كلامو حسسني انها مسكينه و محتاجه لشغل!...انا شايفاها بت ناس برجوازيين فـ ليه هو قال كدا و حسسني إنها عكس كدا؟
المهم تاني يوم مشيت الشركه و طوالي مستر هشام نادانا في قاعة الإجتماعات و كان معاهو الكريه داك ، قال لينا طبعاً امبارح ما ركزنا في حتة إنو ممكن واحد منكم يغش و يدفع مبلغ من عندو عشان يزيد بيهو الترويج للمنتج مع انو ما اعتقد واحد منكم يخالف القواعد و يعمل كدا بس حنغير الفكرهـ ، و حـ نقسم المنافسه لـ جزئين كل الجزء الأول هياخد 10 أيام و التاني 5 أيام فقط، الجزء الأول حـ تشيلوا كميه من المنتج و تمشوا بيها السوق العربي و بطريقتكم و أسلوبكم لازم تبيعو المنتج دا ، نحنا حنديكم كمية العشرين يوم دي كلها و انتوا اتصرفوا و بيعوها و لو في قروب باع المنتج كلو خلال اسبوع أو أقل يعني قبل المده المعينه يلي هي 10 أيام المنافسه حـ تنتهي و القروب هو الحـيفوز ، و زي ما شايفين قدامكم أربع منتجات من صناعة الشركه و هم : شنطة جلد ، هاي هيلز ، فساتين ، إكسسوارات ، جلاليب ، و و و و الأسعار مرفقه معاهم ، كان ممكن نصعب التحدي و نختار ليكم منتجات كهربائيه بس علشان هي غاليه و صعب تتباع إخترنا ليكم الحاجات البسيطه دي و الممكن تتباع بسهوله ، انتوا أربعين نفر فـ حيكون في 10 قروبات ، قدامكم دقيقه كل قروب يتشاور فيها و يختار المنتج البناسبو.........إتلمينا انا و حاتم و أريج ، و أرجوان دي ما جات إلا بعد ما حاتم قال ليها تعالي يا أرجوان ، لمن جات حاتم قال لينا رايكم شنو نختار الإكسسوارات! راقيه شديد و البنات بحبوها و متأكد اننا حـ نبيعهم بسهوله ، قلت ليهو خلينا اول شي نشوف اسعار المنتجات الـ 10 كلها و على الأساس دا نختار منتجنا ، لمن شفناهم لقينا انو الفساتين أغلاهم بـ 14ألف و هاي هيلز بـ 8 ألف و شنط الجلد بـ 13 ألف و الإكسسوارات كانت طقم فخم و رفيع بـ 6ألف ، و الجلاليب 11 ألف و باقي المنتجات الخمسه الباقيه كانت بنفس سعر الجلاليب، قلت ليهم الأسعار دي مقارنة بحال البلد غاليه شديد! أريج قالت لي و الأكعب اننا حـ نبيعها في سوق عام يعني ما في مول أو مكان تجاري كدا صاحب ماركه! معروف يعني اسعار الحاجات الزي دي في الأسواق العامه أرخص بكتير من أسعارنا دي! من هسي بقولها ليكم ماف زول حـ يشتري مننا ، أرجوان قالت ليها في فرق بين منتجاتنا دي و باقي الحاجات البتتباع في الأسواق العامه ، ديل خاماتهم أصليه و جودتهم عاليه و ديلك كلهم قوقو ولا شنو ما بعرف المهم عشان كدا رخيصات ، حاتم قال ليها المواطن بقى ما بهمو خامة المنتج أو هو مصنوع من شنو أو جاي من وين ، همو كلو بقى في السعر ، الناس بقت تسأل عن السعر أول حتى بعدها تسأل جودة و خامة المنتج ، أريج قالت ليهو طيب هسي نختار شنو؟
فجأه جانا صوت عدنان و هو بقول شباب خلوني أنبهكم على حاجه مهمه ، الما شاف اسعار المنتجات دي كلها يجي يشوفها....... المهم بعد ما الناس شافت الأسعار قال ليهم زي ما عارفين كل قروب حـ ياخد كميه معينه من المنتج يعني ما كلكم حـ تاخدوا نفس الكميه ، الهيختاروا الفساتين عدد كميتهم حيكون 25 و الهياخدوا شنط الجلد عدد الكميه الهتاخدها 35 ، و الهيختاروا ، الجلاليب كميتهم حتكون 45 ، و ناس الهاي هيل حياخدوا 55 قطعه ، و ناس الإكسسوارات 60 قطعه فهمتوا؟
قالوا ليهو ايوه فهمنا ، أرجوان قالت كدا صعب علينا الإختيار! اذا اخترنا الأرخص كميتو حتكون كبيره و العكس! أريج قالت غيتو انا شايفه انو نختار الهاي هيلز لأنو البنات بهتموا بيهو شديد و هيتباع سريع ، أرجوان قالت ليها لا لا الإكسسوارات أحسن ، حاتم قال ليها أنا معاك يا أرجوان ، الإكسسوارات هتتباع بسهوله ، قالت ليهو خلاص اتفقنا هقول لـ هشام اننا هنختار الإكسسوارات ، قبل ما تنطق حرف قلت ليها لا ما حـ نختار الإكسسوارات ، هنختار الفساتين ، قالت لي لا انتِ أكيد مجنونه بـ سعرهم دا فستان واحد ما هنبيعوا! قايلانا هنعرضهم في مول إنتِ؟
ما رديت عليها ، إتلفت على حاتم و أريج و قلت ليهم فكروا معاي كويس ، لو أخترنا الفساتين حناخد 25 قطعه و بس و كدا حنبيعهم بسرعه أحسن ما يكون عندنا 35 أو أكتر و ما تنسوا إنو معانا 10 أيام بس ، طبعاً اثناء ما انا بتكلم كان في قروب اختار الإكسسوارت ، أرجوان قالت لي شفتي ديل مفتحين كيف طوالي اختاروا الإكسسوارات ياخ انتِ وحده م......حاتم قاطعها و قال ليها أرجوان! نحنا قروب و لازم نتعامل كـ قروب! قالت ليهو و دا المفروض يحصل بس هي جنّها تعترض على أي حاجه! عايزا تعاكس الناس و تمشي كلمتها!
