𝐃𝐚𝐢𝐫𝐲 ¦ مُـذكـرات

الـوسـواس الـقـهـري.

نضفت الطاولة النهاردة للمرة الثالثة ومع ذلك لسه ملاحظة الدفتر دا عليها! الصراحة حسيت انه جه في وقته يمكن كان عايز يشاركني تعبي ؟ ولأول مرة مش هرفض وهشارك الدفتر دى باللي حاسة وبحس بيه طول الوقت .
انا لوحدي في البيت حاليا بس مقدرش اقول ان البيت هادي بوجود افكاري بصوتها العالي دا ، هتقوليلي بتسمعي ايه؟ هقولك من كترهم مش عارفة احدد ، واولهم الصوت اللي عمال يقولي "قومي اتأكدي انك قفلتي الباب!" مع اني اتأكدت اربع مرات قبل كدا رغم ذلك عندي شك وهقوم اتأكد تاني ممكن الصوت دى يختفي وقتها؟

دايما متوترة ،خايفة كأن حد دابب الرعب في مخي وجسمي هو اللي بيجبرني اقوم اتأكد من كل حاجة عشر مرات وياريت يقتصر الموضوع على دا ، أقوم اغسل ايدي كل شوية بطريقة عنيفة انا مش مدركة ليه بعمل كدا حتى! مع اني معملتش حاجة تضطرني اقوم اغسل ايدي بما معناه ان معنديش سبب حتى ..هو اي حاجة عشان ارتاح وخلاص

ويااه بقا لو خرجت من البيت  كمية الأسألة اللي يطرحها عقلي اكتر من مرة او اتنين! زي
"قفلتي الباب كويس؟"
"شكلك نسيتي البوتجاز شغال "
"الشبابيك مفتوحة؟ "
"اكيد نسيتي المفاتيح"
وأسألة الى ما لا نهاية تعكر عليا يومي واكره اللحظة اللي خرجت فيها ومع العلم اني بطلع اتأكد مرة واتنين في سبيل اني اريح نفسي...مع ذلك نفسي مش بتسيبني وممكن تطلعني تاني اتأكد للمرة الثالثة او العاشرة.

بفكر في الموت دايما ومع اني بخاف منه، بس مش هنكر الأفكار والأصوات اللي بتقولي "اعمليها في نفسك واخلصي" . مش خايفة غير في يوم اخضع للأفكار دي زي ما خضعت لغيرها.

دايما محض تريقة واستفزاز للي حواليا ،بسبب تصرفاتي وحذري الأوفر في نظرهم ، ميعرفوش ان كل اللي بعمله دا محاولات مستميتة مني عشان اسكت الاصوات اللي جوايا ،كأني هموت من الجراثيم اللي موجودة على ايد الباب ! ، او عشان سلمت على حد وانا مش متأكدة انو مش غاسل ايده بتاع تلات مرات عالاقل!
ولا عشان انا عايزة بس احافظ على نفسي واكون كويسة؟
بس مش دا السبب اكيد..لأني عارفة ان اللي بعمله انا مش طبيعي وعمره ما هيكون كدا، بس الأصعب لما افكارك تفرض عليك تنفيذها، ومتسمحش ليك مخالفتها رغم انك بتفكر ان دا غريب وان محدش بيعمل كدا! بس مع ذلك بتنفذه عشان تريح نفسك من عذاب صوت افكارك اللي ممكن يوصلك لأذية نفسك على سبيل انك بس عايز ترتاح وانك مش قادر تستحمل..وانا فعلا مش هقدر استحمل ، فبلجأ لتنفيذ كل حاجة صادرة من مقر تعذيبي

عندي 22 سنة...الي في سني دخلو علاقات وفيه اللي اتخطب وفيه اللي اتجوز وفيه اللي عندهم صحاب عادي....وانا ولا واحدة من دول بسبب تصرفاتي الغريبة والاوڤر للكل، حتى علاقات الصداقة كان صعب احافظ عليها بسبب...مش بسبب حد ، دا بسببي انا بس!

