《للحب روايتان.. كلاهما أنت》
...حول شوقا عينيه تيشوف فالفراغ.. ورجع شاف فيه تيهضر بسخرية..
شوقا: كون مارديتش البال بين ماشربتيش بزاف اليوم.. كون قلت راك سكران.. شكون قالك تنبغيها..؟!
كوك: هيونغ.. هادي حكمة.. (غمز جيمين بخبث) الى جانب جيمين هيونغ عندو الحق.. ماتخليوش الفجوة بينك وبين ديك البنت تكبر.. نتا باين عليك تتبغيها..
شوقا شاف فيه: فين باين عليا..؟
كوك: الصراحة شفتك واحد النهار تتفحص تصاورها فسوشل ميديا.. كنت انسولك ولكن تراجعت.. واليوم جات الفرصة انني نعرف شكون هي.. غير شفتيها عيونك بداو تيبريو.. وتعصبتي فاش تجرأ داك الشاب وقلل الادب عليها.. اذن راه بااينة بين تتبغيها..
تاي شاف فكوك: هادي هي الصداقة.. عرفتي هيونغ تيبغي وحدة وماقلتيهاليش..
كوك: ماشي وقتك دابا..
شوقا: نتونا فهمتو غلط.. نسرين كانت واقعة فمشكل فاش كنا فكوريا.. عاونتها وقدرات ترجع لعائلتها.. هادشي لي كاين..
جيمين: والبوسة..
شوقا شاف فيه بعيون حارقة حتى تدخل نام باش يلطف الجو..
نام: بوسة شكر اجيمين.. عاونها وباستو (غمزو)
جيمين بدا تيضحك بالسر.. ونطق اخيرا جين لي كان غير ساكت..
جين: كيفما كان الحال خصك تنفذ الحكمة.. ياك عاونتيها وسالات علاقتهكم ببوسة.. بغيت نقصد انكم مادابزتوش.. فغير من اللاىق اليوم تشوفها وما تلقيش عليها التحية..
جيمين: اتفق..
شوقا بقا ساكت تيشوف قبالتو ساهي.. حسهم دوروه بيناتهم.. وكيفما كان الحال راه عندهم الحق.. هو تيبغيها.. مدة قصيرة باش عرفها.. كانت كافية تقلب حياتو سفاها على علاها.. ونسرين الوحيدة لي قدرات تقلبو حياتو وتعطيها معنى..
طلع فيهم عينيه لقاهم تيشوفو فيه.. فالتالي تنهد ووقف تيعدل سمطة سروالو..
شوقا: فين هي..
جيمين: الكارد لي كان معاها دخل غير دابا شوية دخل للصالة لي حدانا.. باينة اتكون تما..
شوقا: فين شفتيه نتا..
جيمين شيرلو للحيط: كولشي بزاج اهيونغ..
شوقا شاف ناحية الحيط لي تيبين الطريق لي دخلو منو.. كان كولو زاج..
طرطق عنقو تيخبي توثرو وتم غادي بخطوات هادئة عكس عواصف قلبو الهائجة.. داير يديه فجيب سوالو تيضغط على صبعانو بتوثر.. شنو ايقولها.. واش اتعطيه فرصة باش يدويو بعدا.. مزال عاقلة عليه هي..؟ اكيد اتعقل عليه.. ياك هي براسها وصاتو ماينساهاش حيت ما اتنساهش..
زفر بحنق ومد يدو تيفتح الباب فاش وصليه.. وتم خارج حتى لمح صحابو من وراه..
شوقا: علاش تابعيني..
جيمين بضحكة ساذجة: نشوفو..
كوك ضربو لراسو: بغا يقول نتأكدو واش اتنفذ الحكمة وماتغشناش..
شوقا طلع فبهم حاجبو: بانلي ندير بالناقص..
نام: هيونغ.. وصلتي لنص الطريق.. بقا النص كملو.. ثيق بيا.. اتشكرنا مورا هاد الخطوة.. سوا خرجتي بنتيجة سوا لا.. راك مخاسر والو..
شوقا سكت تيشوف فيه.. عندو الحق.. ما ايخسر والو الى هضر معاها.. حيت الصدفة لي جمعاتهوم فهاد البلاصة مرة اخرى.. مكانش لقاء مخطط ليه من قبل..
عض على لسانو داخل فمو.. وتم قاصد باب الصالة لي ممكن تكون فيها نسرين.. لاحظ بين الحيط ديالها ماشي شفاف بحال الصالة لي كانو فيها هوما.. يعني هاد الصالة خاصة..
كانت المسافة بين باب الصالة فاش كان وباب الصالة لي هي فيها صغيرة.. ولكن خطواتو الصغار نتيجة توثرو خلاوها تكون كبيرة.. غير وصل نص الطريق.. وهو يتفتح الباب وتمات خارجة نسرين منزلة راسها ودازت من حداه بلا ماتنتابه عليه.. خلاتو يدور متبع ليها عينيه شافها قاصدة ممر خاوي..
بقا واقف بلاصتو حتى سمع وشوشة ودار لقا صحابو تيطلو من باب الصالة فين كانو.. بقاو تيشجعوه باش يتبعها.. فالتالي دار بهضرتهوم وتم تابعها بخطوات هادئين متردد تسمع خطواتو ودور لعندو..
وصلو لكولوار خاوي تيدي للحمام لي كان فلخر ديالو.. وسرع من خطواتو حتى بقات بيناتهوم غا زوج خطوات.. باغي يستاغل الفرصة ان المكان خاوي.. ولكن فاجآتو فاش وقفات خلاتو يوقف حتى هو.. ونطقات راداليه بظهرو..
نسرين: هاي.. (دارت لعندو) أوبا..
شوقا حتافظ بتوثرو لراسو.. وخلا تعابير وجهو هادئين.. ونطق بنبرة عادية مع ابتسامة خفيفة..
شوقا بالانجليزية: باش عرفتيني وراك..
نسرين تبسمات هي الاخرى: شفتك فاش خرجت من الصالة..
شوقا شاف فيديها: كيف بقيتي..
نسرين: مزيان.. ضلعي تيضرني ولكن بيخير..
شوقا هز براسو: مزيان..
نسرين: كنت باغا نحضر للكونسيرت.. ولكن وضعي مايسمحش..
شوقا: ماعليش.. فاش تبراي ايمكن ليك تحضري..
قربات منو حتى ما بقا تيفصل بيناتهم غير سنتمترات قليلة.. وعلات فيه راسها..
نسرين: توحشتك..
شوقا: نتي لي مشيتي..
نسرين: كون مامشيتش كون وقعات حاجة اخرى..
شوقا: كنت انموت..