ما رديت عليها إتلفت على مستر هشام و قلت ليهو نحنا حنختار الفساتين ، إبتسم و قال صراحةً كنت حاسس إنك هتختاري الفساتين يا مها ، طوالي عدنان عاين لي ، أرجوان بصوت عالي قالت لي دا غباء منك ما أكتر و......سكتت لمن لقت مستر هشام بحمر ليها! ....شميتها شديد والله! جنها تسئ الزول قدام الناس ، المهم كل قروب إختار منتجو ، عدنان قال لينا المنافسه حـ تبدا الساعه 11 يعني بعد نص ساعه ، كلكم هتمشوا السوق العربي و هتنتشروا هناك و بطريقتكم و أسلوبكم هتبيعوا منتجاتكم ، بتقدروا تستخدموا عربات الشركه عشان تاخدوا بيها بضاعتكم ، المهم قال كدا و طلع و وراهو طوالي طلع مستر هشام ، أريج قالت لينا خلونا نمشي الكافتيريا نفطر و نستعد للمنافسه ، فعلاً مشينا الكافتيريا فطرنا و بقينا نتناقش في الحنعملوا ، طبعاً أنا و أرجوان خالص ما بنتفق لو هي اتكلمت أنا بسكت و العكس ، المهم لمن زمن المنافسه جا العربات شالت لينا المنتجات و ودتها السوق العربي و ورونا الموقع ، حاتم قال لينا لازم نمشي بعد دا ، أرجوان قالت ليهو بالمواصلات يا حاتم؟ قال ليها أكيد ، قالت ليهو لا ياخ هسي هشام دا لو عمل لكل قروب ترحيل مالو؟!!.....أريج و حاتم ضحكوا على كلامها و قالوا ليها ارح ارح ياخ! قالت ليهم لا دقيقه خلوني أكلمو و فعلاً مشت كلمتو و واضح ردو كان شنو بس هي كذبت و قالت ما لقتو ، طبعاً عرفنها بتكذب بس ماف زول كتر معاها ، قلت ليهم شباب خلونا نمشي بعد دا! ....أول ما طلعنا كدا جانا صوت عدنان و هو بقول أرجوان! كلنا إتلفتنا عليهو ، قالت ليهو ايوه ، جانا قريب و قال لينا أنا ذاتي طالع و لحسن حظكم حـ أمر بالسوق العربي فـ تعالوا أوصلكم معاي ، أريج قالت ليهو ما حابين نتعبك معانا ، قال ليها ماف تعب و طوالي مشى قدامنا و هم مشوا وراهو لغاية ما وصلوا عربيتو ، حاتم ركب معاهو قدام و أريج و أرجوان ركبوا ورا و أنا عملت نفسي بتكلم بالتلفون لمن هم بقوا ينادوني ، في الآخر مشيت عليهم و أنا لسه خاته التلفون على أضاني عشان أوهمهم انو في موضوع مهم شاغلني ، قلت ليهم انتوا أمشوا بحصلكم بعد شويه ، أريج قالت لي ليه في شنو؟ ....قلت ليها لا لا ماف حاجه و......قبل ما أتم كلامي عدنان دور عربيتو و إتحرك! ....حسيت بحرقه في قلبي و حسيت إني شويه كدا و هـ أبكي! .....قلت يا مها المزعلك شنو؟ مش دا الكنتِ عايزاهو إنتِ؟ مالك هسي! ما يمشي كان مشى!
