توأم روحك أنا

البارت السابع

انتهت مراسم الشيلة بحمدالله وفضله ومرقنا منهم والزغاريد مالية الفريق..
رجعنا هلكانيين وجري كل زول مشا غير واستراح وانا كنت نعسانة ماواصلتا معاهم شمارات مابعد الحدث ومشيت نمتا خليتهم تحت ناصبين المجلس..
بعد رقدتا كده إسلام إتصل لكن ماقدرت ارد عليهو نمتا طوالي بعد صمتا التلفون وانا في قمة اسفي اني همشتا حبيب روحي..
بعد كم يوم كده إسلام قال لي فاتحي اهلك في موضوع التمثيل ووريني بحصل شنو قلتا ليهو طيب بدون نقاش..
بعد رجعتا البيت قعدتا بابا وماما وكلمتهم ماما رفعت لي حاجبا ولوت خشما وقالت تمثيل كمان يانورهان؟ انتي ماناوية تركزي ليك في مكان؟
بابا قال لي: انتي ماعندك خبرة والموضوع كبير حاتظهري زي العويرة وسط الناس ديل
قلتا ليهم فرصة وجاتني وانا حابه اغتنما والمخرج طمني انو الموضوع ماخطير وحايساعدوني
ماما قالت لي : انتي مظبطة امورك وحتى المخرج كمان لاقيتيهو وجايانا تحصيل حاصل بس؟
غايتو ماما دي، قلتا ليها المخرج أساساً معانا في القناة وبلاقيهو بصفة دايمة وهو طرح علي الموضوع
سكتو تاني ماقالو شي بس قالو لي على كيفك، ووقت الغدا لمن قعدنا كلنا بابا بي طريقة ضاحك بيها عليا كلم الباقيين اني حاأمثل، استلموني كلهم وضحكو عليا وحبوبة قالت كلمة واحدة بس قادر الله..
يلا انا غيظ منهم بس قررتا امثل في المسلسل ده بأي شكل، وكلمتا بعدين إسلام إني مشاركة معاهم إن شاء الله وانبسط شديد وده الاهم..
بعد الكلام ده بي أسبوع إسلام ساقني وعرفني على الكاست، المنتجين ولاقيت كمان الممثلين الرئيسيين واتفاجأ انو شخصيتي رئيسية برضو اريتا وقعت السواااد وإسلام قال لي أنا مراهن بيك وختاني في حتة ضيقة يعني لازم ابذل اقصى جهودي المتواضعة عشان اطول رقبتو قدام الكاست كلو ..
قبل مانبدا المشروع ده إسلام كلم اهلو انو عايز يتقدم لي ووافقو وجا كلمني، قال لي كلمي ابوكي اننا انا وابوي حانزوركم في البيت واخدي لي منو معاد،، اخخخخ انني مبسووووطة شديد ياخ طبعا اول زول بلغتو بي الخبر كانت نهال وفرحت لي فرحي..
بي كل الخجل الفي العالم تاني قعدتا بابا وماما وكلمتهم بي الحاصل، ماما ساكتة وده خلاني اخاف شديد اما بابا قال الفيها الخير ربنا يسويها، بعد بابا نزل ماما استلمتني تاني وقالت لي: اول شي الاصول تجي تكلميني انا وانا اوصل الكلام لي ابوك جيل اخر زمن صحي، تانيا ده ياهو الخلاك تقولي عايزة امثل؟
قلت ليها بي ادب شديد اي ياهو
قالت لي : طييب خير ياستي يشرف وبعدها نشوف ونحكم، بعدها سكتت وقامت نزلت تحت
انا بقيت ماعلى بعضي من اليوم داك متوترة وخايفة..
بابا طبعاً كلم حبوبة وقالت ليهو خير يجو يوم الخميس الجاي فينا ده، نفسي اكون زي حبوبة والله، مرا حازمة كده  وذات شخصية..
كلمتا اسلام طبعا وقال اوكي..
تاني يوم لمن مشيت القناة اول زول قابلتو في وشي كان علوية، قفلت لي اليوم من اولو، ساقتني على جمبة وبرااحة كده قالت لي مبروك ربنا يتمو على خير، طبعا خلعتني كيف، وهي لمن شافتني إتفاجأتا قالت لي إسلام كلمني بي الخبر انتي نسيتي انو صحبي الانتيم؟
اتمنيت اقع فيها ضرب وشتايم لكن سكتا وابتسمتا ليها وقلت الله يبارك فيك ياعسل
ملحوظة:: ايااااك تقولي لي وحدة غايرة منك وحاسداك في ظرف ذي ده عقبالك، بتنسفك والله لأنو بي الكلمة دي زي الكبيتي البنزين في النار بفرقع فيك طوالي هههه
انا اختصرتها بي كل طيبة واتظارفتا ومشيت
بعد تلاتة يوم جا الخميس وحبيب روحي وابوهو جونا بي المسا، والحمدلله بابا وعمو ياسر وجا عمو قاسم قامو بي الواجب معاهم وحبوهم واندمجو مع بعض كتير وطبعا علي كان في ورامي، اهلي عزوتي الله يخليهم لي..
