توأم روحك أنا

البارت الخامس عشر

.......
ضحكتا مساافة وهو بعاين لي مهجوم اظنو افتكرني فكت مني خلاص، بعد قدرتا اتمالك أعصابي قلتا ليهو قصي عايز مني شنو انت طيب، قال لي عايز اتزوجك بس والله، قلتا ليهو طيب انا موافقة عليك والله انت لقطة مافي زيك الزمن ده ورجعتا اضحك تاني وبقش في دموعي من كترت مااتأثرتا وضحكتا، قصي سكت مانطق بي حرف تاني، اظنو اتهجم اكتر ومااتوقعني اتصرف كده او اقول كده .. رجعتا احاول افتح الباب وانا بقول ليهو ممكن تفتح الباب ده؟ واتضح لي انو عاصي بس مامقفول وإنو قصي غشاني وهو ما امن الباب من الاساس.. عاينتا ليهو مسافة وابتسمتا وماوقفتا تاني تووووش مرقتا مشيت ونهال كانت قاعدة برا شافتني مرقتا وقفت لكن انا ماعبرتها طوالي طلعتا من باب الخروج وهي بتنادي فيني استني يابت اقيفي، في الشارع وقفتا اشوف لي شي اركبو وهي جات جارية وقالت لي سغيلة دي بتكلم معاك ماتردي ياخ، صريت ليها وشي وقلتا ليها بقو قصي وزلفى اهم ليك مني؟ ، قالت لي انتي عبيطة؟ كيف يعني اهم، قلتا ليها تغشيني يانهال عشان خاطر قصي؟ تتفقي معاهو عليا انا اختك التوم؟ جد ماحريتا منك، قالت لي اي  بغشك عشان مصلحتك لأني جد عايزة ليك قصي لأنو راجل في اقوالو وافعالو وانسان شاريك انسان يعتمد عليهو انسان ببقى ليك سند في الأزمات وببقى ليك رفيق في اللحظات الحلوة، قاطعتها وقلتا ليها اطمني انا قلتا ليهو موافقة ارتحتي؟ عاينت لي مامصدقة وقالت مابصدق انتي قلتي ليهو كده، انتي؟
وقفتا تكسي وركبتا وهي ركبت وراي ومشينا البيت، الطريق كلو تتكلم وتشكر في قصي وانا ساكتة، انا مرتبكة حالياً لأني قررتا قرار مصيري في لحظة جنون، صعب اتراجع واقول ماعايزاك ياقصي لأنو راجي موافقتي بي إصرار، رجعنا البيت ومشيت الاوضة قلعتا هدومي ورقدتا واتغطيت كلي لي وشي حاولتا انوم حاولتا اهرب من نفسي، قصي اتصل بي وشفتا اني لو مارديت بكون بلعب بي اعصابو، استسلمتا ورديت عليهو
قصي: نورهان
انا: أهلا
قصي: في اخر كلام قلتيهو لي، جد انتي موافقة تعرسيني موافقة انو اجي اتقدم ليك رسمي؟
انا: ايوة موافقة
قصي: من صميم قلبك؟ ولا عشان انا ضغطا عليك، نورهان انا عايزك ايوة لكن ماعايز افرض نفسي عليك، ماعايزك تحسي بعدين انك تعيسة عشان وافقتي في لحظة مامنطقية
انا: مالك بقيت متخوف افتكرتك حاتفرح
قصي: انا طاير من الفرح لكن كمان ماعايز ابقى اناني واسعد نفسي على حسابك، ماعايزك تكوني بتتهوري وتجي تندمي وقت اللحظة الحاسمة
انا: قصي قد اكون مابحبك بنفس مقدار حبك لي ورغبتك فيني، لكن انت غالي علي وبقيت جزو من حياتي مهم جداً، ومااظن اني حااكون تعيسة لو عرستك، انا مابحبك ياقصي لكن مابكرهك هل حاتتحمل انت النقطة دي؟ ولا حاتبقى ليك هاجس وتنغص حياتنا
قصي: بتحمل لو وعدتيني انو ترمي الماضي ورا ضهرك وتعايني للمستقبل بتحمل لو بقيتي نفس نورهان الفرفوشة البتحب الكورة الاسرت قلبي اول مرة شفتها، وانا بالمقابل بوعدك انو اكون ليك زي ماتحبي اني اكون صديق حبيب اي شي تحبيهو
انا: خلاص اذن متفقين وانا برجع اقول ليك انا موافقة من قلبي
قفلنا بعد اتفقنا تمام، قمتا اتوضيت وجيت صليت ركعتين  وبقيت ببكي  من جديد، خلاص انا حااكون لي واحد تاني غير إسلام، بقيت ادعي ياربي شيلو من قلبي وازرع قصي محلو  ياربي انا عايزه اكون لي قصي خالصة مخلصة ماعايزة افكر في غيرو انا عايزة انسى اي شي خلافو، يارب لو فيهو خير لي قربو اكتر واكتر انا رميت تكالي عليك يارب اتوكلتا عليك وانت نعم الوكيل..