اول ما هم مشوا كدا أنا طوالي مشيت الموقف و لسوء حظي ما لقيت مواصلات للعربي! قالوا الحافلات بتجي هسي فـ بقيت واقفه في الشمس ديك و حاتم و أريج بتصلوا علي ساي ، في الآخر رديت عليهم و قلت ليهم جايه جايه ، وقفت مسافه كدا بعدها جات حافله ركبت و مشيت ليهم ، لمن وصلتهم لقيتهم معلقين الفساتين و واقفين ساي و أرجوان دي بتجوط بأعلى حس ! لمن شافتني قالت لي تعالي يا عبقرينو بيعي لينا الفساتين دي! مش براك اخترتيهم! حاتم قال لي شكلنا ورطنا نفسنا يا مها ، ما أظن نبيع شي! أرجوان قالت ليهو عشان تاني تسمعوا كلامها ، بقت تجوط فيني و تعلي في صوتها لمن كل الناس ركزت معانا بس خالص ما رديت عليها ، حسستها كأنها كلبه و بتنبح ، فتحت تلفوني و عملت فيديو قصير كدا و إتكلمت فيهو عن الفساتين و خامتها و متانتها و جودتها و سعرها و في الختام وريتهم اننا في السوق العربي و إنو الكميه محدوده ، بعد ما خلصت الفيديو و نزلتو في التيك توك و اليوتيوب ، أرجوان ربعت لي يدينها و قالت لي الليله لو ما جا زول إشترى مننا هكتلك ، شويه كدا جوا بتين زميلاتنا في الشغل ، قالوا لينا لسه ما بعتوا حاجه؟ أرجوان قالت ليهم بزهج شايفين شنو إنتوا؟ ....وحده منهم قالت ليها خلاص ما تتزهجي في زول قال ليكم اختاروا الفساتين! صحبتها قالت ليها ارح ارح مالنا و مالهم المهم اننا بعنا 4 من منتجنا 😌
قالوا كدا و مشوا و أرجوان دي إتحرقت حرقه ما عاديه و لو عليها تخنقني ، بقينا نقابض في الناس و نعرض عليهم الفساتين ، كلهم بقيفوا و بشوفوها و بقولوا رهيبه و أول ما يعرفوا سعرها بمشوا طوالي ، استمرينا كدا لحد الساعه 4 ، حاتم مشى جاب لينا سندوتشات و جا ، أرجوان ما رضت تاكل و لمن نحنا شلنا السندوتشات قالت لينا كمان عندكم نفس تاكلوا؟
أريج قالت ليها بطونا ذنبها شنو؟ يعني لو ما أكلنا الفساتين دي حـ تتباع؟ ....حاتم قال ليها روقي يا أرجوان و بطلي قلق و أمسكي السندوتش دا هتقعي من طولك لو ما أكلتي ، قالت ليهو نحنا وقعنا و إنتهينا ، قال ليها أمسكي ياخ! قالت ليهو بزهج قلت ليك ما عايزا ، المهم لمن 5 و نص جات أرجوان شالت شنطتها و قالت لينا انتوا اسوأ قروب و ما هتعب نفسي معاكم و طوالي مشت ، حاتم قال لي بعد دا الزمن اتأخر ، أريج قالت ليهو و البضاعه دي هنوديها وين؟ عربات الشركه هتجينا تاني؟ قال ليها آي و فعلاً إتصل عليهم و جاتنا عربيه شالت لينا البضاعه و رجعتها الشركه ، حاتم سألنا أنا و أريج ساكنين وين عشان لو طلعنا كلنا من نفس الحته او بنركب نفس المواصلات نمشي سوا ، بس للأسف هم الإتنين مواصلاتهم طلعت وحده و أنا براي ، أريج قالت لي بتخافي؟ قلت ليها أخاف من شنو يعني؟ عاينت لي بزعل كدا و ما اتكلمت تاني ...حاتم قال لي خلاص تمام يا زوله يلا يا أريج خلينا نمشي ، هم مشوا لمواصلاتهم و أنا بقيت لافه بفتش على مواصلات بحري لحد ما فجأه كدا عدنان طلع في وشي! ....والله إتخلعت لأنو فجأه كدا ظهر و من شدة الخلعه ختيت يدي على قلبي! ياخ هو ما عندو شغله غيري! حاساهو مخلي شغلو كلو عشان يقعد يلاحقني! ....طلّع نظارتو و قال لي بالمناسبه انتوا ما مجبورين تقعدوا لحد الزمن المتأخر دا و بعدين السوق العربي دا إنتِ ما بتعرفي الفيهو عشان تقعدي للزمن دا؟
