𝐃𝐚𝐢𝐫𝐲 ¦ مُـذكـرات

الإكـتـئـاب الـحـاد.

اسمي ريما عندي 16 سنة لجألت للورق عشان اطلع ولو جزء من اللي جوايا مع اني عارفة اني مش هعرف.

احساس غریب محدش يقدر يوصفه كسل، لأنه اكتر من كونه كسل، احساس فظيع لدرجة اني بتنفس بالعافية!
ازعاج ازعاج ازعاج الناس كلها بقت مزعجة ،مش قادرة اسمع او استحمل حد ودا اللي خلاني اجرب اكتب في مذكراتي ، معنديش قدرة اعمل حاجة ، كمية تشائم جوايا تتوزع على العالم بحاله ،جه في بالي كتير مرات انا ليه عايشة اصلا ؟
ايه الفائدة من كل دا؟

ايوا انا نفس البنت صاحبة الطاقة الايجابية دائما، اللي طول الوقت بفكر في حلمي وازاي هحققه ، انا اللي كنت مبسكتش ومستمتعة في حياتي ومش شايلة هم بكرا حتى! بس ايه اللي حصل ؟
المشكلة فعلا ان محدش قادر يفهمني ،اصل ازاي وانا مش فهماني ولا عارفة انا بمر بإيه وليه؟؟، ماما بقت رايحة جاية تزعقلي بسبب اهمالي لكل حاجة، بسبب كركبة اوضتي اللي بقت تشبهها بالزريبة ،الصراحة معنديش قدرة اناقشها حتى تعمل اللي هي عايزاه بس تسيبني في حالي.
النوم بقا ملجأي الوحيد ،على الأقل بنفصل فيه عن العالم المقرف دا شوية، الناس كلها بتنفر مني ،مش قادرة اتحكم في نفسي، علاقاتي بدأت تقل ، بدأت انسحب ومبادرش ولا اكوّن اي علاقات جديدة، كل اللي كان متعود على اهتمامي بقا بيشتكي مني واللي يقول اني ببعد واللي يقول اني زعلانة، افهمهم ازاي ان معنديش طاقة اصحح ظنونهم حتى؟
بتعصب على اتفه سبب وبعيط من دون اسباب واضحة كأن دا شغلي الوحيد اصحی اعیط وانام!

محدش كان واخد باله من الحرب اللي انا بخوضها كل يوم مع نفسي ومشاعري ....لحد ما حصل حاجة لفتت انتباه الكل، خلتهم كلهم خايفين مني او عليا مش عارفة فعلا ! ، بس مكنش قصدي اعمل كدا ، انا مش عارفة ازاي حتى عملت كدا، يمكن مكنتش في وعيي! بس دى معناه ايه حتى؟ ، انا فعلا مش عارفة ، وماما لما شافت الموضوع وربطت الاحداث مع بعضها من اول ما اتغيرت كليًا لحد اللي حصل دا قررت انها تاخدني لدكتور نفسي ، والموضوع مکنش اختياري حتى ،ومظنش انه يحقلي بعد اللي عملتو؛ وخصوصا اني بقيت عايزة اجربه تاني.

اتعالجت بعد كم شهر معاناة ، اكتشفت ان كان عندي اكتئاب حاد خلاني اغمض عيني عن اي حاجة جميلة في الحياة دي ، عماني عن كل ما هو ينفعني ويخرجني من اللي انا فيه، عرفت فعلا ان الاكتئاب عامل زي السرطان بيتشعب جوا الإنسان ومش بيسيبله اي مشاعر جميلة، ويبدأ يسيطر علينا ويجر كل آمالنا واحلامنا لبرا وييجي لحظة ينسهالنا تماما، في ناس فعلا وصلت للمرحلة دي ومنهم انا، وفي المرحلة دي قدامنا خيارين... یا نحاربه ونرجع احلامنا وطموحاتنا ونفتكر ونسعى لهدفنا من الحياة دي... يا اما نفضل في الدوامة دي واللي الله اعلم هتكون نهايتها ايه.

---

📌¦ فرح.

الكتاب بدأ مع فرح، وبدأ بموضوع شائك شوية، اتمنى تعجبكم الفكرة، ولو حابين نتكلم عن حاجه معينة ياريت تقولوا 💘.