نوفيلا "زواج بالإجبار " ✓

الفصل الثالث 💖

@Rahma_Reda ( جميع الحقوق محفوظة للكاتبة  )

اخيرااا الفرح خلص بس دوامة الافكار لسه مستمره، الابتسامة المزيفه اللى راسمينها والظاهر ان اهاليهم فاهمينهم كويس بس للاسف هما اللى حطوهم فى الموقف ده، مفيش فى ايديهم حاجه للاسف الشديد...
كريم اخد اروى و طلعوا جناحهم الخاص و اول ما دخلوا و قفلوا الباب خبط، راح فتح و كانت والدته..
خرجلها و قفل الباب و هى وقفت قدامه و مسكت وشه بايديها و بحب اتكلمت:- حبيبي، اروى كويسه جداا و انت بس لو قربت منها هتعرف تتأقلم معاها و تفهمها، متفكرش بطريقه سلبيه يا كريم و متحملهاش ذنب ان والدك اجبرك عليها، اوعى تكسرها يا كريم دى يتيمة و بقت مسؤوليتك، امانه فى رقبتك حافظ عليها، اركن زعلك من والدك على جنب و شوفها مراتك، قرب منها و انت مع الوقت صدقنى هتحبها
كريم استغرب كلام والدته و حس ان فى لغز فى الموضوع بس حب يتذاكى و يخليها هى اللى تعترف:- طيب انتى بتقوليلى الكلام ده دلوقتي ليه؟! خلاص اتجوزنا و بقت فى بيتى
هدى فهمت ابنها و حست انه عايز يوقعها بالكلام، اتنهدت واتكلمت بهدوء و غموض :- كل اللى اقدر اقولهولك يا كريم انك دلوقتي بقيت طوق النجاة ليها، هتفهم مع الوقت كلامى ده بس كل ما تحاول تيجى عليها افتكر انها يتيمه و امانه فى بيتك، ابوها سلمها ليك انت و اختارك انت علشان عنده ثقه عاميه فيك و انك هتحافظ عليها و مش هتكسرها، اوعى تخيب ظنه فيك يا ابنى اوعى
ابتسمت بحنان و طبطبت على كتفه:- ادخل لمراتك يا حبيبي و حاول تقربها منك.. ادخل يا ابنى ربنا يسعدك
@Rahma_Reda ( جميع الحقوق محفوظة للكاتبة  )

سابته و مشيت و هو فضل واقف بيحلل فى كل كلمة قالتها و للاسف مش فاهم او مش عارف يربط الامور ببعض..
بص لباب الجناح و اتنهد:- الظاهر ان الموضوع اصعب مما كنت متخيل

دخل و كانت اروى لسه بفستانها، اتكلم بهدوء:- مغيرتيش ليه؟!
اروى بصتله بتردد و هو فهم بس مش عايز يضغط عليها:- طيب انا ممكن اروح اوضه تانيه لحد ما تخلصي
كان هيخرج بس وقفته:- لحظه يا باشمهندس
كريم التفت باستغراب:- باشمهندس؟! اعتقد انى جوزك يا اروى و لا ايه؟!
بصت لبعيد و هو قرب وقف قصادها و اتأكد فعلا ان فى حاجه:- ارفعى الألقاب بينا، انتى مراتى مفيش واحده بتقول لجوزها يا باشمهندس
مكانتش عارفه ترد او مش عاجبها الكلام، فى كلتا الحالتين كل اللى كان شاغل تفكيرها ازاى تقوله انها مش عاوزه الليلة تتم او بالمعنى الصح ان الجواز ده يكون صورى لفترة و بعدها يطلقوا....
فاقت على صوته بيتكلم بحيره و همس:- بتفكرى فى ايه؟!
بصتله للحظه صعبان عليها تمنع نفسها عنه او تكسر فرحته، اخدت نفس طويل و اتكلمت بتوتر:- طيب انا عارفه ان الموضوع صعب بس صدقني انا مش هقدر
بصلها بحيره بيحاول يربط كلامها و بعدها اخدها و قعدوا على طرف السرير:- انا صراحه مش فاهم انتى بتتكلمى عن ايه، براحه كده و وضحى تقصدى ايه
بصتله بقلق:- شوف يا كريم انت شخص محترم و الف مين تتمناك، لكن انا آسفه، مش... مش... يعنى حاول تفهمنى
هز راسه باستغراب و حيرة و هى غمضت عينها و اتنهدت و همست بسرعه:- مش عاوزه علاقه بينا يا كريم ياريت تفهمنى
فضل ساكت و هى مستنيه رد، فتحت عنيها و بصتله بحذر تشوفه ساكت ليه بس اتفاجأت بيه بيبصلها بذهول و لخبطه :- انتى بجد مش عايزه ا..... ، لا لا لا ثوانى، ثوانى بس، انتى.............
وقفت وقاطعته بتوتر و قلق:- كريم ارجوك افهمنى انا بس مش عازاك تزعل او تضايق انا.........