قلت ليهو و إنت مالك! مسؤول عني ؟ اقعد هنا للعصر للمغرب للعشا ما عندك بي شغله ، شوف شغلك بوين! و بعدين بس أثبت لي انو جيتك دي صدفه! .....ربع يدينو و قال لي و منو القال ليك صدفه؟
سكته و مشيت خليتو ، جاني صوتو و هو بقول لي مواصلات بحري ما هنا ، ما إتلفت عليهو ، تاني لحقني و المرهـ دي وقف قدامي و قال لي متين هتبطلي حركاتك دي؟ قلت ليهو حركاتي؟
قال لي بضيق ايوه حركاتك البايخه دي! قبيل كنتِ عارفه اني لمن قلت ليكم خلوني أوصلكم عملت كدا عشانك بس مع ذلك عملتي نفسك مشغوله و قلت امشوا بحصلكم بعدين!؟ عايزا تصلي لشنو إنتِ؟
طبعاً كان بشاكلني عديل! قلت ليهو انت المتين تبطل حركاتك دي! انا بالواضح كدا قلت ليك بكرهك و ما عايزا اتعامل معاك بس انت مُصر تبيخ نفسك و تقعد تتهابل معاي كدا! قال لي دا هبل؟ انتِ شايفه كدا؟
قلت ليهو ايوه هبل و عدم موضوع منك، ياخ انا اتكلم معاي بأي لغه عشان تفهم انك ولا شي بالنسبه لي! ما معقوله وين ما أمشي ألقاك لاحقني ، هز لي راسو و قال لي تمام يا ستي أصلاً انا الغلطان ، شكلك كنتِ عايزا ليك فرصه عشان تتخلصي مني و الحصل كان أكبر فرصه ليك و استغليتيها! قلت ليهو ئهه! عايزا لي فرصه؟ يعني انا في شي كان جابرني عليك عشان انتظر فرصه! قال لي على فكره انتِ وحده أنانيه و ما بتشوفي الأمور إلا من وجهة نظرك الكلها غلط في غلط ، كنتِ عامله نفسك انسانه متفهمه و بتحس بكل الناس بس في الحقيقه انتِ قبل ما تخدعي الناس بشخصيتك المزيفه ديك كنتِ بتخدعي نفسك و بتطمنها انك انسانه نقيه و متفهمه و دايماً مظلومه ، قلت ليهو الوصلت ليهو دا كلو بسببك و بسبب الغيرك ، انتوا الحولتوني و خليتونا اتعامل معاكم بالمثل ، قال لي كذابه انتِ لا اتغيرتي بسببي لا بسبب غيري ، ولا اقول ليك انتِ أساساً ما اتغيرتي و أسلوبك و طريقتك الهسي دي كلها كانت فيك من زمان بس كنتِ بتمثلي دور الملاك ، عموماً ما عايز أكتر معاك بما انك بتضايقي لمن اتكلم معاك ، كل الحـ اقولو ليك يا معا اني حاولت أكتر من مرهـ أكسبك و اصلح الحصل و أبدا معاك صفحه جديده ، انتِ الحاجه الوحيده الإتمسكت بيها للآخر ، قلت ليهو بعد ليان طبعاً 😏 انا نفسي انك تبطل كذب ، نفسي لـ مرهـ وحده بس تقول لي انو ليان هي الوحيدهـ الإنت حبيتها و لحد اللحظه دي انت بتحبها ، أنا كنت مجرد خيار في حياتك و يمكن عشان طلعتك من عزلتك و اتعاملت معاك حسيت نفسك بتحبني و أوهمتني بالحاجه دي بس أول ما ليان ظهرت مشاعرك بانت على حقيقتها ، انت ما حبيتني انت بس إتعودت علي و حقيقةً انا بقيت ما بثق فيك و في مشاعرك و أساساً بعد الحصل مستحيل نرجع لبعض ، لو كان الإخلاف بيني و بينك بس كان ممكن اتجاوز و يمكن نحلوا بس الخلاف ما بشملنا نحنا الإتنين بس بشمل أهلي و ديل بالنسبه لي خط أحمر و مهمها بلغت درجة حبي ليك ما بفضلك على أهلي ، قال لي تمام يا زوله ، ما كنت عايز نصل للمرحله دي بس خلاص وصلناها و دا العايزاهو إنتِ و المره دي قولاً و فعلاً البينا إنتهى و انا طاقتي خلصت و ما قادر اعمل حاجه تاني......
