𝐃𝐚𝐢𝐫𝐲 ¦ مُـذكـرات

أحـلام الـيـقـظـة.

انا ليلى، في عيد ميلادي اللي فات وتحديدًا عيد ميلادي الـ15 قابلت صاحبتي الأولى والأخيرة ' ليان'، كنت سعيدة جدا لحد ما فجأة بدأت ماما تسألني عندها، حاولت اقولها اني مش بشوفها غير لما بكون لوحدي، وانها خجولة جدا من انها تظهر لماما مرة واحدة كدا.

فضلت ماما مستنية عيد ميلادي التاني عشان تقابلها، وبالفعل كان عيد ميلادي الـ16 قريب وقتها..

وتم العيد ميلاد وماما فضلت في انتظار ليان، بس مظهرتش خالص، وهنا بدأت ماما تتعامل معايا بشكلغريب، ومنعت دخول الانترنت وحتى الخروج كان بحساب.

مكنش الموضوع جديد بالنسبالي، لأن ماما ديما حذرة في كل حاجة تخصني، حتى اختيار الأصدقاء، وبسبب دا عمرها ما كانت 'الام الصديقة' بالنسبالي بالعكس ديما كانت الام اللي بخاف احكيلها حاجه، أو احكيلها واندم زي ما حصل مع ليان.

من ضمن الإجراءات اللي ماما اخدتها بسبب ليان انها عرضتني على دكتور نفسي، و الدكتور دا بقى من اول جلسة بدأ يسألني ولا أكنه بيحقق معايا!، حسيت وقتها اني مش قادرة اتحمل كلامه ولا نظرات اهلي من إلازاز الفاصل بينا، نظرات بابا المخذولة مني اللي بتكرر كل يوم مش قادرة اتحملها دلوقتي.

كنت عايزه ارجع بأي طريقة، كل اللي فكرت فيه اني محتاجة ليان، محتاجة نقعد زي كل يوم عند البحيرة واحكيلها مشاكلي وتسمعني بكل حواسها، محتاجة نقعد نغني ونغرق نفسنا مايه كعادة كل يوم، كانت ليان ملجي..، لحد ما للدكتور قفل دفتره وقالي 'ليلى ايه رأيك تكتبي مذكراتك مع ليان؟ انا حابب اسمع عنكو كل حاجة.. قد ايه صداقتكو جميلة..' فرحت وعيني لمعت وقلتله 'انت بتتكلم بجد؟!'، قالي 'ايوة والمرة الجاية اسمع ليان كمان، ايه رأيك تسأليها رأيها عنك وتوريني؟'، وافقت وبدأت اكتب مذكراتي مع ليان وسألتها ليان ايه رايك فيا، قالت كلام جميل اوي، قالت إنها فخورة بيا حتى لو محدش حس بدا..،كنت سعيدة جدا وقتها وكلامها كان كفاية بالنسبالي، وحسيت فعلا ان يومي بيعتمد عليها.

تاني مرة رحت للدكتور، قدمتله كلامها عني ويومياتنا، لقيته بيقرأ باهتمام عكس ماما تماما لما قلتلها عن ليان..

مرة في مرة الدكتور بقى بقى صديقي زي ليان، حتى انها بطلت تظهرلي فكرت فإنها ممكن تكون زعلانة مني، ودا دخلني في فترة حزن طويلة، واللي ساعدني اتخطاها كان الدكتور...

كبرت شوية لحد عمر الـ18، والدكتور قرر يكلمني عن حالتي.

قالي اني كنت مصابة بحاجة اسمها 'أحلام اليقظة'، وأن ليان مجرد خيال بعوض فيه اللي مش لاقياه في حياتي الحقيقية، مش هقول اني كنت صغيرة على معرفة حاجة زي كدا.. بس بمجرد معرفتي ليان ظهرتلي، وقتها نسيت كلامه وكل اللي قاله، وكل اللي فكرت فيه اني لحد دلوقتي لسه محتاجة ليان.

---

📌¦جنة.