قصي طبعاً مستعجل، طوالي كلم امو انو عايز يخطبني رسمي من اهلي وامو وافقت وقالت ليهو كلم خالك رضوان يمشي معاك، طبعا قصي ابوهو متوفي ليهو15 سنة وخالو كان ليهم اكتر من اب..
اتصل برضو بي عمو ياسر وقال ليهو يفاتح بابا بي الموضوع وبابا اصلا بحب قصي فما صدق وابتسم للضرس الاخير وقال حبابو ألف..
الموضوع بقا جد خلاص ومافي طريق للرجعة وانا الخوف متملكني، سألتا نفسي كتير لي انا ماراغبة في قصي مع انو انسان مافي منو، انسان خايف الله وبعد كلو كلمتين بجيب سيرتو، لييه انا ماعايزاهو، ليه بحب العزاب لي نفسي، قررتا امنحو فرصة واكون عادلة اكتر..
اخر الاسبوع جونا هو وامو وزلفى وخالو، طبعا اهلي رحبو بي الفكرة وبابا وعدو يرد ليهو قريب، بابا كان مواااافق بس حب يتعزز شوية ويغلي بتو  ههههه
انا طلعتا سلمتا بس وقعدتا شوية اتعرفتا على الخال وكنت اغلب الوقت ساكتة وزلفى تشيل وتغمز لي وتضحك، قلتا ليكم زي نهال كاواية..
وعدني قصي انو مابتكلم معاي تاني لحد ما بابا يسمعو الموافقة النهائية ووفا بي وعدو خلال الايام التلت..
مرو الايام وجا يوم عرس حمادة، نهال عادل كان جاييها وابت تمشي معاي قمتا سقتا رؤى وريم وديل ماصدقو طبعاً ..
اها طبعا لبستا فستان اوف وايت سكر سكر وعليهو جاكيت اسود  قصير واكمامو طوال ولفيت طرحتي الاوف وايت مع البروش الاسود ولبستا شوز واطية اوف وايت ومعاي عصايتي، وعملت مكياج خفيف ظل خفيف في العين اسود لامع، مكياج سيفورا الرهيب عمل شغل عجيييب جرت لاين مع ماسكارا وروج لونو رووز خفيف لامع وكده بقيت جاهزة..
كنت متوترة ومامرتاحة نهائي وجاهدتا نفسي جهاد شديد عشان افضل هادية قدام الراجيني هناك..