لمن حسيت انو دموعي هتجري خليتو واقف و مشيت ركبت طوالي و أول ما قعدت كدا ما قدرت أمسك دموعي ، بكيت كدا لمن الجنب كلهم بدوا يسألوني الحاصل عليك شنو ، طول الطريق ببكي و بتذكرو زمان و هسي ، كلامو القالو لي لسه بتردد على مسامعي ، حسيت قلبي بنزف دم و شويه كدا حـ اطرشق من الزعل ، رغم اني الخليتو يقول كدا بس بالجد اتوجعت لكن ما كان في خيار تاني كوني اسامحو و ارجع اتعامل معاهو تاني زي زمان كدا كأني بخون أهلي و برخصهم 💔
لمن وصلت البيت ما اتفاهمت مع زول ، قلت ليهم مصدعه و ما عايزا أي كلام كتير ، مع ذلك مزن جات لاحقاني و قالت لي الصداع دا سببو عدنان مش؟
قلت ليها بصوت متحشرج ما تجيبي لي سيرتو ، قالت لي ما أختك أنا؟ ناسيه زمن كنتِ تجي و تحكي لي كل البحصل معاك؟ هسي الإتغير شنو لمن بقيتي تدسي مني؟ ....قلت ليها بصوت باكي اقول ليك شنو اذا انا ما قادره افهم نفسي! متأكده اني ما هقدر افهمك البحصل معاي و لو فهمتي هتزعلي مني ، قالت لي ماف زعل إنتِ بحس أحكي لي.......يومها فتحت ليها قلبي و بديت احكي و احكي كل تفصيل و شعور صغير أنا حاسه بيهو ، حكيت ليها بأي حاجه بحس بيها و الحيره و الدوامه الأنا فيها ، حكيت ليها لحد آخر موقف حصل بيني و بينو يلي هو قبل ما أجي البيت ، لمن خلصت هي سكتت مسافه بعدها قالت لي دا معناهو إنو عدنان بحبك! قلت ليها ماف كلام زي دا الأولاد ديل طبعهم كدا بجروا ورا البت البترفضهم و أول ما يصلوا ليها بعلقوها فيهم و في الآخر بخلوها معلقه كدا و بمشوا بس متى ما الواحد فيهم حس انو البت دي خلاص قنعت منو و شالتو من حياتها برجع ليها تاني و بكرر نفس حركتو ، قالت لي لكن انتِ ما شلتيهو من حياتك! ....الفهمتو يا مها إنو انتِ لسه بتحبي عدنان بس عشان مازن و ماما و بابا ما عايزا تديهو فرصه! مها انتِ ليه ما بتفكري بمنطق! ليه فجأه كدا بقيتي أنانيه؟ شوفي انا من حكيتي لي المره الفاتت انو سامي قال ليك انو عدنان ما كان عارف والله حنيت عليهو و عذرتو بس عشان انتِ قلت انك شلتيهو من حياتك قلت ماف داعي اجيب ليك سيرتو تاني و اقول ليك اعذريهو ، قلت ليها أعذرو شنو يا مزن ، انتِ كيف قادره تتعاطفي مع واحد كان مستعد يسجن أخوك؟
قالت لي اذا انتِ خاصمتيهو و دستي على مشاعرك و حاولتي تكرهيهو عشان كان هيتسبب في سجن مازن فـ ليه ما قادره تفهمي انو عدنان برضو داس على مشاعرو و انهى البينكم لأنو الماتت دي أمو و المتهم كان مازن ، زي ما انتِ فضلتي اخوك عليهو هو كمان فضل أمو عليك ، على الأقل مازن طلع برئ و هسي هو بيناتنا بس عدنان يا مها ما هيلقى أمو تاني ، قادره تتخيلي كيف انو الموضوع دا كان صعب عليهو ، يعني بكل أنانيه كنتِ عايزاهو يخلي الكتل أمو طليق حر يسرح و يمرح زي ما عايز عشان خاطر إنك ما تزعلي؟ قلت ليها بس مازن ما هو الكتلها! قالت لي دا هسي بس زمان كان في نظر كل الناس هو الكتلها و انا بتكلم عن الماضي ، نفترض انو مازن كتلها و عدنان عشانك ما سجنو هل كنتِ هتقدري تعيشي معاهو عادي كدا و انتِ عارفه انو اخوك هو الكتل أمو؟ خلينا منك هل هو هيقدر يتعايش مع أخت الكتل أمو؟ يعني حتى لو في البدايه وافق عشانك ، ما حيستمر معاك كدا طول الحياة و كل ما عينو تقع عليك هيتذكر انو اخوك كتل أمو و بأكد ليك انكم ما كنتوا هتستمروا مع بعض ، عشان كدا بطلي أنانيه يا مها...و و ....الخ
غيتو كلامها بكاني زيادهـ ، بدل ما تبرد قلبي و تطبطب علي زاد علي الوجع 💔
