أنارت عتمة قلبي

الحلقة الواحد والعشرون

#أنارت_عتمة_قلبي

الحلقة الواحد والعشرون الجزء الأول

------------------------------
----------------------------------------

قراءة ممتعه💜

" الطريق لا تسد على من أيقن أن عند الله المخارج!!

ستبتم الأماني عما قريب...
لنا في الله ظن لا يخيب...
أصبرو وأستبشرو🌸 "

#وأبتسم_ماخلقك_الله_لتعبس😊

في حوش عامر
الساعة 12 ونص بعد منتصف الليل

الحوش كان في لحظة سكون والكل خشو مكاناتهم، وعبير اللي ليها بس ساعة مروحه من حوش إماليها هيا وصغارها
خشت رقدت هيا وراجلها وولادها
وخلت رفيف مع ملاك اللي بعد مارقدتها قامت تليفونها وفتحت النت تلهي فيه شويه وهيا تشوف في هنادي لاهيه في تليفونها وتبتسم أبصر مع مني إدردش

أول مافتحت وصلتها رسالة من مراد باعتها من حوالي نص ساعه

' بكرا الجمعة ياحضرة المعلمة '

أبتسمت لما إذكرت الإتفاق اللي بينهم، كانت راح ترد بس شافاته مش فاتح

طلعت من المحادثات وخشت على الصفحة كتبت منشور ونزلاته وحطت تليفونها لوطه

وقربت من هنادي ضربتها على كتفها وضحكت وقالت: أنتي جايه بتهدرزي عليا وتوسعيلي خاطري ولا بتلهي في تليفونك

هنادي حطت تليفونها وتلفتت بحيث تكون مقابلتها، وأبتسمت وقالت: رجعنا نحكو أني وأحمد
ملاك، بإبتسامه: كنت حاسه تصدقي، بس على أي أساس هالرجعة مش على أساس قلتيله مخطوبه🙄
هنادي، بضحكه: وفسخت مافيش أسهل منها،
هو صح جرحني وكسرني وحطني في مواقف أخييييه، وحتى أني درت فيه هلبا هنته وسبيته بس ماقدرتش نكرهه أبدا، تاريته كل كلامي اللي قلته كان من وراء قلبي بدلالة أول مارجعلي وقالي نحبك نسيت كل شي

ملاك تنهدت: بس يعني حاستها مش ساهله رجعتكم زي قبل بعد اللي صار بينكم
هنادي، بضيق: مش عارفه الصراحه، بس مادامه معاش فيه شي يعرقل تمام إرتباطنا عادي الباقي كله يفوت
ملاك، برفعة حاجب: ونسيتي خواته!؟ توا ولا هو المسؤول الأول والرئيسي عليهم بعد وفاة بوه وأمه

هنادي، بقهر: لا مانسيتش أصلا من قبل مخوفيني أكثر من أمهم،
بس يعني مش زي، أمه تقعد أمه وفرض عليه برها وطاعتها ومايقدرش يقوللها لا، بس خواته يفرق الوضع هما صح واعرات بس كم مره نلاحظ أنهم محترمينه ومايقدروش يحكو معاه،

ملاك، بضيق: مش عارفه حاسه الموضوع صعب شويه مادامه تعقد من الأول وتفركش كم مره راح تقعد فيه لقطه أبصر كيف بينكم، أني مانبيش نخوفك أو نكرهك فيه، بس ماديريش شي ولا تأخذي أي قرار بعواطفك من غير ماتحكمي عقلك وتفكري فيه كويس، وأنتي مش صغيره تعرفي مصلحتك والشي اللي يساعدك ويريحك، بس أستخيري وخودي وقتك وماتستعجليش وربي يقدملك اللي فيه الخير