نسرين: كنا..
شوقا: لهاد الدرجة..
نسرين: لهااااد الدرجة..
شوقا: نسرين..
نسرين فيكسات عينيها فعينيه: اممم..
شوقا: انبقاو هاكا..؟ (جبد يدو من جيبو تيشرح) قصدت اننا مانبقاوش نتواصلو ونساو ديك الليلة..
نسرين قاطعاتو: مابغيتش نسا..
شوقا: سو شنو.. نبقاو هاكا بعادين على بعضنا..؟
نسرين: شكون قالك انبقاو هاكا..
شوقا: عندك شي فكرة..
نسرين: قبل من هادشي كامل.. خصني نعرف حاجة وحدة..
شوقا بفضول: شنو هي...
نسرين: واش باغي علاقتنا تستامر.. واش باغيني..؟ متأكد من مشاعيرك ليا..؟ حيت انا ما انقبلش غير بعلاقة جدية..
شوقا سكت تيشوف فيها.. حتى نطقات مرة اخرى..
نسرين فكر على خاطرك.. حيت من خلال اجابتك انعرف شنو ندير..
شوقا مجاريها: وكيفاش انرد عليك..
نسرين شافت فيه مطلعة حاجبها: اتجاوبني اليوم نيت.. وهنا..
شوقا بقا ساكت تيشوف فيها لثواني.. حتى مد يدو لخصرها وجبدها عندو بجهد.. حتى تأوهات بسباب ضلعها لي عطاها الحريق.. وتحنا لعندو شوقا اكثر ضام شفتو مع شفتها بطريقة هادئة.. كانت قبلة سطحية ولكن معبرة..
فصل القبلة دغيا وشاف فعينيها مباشرة.. ونطق بهدوء..
شوقا: وصلك جوابي..
نسرين بقات ساكتة تتشوف فيه مبلونطية.. ماتوقعاتش انه ايتجرأ ويبوسها مرة اخرى خاصة ان صحابو تيطلو من الكولوار لي حداهم.. في حين شوقا ماهتمش ليهم واخا حس بيهم تيضحكو بالهمس وتيوشوشو.. قد ماهتم بتعابير نسرين المنداهشة.. وقرر يفيقها من دهشتها بقبلة اخرى خلاهوم بزوج ينغامسو فيها مغمضين عينيهم..
قاطع قبلتهوم شخص من وراهم لي هضر نبرة عالية باش يسمعوه..
- ويل ويل ويل.. (حسنا حسنا حسنا)
نسرين فتحات عينهيا وبعدات على شوقا دغيا تتشوف فمصدر الصوت.. تقلبو عيونها من البرائة للعيون حاقدة وحمرة.. ونطقات بصوت هادئ كيف عادتها..
نسرين: ككريييسسستوفر.. (ضغطات على الاسم)
كريستوفر تحنا ليها بجنتلمانية: ليا الشرف ان حسناء منهاتن تعرفات عليا..
نسرين شافت فشوقا ونطقات بهمس..
نسرين: اوبا.. سير من هنا نتا وصحابك..
شوقا شاف فيها: شكون هدا..
نسرين: واحد من اعداء جدي..
شوقا وسع عينيه: كيفاش..
نسرين: ماتخافش.. لي كارد كاينين.. خص غير نتوما تمشيو..
شوقا: زيدي معانا..
نسرين: مايمكنش..
كريستوفر حنحن: راني مزال هنا..
نسرين ضاغطة على سنانها: اوبا سير من هنا.. (طلعات راسها فكريستوفر ونطقات بنبرة عالية) شنو جاي دير هنا كريس..
كريستوفر: كنا متافقين انا وجدك ان اليوم انكملو واحد الصفقة.. ولكن تخلف على الموعد.. سو جيت نتي تكمليها..
نسرين: انا مداخلاش مع جدي فأعمالو.. سير من هنا..
كريستوفر بدا تيقرب منها بخطوات هادئة: عارف.. ولكن اليوم ادخلي رسمي..
نسرين حولات عينيها لوراه تتشوف فرجالو مخرجين صحاب شوقا منيشين عليهم بالسلاح.. خلاوها توسع عينيها بالصدمة..وبدات دور فعينيها على لي كارد دياولها مالقاتهومش..
كريستوفر: تتقلبي على آدم.. (صفق بيديه صفقة وحدة) ختفى.. مابقاش..
نسرين شدات فيد شوقا ونطقات ضاغطة على سنانها: شنو باغي..
كريستوفر شير بيديه لطريق الخرجة تاع الكلوار: زيدي معايا واتعرفي..
نسرين سكتات تتضغط على شفايفها بسنانها.. ودارت عند شوقا بوجه حزين..
نسرين: سمحلي حيت تيوقعلكم هادشي بسبابي..
شوقا: زيدي دابا كيف قال.. نتبعو كلامو حتى نلقاو شي طريقة..
نسرين ضغطات على يديه حتى تبسم فوجهها.. تبسماتلو هي الاخرى ورجعات نظرها لكريستوفر.. وتمو غاديين بزوج فالكولوار دايزين من حدا كريستوفر لي كان تيشوف فيديهم المتشابكين وتيضحك مفقوص..
فاتوه فالخطاوي وهو لحق عليهم حتى فاتهم بخطوة..وتم غادي بيهم بوجه بارد وصحاب شوقا وراهم.. ولي كارد جنابهوم ووراهم هازين عليهم السلاح في حالة ما بغاو يهربو..
دخلو مجموعين للصالة دالبولينغ لي كانت فيها نسرين وصحابها.. لقاو صحابها مزال تيلعبو تما وغير شافو داك المظر وقفو من اللعب مرعوبين..
حتى هزو فيهم لي كارد ديال كريستوفر السلاح خلاوهم يرفعو يديهم خايفين.. وجلسوهوم كاملين فلي فوطوي والكراسا.. وجلس قبالتهم كريستوفر تيضحك..
كريستوفر: امنيتي نشوف تعابير جدك فاش يعرفك بين طحتي فيدي..
نسرين بهدوء: دير لي بغيتي كريس.. ولكن عرف حاجة وحدة..
كريس بفضول: شنو هي..
نسرين: انك اتندم..
كريستوفر بقا تيشوف فيها لثواني حتى طرطق بالضحك.. بقا تيضحك بالجهد بطريقة مستفزة ونسرين غير مطلعة حاجبها فيه.. حتى جنع الضحكة فجأة ونطق بصوت بارد..
كريستوفر: الوضع لي راك فيه ماتيسمحش ليك تهدديني..
نسرين بضحكة سخرية: وحتى انا ما تنهددش..