مشينا وودانا علي وفات، دخلنا الصالة أخيراً وانا طبعاً خايفة شديد وبقيت اتلفت عايزة اشوف زول من الناس البعرفهم، شفتا منى المزيعة الكانت زميلتي وهي جايا علينا، جات سلمت علينا سلام حار ودخلنا كلنا وقعدنا معاها في التربيزة الكان فيها زميلة تانية اسمها جيهان واخو منى وام جيهان، سلمنا وقعدنا كلنا، بقيت اتلفت شوية اشوف المعازيم، جو بنات سلمو واتصورو معانا، وجاتنا اخت حمادة اسمها إيلاف وكان حمادة موصيها تستقبل زملائو البجو يجاملوهو، تاني اشوف ليك شخصية بعرفا كوييس جايا من بعيد، علوية هانم كانت، قاشرة قشرة التقول عرس أهلا، من شافتنا جات طايرة.. جات سلمت وقعدت لي وبقت ترغي وانا وشي مافيهو اي تعابير ماكنت عايزه اشجعا، ماعشان عفيت ليها معناها تبقى صحبتي، بقت تحكي لي عن جود مرت إسلام وقدر شنو كريهة ومغرورة وطلعت بتغيير من علوية وخلت إسلام يبعد عنها وبقا مازي اول ونسى صحبتهم اللي ليها سنيين طويلة، بقت تقول لي إسلام اتغيير وبس كايس رضا مرتو والخ الخ الخ، صبري نفد في الاخير وقلتا ليها علوية لو سمحتي انا إسلام صفحة وقفلتها  وماعايزة اسمع سيرة بتخصو تاني، وبعدين مش دي جود الاحسن مني في اخلاقا وانا كنت الوصولية العايزة انشهر على حساب إسلام؟ حسي جود بقت كخة؟ بعدين انا دخلي شنو في مشاكلك معاها ومع إسلام؟ ممكن تقفلي السيرة دي انا جاية عشان اجامل حمادة الانسان الزوق ماعشان اسمع مشاكل الناس مشاكلي بتكفيني وزيادة..
البت كتمت فرد كتمة ههههه ياخ لايوقة خلاص مافاهماها عايزة مني شنو خلاص إسلام وفارقتو عايزة مني شنو اللصقة دي، ولا ماشة بي المثل البقول عدو عدوي يبقى صديقي؟  مخها مامظبوط نهائي، اتحرجت لأنو زكرتها بي القالتو لي اسلام عني اني وصولية وانو اختيارو لي غلط..
المهم قبلتا منها وبقبت اتونس مع منى، كلمتني انها لقت عرض افضل في قناة تانية وحاتبدا خلال الاسبوع الجاي وهنيتا واتمنيت ليها التوفيق، قالت لي انتي كمان قدمي من جديد انتي مزيعة كفء وبتلقي عروض افضل، قلتا ليها خير ان شاء الله..
ونحن بنتونس سمعتا صوت بقول السلام عليكم، قلبي فرا وحسيت بي غصة رهيبة، الحالة مااتلفتا لسة، لما اتلفتا وردينا السلام كان إسلام واقف ومعاهو مرتو، الغريب انو انا اتمالكتا نفسي وبينتا كل الهدوء والسلام في عيوني ، سلمتا سلام كويس وكنت عادية ماعارفة من وين جاتني القوة لكن عرفتا انو ربنا واقف معاي  إسلام كل الوان الطيف اترسمت في وشو وكذلك جود مرتو، طول ماشافني ولقاني في احسن حالاتي ، سلمت علي وعاينت لي عين متأملة شديد، عرفتني طبعا انا منو، اضطرو قعدو معانا بعد علوية قالت ليهم اتفضلو خصوصا انو ناس جيهان وامها قامو مننا، إسلام بقا يسأل فيني عن حالي وصحتي وانا برد ليهو بي عفوية شديدة لكن قلبي من جوة تعبان تعب السنين، جود قاشرة بي التوب الماخمج والدهب يراري فيها، لونا اصفر ماعارفة لونا ولا لون كريمات هههه، كانت متضايقة واضح وطبعاً علوية حاسة بي سعادة كونو جود مضايقة من وجودي، رجعتا اتونس مع منى وعلوية لصقت في إسلام وبقت تتونس، بعد شوية إسلام قام مشا يسلم على مجموعة رجال قاعدين وخلى جود معانا، اخواتي لفتوني وقالو لي صورينا وبقو يتموضعو وانا اضحك فيهم انا ومنى ونسيت موضوع جود وقعادا قصادي، تاني في بنات جوني وسلمو واتصورو سيلفي معاي، مشو بي هنا جوني نسوان كبار واتصورو معاي برضو وفي واحدة باستني بوس شديد..
