عدت فترة أسبوع كدا لاقيت فيها أرجوان مرتين و اتكلمت معاها بخصوص موضوعها و مازن أخوي في البدايه كانت رافضه بس في اللقاء التالت قالت لي بفكر ، المهم يومها لمن رجعت البيت بابا و مازن نادوني .....لمن مشيت ليهم ماما كانت بتتكلم معاهم بنبره عاليه و هي زهجانه ، لمن وصلتهم كانت بتقول ليهم اعملوا العايزنوا و بس انا يدي رافعاها من الموضوع دا ، جات مارهـ بجنبي و هي بتعاين لي بنظرات كلها غضب ...قلت لـ بابا خير في شنو؟
أشر لي عشان أجي و اقعد جنبو و فعلاً مشيت قعدت جنبو و انا مستغربه و مرهـ اعاين ليهو و مرهـ أعاين لـ مازن! ....بابا اتنهد و قال لي ولد الناس دا انتِ عايزاهو؟
قلت ليهو بخلعه منو؟
قال لي عدنان.....طبعاً إتخلعت! ....انا ما نسيتو بس اتناسيت موضوعو و قلت تجي كيف ما تجي ما هـ ارهق نفسي بالتفكير! ....كدا فهمت ماما كانت بتجوط ليه و ليه عاينت لي بالنظرات ديك و طول ما ماما ما موافقه انا كمان ما هـ أوافق ....قلت ليهو لا ما عايزاهو ، مازن قال لي كذابه والله ، قلت ليهو ماف شي بخليني اكذب! ...ما عايزاهو والله! دي الحقيقه....بابا قال لي ما موافقه بسبب امك ولا دا قرار من عندك؟
قلت ليهو من عندي ، مازن قال لي يا زوله! !!
سبب رفضك الأساسي كان انا و عشاني ما رضيتي تديهو فرصه تانيه و حرمتي نفسك من سعادتك ....احب اقول ليك اني ما عندي مانع و بيني و بينو ماف أي عداوه و اخوك الخايفه و زعلانه عليهو دا ذاتو ما هين 😂 و بالمناسبه عدنان هو الطلعنا من حكاية المخ***درات ديك و طلع عزام منها ، ما كدا برضو زمان حصلت و طلعنا من ورطه كبيرهـ بسبب الموضوع دا هو و أبوي ، يعني هو كان عارف انا شنو بس مع ذلك ما عايرني و ما جاب ليك سيره .....
طبعاً إنصدمت! !معقوله عدنان ذاتو عارف! !
بعد مسافه قلت ليهو برضو ما موافقه ، قال لي ما على كيفك! قلت ليهو هتغصبني يعني؟
قال لي ايوه ...بابا قال ليهو ما تغصبها على حاجه يا مازن هي مدام قالت ما موافقه فـ خلاص خليها على راحتها و نحنا أكيد ما هـ نجبرها على زول ...مازن قال ليهو لا يا أبوي انا عارفها كويس و عارف الحاجات الهي بتحبها و البتكرهها ، انا بعرفها أكتر من نفسها .....قلت ليهو انت ناسي الكان هيعملوا خيلانو فيك ولا ناسي كيف هم شالوا من بابا مبالغ كبيره و حتى بعد ما الحقيقه ظهرت ما رضوا يرجعوها ليهو!