كريستوفر بجدية: كملي ليا الصفقة لي جيت على قبلها.. وانمشي بكل هدوء..
نسرين سكتات تتشوف فيه عاد نطقات ببرود: اشمن صفقة..
كريستوفر: تزوجي بيا..
نسرين طرطقات فيه عينيها بالصدمة.. حتى بداتها هيستيرية تاع الضحك.. خلات الباقي غير تيشوفو فيها مفاهمين والو.. اشمن صفقة وشكون هدا وعلاش هاز عليهم السلاح..
من غير شوقا لي فاهم ومافاهمش فنفس الوقت.. لي عارف ان نسرين مداخلاش مع جدها فأعمالو.. اذن علاش هدا تيطلب منها تزوجو وهو مافيوزي بحال جدها..
دور عينيه ناحية نسرين لي سكتات من الضحك.. وشدات على ضلعها لي عاطيها الحريق بجهد وغير صابرة..
نسرين: ضحكت حتى بدا ضلعي يضرني مرة اخرى.. هادي طريقتك باش تقتلني ياك..
كريستوفر: تندوي سيغ.. (جدي)
نسرين تبدلو ملامحها للجمود فرمشة عين: على حسب ماقلتي انها صفقة غير منهية.. وجدي لي بداها معاك.. ولكن لي تنعرف ان جدي مستحيل يدخلني فصفقة بلا خباري..
كريستوفر: هاهي فخبارك.. عالم المافيا ترون مؤخرا.. و اتبدا حرب العصابات فأي لحظة.. وباش نهدؤو الامور خصنا نتزوجو..
نسرين مطلعة حاجب ونطقات بضحكة ساخرة: وشنو ايستافد عالم المافيا بزواجنا..
كريستوفر: زوج دلي مافيا ايتضامنو مع بعضهم.. تاعي ونتاع جدك..
نسرين: الزواج غير حل فارغ درتوه نتوما بزوج.. لو انكم باغيين التضامن ولا الهدنة بيناتكم اديروها بلا مادخلوني فتخربيقكم..
كوك مال عند شوقا حيت جالس حداه: نسرين مافيوزية..؟!!
نسرين شافت فيه بعيون حاقدة حيت سمعاتو.. اعدى حاجة عندها هي شي واحد ينعتها بمافيوزية.. خلاتو يتقاد فجلستو مرة اخرى داير راسو مقال والو.. وشوقا شاف فيه حتى تبسمات فوجهو تطمنو.. ورجعات شافت قدامها..
لقات كريستوفر تيشوف حداها بعيون محقدة.. استمتجات انه تيشوف فشوقا وهي طلع فيه حاجبها ونطقات باش تفيقو من سهوتو..
نسرين: ماموافقاش..
كريستوفر حول عينيه من شوقا ليها: علاش.. حيت فحياتك راجل اخر..؟!
نسرين لتازمات الصمت.. باغا تستافزو بأي طريقة ممكنة.. حيت فاش تيتستافز ماتيتحكمش فأعصابو وتيغلط.. وهي باغا تستافد من أغلاطو..
عم الصمت للأرجاء مرة اخرى.. حتى رجع نطق كريستوفر وهو كاتم غيظو..
كريستوفر: مغني ماعندو فاش ايفيدك نهار اهاجموك عصابات اخرى.. من الاحسن تزوجيني انا لي مولف.. ولا لا..؟
نسرين: وعلاش ايهاجموني..؟
كريستوفر: حيت حفيدة جوزيف كاستيلو..
نسرين هزات براسها: انا قادرة براسي مستر كريس..
كريستوفر: مابيناتناش الرسميات.. (تقاد فجلستو) على اي.. كيفاش تعرفتي عليا.. حيت عمرك شفتيني..
نسرين: اعداء جدي وحلفاءو تنعرفهم واحد واحد..
كريس طلع فيها حاجبو: متأكدة..؟
نسرين بإطمئنان: يااس..
شوقا بهمس: نسرين لياش تتخططي..
نسرين دارت شافت فيه.. وشدات فيديو مزيرة عليها..
نسرين: ثق بيا.. اليوم كولشي ايسالي..
دورات وجهها لقات كريس ناض من بلاصتو وهو معصب.. ونطق آمر احد لي كارد ديالو..
كريس شير لشوقا: شدلي هداك لي جالس حداها..
تم قاصد الكارد شوقا بإندفاع.. مد يدو باش يشنق على شوقا.. ولكن كانت نسرين سابقاه ومدات يديها للسمطة نتاع سروال الكارد طيرات منو الفردي.. شداتو مزيان فيديها وضربات بيدو يد الكارد حتى رجع لور مقصح من حر الضربة.. ووقفات منيشة السلاح فوجه كريستوفر لي واقف بعيد عليها بأمتار.. ولي كارد دياولو وجهو ليها سلاحهم حتى هوما..
نسرين: سالات اللعبة مستر كريس..
كريس بدا تيضحك: ما اتقدريش تقيسيني..
نسرين طلعات فيه حاجبها: ثايق فراسك..
كريس: ثايق فمعلوماتي..
نسرين ميلات فيه راسها: اشمن معلومات..
كريس: على حد علمي مصابي عمى الالوان التام تيكون عندهم النظر ضعيف.. وبالخصوص البعد تتشوفي غا الضباب.. يعني ما اتقدريش تنيشي عليا ونتي بعيدة عليا..
نسرين ضحكات بفقصة: ماتنساش انني لاعبة تنس مستر كريس.. والتنس فيه البعد والقرب..
كريس: سي.. تديري ليلونتي.. ولكن اليوم مدايراهومش.. حيت كنتي جايا بنظاظر وحيدتيهوم فلوطو ونسيتيهوم تما..
نسرين: اوكي.. عندك الحق.. انا مانقدرش نيش عليك.. ولكن القناص تاعي لي وراك قادر..
كريس وسع عينيه بدهشة.. ثواني حتى لي كارد لي كانو منيشين عليها رجعو منيشين عليه هو.. وهي جلسات فبلاصتها شادة على ضلعها وحطات الفردي حداها..
نسرين: ديجا قتلك عارفة حلفاء وأعداء جدي كاملين.. ونتا من حلفاؤو ماشي العكس..
كريس تبسم جنب: باش عرفتيني..
نسرين تنهدات تتشوف فلي كارد دياولها.. شيراتلهوم بيديها باش ينزلو سلاحهم.. ورجعات شافت فكريستوفر..
نسرين: من ديبار كنت عارفاك تتبعني.. عارفة خطتك مع جدي.. كولشي تيوصلني..
كريس جلس تاهو مرتاح: اذن لاش مثلتي عليا..