حسيت بي راحة وحسيت انو الكون ما محورو إسلام فقط..
الحفلة اشتغلت والناس هججت، بقينا نتفرج وساكتين ، إسلام ومرتو قاعدين قصادي، جود اتلفتت تتفرج على الفنان وإسلام بعاين لي كل شوية والتانية، نهائي ماجاملتو ولا عاينتا ناحيتو وحسيت علوية مراقبة الموقف، بعد مسافة قام مابعرفو فات ويين قريب ربع ساعة، خلال الحفلة تلفوني ضرب لقيتو قصي، الزول ده تقول شيخ بحس كيف مابعرف انو إسلام خاطر لي او موجود في المكان، قلت لي ريم خليكم انا ماشة برا ارد على التلفون واحجزي لي كرسيني معاك، رديت وقمتا على حيلي، طلعتا برا مكان الحفلة وانا بقول، معليش ياقصي ماسامعاك كنت
قصي: وين انتي والدوشة شنو عندك
انا: انا في عرس
قصي: عرس وين ماعزمتيني يعني
انا: عرس حمادة زميلي في القناة كان
قصي: تمام ايامك والله والجا معاك منو
انا: رؤى وريم اخواتي
قصي: مشتاقين بي المناسبة
انا: مالك كسرتا الوعد
قصي: عيان والله وعندي حمى قلتا اسمع صوتك اتقوى بيك حبة
انا: سلامتك الف سلامة مالك ملاريا ولاشنو؟
قصي: اي تصدقي شبطت فيني من وين ماعارف
انا: تعال لي في العيادة بتاعتي بعالجك منها
قصي: علاج الهنا والمنى اكيد
انا: الف سلامة عليك يابطل
قصي: دي بقولوها للشفع
انا: انت طفلي الاول ولازم اهتم بيك
قصي: حيييينا، كده تقريبا خفيت
انا : حيكم بي وين
قصي: لو وصفتا ليك بتجي؟
انا: الدنيا ليل وانا بت ناس
قصي: بت ناس هاشم الزين
انا: يلا ماطالبة معاك خفة العرسان على وصول ماعايزة الزفة تفوتني
قصي: طيب يامنيتي امرك مطاع عقبال زفتنا
انا: غايتو تتمسكن لمن تتمكن ياقصي صاح؟  طيب يلا سلام
قصي:  مع السلامة
قفلتا وانا بضحك واتلفتا ماشة على المدخل القا إسلام في وشي واقف، اتخلعتا في الاول لكن اتمالكتا نفسي، قرب اكتر وختا يدينو في جيوبو وقال لي منو قصي ده؟
قلتا ليهو بي استغراب : نعم؟
رددا لي تاني: قصي ده يطلع منو
عاينت على يميني ورجعت عاينت ليهو وقلتا: بصفتك شنو بتسألني
قال لي حبيبك انا كنت استبدلتيني سريع كده؟
قلتا ليهو يعني كنت عايزني اندب وراك مثلاً ؟ انت حتى ماانتظرتا اني اشفى من الحادث وجريت خطبتا حبيبتك ماوقفتا معاي في الانت اتسببتا لي بيهو ده انا كنت حاأموت
قلتا كلامي واتحركتا على المدخل قام كورك لي نورهان، غصباً عني وقفتا ليهو وهو قال لي : منو قصي ده الانتي كنتي بتضحكي ليهو ومبسوطة؟ قلتا ليهو افتكر مابخصك وانا حرة اضحك ابكي أعرف قصي اعرف شيطان ده شي راجع لي
قال لي : نورهان انا مانسيتك للآن
قلتا ليهو: بس انا نسيتك
ابيت اقيف تاني ودخلتا جوة وانا بعتب بي عصايتي ورجعتا قعدتا مكاني، جود تشيل وتعاين لي عين فاحصة وحسيتا متغاظة مني مابعرف مالا، انتي ياهناية سرقتيهو مني بعد كنت لابسة دبلتو ليك عين تعايني لي كمان؟  حكم والله، طيري انتي وراجلك انا مالي ومالكم كمان،. على قول حبوبتي قسمة بِس ههههههه.. إسلام جا راجع بعد 10دقايق ووشو مابتفسر اظنو مضايق من شي، انا ماعاينت ليهو غير نظرة خاطفة وتاني ماعبرتو، لكن قلبي من جوه واجعني شديد، شوفتو جمب مرتو ذادت من حسرتي عليهو، بحبو ياناس مافي يدي اغير شعوري بلمح البصر..
