توأم روحك أنا

البارت الثامن

تاني يوم الصباح مامشيت القناة عديتا نوم بس نمتا لحد ماريحتا جسمي وكيفتا مزاجي شديد حتي صحيت، لقيت البيت يضرب يقلب ديل داخلين وديل طالعين مبروك مبروك مبروك، واتغير اسمي من نورهان للعروس، مبروك ياعروس ربنا يتم ليك على خير، جملة جد بتطرب الأذن، والاحلى لما اتصل علي إسلام يصبح ويتونس، قال لي غيرتا الحالة في الفيس لي خاطب، بسطني كيف، الزول ده بقى حقي يانااااس..
انا كمان جريت غيرتا الحالة من عازبة لي مخطوبة وكتبتا بوست مع الحالة وقلتا انا بيك سعادتي مؤكدة وجاتني كمية من التعليقات مبروك مبروك ياخ احساس اووفر وبقيت اضحك براي زي الهبلة، انا مامفرحني موضوع الخطوبة في نفسو انا فرحانة اني حصلتا على الانسان الحبيتو من نظرة فهمتو عليا؟  بقيت قاعدة وبدندن: ياسلام ياسلام قد ايه حلو الغرام، بالعين ولا الايدين بدينا السلام مش فاكرة يومها مين اللي ابتدا بالكلام لكن فاكرة عنيا لما جريت عليك ولقيت قلبي في ثواني مليان منك غرااااااام...
انقضى اسبوع على الخطوبة ورجعنا نباشر حياتنا وشغلنا ورجعتا اصور المشاهد الفضلت لي في المسلسل..
في المسلسل اتعرفتا على امجد ، زول ظريف بمعنى الكلمة النوع القلبو حار وهميم، دورو في المسلسل دور واحد شرير وسحر اللي هي انا كانت بتساعدو في امور الشر لحد ماقابلت البطل وقررت تساعدو بدون ماتحسس شريكا ده بي ميولا الجديد..
يلا إسلام كان بتضايق من الصداقة الجديدة دي مع امجد وكان بقول لي بطلي تنداحي مع اي زول خليك راكزة وختي لي نفسك حدود، كنت بقول ليهو ده مجرد زميل لحد مافي مرة قال لي ماتكوني فاكرة نفسك ممثلة بالجد وتعيشي لي الدور، مرات بصدمني بي كلامو ده ومابقدر افهم لي هو مستحلي يضايقني كل مرة كده
وفي مره كنت بحكي لي نهال كانت بتقول لي عايزة تلغي شخصيتك عشان ترضيهو؟ وهو ليه يدي نفسو الحق يصاحب البنات وانتي ممنوع؟ كنت بقول ليها ماتتدخلي انا كده عاجبني اهم شي انو يكون راضي ومبسوط  بقت طبعا تزعل مني وتقول لي لو كده عاجبك صحي مابتجي تشكي لي، قلتا ليها انا مابعتبرا شكية وياستي آسفين مابحكي ليك شي تاني..
في يوم ونحن بنتغدي طبعا عارفين انو السفرة دي منبر للنقاش ولي الاخبار، حبوبة اعلنت لينا انو اتحدد عرس عمو ياسر بعد شهر من تاريخ اليوم، زغردنا وباركنا ليهو وكان في هرج ومرج والغريبة حبوبة مانهرتنا زي عادتا..
في نفس اليوم ده بي المسا اهل إسلام اتصلو وعزمو ماما وحبوبة وناس البيت كلهم عشا اخر الاسبوع اي بعد 3يوم..
طبعا حبوبة حمتني امشي معاهم وقالت ماعندنا بنات بخشو بيت العريس واهلو قبل ماالمأذون يعقد، وكانت حاسمة في رايا وماما وافقتا في قرارا.. آخر الاسبوع وصل والكل اتشيكو واتهندمو تماام وفاتو ناس إسلام..