نسرين: نلعب معاكم شوية.. نخلي حدي يثيق بين قدر يربحني فهاد الحرب لي شنها عليا..
كريس: انا تنتبع غا اوامر جدك.. معارفش شنو واقع بيناتكم..
نسرين: لي واقع انه باغي يدخلني فعصابتو بأي ثمن.. وتيتعمد يدير مسرحيات بحال هكا ديما فاش تيكون معايا البراني.. باش انا نخاف على حياتهم ونقبل بالعرض ديالو..
كريس تنهد: كاملين عارفين ذكاءك وذهاءك.. ويلا دخلتي للمافيا اتكوني عنصر فعال.. فعلاش مباغاش..
نسرين: صحيح انني مصابة بعمى الالوان التام.. وتنشوف غير الكحل والبيض.. ولكن تطلعي للحياة فيه الوان.. ماباغاش ندفن راسي فداك العالم.. عمي مات برصاصة تاع بوليسي.. وبابا مات برصاصة مافيوزي.. والعامل المشترك بيناتهم هو انهم قبلو يخدمو مع جدي..
كريس: خايفة على راسك..؟
نسرين: خايفة على لي داير بيا.. ماما ومرات عمي وولد عمي ماتو غير بسباب حرب العصابات.. وانا نجوت بأعجوبة.. ولكن فقدت الالوان والعائلة بسباب ديك الحرب..
كريس تنهد مرة اخرى: جدك مصمم انك دخلي..
نسرين: وحتى انا مصممة على العكس.. وصل هاد الرسالة لجدي.. اسرار المافيا كولها فيدي.. جميع الصفقات والحلفاء والاعمال لي دار من نهار دخل للعصابة حتى لليوم عندي.. توقع ليا انا ولا لي قريب ليا شي حاجة ولو تكون بسيطة.. غادي نسى انه جدي.. وايشوف الحرب لي طول عمرو هارب منها..
كريس وقف: رسالتك اتوصل.. (دور عينيه على لي كارد وضحك) لحد الساعة مصدوم كيفاش قدرتي تقلبي لي كارد لصفك..
نسرين: حيت لي كارد دياولي من الاساس.. (غمزاتو)
خرج كريس تيضحك.. حتى تم داخل آدم تيطرطق فعنقو..
آدم: شنو وقع اميس..
نسرين تبسمات فوجهو: وجد دي لوطو.. انمشيو للقصر.. وعندي الضياف..
آدم: امرك ميس..
تم خارج آدم وهو مبلونطي مفاهم والو.. في حين نسرين دارت عند دراري لي كانو غير جالسين تيرمشو.. عياو استوعبو مالقاو مايفهمو..
نسرين تتشوف فشوقا وصحابو: سمحولي على هاد الشي لي وقع اليوم.. كنت ضاربة لحساب لكولشي الا انكم اتكونو حاضرين..
دراري بقاو تيشوفو فبعضهوم.. وشوقا غير ساكت وتيشوف فيها.. فيح صحابها نطقات وحدة منهم..
- نسرين..
نسرين شافت فيها: مانحتاجش نوصيكم.. اي حاجة بخصوص هاد الليلة من الافضل تنساوها.. لصالحنا كاملين..
- وي عرفت.. وبكن راني تصدمت.. دابا جدك مافيوزي..
نسرين تبسمات جنب: قريب ما ايبقاش هكك.. اليوم انا عارضة عليكم للعشاء.. واخا مشا الحال ولكن ماشي مشكل.. انتعشاو فطبلة وحدة مع جدي.. (طرطقو عينيهم فيها خلاوها ضحك على ردة فعلهم) ديجا قلت ليكم ما ايبقاش.. الليلة ايعتازل.. انا واثقة.. (شافت فشوقا لي غير ساكت وتيشوف فيها ماعرفاتش فاش تيفكر) قابلين عراضتي..؟
بقاو تيشوفو فيها لثواني حتى نطق نام..
نام: باش انعرفو حنا بين ماشي فخ باش تخلصو منا..
نسرين تبسمات ببرائة وشدات فيد شوقا جاراه: ماعندك مناش تخاف.. حيت ما انقدرش..
تمات حارة شوقا لي غير ساكت.. حتى حسات بيهم تابعينهم.. وخرجو من الفضاء لقاو لوطويات مستفين تما تيتسناوهوم.. ودارت شافت فيهم..
نسرين: ركبو فلوطو لي بغيتو معامن بغيتو.. الصحافة مكايناش.. يعني خوذو راحتكم..
تنهدو تيشوفو فشوقا لي تيوميلهوم بعينيه بالموافقة.. وركب كل واحد لوطو لي بغا.. وهي جرات شوقا ناحية لوطو حمرة..
نسرين: ركب..
شوقا: لياش تتخططي ثاني..
نسرين وساعت إبتسامتها: ياك بغيتيني نبقا معاك.. (شافتو ايهضر وسبقاتو) الى بغيتينا نبقاو بزوج ركب..
شوقا تنهد وركب لور.. وهي ركبات حداه.. والشيفور كسيرا بيهوم ناحية القصر تاع عائلة كاستيلو لي كاين فمانهاتن.. اكبر وارقى حي فنيويورك.. ومن وراهم لوطويات صحاب شوقا ونسرين.. لي الطريق كولها وهوما تيدويو على داكشي لي وقع.. من غير نسرين وشوقا لي غير ساكتين.. حتى تنهد شوقا وقدر ينطق بداكشي لي زاعجو..
شوقا: يعني نتي تتلبسي الكحل حيت غير هو لي تتشوفي..؟
نسرين تبسمات تتشوف قبالتها لثواني.. عاد شافت فيه ونطقات بهدوء محافظة على ابتسامتها..
نسرين: تنشوف الكحل والابيض ودرجات من الرمادي..
شوقا: شنو وقعليك..؟
نسرين: سي تنلبس الكحل حيت هو الوحيد لي نقدر نلبسو وانا مرتاحة.. ماتنقدرش نشوف الالوان يعني ما انقدرش نسق بيناتهم..
تقاد شوقا فجلستو تيشوف فيها مباشرة فعينيها..
شوقا: واش تتعمدي تهربي من سؤالي..؟
نسرين: نو.. كنت انجاوبك عليه دابا..
شوقا: تنسمع..
نسرين: كان فعمري ست سنين فاش تخطفت مع ماما ومرات عمي وولدها.. لي خطفونا كانو اعداء المافيا تاعنا.. ديجا عمي كان ميت.. وبابا حاول ينقذنا.. ومات قدام عيني برصاصة جات فقلبو.. (حنات راسها تتشوف فيديها) ونتيجة التشابك بالرصاص واحد الرصاصة طائشة قاست خزانات فيهم مواد كيميائية ووقع انفجار لي ماتو فيه باقي عائلتي.. وانا تضررو عيني.. تما فين فقدت القدرة نشوف فالالوان..
