حب وحنين

Chapter10

گولوله كلمات العتب تنگال بس
لليستحق من هاي ما عاتبته.
#. 💔

،،،،،،،،،،،،،،،،

حنين
راح اكرم لدوامه وبقيت اني انظف واجهز الغدا.. ونهاد يم امها بالغرفة والاطفال يلعبون ساعه بالحديقه وساعه يمي بالمطبخ..

اتغدن سويه واني وحدي گعدت بالصاله اكلت وبالكذب مگالت تعالي يمنه.. كلش لبستني وماحاچتني ابد.. حتى امها مخلتني الزمها .. كل مااقربلها وگالت لا اني .. عفتها براحتها وما طوخت وياهه.. للظهر اجه اكرم بس اني چنت نايمه من اجه.. للعصر يله شفته.. ماادري شنو الي اخذني لغرفته.. يمكن حظي راد يسويهه.. لگيته نايم بدون غطه وجسمه ونومته تخبل.. مخلي ايده ع عيونه والخ ع بطنه..
گعدت ع السرير يمه هو حس عليه وگعد..

اكرم:وردايتي..
حنين:اگعد كافي نوم!
اكرم:لج تعبان كلش ..ماشالله اليوم المستشفى انترست مصابين ودخلنه عمليات هوايه ..
احجي ويا والفلف بالتشيرت مالته:تغديت؟
اكرم:لا.. مااشتهي ولعبانه نفسي كلش..مااريد احچيلچ شنو شفت اليوم.. ولتذكريني بالاكل..
حنين-اوكي.. بس اني مشتاقتلك وانت حابس نفسك من جيت ولهسه!
اكرم:هسه شويه واطلع .. راسي مصدع شوي..
حنين-سلامتك روحي..

بسته من گصته وطلعت.. كملت كم شغلة بالمطبخ ومر الوقت بسرعه وصار الليل وع العشا كل ما تخطف مني نهاد تخزرني.. مو مثل خزراتهه العاديه.. لالا هل مرة بحقد او استضغار..

مشيت كل شي عادي وگلت يجوز مغثوثه من شي..
كملو العشا وبديت اغسل مواعين..اجه اكرم للمطبخ ..
اكرم:وردايتي.. اني طالع.. نهاد محتاجة كم شغله..
تفاجئت شنو الي محتاجته! وهي باچر ع اساس تروح! مسألت بس وره ماطلع اكرم عرفت شنو السبب الحقيقي..
كملت المواعين ودخلت يمهن بالغرفه.. گبل نهاد صاحت ع اطفالهه وطلعتهم من الغرفه.. بقيت اني متعجبه عليها ليش هلگد عصبيه وليش طلعتهم؟!

نهاد:انتي من شوكت هنا؟
حنين-اربع لو خمس اشهر؟
نهاد:وكل هل فترة انتي ويه اكرم ؟ وتنامين يمه؟
انصقعت بالحچته وتخيلت امهه هي النطقت بس شلون؟ بعدين تذكرت لمن رحت لاكرم العصر..nada hs
نهاد:طلعتي وحده بت شوارع هاي اذا مو بت حرام! واني اگول شنو هل حنيه والطيبه ع امي والبيت يلج من النظافه والطبخ جاهز!

صبت دموعي ع كلامهه ونزلت راسي..
نهاد:اوي خجلتي مو؟ شوفي بعد السما عن الارض اخلي اكرم ياخذج.. بت شوارع تزوج اكرم! اكرم الدكتور الي كلهه تتمناه! لج مهندسات وبنات اصل وفصل يتوسلن اخذهن اله! تجين انتي الزعطوطه مسويه نفسج ام البيت!
حنين-بس..
قاطعتني وگالت:لا بس ولا شي.. تتخطفين يمه وترحيله للغرفه شيسموهه! اول ماگلتي ابات هنا نغزني گلبي منج.. تدرين ليش؟ لان ماكو بنيه متربيه تبقى بيت واحد عزابي!
حنين-خل..
هم رجعت قاطعتني:لا تحچين ولا حرف.. اذا باقي عندج شويه كرامه وشرف لتبقين هنا! اذا انتي صدگ شريفه ويمسج الحچي راح ترحين بدون مشاكل.. واذا لاوالله من ذولي الشلايتيات مراح تتأثرين بالي اگوله..