة الباردة والكريمات والميك اب، اريتو عقبالي انا ونهال  ههه ودخلنا طبعا عارفيين عوايدنا نحن السودانيين استقبلونا في الشارع وفضلونا بي ترحاب شديد ولقيناهم ماخالين اهل ولا جيران مانادوهم، اول فرحة ليهم ياحليلهم..
طبعا لقيناهم ظابطين قعدة لي حبوبة ملوكيييية وقال كده حبوبة اتسنجكت ليك فيها وعاشت الدور هههه ام العريس السلطانة الام ونحنا الحاشية المعاها، كمان هم ماقصرو سوو الفوق قدرتهم عشان يحترمونا، انا كنت بقول في المواقف الذي دي الاحترام دخلو شنو في الاكل الكتير الغالي مافي داعي طال ما الود موصول لكن طبعا انتو عارفين السودانيين شنافييين ماعشونا كويس مااحترمونا ماقدرونا ما وما وما، لازم تحصل المهاترات دي طيلة فترة المراسم دي من الشيلة لحد الدخلة، اما يوم العرس ناس العريس عايزين يحتكرو الساحة نظام عرس ولدنا وناس العروس عايزين يقولو نحن السمحين الراقين ودي صرت لي دي ودي دفرتني وديل فطونا، وديك مااحترمت ام العريس والعروس رقصت بس مع اهلا وصاحباتا  والخ الخ، مابخلو البساط احمدي نهائي ههههه..
نرجع لي مرجوعنا والناس ديل لاقونا واستقبلونا احسن استقبال، ولبسو العروس وجابوها لينا وسط الزغاريد ولبسناها دهبا ودبلتا، دي اوامر حبوبة لأنو ماعملنا خطوبة عشان قالت ده كلام فاضي وبزار ساكت وتمت الليلة على خييير وانفض المجلس...
يتبع....