شوقا كان تيشوف فيها وهو متأثر بهضرتها.. حتى لمح قطرة تاع دموع طاحت على يديها.. وهو يمد يدو حطها فوق الدمعة.. وزير عليها حتى شافت فيه بعيونها الحومر..
شوقا: عائلتك باقا حية.. (شير لقلبها) باقا حية فقلبك.. متأكد ايكونو فرحانين دابا.. داكشي باش خصك تكوني حتى نتي فرحانة..
نسرين تبسمات وسط دموعها.. وقربات منو معنقاه وهو بادلها العناق.. حطات راسها على صدرو وغمضات عينيها تشتم فريحتو وهي فرحانة.. وطغى الصمت المكان مرة اخرى..
》》... نهاية فلاش باك•
...إيلا بحماس: وشنو وقع فداك العشا..
يونغي: جدها استقبلنا بحرارة وفرح بينا.. كان عشاء كبير.. او بالاحرى وليمة..
الابن المتوسط: كيفاش قنعات جدها يخرج من المافيا..
يونغي ضحك بخفة: كولشي تضربلو الحساب.. تتخلينا كاملين مبلونطيين..
إيلا: مافهمتش.. يعني دارت شي خطة اخرى..؟
يونغي: الخطة لي دارت هي لا خطة.. دوات بالعاطفة وجبداتلو ولادو لي خسر من داك العالم الكحل.. حركاتلو قلبو من جديد بعد ما غمل وسط ريتو.. وزعزعاتو بخبر.. بغيت نقول زعزعاتنا كاملين..
إيلا بدات ترمش فيه: اشمن خبر..
يونغي تبسم: انها حاملة..
الابن المتوسط: قلت ليكم سخفات فتيران حيت حاملة..
يونغي ضحك عليه: لاا.. سخفات حيت جهاد عليها الضو بشكل كبير خلاها دوخ.. حيت صحاب عمى الالوان التام تتكون عندهم حساسية من الضوء العالي.. داكشي باش ماماكم تتفضل الظلام والاماكن المعتمة..
الابن البكر: دابا فهمت.. بؤبؤ عينيها تيتحركو بزاف فاش تتكون فشي بلاصة فيها الضو مجهد.. وتتغمض عينيها.. واخا تتكون دايرة ليلونتي..
يونغي: وي..
إيلا بحزن: مسكينة ماما.. ولكن اتكون تتشوف الالوان بوضوح بالنظاظر ولا لا..؟
يونغي نفا براسو مع ابتسامة خفيفة: لا.. النظاظر وليلونتي غير تيوضحولها النظر.. اما الالوان تتشوف غا الكحل.. والابيض.. ودرجات من الرمادي..
إيلا: وعلاش ما تتلبس دوك الالوان..
يونغي: الابيض تيعكس الضو بزاف يعني ايعميها.. والرمادي ما تترتاحش فيه..
إيلا شبكات يديها فرحانة وتتشوف فباباها بعيون تتلمع: عارف عليها كولشي..
الابن المتوسط: كمل لينا ابابا..
يونغي: ديك الليلة كانت النقطة الفاصلة فتغيير حياة نسرين.. وحياة جدها حتى هو.. هضرات حتى بح صوتها.. ونشفو دموعها..
》》... فلاش باك- قبل 37 عام•
...جالس كل من شوقا وصحابو فجهة من الطبلة.. وقبالتو نسرين وحداها صحابها.. والجد مترأس الطبلة.. كانو تياكلو فجو مشحون وصامت.. تيتسمع غير صوت الفراشط والكيسان..
حتى نطق الجد كاسر الصمت بصوتو الأجش والحاد..
الجد: ماكنتش متوقع انك شي نهار اتقدري تهدديني انسرين..
نسرين توقفات على الماكلة وشافت فيه: ما تنهددش..
الجد: وشنو درتي اليوم..
نسرين: اليوم غير حذرتك اجدي.. حذرتك من شري.. كان عندك الحق فاش قلتي دمكم الاسود تيجري فعروقي.. وهاد الدم هو لي ايحرقكم كاملين..
الجد: باغا تمردي.. علاش.. (شاف فشوقا وصحابو) على قبلهوم..
نسرين: على قبلي.. وقبلك.. وعلى قبل جميع الابرياء لي ممكن يتآذاو من هاد العالم القذر..
الجد ضحك بسخرية: هازة حتى هم البراني..
نسرين: هازة الهم ناخذ ذنب شي واحد وانا مدايرة والو.. (حطات يديها على كرشها) هازة الهم لولدي.. مانبغي حتى حاجة تآذيه.. وانا قادرة نحرق كولشي فسبيل أمانو هو وباه..
وسعو عيونهوم كاملين فيها.. الجد بدا تيكحب من الصدمة حتى مد يدو لكاسو برجفة وبدا وشرب جغمة.. في حين شوقا بقا تيشوف فنسرين مصدوم.. حتى شافت فيه بلامحها الهادئة..
نسرين: مبروك عليك.. اتولي أب..
صحابو شهقو مصدومين ومامثيقينش.. اذن علاقتو بنسرين متطورة وهوما على بالهوم يالاه بدات.. وشوقا غير تيشوف فيها وساكت.. تلجم لسانو.. ماعرف مايقول ولا شنو يدير.. تشللو تعابير وجهو وبقاو غير فملامح الصدمة.. ولكن اللاوعي ديالو تيفكر وهو خايف.. القضية فيها طفل.. وطفلو من الفوق.. اذن حياتهوم دابا اما اتعقد كثر مامعقدة.. اما اتحل كثر مامحلولة..
فاق من صدمتو فاش نطق الجد بعصبية وصوتو تيتقطع..
الجد: مستحيل هادشي.. مستحيل تكوني حاملة.. واش تتحماقي عليا..
نسرين شافت فيه بإبتسامة بريئة: علاش تتقول هكا.. من حقي تا انا نولي ام..
الجد فقد اعصابو: فاش اتولي الكابو دالعصابة ماخصكش تكوني ام.. خصك تكوني متخلصة من اي يد ممكن توجعك.. ايهددوك بيه انسرين..
نسرين: وانا قلت ليك بغيت نولي ام.. وماباغاش عصابتك..
