من سمعت كلامها القالتو لي المنفسن داك إتحرجت شدديد وقررت أمشي من قدام بيتهم فوراً وأنسى بطاقتي المهمة الجيت عشانها، يعني فوق ما أنا جاية بدري ومن أصبحت وجاية بعد تردد وأحراج لانو طردوني أمبارح من نفس البيت هسي إتحرجت زياده بي سبب الكلام السمعتو والاحلى من دا كلو أنو ح يفتح لي الباب الولد الطردني زااتو، والله ما عرفت أضحك على نفسي ولا أبكي عشان بطاقتي الما ح أشيلها دي .. قبلت على الأتجاه التاني وكنت على وشك إني أتحرك وأرجع بيتنا أو أمشي المستشفى بس الباب فتح وسمعت صوت المنفسن بقول لي: إتفضلي يا أخت .. إتلفتا عليهو وأنا راسمه إبتسامه سخيفه على وشي وقلت ليهو صباح الخير ، عاين لي كدا وقال لي حسبي الله دي إنتي؟ ، قلت ليهو إيوه أنا ، قال لي خيررر جاية من الصباح كده ليه ما بتعرفي الزوق إنتي؟ وغير عدم زوق العندك يا أستاذة بتضربي الباب بي قوة تقول حق أبوك ونحنا ما عارفيين دي شنو التصرفات الهمجية العندك دي وبعدين يا بت الناس إنتي ما عندك كرامة ولا كيف مش أمبارح أنا طردتك؟ الجابك تاني هنا شنو؟ ، قلت ليهو عندي بطاق..قبل ما أتم كلامي لي النهاية قفل الباب طااخ في وشي .. لحظتها عضيت على أسناني من الغيظ وقلت أحييين الليلة كدي يفتح كان ما أديتو كف غيرت بيهو ملامح وشو يبقى ما أسمي ميامن، قايلني جاية حباً فيهو المنفسن ولا شنو؟ .. وما كملت معاي زي الناس سمعت رجاء قالت ليهو دا منو الكان في الباب؟ ، قال ليها ما زول مهم دي واحدة قالت محتاجة مساعدة وأنا أديتها وفاتت خلاص..شوف شوف ود الحوحاية يعني فوق ما أنو هو قفل الباب في وشي هسي بقاني شحادة؟ لالا أوفر الصراحه أنا ما ح أقدر أسكت ليهو بعد دا .. رجعت ضربت الباب تاني وبي قوة أكتر من المرة الفاتت، ومن فتح لي ما أنتظرتو يقول حاجة وتوشك دفرتو بي كتفي وجيت داخلة ، قال لي هيي إنتي داخلة وين كده قايله نفسك في زريبة ولا شنو؟ .. ولا إشتغلت بيهو الشغلة وعملت نفسي طرشة عديل وما سمعتو .. لقيت رجاء قاعد في الهول حقهم وبتشرب في شاي ، قلت ليها رجاء صباح الخير ، قلت لي أوو ميامن صباح الفل يا عسل ، إستغربت فيها وقلت ليها عرفتي أسمي من وين؟، قالت لي من البطاقة حقتك نسيتيها أمبارح عند حازم وهو جابها لي وأداني ليها قال لي دي حقت الممرضة الامبارح نستها عندنا ، قلت ليها أخخ الحمد لله إنها عندك لانو دا السبب الجابني هنا أنا حياتي كلها واقفه على البطاقة دي .. وعاينت طوالي لي فؤاد نظام عرفت أنا جيت ليي؟ عاين لي بي ضيق كده وفتح تلفونو وبقى شغال بيه ، رجاء قالت لي أيي شكلها مهمه شدديد البطاقه لانو بيناتك كلها موجودة عليها وأمبارح كنت دايره طريقة أصل بيها ليك عشان أديك ليها لكن ما لقيت ، قلت ليها ما مشكلة حبيبتي ، عاينت لي فؤاد وقالت ليهو: فؤاد أنت مش كنت ماشي تعمل رياضه الموقفك هنا شنو لسه؟ ،قال ليها ايي ماشي هسي بس عندي تلفون داير أعملو ، قالت ليهو اااا تمام .. وقلبت علي قالت لي تعالي أقعدي مالك واقفه؟ وخليني أكب ليك شاي تشربيهو ، قلت ليها لالا شكرا ما بيحتاج بس لو ممكن تديني البطاقة بسرعه عشان أنا مستعجلة، قالت لي طيب دقيقة .. مشت وعدت مسافه زي خمسة دقائق وبعدها جات راجعة طبعا طول المدة دي أنا بعاين لي الاسمو فؤاد دا من فوق لي تحت وبحمر ليه أثناء ما بتكلم بي التلفون لكن هو ما كان منتبه لي وما عدة مسافه طويلة وطلع برة ، رجاء أدتني البطاقة وقالت لي إتفضلي هاك ، شلتها منها وقلت ليها شكراً مرة تانية ومعليش لاني أزعجتكم من الصباح بس كان ضروري أجي لي البطاقة قبل أمشي الشغل ، قالت لي لالا عادي يا بت ماف أي مشكلة إنتي تجي وقت ما تحبي وأعتبري البيت بيتك ، قلت ليها حبييبي تسلمي ، إبتسمت لي وقالت لي عايني يا ميامن ما ممكن تشتغلي معانا؟ ، قلت ليها ما فهمتك؟ .. قالت لي صراحة نحنا لينا فترة بنفتش لي ممرضة تخلي بالها من يسرا إنتي براك أمبارح شفتي وضعها عامل كيف وهي ما بترضى اي زول يديها الحقنة لمن تقوم عليها الحالة لدرجة أنو نحنا في حقن كتتيرة قاعدين نفوتها ليها لانها ما بترضى وبتصل لي مرحلة أنو يغمى عليها ونوديها المستشفى وبتقعد هناك يوم يومين ويمكن أو بي الاصح إنتي الممرضة الوحيدة اللي هي قبلت تاخد منها الحقنه بي بهدو فعشان كده أنا عايزاك تشتغلي معانا وبنديك المرتب البناسبك ما عندنا مشكله إنتي بس وافقي .. قلت ليها كان الود ودي أقبل والله لكن للاسف أنا شغاله في مستشفى وما قاعده أشتغل تمريض منزلي، قالت لي لا يااخي ، قلت ليها معليش وأن شاء الله تلقو ممرضة غيري تقدر تتقبلها يسرا وبالشفاء ليها كمان يا رب ، قالت لي ما ممكن تجربي التمريض المنزلي لي أول مره عندنا؟ .. ما قدرت أرفض مرة تانية بي نفس الطريقة الاولى ف حبيت أهظر معاها وقلت ليها دايراني أوفق عشان يجي أخوك الصاري وشو طبيعي داك ويطردني تاني؟ برري يختي ما بوافق ، ضحكت وقالت لي عسل إنتي والله لكن أنا عمة فؤاد ما أختو .. قلت ليها بالله؟ صغيرة شدديد عشان كده كنت قايلاك أختو ، قالت لي عادي في ناس كتيرة مفتكراني أختو ، قلت ليها طيب يلا أنا أستاذن وراي مشوار ، قالت لي معليش أخرتك بس قبل ما تمشي أديني رقمك ، قلت ليها أبدا ماف تاخير، أديتها رقمي وإتحركت من جنبها..لمن جيت دايره أطلع من بيتهم كنت بفكر قلت هسي لو كان وافقت على الشغل معاهم كان ولدهم المنفسن دا طردني كل دقيقتين برري الحمد لله الما وافقت رغم إني محتاجة لي شغل زي دا وقروشو ممكن أدفع بيها الايجار حق البيت لكن برضو ما بحب أقعد في بيت ناس سيدو ما عاوزني أكون متواجده فيه .. أثناء ما أنا ماشه وسرحانة بعيده فجأة إتضربت مع زول رفعت رأسي وعاينت ليه لقيتو دا فؤاد .. كان مركب سماعة في أضانينو وفي عرق نازل منو شكلو كان بتريض بس رغم دا ريحة عطرو كانت فايحة وماااليه المكان .. نزل السماعة من أضنينو وقال لي أووف ياااخ مالك معاي يا بت الناس محل ما أمشي بلقاك في وشي؟ وبعدين إنتي لسه ما مشيتي لييه مش بطاقتك المهمة والبايعه كرامتك عشانها أدوك ليها تاني المقعدك شنو؟ ، قلت ليهو خليك مني أنت أمك ما علمتك تحترم الضيوف نهائي؟ جنك تطرد الناس كده؟ .. الولد من جبت ليهو سيرة أمو ملامح وشو إتغيرت 180 درجة وحسيتو شوية وح يخنقني .. في قلبي قلت هووي يا ميامن أحسن ليك تجري قبل ما يجيبو خبر موتك في جريدة الدار .. قال لي ما بطرد أي ضيوف بطرد الضيوف المزعجين والحشريين زيك كده بس ، قلت ليهو بالله؟.. كالعادةما ردا علي وفات .. غايتو جنس نفسيات لويت خشمي ومرقت من بيتهم ، لاحظو يخواانا دي الطردة التانية ف لو أنا جيت البيت دا تاني يبقى فعلاً ما عندي كرامة![]()
