فستان زفافها الأسود (مكتملة)

البارت 2

《للحب روايتان.. كلاهما أنت》

...》》... فلاش باك- قبل 37 عام•

...واقف شاب فالعشرينات من عمرو قدام البحر لي كان هايج بسباب الجو البارد والريح العاتية.. رغم ان هاد الجو تيخلي الواحد يتكمش فمانطة وسط دارو من البرد.. خصوصا ان الثلج بدات طيح خفيفة والوقت كان متأخر و فات منتصف الليل.. الا ان هاد الشاب ختار يتكمش فجاكيطتو المبطنة وطربوشو السوداوين بحال عيونو.. ويجلس فهاد الجو العاصف بحال قلبو..

تنهيدة تلو الاخرى حتى حس براسو خفاف شوية من الضغط لي تيتعرض ليه مؤخرا..

حس برعشة خفيفة سرات فجسدو.. وقرر يرجع فحالو لدارو الدافئة.. حرك زاوية نظرو للجنب باش يغادر.. حتى ستوقفو منظر قدامو خلاه يسها فيه..

كانت شابة واقفة حتى هي تتشوف فالبحر وراداليه بجنبها.. لابسة فستان زفاف فالاسود.. عاري من الصدر واليدين.. كان بلا سميطات..

كانت ساهية وماحاساش بالبرد لي تيشحط لحمها حتى زراق.. وطرحتها طاحت من فوق راسها وداها الريح ناحية رجلو وحبسات..

نزل عينيه للطرحة تيشوف فيها عالقة مع رجليه.. تحنا هزها بين يديه تيشوف فيها.. طرحة العروس سوداء.. واش هاد البنت تتعشق الكحل لهاد الدرجة..؟! لدرجة تلبس فستان زفافها فالكحل..؟!!

جاه الفضول يعرف قصتها.. شنو تدير هنا بفستانها.. وفين راجلها.. اتكون هاد الليلة ليلة عرسها.. علاش مكاينش معاها..

عض على شفتو متردد يقرب منها.. فالتالي تشجع وقرب بخطوات هادئين.. ووقتما تيقرب تيحس بالريح تتزيد تجهاد..

ثواني حتى وقف جنبها ومد ليها الطرحة ديالها بصمت.. دارت شافت فيديه وطلعات عينيها فيه.. حس بقلبو خفق بعنف فاش تفيكساو عينيها فعينيه.. عينيها العسليتين الممزوجين بقوة وألم باعثين شعور غير مفهوم ناحية كل واحد شاف فيهم..

بلع ريقو ونطق بالانجليزية حيت عرفها برانية على بلادو.. كان صوتو هادئ وهو تيشير للطرحة لي فيديه..

- طاحت ليك هادي...

مدات يديها برجفة ناحية الطرحة.. شداتها من عندو ورماتها قدامها حتى داها الربح بعيدة عليهم.. ونطقات بالانجليزية بصوت هادئ ممزوج بألم واضح وهي تتشوف فالبحر..

- مابقات عندها حتى فائدة..

الشاب بقا تيشوف فيها متفحص تفاصيلها لي وضاحو كثر حيت قرب منها.. ماقدرش يغادر ويخليها هنا بوحدها.. خصوصا اجنبية والوقت متأخرة.. ممكن توقع ليها شي حاجة من وراه.. وأيحس بذنب كبير اذا وقعليها اي مكروه.. لذلك تشجع وفتح فمو باش يستفسر منها.. ولكن تراجع فآخر لحظة.. وقرر يعطيها تجاكيط ديالو دفيها على الاقل.. حيت الى بقات هكا اتجمد..