الجد رجع سكت ساهي فالفراغ لثواني طويلة خلا الجو يتكهرب اكثر.. لي حاضرين حاسين بحاليلا عايشين وسط شي فيلم اكشن ورعب فنفس الوقت.. بالكشايف باش قدرو يستوعبو انهم دابا فعرين مافيا.. عامر كولو رجال مسلحين ومدربين.. والكابو ديالهوم حمق فأي لحظة يعطي أمر إبادتهوم كاملين.. ونسرين تتزيد تستافزو بهضرتها..
حاسين بحلقهوم ناشف.. وكل ماتيشوفو فملامح شوقا ونسرين لي هاديين تيرتاحو نوعا ما.. حيت باينين بحاليلا عارفين شنو تيديرو.. نسرين بهضرتها وشوقا بصمتو.. واخا مزال مامستوعبين بيمن متورطين..
صحاب نسرين عمرهم ظنو انهم مصاحبين حفيدة مافيوزي.. وصحاب شوقا عمرهم ظنو ان صاحبهم طايح مع مافيوزية.. ولقاو راسهم طايحين تاهوما فهاد العالم.. لي ممكن يخرجو منو بلا روح..
تكسر الصمت المرعب لي كانو فيه فاش نطق الجد ببرود.. وهو تيزير على الكاس دالما بين يديه وساهي قدامو..
الجد: هادشي علاش كنتي تتمثلي انك بريئة باش حتى واحد مايشك فيك.. (شاف فيها) كانت خطتك انك تبقاي عايشة وسط منا ودايرة راسك مامسوقاش.. حتى تقدري تجمعي الأدلة لي يورطونا..
نسرين بدات تتقطع فقطعة لحم ببرود بيد وحدة بقلة عقل: لصالحنا بزوج اجدي..
الجد زدح كاسو على الطبلة حتى تفزعو كاملين: ماتستافزينيش انسرين.. اشمن مصلحة علياش تدوي.. واش نحضي راسي من اعدائي ولا من حلفائي..
نسرين حطات الموس وشافت فيه: عمرني كنت حليفتك.. انا حفيدتك.. والحفيدة ماشي بالضرورة تكون حليفة..
الجد: ملي ماشي حليفة اذن عدوة..
نسرين: تاواحد.. انا باغا نبقا بعيدة على التخربيق ديالكم..
الجد بحدة: ماشي تخربيق..
نسرين بحدة اكثر: لا تخربيق.. جشعكم وطمعكم فالفلوس والسلطة عما عيونكم وقلوبكم.. بسبابكم ماتو بزاف دالابرياء.. بسبابكم تورطو بزاف دالناس.. حولتوهم من ناس عاديين باغيين غير يعيشو هانيين لوحوش متعطشة للد* م.. عمرني جيت لعندك اجدي وقلت ليك بسباب هاد التخربيق فقدت عائلتي.. بابا مات قدام عيني.. ماما ماتت فانفجار لي المفروض نكون مت فيه حتى انا.. ولكن انا عشت.. (تطبطب على صدرها) عشت باش نتفكر داك النهار كل مرة غمضت فيه عيني.. ويجي منظر الرصاصة لي ختارقات قلب بابا قدام عيني.. ونعاود نسمع الانفجار لي فقدت فيه ماما وألوان عيني.. ست سنيييين اجدي.. كان فعمري غير ست سنوات.. الكوابيس عمرهم ماملو انهم يلاحقوني.. كتائبت ومرضت ونتا بحاليلا مكاينش فهاد العالم.. فين جدي راه مشا لصفقة.. فين جدي راه مسافر لمنطقة.. (صوتها تخنق بالبكا) بغيت غير حياة هادئة وبسيطة.. حتى هاد الفلوس والبذخ ماعندي ماندير بيهم الى مايقدروش يأمنولي عائلة دافئة تحتاويني.. نتا اجدي قتلتي كل ماهو زوين فيا.. عييت نمثل بين انا بيخير.. كيفما حتى نتا عييتي.. (بداو دموعها ينزلو فاش شافت عيون جدها تيلمعو بالدموع) حتى نتا تتحسر على موت ولادك.. وعلى حياتك وشبابك لي مشاو فطريق خايبة.. حتى نتا ضحية.. حيت تزاديتي وسط داك العالم ولقيتي راسك مجبور تنضم ليه.. ولكن لو انك تجرأتي وقاومتي.. ولو غير شوية.. ماكناش انوصلو لهادشي كامل.. (زدحات يديها مع الطبلة) درت كل مافجهدي باش تخرج من داك العالم وتعيش مابقا من حياتك فسلام.. ورطت جميع اعداءك مع البوليس.. محيت جميع سجلات صفقاتك المشبوهة.. جميع الادلة لي ممكن يورطوك مابقاوش عند اعداءك.. عندي غير انا.. وغادي يبقاو عندي حتى للحظة لي اتقرر واش تكمل ولا تحبس من هادشي.. الى قررتي تكمل فالادلة ايوصلو للبوليس كيف درت مع لاخرين.. ويلا العكس انحرقهم.. (وقفات وشافت فيه بعيون باردة متحجرة وحمرة بحال الجمرة فيها غا طيف الدموع لي حبسو فجأة) فرصة ثانية جات حتى لبين يديك.. عرف تستاغلها.. حيت الى ماعرفتيش اتخسر كولشي..
تمات مغادرة الطبلة وقلبها مقبوض عليها.. ماحسات حتى طاحت فالارض مغمى عليها.. وناض شوقا بالزربة لعندها تيصرفق فوجهها باش يفيقها.. خايف لاتوقع ليها شي حاجة وهي حاملة..
حتى تمات جاية خدامة هازة كاس دالماء ورشو على وجهها.. وبدات تحرك فبؤبؤ عينيها وهي ساداهوم عاد رتاح قلبو..
شوقا: فين بيتها..
- تبعني امستر..
تحنى هز نسرين بين يديه.. وتم تابع الخادمة خارجين من الصالة تحت انظارهوم كاملين.. من غير جدها لي باقي غير ساهي وصدى كلماتها تيتسمعو فوذنيه..
في حين شوقا بقا تابع الخادمة لي داتو للسانسوغ وطلعو بزوج.. دقائق حتى تفتح فالطابق لي فيه بيتها.. بقاو غادين بهدوء حتى وصلات للباب وفتحاتو.. وتم داخل تيدور فعينيه.. كان جناح كبير فيه كثرت البيبان بالكحل.. والوسط صالة فيها دي فوطوي فالكحل.. وجدرانها بالرمادي.. ماعرفش فين البيت لي فيه السرير.. حتى نطقات الخادمة وهي تتنعتلو..
- من هنا امستر..
فتحاتلو باب البيت الثاني.. ودخل لسريرها لي كان بالكحل وحطها عليه بهدوء.. وجلس حداها تيمسح على خدها بحنان..