...مشيت المستشفى ومن دخلت العنبر لقيت براءة في وشي، قلت ليها هلوو براءة أقسم بالله مشتااقيين شدديد يا بت، قالت لي ميامن حبيييبتي وأنا كمان إشتقت ليك، قلت ليها شنو يعني مختفية يومين؟ " طبعا هي ليها يومين ما بتجي المستشفى " ، قالت لي تتذكري مالك حبييبي الحكيت ليك بيهو وقلت ليك قال عاوز يتقدم لي؟ ، قلت ليها إيي بتذكرو مش الجياشي داك؟ ، قالت لي بسس يااهو يلا أمبارح جا أتقدم لي وأهلي وافقو وهو قال ما عاوز خطوبه عاوز يعقد طوالي بما أننا متفاهمين والعقد يوم الجمعة وكنت مشغولة مع الترتيبات عشان كده ما جيت وحتى ما لقيت طريقة أصل ليك بيها لانو ما عندك تلفون والله يا ميامن وجودك كان مهم شدديد بالنسبة لي وزعلت لانك ما قدرتي تحضري بس أكيد ما ح أخليك تفوتي العقد ، قلت ليها ما شاء الله يااخي ربنا يتتم ليكم على خير وهسي ما فات شي يا ستي ح أجي العقد + أنا جبت تلفون ح أديك الرقم، قالت لي طيبب .. المهم إتونست معاها زين وإتفقنا إني يوم الجمعة أجيها من الصباح عشان أجهز معاها وأنا الحا أمكيجيها كمان لانو بعرف ليهو " قبل فتره وضعنا ساء شدديد ف إتضريت أفتش شغل تاني غير شغل المستشفى وما لقيت حاجة غير إني إشتغل في كوفير في الاول كنت برسم بس لكن تاني شوية شوية إتعلمت المكياج وقدر الله ما شاء فعل ست الكوفير قفلت محلها ومشت مكان تاني "...بعد خلصت الدوام رجعت البيت وكلمت أمي بي براءة وعقدها، قالت لي ما شاء الله ربنا يسعدها وعقبالك يا رب ، إبتسمت إبتسامه مكسورة وقلت ليها أمين .. وأنا في قلبي قلت هو دا منو الح يرضى يعرس واحده وضعها زي وضعي؟ أنا خاته شروط معينه عشان أعرس وما أعتقد أنو في واحد ممكن يقبل بيها أبدا .. المهم بقيت أمشي الشغل وبعد المرات كنت بمشي مع براءة بيتهم عشان أساعدهم وأجهز معاها نسبةً لي أنو هي ما عندها أخوات ولا صحبات غيري....يوم الجمعة صحيت من النوم وأنا متحمسة ومبسوطه عشان الليلة عقد براءة ، كلمت يوسف ونبهت عليهو أنو ضروري يجي لانو أمي قالت ما بتقدر تخلي أبوي براهو ف ما ح تجي مع يوسف .. أول شي مشيت ناس سارة شلت منها فستان لي الحفلة لانو ما عندي فساتين سمحة حتى بعدها مشيت ناس براءة ومن وصلت طوالي بدينا نجهز لي العقد..مع التجهيزات الوقت سرقنا وما حسينا بيهو .. قريب لي المغرب بديت أمكيج في براءة وعملت ليها مكياج خفيف ما أوفر عشان تظهر في العرس أكتر وطلعت قمر قمر بس، وأنا ما عملت ولا حاجة غير مرطب شفايف وجريت لي خط إيلاينر رفيع...أحلى حاجة أنو العقد كان في المسجد الجنبهم ف كنا سامعنو كلو .. أثناء ما هما بعقدو رفعت يديني وقلت يا رب بقولو أنو الدعوة وقت العقد مستجابة وأنا ما دايره حاجة غير أنو يوسف يكون حلالي ووضعنا أنا وأهلي يتصلح ف يا رب إستجيب لي دعوتي دي وأرحمني بي رحمتك الواسعه
.. فضلت بردد في الدعوة دي لحدي ما العقد خلص باركت لي براءة وإنتظرنا لمن جا مالك بارك ليها وبعدين نزلنا تحت ، كانو جابيين السماعات الكبيرة ديك ومشغلين بيها الاغاني والحريم ما قصرو ملو المكان زغاريد ، في نص الحفلة كنت بفتش بي عيني على يوسف وبشوف إذا جا ولا لسه وبحاول أضرب ليهو لكن تلفونو ما بخش معاي .. وأنا بفتش ليهو كده شفتو من بعيد واقف مع مجموعة من الاولاد ومن ضمنهم فؤاد المنفسن....!________________________________ورفيقُ دربٍ بِمثابة قميصُ يوسف يالله .. يأتي كضماد فيرتدُ الفؤاد بصيرًا إذا إقترب منه..!أشوفكم....1.8KYou and 1.8K others805 commentsLikeCommentSend
