بارت اول
قصة. شهكَة حزن
بقلمي.زهراء الجبوري
:::::::::::::::::::::::
تروي قصته
لن تموت اذا خسرت من تحب لكنك ستعيش كالميت إن خسرت كرامتك
______
اسمي اقبال
مواليد 1978/5/15
بدايه قصتي جنت طفله بعمر السنه وجابو ابوي شهيد 1979
جانت امي حامل باختي الازغر مني
ابوي مزوج قبل امي ومطلق زوجته وعنده ولد وبنيه من زوجته الاولى
عايشين بيت جدي مو ويانه يعني ماعدنا تواصل وياهم بس مناسبات نشوفهم
وره استشهاد ابوي امي ولدت اختي وبقينا عايشين بيت خالي
خالي كلش حنين علينا ويحبنا
بس نبقى ايتام والحياة ماتخلى من المشاكل
خالي هم عنده اطفال دخلت مدرسه وصرت صف ثاني ابتدائي اذكر من اجت بيبي ام امي حجت ويه امي
بيبيتي. يمه انتي بعدج زغيره والناس ماترحم وبناتج ماعدهم اخ ليش ماتزوجين اني مادايمه الج يجي يوم واروح وين تبقين اخوج هم عنده جهال المهم ضلت تقنع بيها
جان ابن عم ابوي بيته قريب علينه زوجته ماتخلف
واجه ابوه الحجي وحجه ويه خالي كله
ابن عم ابويه ابني زوجته عاقر وهو بس هل الواحد عندي اريد اشوف جهاله اريد اختك لابني وهم بنات المرحوم يعيشن بينا ونبقى اهلهم بين الرفض والقبول والمناقشات صارت القسمه
وتزوجت امي ابن عم ابوي وعشنا وياهم بالبيت
جان الحجي جدي يحبنا على محبت ابوي الله يرحمه وراحت الايام واجت صار حمل عند امي
بس ماكمل صار عدها اسقاط وبقت كل فتره يصير حمل ويصير اسقاط ضلت امي تراجع اطباء وساده ووووو.....
لحد ماصار عدها حمل والحمد لله ثبت واجت اختي ونور عيني
سنة 1990 جنها لعابه شنو بياض شنو شكار تخبل دبدوبه صارت مثل روحي
صرنا ٣ بنات بالبيت وماكو اخ امي جانت تضوج
دكول ازوجت حتى اجيبلكم اخ وسند بالحياة
ورجعت حملت وهم نفس المأساة مايثبت وهي هم كبرت بالعمر فكعد وسكتت كالت بعد هاي قسمتي ونصيبي من الحياة
بهاي الفتره اني كبرت صرت اتضايق من زوج امي
مااتحمل كلمه منه اكول هو مو ابوي ليش يتحكم بيه عكس اختي الازغر من جانت هادئه وماتحجي شي شنو يكلها سويه
بس اني لا حساسه اكثر من اللزوم لأن جنت احس انو زوج امي طامع بالبيت مالتنا
مال الشهيد يريد ياخذه من امي بس محد يصدكني لأن زغيره وهو من نوع السانه حلو كدام الناس بس الحجي جدي اموت عليه جنت من اروح للمدرسه