شوقا: نسرين..
نسرين مغمضة عينيها: همم..
شوقا: فتحي عينيك..
بقات ثواني وهي مغمضاهم.. عاد قدرات تفتهم ببطئ شديد.. وبداو دموعها ينزلو.. غير شافت شوقا تبدلو ملامحها الهادئة لملامح الحزن والبكاء.. ومدات يديها باش تعنقو وهو تحنا لعندها معنقها وهي مسطحة على سريرها..
شوقا: ماتبكيش انسرين..
نسرين: بغيت نفس على راسي.. عمرني دويت فهاد الموضوع.. وعمرني بكيت عليه باش نفش قلبي.. واليوم جابتها الفرصة.. غير خليني..
شوقا تنهد وبعد منها تيحد فسباطو.. وستلقى جنبها حاط راسو على صدرو تيتلمس شعرها.. وهي تتشهق بهدوء ودموعها دايزين حتى فزكات حوايجو.. فين هو بقا غير تيشوف فالسقف حاس بالضياع.. الحاجة الوحيدة لي عارف.. انه ايولي اب وخصو يتحمل مسؤوليتو..
دقائق وهوما على داك الحال.. حتى سمع دقات خفاف.. وصوت جدها من ورا الباب تيطلب اذن الدخول..
شوقا: جدك..
نسرين تقادات فجلستها تتمحي دموعها: قولو يدخل..
تبسم فوجهها وقرب تيمحيلها دموعها مزيان.. وبساها فجبهتها..
شوقا: بقاي قوية..
تبسمات فوجهو بذبول.. ووقف تيقاد حوايجو.. وقصد الباب فاتحو..
شوقا: تفضل اجدي..
شاف فيه الجد بدون تعابير لثواني.. حتى تبسم فجأة ونطق ببشاشة..
الجد: شكرا اولدي.. (شاف فنسرين لي كانت جالسة فوق السرير تتشوف فيه) واخا تخلينا بزوج..
شوقا: اكيد..
تم خارج ساد عليهم الباب.. ومشا تيتفحص الصالة مخليهم على خاطرهوم..
في حين الجد قصد السرير وجلس فطرفو حدا نسرين.. ومد يدو تيمسح ليها على راسها..
الجد: حفيدتي الغالية كبرات واتولي ام..
نسرين بعيون لامعة: جدي..
الجد: عندك الحق فأي حاجة قلتيها.. نادم.. ونادم بزاف على لي درت.. خسرت ولادي وحفيدي بسباب هاد العالم.. وماقادرش نزيد نخسرك حتى نتي.. كانت نيتي نخليك قوية مورايا.. كابغيتهومش يآذيوك.. ولكن بعد لي شفت اليوم.. عرفتك ماشي من النوع لي ساهل يتآذى..
نسرين: شنو قررتي اجدي..
الجد تبسم: من ديما كانت عندي رغبة نخرج من المافيا.. ولكن ماكانتش عندي الجرأة.. وتنظن اليوم كتاسبتها منك..
نسرين بفرحة: يعني..
الجد وساعت ابتسامتو: يعني وداعا لمافيا العقاب..
نسرين غوتات بالفرحة وعنقات جدها مزيرة عليه حتى كانت اتقجو.. ماحسو غير بشوقا فتح عليهم الباب بإندفاع ووقف منداهش فيهم..
شوقا: مالك غوتي..
الجد طرطق بالضحك: دابا تولف نسرين فاش تتكون فرحانة تتغوت كثر من هاكا..
شوقا تيحك فمؤخرة راسو: راني شفت لمحة..
بداو تيضحكو بثلاثة.. حتى تم نايض الجد قاصد الباب..
الجد: ماتعطلوش ونزلو عند صحابكم.. راه بقاو مشطونين عليكم..
نسرين: واخا اجدي..
خرج ساد عليهم الباب.. وهي بدات تتحاول توقف..
شوقا: خليك مرتاحة..
نسرين: انا مرتاحة.. (وقفات شادة على ضلعها) الطيحة لي طحت تقصح بيها ضلعي ولكن ولفت..
شوقا قرب منها: اذن نعسي ترتاحي..
نسرين: لا.. (شدات يدو) خليني نوريك البيت لي كبرت فيها.. ونوريك حيواني الاليف..
شوقا تبسم: فينو..
نسرين جراتو خارجين من بيت النعاس.. وقصدات باب بيت مسدود.. فتحاتو وتفتحو معاه عيون شوقا بالدهشة.. كان بيت عامر بالاقفاص نتاع الطيور وكبارين.. ووسط منهم طائر العقاب..
شوقا شاف فنسرين بدهشة: العقاب هو طائرك الاليف..؟ راه من الطيور الجارحة انسرين..
نسرين ضحكات على ردة فعلو: سي.. ولكن انا ربيتهوم منين كانو صغار وولفوني..
شوقا رجع تيشوف فالطيور وتم داخل تيدور فيهم عينيه.. وهي اه تتسميليه كل واحد بشنو سماتو.. والنوع تاعو ووقتاش تزاد وكيفاش رباتو.. حتى نطق مقاطعها..
شوقا: علاش ختاريتي العقاب بالظبط لي تربي..
نسرين تبسمات: حيت هو عكسي تماما.. بحاليلا تيكملني.. انا عندي ضعف فالنظر وعمى الالوان.. وهو تيتعتابر اكثر الطيور لي عندهم حدة فالنظر.. بصرو اقوى من بصر الانسان العادي بربعة حتى لثمنية دالاضعاف.. وتيميز الالوان بشكل واضح..
شوقا بقا تيشوف فيها لثواني.. حتى قرب منها وحط جبهتو على جبهتها.. وغمض عينيه منتاشي بعطرها لي دوخو.. وهي دارت بحالو متسمتعة بقربو ليها..
شوقا بهدوء: نتي ما تتقدريش تشوفي الالوان حيت مريضة.. ولكن انا ما تنشوفهمش واخا مامريضش.. حياتي كانت كولها كحلة.. حتى دخلتي ليها ولونتيها.. بغيتك من اللحظة الاولى.. بدموعك.. برائتك.. ضحكتك.. ذكاءك.. سذاجتك.. مرحك.. حنانك.. عصبيتك.. بفستانك الاسود.. تنبغيك انسرين..
نسرين فتحات عينيها لي بداو تيقطرو بالدموع.. ولكن مزال حاطة جبهتها على جبهتو.. لقاتو مزال مغمض عينيه.. وهي تبسم فرحانة.. كانت تتقول ان الدنيا مانصفاتهاش فاش دات ليها لي عزسز علسها.. ولكن عوضاتها.. بشوقا وبولدهم لي فكرشها..
