بعد ما أتحركنا من مدني وبي تلاتة ساعات بالظبط نحنا وصلنا الخرطوم....
من دخلناها وأنا قلبي بقى بدق بطريقة غريبة وحسيت نفسي زي الكأني أول مرة أجيها وما كنت عايشة فيها من وأنا صغيرة وأتمكلني شعور مخيف وحلو في نفس الوقت ما عارفه لي...
نزلنا في الموقف وركبنا المواصلات من هناك، ومشينا البيت....
من وصلتا بيتنا ووقفتا قدام باب الشارع بقيت بعاين لي الجيران الحوليني ولي الحي بي تفحص كدة .. ماف حاجة إتغيرت لسه كل شي زي ما هو إلا أنا بس اليمكن أكون إتغيرت وبقيت واحدة خوافه شددديد وبتخاف أنها تفقد الناس البتحبهم في أي لحظة زي ما فقدت يوسف فجأة وبدون سابق مقدمات .. فضلتا مسافة وأنا بعاين حوليني بعدها أخدت نفس عميق ورفعت يدي دقيت الباب وأنا برجف من الفرحة لاني وأخيرا ح أشوف ناس أمي وأبوي بعد سنتين...
ما عديت خمسه ثواني من دقيت الباب وفتحتو لينا مريم أختي .. كانت عايزة تقول لي الزول الفي الباب يا مرحب لكن أتخلعت لمن شافتني قدامها ووقفت في مكانها داك وبقت مبحلقه فيني .. لحدي ما إستوعبت إنو دي أنا طوالي نطت فيني وحضنتي وبقت تكورك لي أمي بي أعلى صوت عندها وشغاله ليها: أمي ميامن جات .. يا أمي ميامن جات..
أمي من سمعت صوت صورايخها جاتنا برة وأتفاجاءت بي قدامها .. ومن الفرحة لمن ما عرفت تعمل أو تقول شنو بس سكتت سااي .. إلا أنا قربت منها وضميتها علي قوي وقلت ليها أشتقت ليك شددديد يا يمه .. قعدت تبكي وقالت لي حتى أنا مشتاقه ليك يا بتي بركة الجابك لينا ربنا سالمة .. قلت ليها الحمد لله بس....
بعد ما سلمت عليها زي الناس سألتها بكل لهفة الدنيا وقلت ليها: أبوي وين؟ أنا نفسي أحضنو وأسلم عليه لي مدة .. قالت لي هداك ليهو قاعد جوا .. ما أنتظرتها تكمل كلامها زي الناس زاتو ومشيت ليهو... وقلت ليهو أبووووي مشتاااقين .. هو كمان نفسي الشي من شافني أتخلع وأستغرب من جيتي الفجأة وفرح شديد لاني جيت...
المهم بعد موال السلام دا وبعد ما أتونستنا معاهم شوية دخلت الاوضة ورقدتا نمتا لاني كنت تعبانة شديد من أرهاق السفر.....
وتاني ما صحيت إلا بي صوت رجاء ويسرا وهما بضربو فيني على الخفيف وبقولو لي: هيي قومي خلاص كفاكي نوم شنو هو؟ قالو لينا نايمة من جيتي...
قمتا على حيلي وأنا مغمضة عين ومفتحة التانية .. سلمت عليهم وقلت ليهم ياااااخي لي زمن طويل من شوفتكم السمحة دي ياداب الواحد قدر ينبسط .. رجاء قالت لي نحنا زاتنا فقدناك وفقدنا جيتك لي بيتنا .. قلت ليها قصدك إنك فقدتي حكاية أنو فؤاد يطردني من بيتكم مش؟ .. قعدت تضحك وقالت لي أيييك ياااخ أيام والله فؤاد دا ما طرد زول من بيتنا كتتتير زيك نهائي .. قلت ليها الله يسامحو بس .. يسرا قالت لي وأنا فقدت جلساتك جداً....