قال لي شوف موقف عدنان ما بتعاتب عليهو لأنو دي أمو ، أما بالنسبه لخيلانو فهو ذاتو متبري من عملتهم و هو الرجع لأبوي قروشو بعد ما عرف بالحصل ....قلت ليهو يااااخي! !! و انت عرفت من وين ؟و ليه واثق كدا؟
قال لي سامي حكى لينا الحصل و ورانا المر بيهو عدنان كلو بس عملنا نفسنا رايحين و ماف زول فينا جاب ليك سيره عشان ما نذكرك بيهو و بالمناسبه عدنان جا لحد البيت و اعتذر مننا و كان طالع العفو و السماح من أبوي و قال عايز يطلع يدك بس كلنا رفضنا ، اتكلم معانا كتير بس من دون فايده و في آخر كلام قلنا ليهو لو عايز العفو و السماح فـ نحنا عافيين ليك لكن ما عندنا بت نديها ليك ، طبعاً دا قبل ما تخلي الشغل و برضو ما جبنا ليك سيرة الموضوع دا لحد اللحظه ديك ما كنا عارفين انكم بتشتغلوا في نفس الشركه.....طبعاً طبعاً إنصدمت و شديد كمان! ...متين دا عدنان خالص ما جاب لي سيرهـ! ...يمكن بعد اليوم الرسل لي فيهو سأل اذا مشكلتي اهلي و بس!.....بلعت ريقي و قلت ليهم برضو ما موافقه و عن إذنكم ، طلعت منهم و مشيت غرفتي و انا بالجلاله ماسكه دموعي.....عدنان كان حاجه حلوهـ في حياتي و أبداً ما بنكر انو لحد اللحظه دي نفسي نكون سوا بس الموضوع ما بيدي.....بعد يومين من الكلام دا تلفوني رن ....من الرقم عرفت إنو دا عدنان ...طوالي اتذكرت كلام خالتو و العهد الأخدتو على نفسي ...لمن كرر الإتصال قلت هـ ارد و أفهمو و فعلاً اول ما فتحت الخط قلت ليهو يا عدنان زي ما قلت ليك نحنا انتهينا و انا والله تاني ما ناقصه ذنوب و ما عايزا اتكلم مع أي ولد أو اتعامل معاهو ، ياريت تحترم الحاجه دي و ما تتصل تاني لأنو نحنا ولا يمكن نكون مع بعض بالأحسن نرضى بقسمتنا و نواصل حياتنا.....بعد مسافه قال لي و دا العايزو انا ، لو ما كنتِ غاليه ما كنت فكرت اجيك بالباب و كنت عديتك زيك و زي اي بت بقضي بيها زمن بس انتِ ما كدا و انا ذاتي بقيت ما عايز يكون في شي بيناتنا خارج إطار الزوجيه عشان كدا و للمرهـ التانيه طلبتك من أهلك و المرهـ دي قالوا إنتِ الرافضه فـ بس ممكن تديني سبب واحد لـ رفضك؟ ...قلت ليهو كفايه انو أمي ما موافقه و انا مستحيل اقبل بحاجه هي ما راضياها ...قال لي تمام يا زوله و على طول قفل الخط و انا بعدو بكيت قدرتي بس قلت كدا أحسن ، بقيت ببكي و بمسح دموعي لغاية ما سمعت صوت ماما و هي بتقول لي انا موافقه....لمن رفعت راسي لقيتها واقفه جنب الباب ، قلت ليها ما توافقي عشاني انا اصلاً ما هـ اقبل بحاجه انتِ ما عايزاها ....قالت لي إنتِ طلعتي أحسن مني ، عادة البنات بخالفوا كلام أمهاتم و بقيفوا ضد أهلكم عشان الزول المتقدم ليهم او ناوي يتقدم بس انتِ ما عملتي كدا ...طول عمرك كنتِ خاته رضاني أول أولوياتك حتى و نحنا ظالمنك ما إعترضتي ....قلت ليها رضاي برضاكم ...جات ضمتني عليها و قالت لي بتي الصغنتوته بقت زوله كبيره و واعيه و كمان جاهزه للعرس ....قلت ليها لا ما عايزا ....ضحكت و قالت لي يا بت انا جاده والله و موافقه عليهو ..مش عدنان دا؟ والله ما عندي مانع ...ضميتها شديد و قلت ليها بحبك يا ماما ، قالت لي و أنا كمان ....