طبعا إسلام ماضرب لي ولا عبرني لحد مارجعو ناس بيتنا وبرضو لا اتصل ولا هببني حتي، لما لقيتو مااتصل اتصلتا بيهو انا والفاجأني انو مارد لي اول مرة ولا تاني مرة وتالت مرة لقيت الخط مشغول في مكالمة تانية.. طبعا ماقدرت اسكت وشكيت لي نهال زي عوايدي، سألتني لو اتشاكلنا في شي قلتا ليها ابدا ماحصل شي وده المحيرني، قالت ياخبر بفلوس، الليلة دي مانمتا للصباح متضايقة شديد.. تاني يوم كانت الجمعة طبعا وماطلعتا مكان وبس ماسكة تلفوني ومنتظرة لحد الساعة11 صباحاً غلبني ورجعتا اتصلت تاني عليهو ومارد ، لما جات الساعة2 ضهر اتصل علي ورديت ليهو بي لهفة وشوق وعتاب، اتكلم معاي بي برود شديد وقال لي انو حركتي ماكانت حلوة واني احرجتو قدام اهلو، هجمني طبعا وقلتا ليهو حركة شنو دي الاحرجتك بيها ،قال لي ماجيتي رغم انهم عزموك وقدروك لكن اهنتيهم وقللتي من احترامهم، خليك فاهمة حاجة يانورهان الحركات دي مابتناسبني انو تصدر من الحاتكون مرتي في المستقبل والحركات  والمشاكل دي ماعايزك تتخزيها في اي وقت من الاوقات، صدمني طبعا وقعدتا ابكي وقلتا ليهو الله يسامحك وانا ماعملت شي عشان تسمعني المحاضرة دي ولو انا اهنت اهلك بعتزر ليهم، وقفلتا الخط وبقيت ابكي ابكي بكى شديد، نهال جاتني لقت علي حالة وطبعا حكيت ليها وقامت زفتني زفة معتبرة قالت لي انتي عويرة؟ الحصل ده بحصل عند اسر كتير المسألة مسألة مبدأ ولو انتي شككتي في قرارات اهلك عشان خاطر واحد غبي زي ده تبقي مااتربيتي صاح، شاكلتها قلتا ليها ماتقولي غبي قالت لي غبي وبليد ومتخلف كمان ولا على كيفك..
قالت كلاما وفاتت مني وقلتا ليها ماتوري ماما بي كلمة فاهمة؟ لوت لي خشما وفاتت مني..
انا شلتا تلفوني واتصلتا علي اختو الكبيرة واتونستا معاها واعتزرتا اني ماجيت مع اهلي وشرحتا ليها راي حبوبة وقالت لي خير ياستي ماف مشكلة وحبوبتك علي العين والراس..
قفلتا منها وقمت اتنفضتا ومشيت استحميت وروقتا نفسي شوية ونزلتا تحت..
إسلام مارجع لي في التلفون ولا انا اتصلتا تاني ..
تاني يوم مشيت  القناة  وطبعا اتلاقينا وهو ماحب يعمل لغط قدام الناس جا سلم علي وهو مبتسم وكأنو ماحاصل شي قمتا ابتسمتا ليهو بي المقابل، لحد ماساقني على جمبة وتاني نهزرني واخر شي قال لي انا سامحتك وعلوية قالت لي عادي بكونو اهلك حموك وانا خلاص مازعلان منك، بالله قلتا شنو؟ علوية؟ يعني انت اتكرمتا علي بس عشان كلام علوية؟ وماكلفتا خاطرك تسمع مني انا على الاقل؟ كتر خيرك يا إسلام ماقصرتا معاي
تخيلو انو اتجاهل كلامي ده ولا كأني قلتو ورجع قال لي: العايزو منك انك تكون عندك شخصية ماتمشي ورا كلام اهلك وتسمعي التحارييش من حسي عايزة تخربي البيناتنا؟ ثم تانيا معقول تتصلي بي اختي وتلوميها انهم فقدوك؟ معقول يانورهان تتصرفي بي عدم وعي بي الطريقة دي؟ عايزك تفهمي حاجة واحده اخواتي وامي لازم تحترميهم عشان يحبوك واياااك تتصرفي بي قلة عقل مرة تانية وتزعليني منك..