فترات صعبة كتير عديت عليا في حياتي بسبب مخي واللي بيقولهولي، اصعبهم لما كان بيجيلي آلام في مختلف انحاء جسمي بطريقة مؤلمة...سواء آلام الضهر او المفاصل او صداع او تعب وخمول بدون اي اسباب واضحة، روحت لدكاترة كتيرة جدا وكل مرة نفس الإجابة...واللي هي مفيش في جسمي اي مبررات للي بيحصل معايا، بمعنى اني سليمة، ومع ذلك يفضل يجيلي وساوس بأمراض ممكن تكون معايا ودي اعراضها فعلا، بس دايما الدكتور كان بيقول العكس واني كويسة جسديا، مش عارفة هل دى مريح؟ ولا كوني عارفة سبب ألمي مريح اكتر؟

                                        .
                                        .
                                        .

دي مذكراتي من سنة..اتشخصت بالوسواس القهري بعد ما استسلمت لكافة الحلول وقررت الجأ لدكتور نفسي وتقريبا عرفت سبب المي فعلا ...اتشخصت بنوعين من الوسواس القهري واللي هما الوسواس الحركي، ودى كان اللي بيخليني اقوم اتأكد من الحاجة مليون مرة وابقا مهووسة نظافة، واعمل مليون سلوك غريب وملوش اي معنى ولو سألتوني عن سببه مظنش اني كنت لاقي اجابة....زي اني غسلت ايدي من غير ما اعمل حاجة اصلا!زي ما اقوم اتأكد من حاجة مع اني اتأكدت منها قبل كدا وخلاص! بس دا كان كله غصب كان بيتفرض عليا او بعمله قهريا.
  والنوع التاني وسواس التوهم المرضي، وهو اللي كان بيخليني اشك ان عندي امراض كتيرة او خطيرة ويخليني الف على الدكاترة بلا اي هدف او...يمكن عشان اصبر نفسي واطمنها؟ مع ان دا مكنش بينجح في معظم الاحيان ،  بس كان دايما زي حاجة كدة جوايا بتأكدلي ان عندي حاجة وان يمكن اللي حواليا عارفين بس مخبيين عني! شكوك كتيرة جدا وافكار مرعبة اكتر واكتر ومحدش متضرر غيري.
اكتشفت بردو ان الوسواس القهري في اغلب الاحيان بيبقي ناتج عن خلل في النواقل العصبية في المخ او ممكن الحالة البيئية تشجع المرض على النشوء، يعني لو كنت في ضغط دايما وفي جو متوتر ومشحون معظم الوقت هتلاقي الضغط دا ممكن يطلع بأشكال كتيرة ومنها الوسواس القهري.
وفي طرق علاجية كتيرة يعني في حالة وجود خلل في النواقل العصبية هيلجأ الدكتور للعلاج الدوائي طبعا مع جلسات العلاج السلوكي عشان اوقف وابعد اي افكار او وساوس نهائيا وممكن المريض نفسه لو ملجأش لدكتور ومرة على مرة اتجاهل افكاره ومخضعلهاش ممكن يتغلب عليها..الموضوع اي نعم محتاج قوة كبيرة بس لو الشخص اصر ميسمعش افكاره هيتغلب عليها ويسيبها بدون اي حاجة، ومع ذلك في حالة فقدان السيطرة وحسينا ان خلاص فعلا الافكار بدأت تسيطر فالأفضل نلجأ لمعالج نفسي عشان الموضوع ميتفاقمش ويتطور بطريقة تصعب السيطرة عليه.

أتمنى اننا لما نشوف حالة زي حالتي في حياتكو مثلا..انكو متاخدوش الموضوع بسخرية او تريقة لأنه فعلا ميستحملش اي شيئ من دا بينما ممكن تعملوا حجات كتيرة تانية زي انكو تقفوا جنبه او تشجعوه عالعلاج او ممكن متعملوش شيئ من دى بل بس متحسسوش مريض الوسواس القهري انه مجنون لأنه مش كدا فعلا بل هو مريض ومعظم اللي بيعمله مش بإيده فمفيش داعي نهجروه ونعيشوه في قوقعة لوحدو لأنه ممكن يحصل شيئ كل اللي حواليه يندموا على اللي عملوه معاه وقتها ...

---

📌¦فرح.