المهم بعد اسبوع من الكلام دا عدنان جا و معاهو عماتو و أعمامو و اتقدموا لي و المرهـ دي قالوا ما عايزين خطوبه عقد طوالي ، فـ اتفقت مع عدنان انو نعمل عرس بسيط و اساساً انا غير العقد و الجرتق ما عايزا حاجه ، في البدايه هو رفض بس فـ الآخر وافق بعد إصراري ، أرجوان برضو بعد ما وافقت على مازن أخوي قالت عايزا عرس بسيط فـ قررنا نعمل العرسين مع بعض ....المهم عديت شهر و اسبوع محبوسه و بدينا ترتيبات العرس و أريج يوم معاي و يوم مع أرجوان و رزان دي ما عرفت عنها شي غير انها خلت الشغل في الشركه بعد ما عرفت إنو انا و عدنان هـ نعرس ، ما بنكر اني زعلت عليها بس كل شي قسمه و نصيب ....لمن كان باقي للعرس 3 أيام روان و ميامن جوني و دي كانت المره التانيه مع اني ما عزمتهم و أرقامهم ذاتها ما كانت عندي بس أكيد مستر هشام كلم روان و هي بدورها كلمت ميامن ، طبعاً مزن كانت شاماهم شديد بس حذرتها ما تسألهم هـ اعتبرهم ضيوف بس و أكرمهم ، أما سماهر دي خالص ما شفتها و ما قاعده تجي معاهم ...متأكده انها سمعت انو مازن هـ يعرس بس تاني بأي عين هتجي و تورينا وشها؟
المهم يوم العقد كنت متوتره شديد و قربت اقول ليهم خليت العرس دا و ذاتو ما عايزاهو ...لمن قالوا عقدوا ماما و مزن جوني أول ناس و قعدوا يبكوا و يباركوا لي بعدها جوا ميامن و روان باركوا لي و طلعوا ...انا لحد اللحظه ديك كنت شايفه نفسي بحلم لأنو خلاص كنت مفتكره انو انا و عدنان وصلنا لـ طريق مسدود و مستحيل في يوم نكون مع بعض بس سبحان الله حصل العكس ....بعد ماما و مزن طلعوا جاني بابا و مازن باركوا لي بعدها مازن قال هـ يمشي بيت ناس أرجوان ، أول ما بابا طلع جوني بنات أهلي و هم بتضاحكوا و قعدوا يعاينوا لـ الباب و أول ما عدنان جا داخل قلبي عمل شححح و حسيتو هـ يقع من مكانو ، شكلو و هو بالجلابيه و العمه كان جذاب شديد و عليهو هيبه ما عاديه ....عيوني إتلمت دموع ...كل البنات المعاي في الغرفه طلعوا و خلونا برانا و مع كل خطوه منو أنا بقرب أسيح ، اول ما وصلني باسني على جبيني و قال لي ألف مبروك لينا و يا بختي بيك ...ربنا يبارك لينا في الزواج دا و يقدرنا نسعد بعض و بإذن الله ما هتشوفي مني إلا كل خير.....كنت منزله راسي و ببكي و ما مصدقه انو دا حقيقه ، رفع راسي و مسح لي دموعي و قال لي مفروض تضحك ما تبكي.....كفايه بكى ياخ ....إبتسمت و قلت ليهو ديل دموع الفرحه ...ما مصدقه إنو خلاص بقينا لبعض ، قال لي لا صدقي دا حقيقه ما حلم ....بعدها مسك يدي و قال لي يلا نطلع ليهم برا ...غطيت وشي زي ما قالت لي ماما و طلعت معاهو برا وسط زغاريد و أبشر أبشر يا عريس ...جا سامي و مستر هشام و حاتم سلموا على عدنان و باركوا ليهو و لمن جوا عشان يباركوا لي عدنان قال ليهم معليش هي ما بتصافح ...ضحكوا و شغلوها ليهو ...بعدها قعدنا و بقينا منتظرين مازن و أرجوان على بال ما هم يجوا بقوا يغنوا لينا و يدقوا في الدلوكه لحد ما هم جوا و استقبلوهم بنفس الفرحه و الزغاريد ، باركنا لبعض و قعدونا الأربعه سوا عشان نتجرتق....
المهم تم الجرتق و العرس على خير و كل واحد نال مرادو و بإذن الله وصلنا لـ مبتغانا 💜
انعقد عقد الود بين قلبي و قلبه عقداً لا يحله ريب المنون ❤️
نعم قد قبلت .. بوافر الحب قالها قلبي حينها ❤️
تجملت يميني بخاتمه لأصبح أميرته, وانتقلت من ذمة أبي لذمته 💍♥️
وعقد قرآن قلبي على قلبه ❤️
ف ألبسته قلبي خاتم مودة و إجلال وثناء وألبسني قلبه تاج حب واستثناء ..❤️
رضيت بك قدرآ ❤️
الحب لمن أعز مقامنا ودخل بيوتنا وجعل حبنا حلالآ أمام الجميع 💍♥️
فإن الساعي إليك حلالآ لن يخونه دربه , وسيسوقه الله لعقر دارك مجرورا من قلبه ♥️♥️
قد أخترت قلبك البيت الذي يكون فيه اسمي الى الأبد وتكون عيناي وقلبي هناك كل الأيام💍♥️
النهايه