》》... نهاية فلاش باك•
...فاقت من سهوتها فاش نطق سائق السيارة وردات معاه بالو..
- الطريق عامرة امدام..
نسرين شافت فانعكاسو فالمرايا الامامية: دوز من طريق اخر..
- امرك مدام..
...عند يونغي لي بقا تيشوف فولادو وهو تيعاود اخر احداث قصتو..
يونغي: ديك الليلة بكات هي وجدها تابكينا معاهم كاملين.. واعدها انه ايبعد من المافيا.. وكملات ديك الليلة بيخير.. رجع كل واحد لشغلو ونسرين رجعات معايا لكوريا.. (ضحك) جاها الوحم عليا..
إيلا ضحكات: معذرو طلع تيشبه ليك..
يونغي: تقدمت ليها للزواج فأمريكا.. وبعد شهراين تقريبا تزوجنا.. كان عرس كبير فيه عائلاتنا حنا وصحابنا.. درناه فكوريا.. لبسات كسوة دالعرس فالكحل كيف شفتها اول مرة.. غير هاد المرة ختاريناه بزوج.. كان عرس بقد ماهو كبير بقد مابسيط.. بزوج بينا ماعندناش مع البروتوكولات الخاوية.. ونتج على زواجنا ربعة دالولاد.. (شاف فإبنو البكر) تشين.. (شاف فالابن المتوسط) بيكهيون.. (شاف فالابن الاصغر) سام.. (شاف فبنتو) إيلا..
بيكهيون: قصتكم زوينة ابابا..
يونغي تبسم: وي زوينة.. (بهمس) زوينة بزاف..
طلع راسو فباب الصالة حتى لمح صحابو داخلين وهوما ضاحكين.. كانو معاهم زوجاتهم وولادهم.. ضحك ببشاشة وناض لعندهم تيسلم عليهم..
يونغي: فرصة زوينة انكم حضرتو كاملين.. ماتصوروش فرحتي..
نام: سمعنا بين ولادك تجمعو.. وقلنا نجيو كاملين..
تسالمو كاملين وجلسو فالصالة شي حدا شي.. الصحاب ولفو بعضهم وولادهم كبرو مع بعضهم.. وتحولات صداقتهم لعائلة كبيرة..
بقا يونغي تيشوف فيهم ناشطين مع بضعهم.. فرحان بزاف وكثر من القياس.. مدة ماتجعات العائلة هاكا.. ناقصاه غير نسرين.. واتكون كملاتليه الصورة لي باغي..
يونغي تم نايض: نخليكم دابا.. (شاف من زاج الصالة بانتلو الشتاء خفافت) عندي مايدار فالجردة..
تم مغادر الصالة تحت انظارهم.. متأثرين بقصتو وماكرهوش تجي نسرين تكمل اللمة لي مدة ماكملات.. حيت عارفين مزيان قيمة نسرين فقلب يونغي.. وقيمة يونغي فقلب نسرين..
...كان غادي بهدوء تيتعكز على عكازو.. حتى خرج للجردة الامامية نتاع القصر.. لقا الشتاء خفيفة وغير تتنقط نقاط صغيرة.. تبسم وعلى راسو فالسماء منتاشي برائحة المطر مع التراب والربيع.. ومناشي بذكرياتو معاها.. حتى حس بيها ضماتو من ظهرو ملوية يديها على صدرو وحاطة راسها على ظهرو..
نسرين: توحشتك..
يونغي تنهد فرحان: جيتي..
نسرين: ماقدرتش نزيد نطول كثر من هاكا..
يونغي شد يديها حيدهوم من صدرو.. ودار لعندها شاد يديها بين يديه.. بقا تيشوف فعينيها لي تيرجفو وولفهوم هكك.. كبرات وبانو معالم تقدم فالسن على وجهها.. ولكن باقية زوينة.. باقية ديك الشابة لي شافها اول مرة بفستانها الاسود.. وباقية بنظرتها البريئة واللامعة وابتسامتها الساحرة..
حتى نطق كاسر الصمت لي دار بيناتهوم..
يونغي: نتي لي بغيتي تمشي بوحدك..
نسرين تبسمات: كنت حاسة اتجمع العائلة من ورايا.. ويلا مشينا بزوج ما انشوفوهومش.. خليتك هنا باش تشدهوم على مانرجع..
يونغي: كيف دازت الجنازة..
نسرين تنهدات: مؤلمة.. فارقت آخر واحد كان من عائلتي.. آدم.. واخا كان فالاول غير كارد.. ولكن رجع اخ وسند ليا..
يونغي حط جبهتو على جبهتها: حنا مزالين معاك..
نسرين مغمضة عينيها فرحانة: عارفة..
يونغي غمض عيونو تاهو: وكأنكِ خُلِقتِ من عتمة اللّيل.. قلبُكِ قمر وعينيكِ نجمتين..
نسرين تبسمات: لغتك العربية تحسنات..
يونغي فتح فيه عينيها: بفضلك..
كوك من وراهم: طبيعتكم هي طبيعتكم..
نسرين فتحات عينيها ورمقاتو بشوفتها النارية.. حتى نطق وهو تيشير ليها بيديه..
كوك: الا دوك الشوفات انسرين.. تتخلعيني..
طرطقو بالضحك كاملين.. وحتى من العائلة لي كانو خرجو باش يشوفوهم حيت صحابو كانو عارفين بقدوم نسرين.. هي لي طلبات منهم يجيو للفيلا يتحمعو من جديد..
كانت جابت معاها مصور محترف.. باغا صورة عائلية كبيرة تعلقها فالصالة تاع الفيلا ديالهم..
جلسو مجموعين فالجردة فاش حبسات الشتاء.. نسرين وشوقا دايرينهم الوسط.. وصحابهم جالسين جنابهم.. وولادهم واقفين موراهم.. وحفايدهم واقفين جنابهم.. حتى نطق المصور..
- ابتاسمو..
ضحكو كاملين فرحانين حتى تسمعات صوت الكاميرا.. وأخيرا كملات الصورة لي كانت باغي شوقا..
● طلع الجينيريك●
تمت والحمد لله..
رأيكم 🖤💜
أنت تقرأ
فستان زفافها الأسود (مكتملة)
Romance✒ فستان زفافها الأسود.. ✒للكاتبة: Nina Rim ✒صنف القصة: دراما و رومانسية ✒نوع القصة: قصة قصيرة 》● ومن ليالي ديسمبر الباردة ليلتان.. لإحياء القلب وقتله كفيلتان.. لم أكن أعلم عن الحب سوى الدموع.. وحياة مظلمة لا تضيئها شموع.. ظه...
