قال لي أنا أتعلقتا بيك يا ميامن ، أتعلقتا بيك شددديد وفي وقت أنا كان أصعب ومستحيل عددديل أتقرب فيهو من زول وأتعلق بيه بس إنتي مختلفة من بقية الناس بالنسبة لي ، في العادة أنا ما بعرف أعترف بي مشاعري لي زول لكن الليلة ولي أول مرة وبعد زمن طويل أنا بعترف بي إنك بقيتي قريبة لي وأنا بقيت متعلق بيك وما عارف نفسي لي حاليا بقول ليك كدا وبوريك بس حسيت أني عايز أوريك إنتي بقيتي شنو بالنسبة لي يا ميامن.....
الصراحة كلامو على قدر ما فاجأني على قدر ما فرحني وخلاني ما أعرف أرد والتعبير غلبني .. هو لمن شافني أتاخرتا وما رديت عليهو قال لي مالك سكتي؟ .. قلت ليهو ما عارفة أقول ليك شنو والله .. شربكتا أصابعيني مع بعض وتابعتا وقلت ليهو حتى أنا أتعلقتا بيك يا فؤاد .. بقيت قريب شدديد مني الفترة الفاتت وأنا ما كنت متخيلة أننا ح نصل لي المرحلة دي في يوم لانها كانت شبة مستحيلة بس أنا أريد وأنت تريد والله يفعل ما يريد .. قال لي فعلاً .. قلت ليهو مبسوطة جداً لانك شاركتني الشعور الانت بتكنو تجاهي دا وما دسيتو علي .. قال لي أنا لحدي الان مستغرب كيف قدرتا أعبر ليك ، المهم يا ستي ما علينا أمشي لي يسرا ما أخرك أكتر عشان ما تفوت قبل ما تقابليها .. قلت ليهو أوكي طيب ح أمشي ليها وبعدين نرجع نكمل كلامنا .. قال لي طيب ...
نزلتا تحت لي يسرا والحمد لله لقيتها لسه قاعدة .. قعدتا أتونستا معاها وعرفتا أخبارها كلها .. وبقينا ندخل في موضوع ونطلع منو وندخل في التاني .. لحدي ما رجاء قالت ليها: إنتي يا يسرا ح تمشو نسابتك متين؟ .. قالت ليها برري ما عارفة مصعب ما وراني لكن غالبا بكرة .. قالت ليها وما تقولي ماشة غبشا كدا؟ .. يسرا قالت ليها ما عندي وقت يا رجاء عشان أتحنن وأتجيه فيهو .. رجاء قالت ليها يسمني كان خليتك تمشي كدا وتفضحيني مع نسابتك ح تبيتي معاي الليلة ونظبطك باقي اليوم دا وبكرة من الصباح مصعب يجي يسوقك معاهو ليهم أهم شي تمشي نضيفة ومجيهه .. قالت ليها لكن هو ما ح يرضى .. رجاء قالت ليها خليهو علي بعرف كيف أقنعو .. وبالفعل زي الساعة 2 ظهر لمن مصعب جا وقال لي يسرا: نحنا نمشي بعد دا .. رجاء قالت ليهو أنا دايرة أقعدها معاي الليلة أشتقت ليها بس خليها معاي الليلة وبكرة من الصباح تعال سوقها وأنت زاتك لو عايز بيت معانا .. قال ليها لالا ما مشكلة تقعد عادي .. ولمحتو سرق نظرو وحمر ليها شكلو عايزاها تمشي معاهو وما داير يخليلها وراهو بس ما قادر يرفض لانو رجاء طلبت منو كدا.....
بعد ما هو قال ماشي هي طلعت معاهو لي الباب ودعتو وأتكلمت معاهو شوية وبعدها جات راجعة .. ومن جات رجاء طوالي ضربت لي الحنانة وقالت ليها تعالي لي هسي دي.....
وما عدت أكتر من نص ساعة ولقينا الحنانة في وشنا .. أنا رسمت يديني معاهم ك أداء واجب بس أما سارة ويسرا رسمو رسم حلووو وبالذات يسرا رسمتها كانت رسمة عروس جديدة ... وباقي اليوم كلو رجاء كانت مجتهدة مع يسرا .. وتاني يوم سنتها لي مصعب بشكل تاني وشكلها فعلاً بقى شكل عروس عروس من حنة لي مكياج لي ريحة .. حتى مصعب بدون ما يشعر قال لي رجاء: لو عارفكم بتطلعوها لي حلوة كدا كان جبتها وخليتها عندكم من أول يوم جينا فيهو .. رجاء ضحكت وقالت ليهو هووي يا ولد بتنا أصلا سمحة من يومها .. قال ليها فعلاً سمحة ولو ما سمحة ما كانت خطفت قلبي .. وطبعا هي الهبلة تتخجل ساااي ونحنا بي جاي بنشغلها ليهم لحدي ما ساقاها ومشو.....
