حب وحنين

Chapter6

وبعدنا نشم مراسيلك💔
بعدنا شما يكضنه الليل نبچيلك
يما تدري بفواتحنه ونغنيلك🧕🏻

.................

حنين..
بقه اكرم مطلع من غرفته.. والحجيه ملتهيه يم التلفزيون ع القرآن گمت اني حتى اسوي عشا.. قلمت بتيته سويتها اصابع.. ونگعتهه بمي وملح...وطلعت لحم ثرمته مكعبات صغار.. سلگته وحمسته ورجعت گليت البتيته وخليتهه ويا.. ماچنت جوعانه ولا چنت مشتهيه هل الاكله بس من الملل گمت ولهيت نفسي شويه..
اجه اكرم للمطبخ ابتسم وبعدين گال..
اكرم:شموازيج بس اريد اعرف! اني مو گلت تحتاجين شي گوليلي؟
-لا.. مليت مامتعوده اگعد بدون مااسوي شي..
اكرم:من شوكت تعرفين اطبخين؟
اجه للطباخ وكشف الجدر وهو يبتسم ومنبهر..
-تقريبا سنتين.. چنت احب اتعلم اطبخ ولان هل شي واجب علينا لازم نتعلم الطبخ والتنظيف وكل شي قبل لا..
من وصلت كلمة الزواج انبلع لساني ومگدرت اكمل... هو فهم عليه وغير الموضوع..
اكرم:شلون صار الجرح؟ خوما ديلطع جراحه او دم؟
-لا.. احسهه ناشف وشوي يحكني..
اكرم:اهاا! اخبار حلوه.. يعني دينشف..زين وبلاعيمج؟
-شوي احسن..
اكرم:تمام.. روحي ارتاحي اني اكمل الباقي واجيب العشا واجيكم..
جاب العشا وهل مره اكلت بدون مااهتم واستحي.. تقريبا تعودت علي وحتى هو ميخلي وجهه عليه ابد.. يشيل اللگمة وگبل يدير وجهه ع التلفزيون لو يوكل امه..
كملنه ومثل الروتين اليومي ياخذ امه للحمام وبعدين يخليها ع فراشهه.. قبل ليطلع من الغرفه دگ تلفونه..
اكرم:هلو امجد.. الحمد لله زينين.. اي زينه ..الجهال شلونهم؟ فرقان شلونها؟ الحمد لله.. سلامتك.. ماكو شي.. اهاا؟ شوكت؟ سفرة سعيدة مقدما.. لا مااگدر.. ع الجايات ان شاء الله.. يوصل  ماشي.. سلملنا.. الله وياك..
بدون مااقصد اجت عيني علي.. هو گال
اكرم:هذا امجد.. اخويه..
تفاجئت عنده اخ :هاا..
اكرم:اي .. طالعين سفرة لتركيا وديبلغني..
حسيت اني السبب بعدم روحته وياهم گبل طفرت من لساني الحچايه وگلت:اذا تحب سافر.. اني ما عليه شي..
اكرم:لاا ليش اخذتي ع نفسج! اني مااريد اسافر واتعب امي..
واصلا مااگدر هل فترة اخذ اجازه..nada hs
دنگت خجلانه من جوابه.. بعدين سلم وراح ينام..
اني همين عقمت جرحي واول مره چانت اشوفه بيهه .. تقريبا طوله نص شبر او كبر بشوي وشكله يخوف الخيوط والغرسات واضحه وعبالك الجلد گوه مچلب.. كزبر جلدي من شفت المنظر وگوه مسحت ع الجرح شوي يود بشاش وعفته لحد مانشف خليت شاش ناشف وثبته بالبلاستر.. خليت راسي ع المخده ومنظر بطني ميروح من بالي.. وكل مااتذكرهه عبالك روحي تريد تنشلع من جسمي.. .. گوه نمت بيومهه..