تاني يوم ما مشيت الشركه و اتصلت على حاتم و كلمتو اني عيانه ما هـ اجي ، بعد ما قفلت منو بدقيقتين جاني اتصال من رغم غريب ، اول ما فتحت الخط جاني صوت أرجوان و هي بتقول لي : اسمعيني هنا ماف حاجه اسمها عيانه ما بقدر أجي ، اخترتي اصعب منتج و عايزانا نتعب فيهو برانا؟ شفتي لو عايزا تموتي و باقي ليك ساعتين بس تجي تشتغلي معانا و تموتي في باقي الساعه التانيه ،.....خليتها جاطت قدرتها و بعدها قفلت الخط في وشها و قفلت تلفوني بالمرهـ ، رجعت تاني لإكتئابي الزمان ، اليوم كلو ما أكلت كويس و قضيتو نوم بس ، اليوم البعدو برضو ما كنت ناويه أمشي و ذاتو كرهت الشركه و الشغل بس كنت مجبوره أمشي ، اول ما وصلت الشركه أرجوان استلمتني ليك و ما خلت كلمه سيئه ما قالتها لي و أنا دا كلو ما حسسني انو لازم أرد ، كنت حاسه بخمول و ضعف ما عادي ، مشيت مكتبي و فتحت الكمبيوتر و قعدت أعاين فيهو بس ما كنت مركزه معاهو ، شويه كدا حاتم و أريج جوني و قالوا لي بقيتي كيف؟ قلت ليهم كويسه ، حاتم قال لي ما تركزي مع أرجوان و ما تهتمي بكلامها هي طبعها كدا ما بتقدر تسكت و تتحكم في نفسها بس من جوه هي كويسه ، هزيت ليهو راسي بس ، أريج قالت لي بالمناسبه أمبارح جوا 3 أنفار و قالوا إنهم شافوا الإعلان في قناتك حقت اليوتيوب و جوا عشان يشوفوك و يشتروا منك بس ما لقوك لكن مع ذلك اشتروا مننا يعني باقي لينا 22 فستان ، قلت ليها كويس ، حاتم قال لي وين حماسك؟ قلت ليهو فترانه أنا ، قال لي أي واضح ، المهم بعد ما خلصنا شغلنا مشينا السوق العربي رغم انو أريج و حاتم قالوا لي لو تعبانه أرجعي البيت بس قلت ليهم لا ، طبعاً أرجوان لمن سمعتهم قالت ليهم ترجع ليه؟ شفتوا لو عايزا تموت لازم تمشي معانا ، قلت ليها ما منتظره أوامر منك من دون ما تتكلمي كنت همشي ما أنا البنسحب من منافسه ، المهم عدا أسبوع ما شفت فيهو عدنان تاني أما الشغل اجتهدت فيهو شديد و بقيت انزل فيديوهات جذابه عن الفساتين حـتى اننا صورنا فيديو كويس كدا و خلينا أريج و حاتم يمثلوا فيهو ، حاتم مثل إنو خطيبها و هي زعلت منو بسبب حاجه تافهه و عشان يراضيها جاب ليها واحد من الفساتين دي طبعاً الطريقه الراضاها بيها و قدم بيها الهديه هي الخلت الفيديو ينتشر بين الشباب خاصة البنات ، يعني ببساطه نحنا استفدنا من عاطفة البنات و عملنا الفيديو دا و الحمدلله في أسبوع بعنا 13 ، يعني باقي لينا 12 ، أرجوان قالت لينا ما تفرحوا ساي ناس الإكسسوارات باقي ليهم شويه و الشويه ديل لو كلموا بيهم أماتهم و اخواتهم براهم بشتروها و بتكمل عندهم ، 12 دي إنتوا شايفنها شويه عشان تفرحوا كدا ، ناسين إنو 3 أيام بس ؟
ماف زول فينا رد عليها بس ما أكذب إني حسيت بالإحباط لأنو باقي 3 أيام بس ، في اليوم البعدو صابنا إحباط ما عادي لأنو لسه ما بعنا شي من 12 الباقين و أرجوان لومها لي كتر لدرجة إني حسيت بالذنب و بقيت ألوم في نفسي ، عدوا التلات أيام من دون ما نبيع شي و المنافسه خلصت و أرجوان دي شويه كدا و كانت حـ تكفتني.......مستر هشام بعد يومين من إنتهاء المنافسه جمعنا كلنا و مدحنا من دون فرز و قال لينا كلكم ما قصرتوا بس حسب المنافسه هنختار 5 قروبات فقط ، أكتر قروب باع أكبر كميه هو قروب......الهاي هيلز ، طبعاً ناس القروب قعدوا يصرخوا من شدة الفرح ، بعدهم طوالي قروب الإكسسوارات و بعدهم الجلاليب ، بعدهم ناس الجيمبسوت ، لمن وصل القروب الرابع دا أنا خلاص يئست و قربت أبكي و أرجوان دي من قبيل بتحمري لي و بتقول لي دا بسببك ، مستر هشام سكت مسافه بعدها ضحك و قال أعصابكم تلفت و متشوقين تعرفوا القروب الخامس صح؟ قالوا ليهو اي قول قول أعصابنا يخ ، قال ليهم القروب الخامس و السادس دا الفرق بيناتهم منتجين فقط ، يعني لو القروب السادس دا باع منتجين بس كانوا هيتعادلوا و لو كان باع تلات منتجات كان هيكون هو القروب الخامس......