العرسان وصلو أخيراً وكانو ماشاءالله حلويين والزفة رووعة ، استنيت لما جا الفاصل قمتا ومشيت باركتا لي حمادة العريس وعروسو سلمى القمر وتاني قعدتا نص ساعة وبعدها جا علي يسوقنا حسب الاتفاق وسقتا اخواتي ومشينا وطبعاً إسلام متابعني بي عيونو لحد مامشيت..
في البيت طبعاً استرجعتا كل احداث الليلة دي وحكيت لي نهال واثنت على تصرفي هناك، وغلبني تاني انوم لأنو صورة حبيبي وجمبو مرتو دمرت نفسياتي للأسف ..
بدون تفكير اتصلتا على قصي والجرس رن مسافة اظنو نام وقفلتا في لحظت هو رد وطوالي رجع لي بي تلفون، كانت الساعة تقريباً واحدة ونص صباحاً، قصي رجع لي ملهوف وقال لي نورهان مالك انتي لسة صاحية؟
قلتا ليهو معليش لو صحيتك، قال لي مانايم كنت شغال في بحث ضروري، قلتا ليهو قصي انا حاسة بي زهج وغلبني انوم فكرتا فيك بس معليش اعفي لي، قال لي ماتعتزري بالعكس انا بفرح لما انتي تفكري فيني وتلجأي لي، ولو عايزة علاج للزهج عليك بالاستغفار بطرد الوسواس وبزيل الهم
قلتا ليهو عرفتا ليه انا بلجأ ليك؟ لأنك دايماً بتريحني بي ابسط الطرق، قد اكون انانية ياقصي باخد منك ومابديك، قال لي لما نتزوج بنتحاسب وترجعي لي كل السلفتك ليهو هههههه
قلتا ليهو اخ ياحيوان اتاريك مبيت النية، وبقينا نضحك سوا..
طوالي مودي اتغير وارتحتا من القلق الماسكني ده.
بابا بعد تم اسبوعين كاملين رد لي قصي بي الموافقة بعد استشارني واتكلم معاي كتييير وقال لي مامعنى انو فشلتي في اول مرة معناها حاتتكرر كل مرة، الحياة تجارب ودروس بنتعلم منها نواجه مصايرنا، قصي زول تمام واهلو تمام اصل وفصل، ان شاءالله تتوفقي معاهو وعندك فرصة الخطوبة ادرسيهو كويس ولو مافي نصيب برضو مامشكلة يتعوض ونشوف البعدو.. بابا طمني بي كلامو وقلتا ليهو موافقة عليهو..
قلتا لي قصي ماعايزة احتفل زي اول مرة قال لي محسساني انك مطلقة عديل، لكن وافق لي وقلنا خلاص اصلا اتحدد عرس نهال بعد شهرين وقلنا نلبس الدبل على الضيق بدون حفلة بس اهلي واهلو..
فعلاً كما خططنا لبسنا الدبل وسط فرحة اهلنا القراب وطلع البرنامج ظريف شديد..
في البيت بدينا استنفار عام وبدو الحبس لي نهال وحبوبة قالت ماينادو اي زول للدخان ولمة لأ لأنو ممكن تدخلا عين ماصلت على النبي والدخان يتنظر
عنترة والكلام منتهى..