ثاني يوم هم مر ع نفس الروتين تقريبا وماكو شي صار.. هم تريگنه وگعدنه اني والحجيه ع التفزيون نوب طلعنه بالحديقه وصار الغده واجه اكرم جايب ويا.. وهم للعصريه گعد يم امه واني سويت العشا.. وطبعا ما مر اليوم بدون ما اتذكر اهلي واشتاق الهم...
نمت وگعدت الصبح احس جسمي مرتاح والافلاونزا خفت وحتى حيل طلع بيه.. دخلت سبحت وحضرت ريوك بكل نشاط واحس نفسي خفيفه رتبت المواعين وجلفت الطباخ والسنك ولو ما گاعد اكرم چان غسلت الارضيه بس من گعد مقبل عليه.. تريك هو وطلع وبعدين گعدت امه وتريگنه سوه اني وياهه.. بعد ما كملنه ريوك وغسلت المواعين وغسلت الها وجهه همين.. گعدنه بالصاله وبقيت افرك اديها ورجليها.. باوعتلي براحه وشكر اليه.. بعدين گلتلها راح اسوي غدا گالت بصوره ممفهومه عود اي...
لگيت بالثلاجة لحم .. سويته مكعبات وسلگته.. دورت تمن ولگيت وشعريه هم اكو بس شويه.. بتيته هم اكو.. وبهارات شكلت من الموجود سويته اخو البرياني ..واكو لبن اكتيفيا همين.. ناقصه بزاليا ويصير توب بس ملگيت ههه... كمل الغدا وتغدينا ورحنه للغرفه حتى ترتاح شويه لان من الصبح گاعده ع حيلها.. سندتها ع كيفي ونامت بفراشهه...nada hs
اني هم مددت وبعد مادريت ع شي... گعدت للعصر لگيت اكرم جاي وگاعد بالصاله..
-مساء الخير..
اكرم:مساء الانوار.. ماشاء الله عليج اليوم.. شنو مبدعه شنو مسويه!
-اكلت؟
اكرم:اي.. عاشت ايدج.. متوقعت هيچ تعرفين اطبخين!
-عافيات..
اكرم:خوما تأذيتي من الوكفه والشغل؟
-لا زينه.. بس احس حكه قويه بالجرح وبنفس الوقت اخاف اخلي ايدي علي..
اكرم:اها؟ زين تشوفين اكو رطوبه لو ناشف؟
-لا كلش ناشف..
اكرم:لعد لازم ينفتح الخيط..
-هاا؟
اكرم:اي يله.. هسه اسحبه بدون متحسين بي..
-هاا.. لا عفيه اخاف..
اكرم:ههه من شنو تخافين.. لعد احسن تأخري ويصير الالم اكثر من اسحبه اذا اتأخر؟
-هاا.. لعد يله.. بس دقيقه..
رجعت للغرفه واستحيت من امه هي نايمه ع فراشهه ومااگدر اگول.. بعدين دخل ورايه وكأنه يعرف بحيرتي..
اكرم:تعالي للغرفه الثانيه..
رحت ورا.. مادري ليش حسيت حتى الاصوات انقطعت وهدوء كلش واقل حركه مسموعه.. نمت ع الفراش وغطيت نفسي للنص
-يله .. جاهزه..
باوع بوجهي وابتسم:لتخافين حنونه!
گعد ع كرسي موجود بغرفته وانطاني نظره اطمئنان.. بس اني متت خوف.. بده يعقم ويمسح بالمنطقه.. اني اباوع واحس راح يصير وجع قوي ومن گد ماتخيلت الالم حسيت صدگ اكو الم..
مادري شلون مديت ايدي ولزمت ايد اكرم وسديت عيني وگلت
-عفيه لتسحبه!
اكرم..
من ردت افتح الخيط.. وهي شغلة بسيطه ومتوجع.. حنين وجهه گام ينطي الوان.. والخوف البعيونهه يقلق الصراحه.. من خوفها مادرت بنفسها لزمت ايدي بكل قوتها وسدت عينها.. شديت ع ايدها بأثنين اديه وحبيت اطمنهه اكثر..