قروب .....قروب الشنط ، طبعاً لمن قال كدا أنا عديل دموعي نزلت و أرجوان شغاله لي دا كلو بسببك و حاتم لحاول يهدي فيها و ديلك مبسوطين ساي ، مستر هشام قال ليهم سبب معليش خلوني أكمل كلامي هسي انا ما قلت ليكم حاجه! ....منتجين بس هم الخلوكم تكونوا في المرتبه السادسه فـ المرتبه الخامسه من نصيب قروب الفساتين ، طبعاً انا ما صدقت! أريج قعدت تصرخ و تقول اتأهلنا للمنافسه التانيه اتأهلنا يا جماعه ، ختيت يدي على قلبي و قلت الحمدلله طبعاً أرجوان لسه كانت مكشره ، حاتم ضحك و قال ليها كنت شايل ليك هم والله تقومي تموتي بسبب المنافسه دي 😂 اضحكي ياخ ما خسرنا ، قالت ليهو ما خسرنا لكن كنا على حافة الخساره لو ديلك اجتهدوا شويه بس كانوا حيكونوا مكانا يعني نحنا كأننا انكتبنا بقلم رصاص ، أريج قالت ليها واااي أنا منك يا أرجوان يا بت خلي النكد و أفرحي شويه ، حاتم قال ليها أنا عارف البروقها شنو ارح ارح عازمك آيسكريم ، أريج قالت ليهو و أنا و أنا! ...قال ليها خلاص كلكم معزومين بمناسبة نجاتنا من الخساره ، مستر هشام قال لينا انتظروا تفاصيل الجزء التاني من المنافسه بعد بكرا ، قلنا ليهم تمام ، بعدها حاتم قال لينا يلا اختاروا مكان ظابط أعزمكم فيهو ، قلت ليهم أنا أعفوني تعبانه و عايزا أمشي البيت ، قال لي يا بت مالك انتِ؟ أريج قالت ليهو الإتنين ديل بحبوا النكد و الزعل زي عيونهم! ......طوالي أنا و أرجوان عاينا لبعض بس بغيظ كدا ، قلت ليهم معليش بس اعفوني ، أرجوان قالت لي أمشي ساي يعني ماف زول هيموت لو إنتِ مشيتي ، حاتم قال ليها أرجوان! كل حاجه ليها حدود! بطلي البتعملي فيهو دا! قلت ليهو خليها اصلاً اللسان الأعوج عمرو ما بتصلح .....طبعاً هنا هي هاجت و فارت و دفعت و تعالوا شوفوا كواريكها و صوتها العالي ، حاتم و أريج قفلوا اضنينهم و قالوا لي لو عندك سماعات طلعيها و ألبسيها ، قلت ليهم همشي البيت أحسن ، طبعاً كلامنا دا فورها زياده ، سيرتني لحد الباب و هي لسه بتصرخ و بتتكلم ، ولا رديت عليها طلعت و مشيت البيت ، غصب عني بقيت اتسائل عدنان مشى وين! ......قلت ما تشغلي بالك اصلاً دي حركاتو يغيب شهر و يجي يوم بكرا بلقاهو في وشي ، المهم بكرا لمن مشيت كنت متوقعه انو أشوفو بس لحد نهاية اليوم ما شفتو ، طبعاً في اليوم البعد اليوم دا مستر هشام أدانا تفاصيل المنافسه التانيه ، جاب لينا 5 أسامي لشركات كبيره و قال لينا المره دي حتاخدوا نفس المنتج ، كل قروب قدامو نص ساعه يبحث فيها عن الشركات الخمسه دي و يختار الشركه البعتقد انو بقدر يتعامل معاها و خلوا بالكم الـ 5 دي ما كتيره و ما تظنوا إنو الموضوع ساهل لأنو الخمس شركات دي تحديداً ما بتتعامل ما أي زول و ما بقتنعوا بسهوله و غير كدا عشان تقابل زول منهم يمكن تحتاج يومين أو تلاته حتى يفكروا يقابلوك ، فـ اتصرفوا و اعرفوا اتعاملوا معاهم المهم عملنا المطلوب و كل قروب اختار شركه طبعاً المره دي سكته ساي و ما اخترت أي شركه خليتهم يختاروا هم عشان بعدين أرجوان دي ما تعمل لي وجع راس ، المهم المدهـ كانت 3 أيام ، كيف كيف قدرنا نقنع الشركه و خليناهم يشتروا مننا الكميه كلها ، و بيجاي بيجاي نحنا الفزنا و الأربع قربات ديك وزعوا ليهم مبالغ ماليه و نحنا كمان أدونا مبالغ أكبر منهم بالإضافه للرحله الما قالوا لينا هتكون وين ، مستر هشام قال لينا انتوا أجهزوا بس و الرحله دي حتكون خلال اسبوع أسبوعين كدا ، هنرتب ليها و نديكم خبر ، قلنا ليهو تمام ، طبعاً اليوم داك كان أول يوم أشوف فيهو أرجوان دي بتضحك! ضحتها كانت بصدق كدا يعني ما ضحكة الشماته الكانت بتضحكها ديك لا لا ضحتها دي كانت غير لمن استغربت فيها! !
