حب وحنين

Chapter2

صـح نـشـتاق بـس عـيـب نـسـأل ؏ 🖤لم̷ـــِْايـسـأل عـليـنآ  🙂💔

حنين
من عالم الظلمه الچنت اشوفه حسيت ع وخزات ووجع خفيف.. ماصحيت كلش بس چنت احس يعني .. سمعت اصوات قريبه مني.. چانت سوالف.. واصوات غريبه عليه اول مره اسمعهه.. فتحت عيني وشفت المكان الاني بي وتذكرت الصار بيه وشويه وصار الوجع قوي ومكدرت اتحمله.. كمت ابچي مخنوگه.. مريه بصفي بس بيناتنه برده.. فتحت البرده وكالت: ها ؟ اصيحلج الدكتور؟
هزيت راسي الها بأي.. شويه واجه الطبيب وويا ممرضه كشفو ع مكان الطلقه وخلو ابره بالمغذي بعد محسيت بوجع بعدهه..
شويه استقريت وباوعت داير مدايري.. بصفي منا مريه چبيره وگبالي هم سرير بس فارغ واكو اصوات بالغرفه بعد بس مكدرت اشوف اشكالهم.. بس الي بصفي شفتهه... حاولت اتذكر شكد صارلي بالمستشفى والوقت شنو ليل لو ظهر لو صبح..
مكدرت اشوف الساعه ولا الشباك لان اني بطرف الي بي الحايط مو يم الشباك.. كل المريضات الي ويايه وياهه مرافقات اله اني وحدي.. تذكرت مصيبتي وامي واختي .. صرت اتخيل اشوف امي قاتليهه لو اختي شو شمسوين بيهه.. ظليت افكر بيهن وخايفه عليهن ومادري شلون غفيت..
كعدت ع صوت الدكتوره الي فحصتني اول مدخلت.. صوتهه بعده ابالي .. اول مگالت حنين! فزيت وحسيت رجعلي شخص اعرفه من زمان... حاولت اكعد ع حيلي بس مكدرت.. هي شافتني ويمكن دمعت عيونهه ويمكن اني اتخيلهه هيج..
اني هم عيوني موگفت دمع.. شويه وسمعت صوت رجال يگلي ها حنين شلون صرتي؟ دورت مصدر الصوت شفته الطبيب الي چان بالغرفه بذيج الليله السوده..
گلت:الحمد لله..nada hs
رجعو تحمدولي بالسلامه اثنينهم وشافو المغذي لان چان يمشي بسرعه وقللو والدكتوره هم شافت جرحي وكالت:انتي عندج اصرار حتى تعيشين.. خليج هيج لتتنازلين مهما صارت الظروف..
-دكتوره.. اني شگد صارلي هنا؟
وصال:يومين.. صارلج اكثر من 30 ساعه غايبه عن الوعي.. وكنتي بالانعاش والبارحه طلعوج لهنا..
دنگت وحايره بسؤالي شلون اكوله:واهلي...؟ هم احد اجه؟
الطبيب نط من يمه:لا! اذا تردين تعيشين انسيهم وعيشي لنفسج مو لأحد!
وصال:شوفي.. محد اجه للمستشفى بعد.. ومن دخلوج عمليه هم لزمتهم الشرطه وبعد منعرف شنو صار وياهم.. انتي كل هذا معليج بي.. حتى اذا اجوي بعد راح اخلي الكل يبلغهم انج متي
-هاا!
بقيت مصدومه بالي تحچي.. والطبيب الي وياهه اشرلهه براسه حتى يطلعون.. طلعو وخلتني اضرب دالغات واتصفن.. يعني معقوله اهلي راح يقتنعون اني متت؟ وبغير ميشوفون گبر اليه ؟ وراح يسكتون؟ شلون راح يصدگون؟ حسيت الكلام الي حچته الدكتوره مجرد حچي ميقدم ولا يأخر .. بس شافتني حالتي صعبه وعود تصبرني حچت هيج..
رجعت غفيت شويه وگعدت ع صوت رجال.. گعدت گلبي يرجف وميته خوف.. شفت اثنين شرطه گبالي.. بدو يسألون بيه ..
منو ضربج؟ گلت ماادري.. حاول ستفزني الثاني گال:مو اخوج الي ضربج؟ شلون تنكرين؟ لا والعالم كلهه تشهد بس انتي لا؟!
گلت:لا مو اخويه الضربني.. اني دخلت للمستشفى لان چان عندي الم ومااعرف شنو صار بعدهه.. كعدت لگيت نفسي هنا..
الاول:شوفي احنه هنا حتى نحميج سواء من اخوج او غيره! اذا مبلغتي علي ممكن يرجع يأذيج مره ثانيه.. احچيلي شصار وليش ضربج حتى اكدر اساعدج..
نترت بي :ماعندي شي اگوله! اني مريضه ودخلت هنا!
الثاني ظل مدنگ راسه ومدري شيگول ويه روحه.. رجع الاول گال:ع العموم.. اهلج طلعو بنفس اليوم الي دخلو المركز وقضيتج منرفعت للقاضي.. اذا تحبين هسه اكتب بلاغج ونتخذ اللازم!
-لا ماعندي اي بلاغ ع اي شخص..
سلمو وطلعو.. النسوان الي يمي كل وحده تفوت تبقه تباوع بوجهي وتتفحصني من فوك ليجوه.. من طلعو اخذت نفس طويل عبالك چنت مخنوكه ومتعجبه ع نفسي شلون كدرت اكمل كذبتي وماحجيت الصار.. تذكرت كلام الشرطي الگال اهلي طلعو من الحبس.. تذكرت ابن عمي الضابط وگلت اكيد هو طلعهم ماكو غيره.. ظليت حسبه تجيبني وحسبه توديني وماادري شنو التالي
حيل چنت خايفه ومادري شراح يصير بييه.. تمنيت لو ميته وخلصانه من هل عذاب والخوف احسن...nada hs