طبعاً جابو الشيلة شيلة الهنا، و عادل عايز يمووت لأنو منعوهو يشوف نهال تاني الا يوم العرس، في مرة سألتها بعمل معاك شنو وانتو براكم، قالت لي ولا شي، قلتا ليها راجل ومرتو في الحلال وبراهم والشيطان معاهم ماسوو اي شي نوهائي؟  قالت لي بقيتي مخك ماتمام هههه..
قصي طبعاً بقى يتصل تلاتة او اربعة مرات في اليوم وطريقتو في الكلام بقت عجيييبة، رومانسي لأبعد حد وحنيين، مابقول لي حبيبتي اكتر شي منيتي او حياتي قال انو حياتو ابتدت من عندي،
بأنب نفسي دايماً اني غبية ومابتجاوب معاهو وهو صابر علي، انا جد حيوانة، الانسان الفي يدو ماعايزو عايز المستحيل..
بالجد قصي اثبت لي في مواقف كتيرة انو شخص مقامو عالي و عوض(وعسى ان تكرهو شيئاً فهو خيرٌ لكم) صدق الله العظيم..
الايام دي مواصلة في العلاج والدكتورة قالت لي لازم تتخلي عن العصاية وتضغطي على نفسك عشان رجلينك تتجاوب كلياً، كنت خايفة انو افضل اعتمد على العصاية طول حياتي..
نهال بقت مبلمة ومكمكة طول اليوم وانا اضحك فيها وقلتا ليها نقدم ليك لجوء عند ناس داعش عشان تجاهدي معاهم بعد ده، قالت لي ببدا بيك انتي اول زول في الجهاد، حيوانة خلاص انا دي دايرة لي اذاي بس، حبوبة بدت مسلسل العزاب الجديد لي نسوان وليداتا وخدمتهم قطعت قلبهم لكن هم اصلاً مازعلانين وكلهم بعتبرو نهال بتهم واكتر..
في يوم كنا شغالين في حاجات في البيت سمعتا تلفوني ضرب وكان بعيد في البرندة، قمتا اتنفضتا ومشيت عليهو وشلتو عاينتا منو متصل، لقيتو إسلام! نسيت تماماً اني ماحظرتو ومامسحتا رقمو قبل اليوم، بقيت ارجف كلي واتوترتا شديد وابيت ارد، تاني ضرب وتاني وتاني، قفلتا التلفون نهائي، عايز مني شنو تاني واتزكرني من وين، ماعجبني من يوم العرس وسؤالو لي عن قصي كان بي غيظ، كان نفسي اعرف عايز شنو لكن قلتا يابت هي ماتفتحي اي مجال معاهو لا كلام لا سلام حاجة وانتهت ومابنفع نبقى حتى اصحاب ولا بيناتنا كلام من اي نوع..
كلمتا نهال بي الحصل قالت لي اياك يانورهان تتكلمي معاهو انا عارفاك ممكن تضعفي وبعدين هو راجل متزوج كايس منك شنو تاني..
ماقدرتا اتخلص من العصاية للآن لكن مااستسلمتا قلتا مع الايام برجع لي طبيعتي خصوصاً انو ماحصلت لي اي اعاقة دايمة..
قصي وأنا علاقتنا ماشة للأحسن كل مرة وطوالي مع بعض تلفونات وزيارات لأنو حبوبة قالت ماعندنا بت بتطلع مع راجل إلا على بيتو في الحلال..
أخيراً ظبطنا كل شي واخترنا لي نهال الفستان والميك اب ارتيست، انا جهزتا كم لبسة كده لي الحنة والجرتق واما فستان العرس كان حدث، فستان بي اللون البصلي الفاااتح ومشغول بي كريستال دقيق في كل الصدر ومن تحت مردف، اي عرس تومتي ياخ ولازم اتكلف وبعدين قصي قال لي عايز حبيبتي تطلع مزة زيها زي العروس، وانا اخترتا ليهو طقم ظريف كده بي البيج بنطلون وصديري بيج والقميص كبدي ناير والكرافيت بيجي لامعة كده  اللهم احفظو لي من عيونهم يارب..
يتبع......