انتو سمعتو الانا سمعتو؟ حتى اختو كذبت فيني؟ دي وقعت شنو ياجماعة دي..
المهم قفلنا السيرة لأنو يبدو مافي فايدة ومابصدقني مهما قلتا عشان كده اعتزرتا ليهو عشان مابحب يكون زعلان مني وحبي ليهو بضعف موقفي وبخليني استكين والم زعلي في اعمق اعماقي، وسكتنا على كده..
في يوم مشيت معاهو كانو اصحابو عازمننا واتفاجأ انو علوية معانا برضو وطبعاً ماسكة الونسة هي وقاعدة جمبو التقول هي الخطيبتو ماأنا وكل ماواحد فيهم يتونس معاي يقوم إسلام يحدر لي اقوم اسكت بقيت ماعارفة انا جيت لييه أساساً ..
مرت الايام وخلاص انتهينا من تصوير كل المشاهد وعملو احتفال كبير واتفاجأ انو إسلام ماكلمني ولا ساقني الحفلة واعتزر ليهم عني وانا ماجايبة خبر  انصدمتا من تصرفاتو المتكررة، نهال كتير بتقول لي انتي الاديتيهو فيك الفرص عشان يهينك ويقلل من قيمتك، قلتا ليها انا بحبو شديد ومصيرو يفهم الحتة دي وثم تانياً انا متأكده انو علوية الفقرية هي البتحرشو، قالت لي وعايزة بي واحد بتحرش من واحدة تانية شنو دي مابعيد لو عرستو تمشي معاكم شهر العسل ويتفسحو هي وياهو وانتي يسيبوك في الاوضة محبوسة عشان ماتسببي لي سي السيد احراج، طوالي انزعجتا وبقيت اكورك فيها انتي مالك دايما سلبية معاي وانتي لييه عايزاني في اي موقف اسيبو المفروض تكوني جمبي مش ضدي وانتي وانتي والخ الخ، هي زاتا شاكلتني وقالت لي جد انتي حيوانه وعميانة وتستاهلي كل البحصل معاك ده ، وقامت مشت خلتني ومن اليوم ده بقينا مابنتكلم مع بعض وقدر ما ماما سألتنا قلنا مافي شي..
مرت الايام وعلاقتي بي إسلام كان طبيعية الى حد ما ورجع يحبني ويدلعني شوية شوية زي أول لكن لسة انا ونهال متحاربين والموضوع ده مألمني شديد لكن ابيت اعتزر منها وفضلتا على موقفي..
وأخيرا ً جات ايام العرس السعيد عرس عمو ياسر وبدت التحضيرات والبيت اتملا ناس، كلمتا حبوبة انو تتصل تعزم اهل إسلام بي نفسا ورحبت بي الفكرة واتصلت بي امو وعزمتهم كلهم..
يوم الحنة جا وكان يوم مزحوووم شديد، مايفوتكم طبعا إسلام اجبرني اعزم علوية وهددني انو مابجي لو ماعزمتها، عزمتها طبعا بدون نفس وجات مع اهل إسلام طبعا مجنصصة وقاشرة ..
بدت الحفلة وهاتك يارقيص وحبوبة هايشة ومبسوطة وراقصة معانا ، انا مشيت عزمتا اخوات إسلام للرقيص لكن ابو يقومو معاي قمتا شختا ليهم ومشيت اهجج مع اهلي، طبعا انا ونهال كأنو مازعلانين مع بعض بقينا نرقص الاتنين ونحتو سوا ماقلتا ليكم ماعندنا غير بعض وصراحة الحفلة راابة ماقدرنا نقاوم والمضحك انو علي في نصنا انا وهي ورامي جانا جاري انحشر برضو، جد الاعراس دي بتنشر الفرح في الجو وتلقو الناس بتضحك بدون سبب يزكر.. لكن في ناس لازم يقتلو الفرحة الا وهم اهل إسلام بلس علوية طبعاً..