علي طبعا اتزكر انو شافو اول يوم مشيت فيهو القناة ووقفنا اتكلمنا برا في المدخل،
الرجال عينهم زي صحن الدش تلقط ورا وقدام وطبعا علوش شغلا لي اي طبقتي الراجل من اول يوم والخ الخ ههههه حبيبي علوش والله..
إسلام السبت طوالي جاب امو واخواتو اتنين والاتنين اكبر منو يعني اكبر مني..
برضو رحبو بيهم حبوبة وحاشيتا من مرتات اولادا نهال جات ادتني الزيت، امو مرا مقندفة ومتعوجبة شديد اسمها ثريا، اختو الكبيرة اسمها اميرة متزوجة وشكلها النوع المغرور تشيل وتعاين ليهم بعيون فاحصة، والبعدا اسمها امل غير معروف وضعها الاجتماعي متزوجة انسة مخطوبة او مطلقة شنو ما معروف
طبعا بعد ضيفوهم حتي جاتني ماما وقالت لي تعالي سلمي، طبعا اتزكرتا التعارف بتم كيف يوم مشينا مع عمو ياسر واتزكرتا كيف اتصرفت مهرة وعملتا زيها تمام
طبعاً اكيد عرفتو انهم حايتفاجأو لما يشوفو نفس الشخص مرتين بقو يعاينو فيني ويعاينو في نهال واكيد قالو طيب داسينها ليه مانحنا خلاص شفناها طيب
مرت الليلة على خير وكان في حبت ظرافة متبادلة من الطرفين وااا فركييييش كلو على بيتو ..
بالليل انا وإسلام طاقين الحنك في التلفون وكان سعيد ومبسوط وقال اهلو عجبناهم والامور تمام بعد داك فتح لي موضوع المسلسل وبقينا نتناقش سوا....
لما مشيت القناة تاني يوم تاني جاتني علوية تتظارف وشغالة امح امح امح تبوس فيني كرهتني البوس زاتو وبي الخباثة كده كلمت الناس كلهم في القناة بي الخطوبة دي ، انا قلت ليكم خباثة لييه؟ عشان عكست الموضوع وقالت لي إسلام نورهان بي الفرحة كلمت الناس كلهم بي الخبر وطبعاً انزعج شديد وجا لامني وقال لي ماكان تتكلمي لسه الوقت بدري عشان نصارح الناس بي علاقتنا وخطوبتنا وانا محتارة وفاتحة خشمي، انا متين كلمت زول قلتا ليهو انا ماكلمتا زول وحتى علوية جات باركت لي مابعرف عرفت كيف قال لي بي نرفزة علوية انا كلمتها لأنها ماغريبة لكن توصل انك تنشري الخبر من غير ماترجعي لي ده زعلني منك، شفتو البت وشفتنتا؟ جد انصدمتا ولساني اتعقد..
في الاخير مر الموقف بسلام وقفلنا السيرة، وانا ماراح مني الزعل من تصرف قشرية الله يقطع شعيراتا ديل المعولقة الكلبة، زعلتا لكن ماأوليت الموقف اهتمام ولحظتا مافكرتا لي نواياها الشريرة والفي راسا شنو..
بعد خلصتا يومي رجعتا البيت وعرفتا إنو عندنا ضيف وطلع دكتور قصي جا يزور بابا ويطمن عليهو اصلو بقا صديق العيلة وخصوصا عمو ياسر ، المهم كنتا ماشه اطلع فوق لما صادفني عمو ياسر  داخل على الصالون وقال لي تعالي يانور سلمي على دكتور قصي ، مشيت وانا ماطايقة اخش ليهم صراحة ودخلت لقيتو قاعد ومتشييييك تمام والنضارات فريما جميل عجبني وهو من شافني وقف طوالي وسلم علي سلام راقي وانا سلمت سلام بارد وزحيت يدي بسرعة قالي كيفك يااستاذه نورهان  مبروك على البرنامج الجديد عامل ضجة ماشاءالله
تاني اندهشتا انو عرفني لكن قلت في بالي بكون لاقى نهال اول عشان كده، قلت ليهو الله يبارك فيك..