المهم مر يوم و اتنين و تلاته و عدنان دا إختفى عديل و ماف زول قاعد يجيب سيرتو و انا الشركه دي بقت لي النار ، كلام سامي بقى بتاع إنو عدنان قبل كدا حاول ينتحر بقى يدور لي في راسي ، خفت شديد انو يعمل حاجه في نفسو أو يكون عملها بس لو كانت حصلت ليهو حاجه كل الشركه هتعرف......حاولت اشيلو من بالي و اتصرف بشكل طبيعي بس ما قدرت و التوتر إتملكني ، بعد أسبوع من الكلام دا مستر هشام نادانا أنا و أريج و حاتم و أرجوان في مكتبو و قال لينا إنو الرحله هتكون بعد يومين و الوجهه هي منتج الرهد السياحي لمدة أسبوع ، قالوا ليهو تمام و كانوا متحمسين شديد إلا أنا ، قلت ليهو انا ما حابه أمشي ، قال لي المكان ما عجبك ولا شنو؟
قلت ليهو لا ما كدا بس ما عندي نيه أمشي ، قال لي تمام ماف زول هيقدر يغصبك على حاجه ، بعد ما طلعنا منو أريج قالت لي بالجد إنتِ وحدهـ متخلفه و بليده! ما ماشه ليه يعني؟ حاتم قال ليها يمكن أهلها ما بخلوها! قالت لي اهلك خليهم علي بقدر أقنعهم ليك ، قلت ليها أهلي ما عندهم مشكله بس أنا ما عايزا أمشي و خلاص ، قلت ليهم كدا و مشيت خليتهم ، رجعت لـ شغلي بس والله ما قادره اشتغل و حاسه نفسي مخنوقه شديد! شويه كدا أريج و حاتم و أرجوان جوا داخلين و اصحابهم بدوا يسألوهم عن الرحله هتكون وين و متين ، فـ وروهم ، رزان صحبة أرجوان قالت ليهم حظكم والله و الحاجه القاهراني إنو عدنان ماشي معاكم اخخخ يا قلبي 😭
طبعاً لمن قالت كدا قلبي انتفض! قربت امشي و اقول ليها منو القال ليك كدا ، أريج قالت ليها اخخخ بس ما هقدر أوصف ليك كمية سعادتي اتخيلي نمشي رحله مع عدنان ، من هسي قاعده اتخيل ، رزان قالت ليها اسكتي و ما تزيدي علي الوجع ببكي ليكم هسي دي ....ما بعرف بس اتصرفي يا أرجوان ، عايزا أمشي معاكم أنا 😭
أرجوان قالت ليها حظك حلو ، في خانه فاضه ، يعني هتقدري تمشي معانا بكلم ليك هشام ، قالت ليها كيف ما فهمت؟ قالت ليها في بلا و انجلى قال ما ماشي معانا ، قالت كدا و عاينت لي ، رزان طوالي فهمت و عيونها بقت قلوب قلوب و أنا الحرقه عايزا تقتلني! أرجوان دي كريها و حيوانه! كدا ياداب شميتها كويس! بقيت اعاتب في نفسي عتاب حاد كدا و اقول ما كان استعجل و اقول ليهم ما ماشه و تاني بتراجع و بقول عايزا تمشي ليه انتِ؟ عدنان دا منو عشان تفكري فيهو و تمشي الرحله عشان تشوفيهو! .....بقيت في صراع نفسي و ما عارفه اعمل شنو و فوق داك قلبي ما ريحني و حسيتو بعتصر من شدة الوجع ، رجعت البيت و انا وشي عايز يقع مني من شدة الزعل ، أخدت بكيتي و بعدها قلت ما تهتمي يا مها انسيهو و شيليهو من بالك و الرحله دي ما حـ أغير رأيي بخصوصها ، رقدت في السرير و أول ما خمدت عيوني و نمت حلمت إنهم مشوا الرحله و رزان الوقت كلو كانت لاصقه في عدنان و هو ما كان عندو مانع و الوقت كلو بضحك معاها و بونسها و أمورهم باسطه! صحيت من النوم و دمعتي في عيوني و قلت أصلاً الرجال ديل حيوانين و خاينين ، أنا بكرهـ عدنان بكرهو شديد 😭😭😭
و ما همشي الرحله دي ما هـ امشيها 10 مرات و مستحيل أغير رأيي بلا عدنان بلا رزان ، بلا يخمهم الإتنين
- ظَنَنْتُ ..
أَنَّ قَلْبَكَ سَـ يُخْبِرُكَ يَومــــاً
بـِ انتظاري ...!
بـِ بَعْض الشَّوْقُ الَّذِى يجرفني إلَيْك
وَ بَعْض الْأَنِينِ الَّذِى يَنَالُ مِنًي كُلَّ لَيْلَةٍ ..
- ظَنَنْتُ ..
أَن غيابكَ لَن يَطُول
أَنَّ بَعْضَ مِنْك يُرْحَلُ إِلَيَّ ..
- ظَنَنْتُ ..
أَنَّ قَلْبَك سَـ يُخْبِرُك إلَى أيَّ قُيُودٍ
أوصلتني .. إلَى ذلك الصَّمْت القاتل
- ظَنَنْتُ ..
وَ لَكِنْ أَدْرَكْت الآنَ .. أَنَّ بَعْضَ الظّن إثْم ! 💔
لـ كاتبه
يتبع........