-حنين.. فتحي عيونج.. باوعيلي!
فتحت عيونهه وباوعتلي عبالك تريد تبچي..
-متوجع صدگيني.. انتي بس لتفكرين بالالم واني مراح أأذيج..
عيونهه وهي بهل الحال ماادري شنو تسوي بالواحد.. مثل الطفل برطمت وعيونهه مغورگه وتباوعلي بتوسل..

خليت ايدي ع خدهه وچان بارد وناعم بوقتهه:اني يمج.. مراح تتأذين..
عقمت ادواتي الي هنه مقص وملقط طبيات.. وبديت افتح الغرزات وحده وحده.. ويه كل غرزه تلزم التيشيرت ماالتي اكثر كملت وهي بعدهه ساده عيونهه متريد تشوف ههه..

-راح تبقين مغمضه؟ ترا كملت هههه..
فلتت ايدها مني وباوعت لنفسها:صدگ بعد ماكو ولا وحده.. ؟ يارب الحمد الك.. شكرا دكتور لو ماانت مااعرف شچان صار بحالي..
-مو فتحنه الخيط معناهه تشيلين ثقل لو تتحركين زايد! التزمي بالي اگوله ولتتحركين بصوره مفاجئه ع الاقل مدة شهر.. ثقل شغل بالبيت ممنوع.. تعقيم تستمرين علي يوميه وحاولي تعرضي للشمس..واني راح اجيبلج مرهم همين...

حنين:ربي يحفظك.. مااعرف شگول وشنو ادعيلك..
-هذا واجبي..
گامت من فراشي واني هم لميت الغرزات الوگعن والشاش وعقمت اداوتي ورجعتهن لمكانهن.. بعد ماكملت صفنت ع المكان الي نامت بي واتذكر شلون لزمت ايدي .. وخوفهه ولزمتهه لتيشريت بعدين.. ماادري ليش تمنيت يطول وجودها يمنه.. حسيت كأني متعود ع وجودهه بالرغم هي مصارلها 10 ايام يمنه، واذا راحت راح يصير نقص بحياتي..
صار العشا ورحت جبت من برا وتسوگت فواكه وخضار وكل شي مونه تحتاجه حنين لان متحب اكل البرا... كملنه العشه وكلمن راح ع غرفته واحس حنين بأفضل حالاتهه..لو شخص غيرهه چان ماتحمل الاصابه وخاصه بالامعاء الي دائما تسوي تلوث والتهاب.. بس هي بنيتهه قويه وجسمهه بعده نشط وصغيره تشافت بسرعه..
ثاني يوم الصبح رحت ع دوامي وكالعاده بعد ما خف الشغل شوي علينا گعدنه اني ووصال نحچي وصدمتني بأهل حنين..
وصال:تدري دزيت ناس يسألون ع اهل حنين؟ لا وناصبين الها فاتحه!
-شنو؟ متأكدة؟
وصال:اي والله والبارحه لو اول البارحه چان اخر يوم يمكن.. بس المعروف عند الناس هسه هي ماتت..
-عجيب! واني توقعت يرجعون ويدورها وياخذوها!
وصال:مادري والله مادري.. راح اموت من القلق اني!
-اووف!
وصال تسأل بتردد:هي شلونها؟
-زينه ..وشلت الغرزات البارحه..
وصال:هاا..
-اي.. تجين ويايه اليوم تشوفيها؟
وصال:هاا! لا مااگدر .. سكتت شويه بعدين كملت.. اذا تحتاج ملابس او شي بس گولي اني اشتريهن وادزهن بيد السايق..
-لا خاف امج تسويلج مشكله.. اني اجيبلها .. هي شگد قياسها؟
وصال:اي امي متخبله عليه هل الايام وتگلي هسه يخطفوج وصدك گمت اخاف.. لارج.. الي دزيتهن الها لارج ..بعد مااعرف رهمن لولا!؟
-ماشي.. ديري بالج ع نفسج ولتبينين خوفج لاحد..
هزت راسهه بنعم والخوف بعيونهه..
كملت شغلي وطلعت للبيت اول مدخلت للمطبخ تفاجئت شنو مسويته.. الكاونتر يلمع والهوسه مختفيه الطباخ نظيف وعلي جدرين.. فتحت الاول چان فاصوليا والثاني تمن وشعريه.. رجعت باوعت للمكان الشباك نظيف ويلمع السنك مرتب واول مره اشوفه بدون ماعلي اكواب او مواعين .. ميز الطعام مرتب ومنظف..
رحت اخذت دوش وغيرت ملابسي.. دگيت عليهن الباب هي وامي ماكو صوت .. فتحت الباب ع كيف.. شفتها نايمه ومنطيها ظهرها للباب .. رحت صبيت وتغديت وكل لگمه اكلهه اتعجب ع الطعم شلون هيچ تگدر تطبخ وبهيج عمر.. ههه اني شايف الي ويايه عجايز ميعرفن يطگن بيضه واذا صادفت عزيمه كله يجيبن من برا.. كملت غدا وغسلت مواعيني ورحت نمت..

يتبع..