سلمتا على بابا بعد داك وانا واقفة على مشية لكن بابا اصر انو اقعد معاهم وجات حبوبة تمت الناقصة وقعدت وبقى ماعندي عزر ارفض، بقينا نتونس ونسه عامة وتاني فتحنا سيرة برنامجي وبقينا نتناقش، صراحة قصي او الدكتور قصي شخص حديثو ممتع وانسان حبوب بس انا كنتا مابطيقو ليه ماعارفة لكن اهلي كلهم مفتونين بيهو شديد..
بعد مسافة قمت استأذنتا إني طالعة فوق واعتذرتا منو وقمتا مرقتا ، وانا في الحوش جو داخلين ماما ونهال قالو كانو في السوق من ساعتين، رجعتا احترتا تاني كيف قصي عرفني وبقيت ببرر لي نفسي بي كم فهم وتاني سبتا الموضوع ومشيت طلعتا فوق وماما ونهال دخلو يسلمو على دكتور قصي..
طلعتا فوق غيرتا واستحميت ورقدتا في السرير ونمتا من اول دقيقتين ماصحاني الا صوت التلفون عاينتا لقيتا الساعة بقت 11ونص قمتا مفزوعة عاينت لقيت المتصل إسلام رديت ليهو قال لي نايمة ولاشنو كنتي اتصلتا مرتين مارديتي،. قلتا ليهو اي والله حتى العشا ماصليت، قال لي اشتقتا ليك شديد وعايز اتونس معاك شوية
ابتسمتا مع نفسي وقلتا ليهو قبيل ماكنتا معاك مااتونست معاي بالعكس شاكلتني زي الطفلة الصغيرة
قال لي ماكان قصدي بس تصرفك ازعجني،
لسه مصر انو انا الكلمتا الناس تخيلو؟
قال لي انسي الموضوع ده خلاص وخلينا في المهم
قلتا ليهو خير
قال لي قلتا ليك مشتاق ليييييك
قلتا ليهو قدر شنو
قال لي سييييل سيل جارف بشيل كل القدامو،
بقيت اضحك وخجلانة هو قال لي احلى ضحكة ياناس معقول البت دي حاتبقى خطيبتي ومرتي؟ الله الله
قلتا ليهو إسلام خلااااص ماتخجلني ياخ
قال لي تخجلي مني انا معقول؟ لو بتحبيني مابتخجلي مني
قلتا ليهو بسرعة طبعا بحبك! تخيلو بس قاعدة على ناار وانفجرتا فيهو طوالي  غايتو خفة شديدة عارفة مافي تقل البنات البحبوهو الشباب
إسلام بقى يضحك يضحك قال لي عسلي ياناس اتاريك مغرمة بي وانا ماعارف، ورجع يضحك تاني غايتو أحرجني إحراج غلطانة انا البعبر ليك عن شعوري..
قال لي التصوير حايبدا بعد اسبوع استعدي ياسحر
بقيت اضحك قلتا ليهو نسيت اسمي ولا شنو قال لي لحد مايخلص تصوير المسلسل انسي انو اسمك نورهان من الليلة انتي سحر سحر وبس لازم تعيشي جو الشخصية عشان تتقني دورك كويس، قلتا ليهو امرك مطاع قال لي احب المطيع انا وبقينا نضحك..
يلا سمعتا كلامو وبقيت اتقمص في الشخصية وبقيت اتمرن قدام المراية كمان، وقلتا لي ناس البيت انا اسمي سحر من الليلة، طبعا بقو كل مرة يهزلو بي الملاعيين ..
يوم كده جاني اتصال من رقم غريب رديت اتكلمت معاي واحدة اكتشفتا انها علولو علوية قالت لي كيفك حبيبتي مشتاقيين شلتا رقمك من إسلام لأنو المفروض بقيتي خطيبت اخوي يعني اختي ولازم نتواصل ، ماريحني كلاما ماعارفة كل مااسمعا بحس انو كلاما مبطن وعندها قصد تاني من اي كلام بتقولو مع انها مامبينة نيتا شنو لكن انا لله في لله مابرتاح ليها.. قلتا خير مابتقصري والله ست الزوق ، وبقت ترغي معاي وحكت لي عن إسلام بحب شنو وبكره شنو نظام هي بتعرف ادق تفاصيل حياتو  المهم انا ماشة معاها على هواها عشان اجيب آخرها..