ابو يتمو الحفلة طبعاً وإعتزرو مننا ومشو كلهم بي علويتهم، طبعاً إسلام قال بوصلهم وبرجع لكن مارجع الظاهر حشوهو فل مابعرف لكن قالو ليهو شنو..
طبعاً عمو ياسر عزم صاحبو الجديد دكتور قصي بي اسرتو طبعا ،جا ومعاهو امو واختو ، ودي بي الذات طلعت سبحان الله بيرفكت ماتش من نهال نفس الشخصية والشي ده عرفتو فيما بعد لأنو اتقابلنا كم مرة تاني.. اسمها زلفى ،اسمها ده كسرني شديد والله.. المهم جو هي وامها خالتو يسرية مع دكتور قصي وعرفهم بي حبوبة وبقية الاسرة الكريمة، وكانو مبهورين ومحتارين من الشافوهو بسبب انو في 3ضرات بي عيالهم عايشين تحت سقف واحد مع نسيبتهم كمان، ونحن ماشاءالله نعجبكم سيرك متحرك قمة الضحك والهبل وشغل بهلوانات ناقصنا كم حيوان كده في العرض ونبقي سيرك الحاج هاشم للعروض الباهرة
العريس وصل تاتاتاتاااااااا ، عسسسسسسسل ماشاءالله عمو ياناس العين الحاسدة ماتعاين ليهو الصلاة على النبي جرينا جبنا المباخر وبقينا نبخر ونزغرد وكانت الدخلة عجيييبة وفتحو اغاني الحماس ونحن نزغرد ونزغرد، قسماً بالله كانت بهجة كدة غريبة شفتو نوع الفرحة البتخوف ديك جبنا العريس في نصنا وهاتك يالهجيج واول ماحبوبة جات علينا بقينا نصرخ ونزغرد وحالة كده من اللاوعي الجنوني، طبعاً كلكم جربتو الاحساس ده في اعراس البيت لكن ماجربتو احساس اسرة الحاجة قسمة ونسوان وليداتا، انا مااتزكرتا إسلام تاني رغم انو ماجا راجع، حسيت اني بنتمي في اللحظة دي لي اهلي ومنحتهم كل احاسيسي ونسيت اي شي تاني..
إنتهت الحفلة وجابو الصينية حقت الحنة وقعدو الشباب يتحننو مع العريس، كان المنظر مضحك خصوصا انو بابا وكمان عمو قاسم اتحننو برضو، خالتو مها رجفت عديل قالت الراجل ده ناوي يجيب عليها التانية، اما ماما وخالاتي العزيزات مااهتمو لي حنة بابا وكل واحدة قالت حلم الجعان عيش وبي البخيت عليهو لو جاب الرابعة وايش ياخد الريح من البلاط، والله متخوفاااات لكن بكابرن ساي..
الكمل الليلة كان حدث سعيييييد شديد، خالو فارس جاااا،، انا ونهال بدينا نصرخ زي الشفع وجرينا حضناهو وماما معانا وبقينا نبكي مامصدقين، اتضح انو متفق مع عمو ياسر على الجية وعاملنها مفاجأة للكل، جد كانت ليلة مرهقة للاعصاب واتاري الفرح كمان متعب..
انتهت اللمة ورقدنا زي الجنايز منتهييين لابنجر يد ولارجلين وطبعاً البيت كان ملان وفي بنات من اهلنا جو نامو عندنا فوق وخففو علينا حرج انو لسة متحاربين انا ونهال ومابنتكلم مع بعض حتى بعد رقصنا سوا وهججنا لكن راحن السكرات وجن الفكرات..
طبعاً إسلام مااتصل بي تاني وانا نمتا على كده التعب مااداني فرصة احزن أساساً ..