حكيت لي نهال عنها قالت لي ماارتحتا ليها ماشكلها شكل صاحبات الله يستر ماتكون خاته عينا في إسلام هي كمان ، خلي ليها بالك شديد، وقعدت تضحك وقالت لي قدر الإسلام يايمة ،ضربتها قلتا ليها قولي غايرة بس، وقعدنا نتلاوى زي عوايدنا ونتخابط بي المخدات...
انتهى الاسبوع وبدينا تصوير المسلسل وكان الموضوع ماساهل نهائي بي الاضافة لي شغلي في القناة كانو لي الاتنين موت احمر، ياربي الموت عندو الوان؟  نفسي اعرف موت احمر دي شنو هههه ماعلينا..
في الفترة دي انا وحبيبي بقينا مابنتفارق اغلب وقتنا مع بعض وعشان التصوير حاياخد وقت طويل قررنا نعلن خطوبتنا رسمي ونلبس دبل وسط الاهل والاحباب والاصحاب وقررنا نعمل حفلة بسيطة ندعي فيها المقربين..
وفعلا بعد موافقة الاهل من الطرفين حددنا الحفلة تكون خلال اسبوع والامور سبحان الله مشت بسهولة وحجزنا صالة مناسبة وفنان على قدرنا ومشينا عزلنا الدبل سوا والفترة دي كانت اسعد ايام حياتي ماكنت مصدقة نفسي وطاااايرة في الهوا فووق بين الغيوم دي قراية الروايات بتكبر الخيال عارفة..
جا يوم الحفلة وطبعا ناس ماما وضراتا ونهال واخواتي ماقصرو معاي وقفو وقفة عجييبة حبايبي الله يخليهم لي وجا اليوم الموعود تاتاتاتااااا.......
لبستا فستان كوبي غامق واكسسوار كريستالي ورفعو لي شعري فوق مع تاج صغنون كده وعشتا الدوور، السندريلا نورهان ،اما عسلي كان لابس قميص كوبي وبنطلون رمادي غامق وشاكي القميص اتفقنا نلبس سوا وطلع ماشاءالله عيني بارده عليهو.. طلعت الحفلة روووعة وجبنا فنان صاعد وربا لينا الحفلة ربة جد وإسلام رقص معاي رقيص جد وكنا في قمة سعادتنا وطبعا اهلو كانو محاوطننا عايزين يبدو شغل النسابة من حسي..
ياحليلو حبيبي كان فرحان بي وانا كنت فرحانة بيهو شديد وكنا احلى اتنين بالجد💞 في الفاصل كنت واقفة وجمبي نهال ومعاها بت جيرانا بتونسو وانا كنت بفتش لي إسلام بي عيوني فات وين لقيتو مع ناس امو في التربيزة حقتهم وقاعدة جمبو علوية والضحك مجلجل في المكان، ياخ مالا معاي البت دي.. فجأة حسيت في بتين بي وراي بتونسو بس لقطتا كلامهم، كانت واحدة بتقول العروس حلاااتا احلى من مابتظهر في التلفزيون، التانية قالت ليها مسكينة ياخ من حسي حننتني، الأولي قالت فعلا والله لو كانت عارفة انو العرس ده ماتامي كان راحت فيها، التانية قالت ليها خسارة الحفلة والعشا والجو الظريف، الاولى قالت يازولة يكون الله بريدا لو العرس طرشق..  انا بعد السمعتو ده خلاص اضاني صنت وماسمعتا حرف زيادة ، كيف يعني العرس ماتامي وده كلام شنو وديل منو اصلا، قمت اتلفتا وراي لقيت شلة بتاعت بنات فما عرفتا منو فيهم الكانن بتكلمن فيني.. تاني قلتا اه اصلا بكونو البنات كلهم غايرات مني لأنو إسلام اختارني انا من دونهم كلهم، ونسيت الكلام كلو وماختيتو في بالي والحفلة اصلا كانت دورت تاني ومشيت ارقص مع نهال واخواني وناس بيتنا..
مشت الأمور كلها تمام والناس انبسطو وانتهت الحفلة أخيراً وقعدونا عشان يلبسونا الدبل وجوهو اخواتو وقفن في التلبيس ومعاهم نهال اختي، إسلام مسك يدي عشان يلبسني الدبلة وصراحة انا ماكنتا متوترة ولا شي كنت مبسووطة للضرس الورا وبعد لبسني طبقتا يدو لمن هجمتو ههههه ولبستو دبلتو وكده بقى خطيبي رسمياً...
يتبع......