تاني يوم قمنا من بدري استعدينا وجهزنا لي استقبال النسوان الجايبات فطور العريس وفعلاً وصلو واستقبلناهم احسن استقبال والكل كانو مبسوطين وحبوبة ادت النسوان الهدايا وكانت مشرياهم لي عمو قاسم، غايتو حكاااامة وماعلى كيف زوووول خخخخخخخ...
نسابتي الكرام ماجو الفطور مع انو كلمناهم وكسفوني قدام حبوبة وماما وخالاتي العزيزات، لأنو خالتو يسرية وزلفى جو من بدري مع انو عزمناهم امس بالليل لكن عدو الحالة واحدة وجو،، طبعا سمعتا من ماما كلام كتير وكانت زعلانة لكن هونتا ليها الامور واخر شي سكتت مني..
بي النهار جابو فنانة ظبطت لينا حفلة زي الحفلة من بعد الفطور لحد المغرب ووقفت فاصل ساعة الغدا بس.. نسابتي اخيرا جو يتكركرو مشكورين ومعاهم علولو الفقرية عاملة فيها بت الاسرة وصديقة الكل.. اهلي عاملوهم كويس واحترمنهام وماقصرنا فيهم، الشي المافهمتو لي يوم الليلة هم الزعلهم شنو شان يسيبو الحفلة امس في بدايتا ويمشو وحتى إسلام ماجاب لي سيرة المرة دي وما سألتو أنا ..
المرة دي اتظارفو ورقصو في الفنانة وختو ليها نقطة كمان.. أما زلفى المجنونة امشي ختي للفنانة نقطة مابعرف كم وقالت ليها قولي دكتور قصي،، البت لي نهاية الحفلة ماسكتت تاني من قصي قصي قصي، عرفتو المبلغ كان كبير.. انا مانسيت حبيبي واديتا وقلتا ليها قولي إسلام ..
ساعة العقد مرقو النسوان والرجال الكبار وفاتو في العربات وتييت تيييت تيييت كانت بهجة مابعدها بهجة ونحن تمينا حفلتنا ولما اذن المغرب انفض المولد ده وجرينا صلينا المغرب وطيران على اللبس والتجهيز..
في الدخلة بالليل كذلك استمرت الافراح والهجيج وزولي جاني قاشر ويضحك للضرس الورا ووشو منور، انا فرحتا فرح ماكنت فاهمة سر فرحتو ماليها علاقة بي ..
بقا يرقص معاي طول الحفلة هو وقشرية الفقرية، جات نهال ومعاها زلفى ودكتور قصي شخصيا، بقو يرقصو معانا واخر شي إسلام ساق علوية ورجعو قعدو وانا كنت مراقباهم وكان بحكي ليها في شي وفرحااان شديد، قلبي اكلني عديل وبقيت بتململ والرقيص غلبني اخر شي، وحسيت نفسي وحيدة من غير نهال الاستبدلتني بي زلفى وماعرفتا افضفض لي منو.. طبعاً في عز مشاعري الملخبطة لاحظتا انو دكتور قصي مركز معاي شديد لدرجة جا سألني اذا انا كويسة، اختصرتو طوالي عشان ماافتح لي باب ونسة انا ماراغبة فيها حالياً، رجعتا افتش لي إسلام بي عيوني مالقيتو تخيلو انو اختفى هو وعلوية فجأة، بقيت زي المجنونة بفتش عليهم اخر شي شايفاهم من بعيد جايين داخلين من برا ورجعو قعدو في محلهم..
تاني قلتا لي نفسي اني اووفر ومافي شي يخليني اتصرف كده ورجعتا ارقص مع علي اخوي وخالو فارس وعمو ياسر..
تاني مشيت قعدتا جمب إسلام وعلولو ومن جيت سكتو من الكانو بتكلمو فيهو، ماعارفة كل مااحاول اتغاضى عن افكاري لازم يحسسوني انو في شي وقد كان وشكوكي فيما بعد اتحققت..
انتهى العرس وعملو الجرتق وانفض المولد على خيير الحمدلله وسفرنا العرسان خلاص ويلا بلا لمه العرس تمه..
يتبع....#