الأقدار الدامية

البارت الثاني

وكعت للكاع وحسيت على روحي اني بالمستشفى جدي وبيبي فوك راسي وايديه مشدودات ورجليه هم وبيبي تمسح براسي
ملاك ..... بيبي اني شنو بيه ليش جايبيني هنا

الجده ..... حبيبتي لتخافين مابيج شي

جدي .... يا يابه شصاير برجليج وايديج وليش وجهج هلكد اصفر وتعبتي مو طلعتي تتونسين شو صار العكس

ملاك ..... مابيه شي جدو وكعت واني ألعب هناك

جدي... عمج شاهر ماشافج

ملاك.... شافني وساعدني (( جنت اخاف احجي لجدي على كلشي صار ويايه لان عمو شاهر يضربني اذا يعرف بيه حجيت لبيبي ولجدو شسوا بيه ))

طلعنه من المستشفى وبيبي لازمتني جدو يمشي قبلنه شايل بأيده ورقه تخطيط الاشعه اخذنه تكسي ورجعنه للبيت

استمرت معاناتي والاشياء المو حلوه والمره الاعيشها بيت جدي

كبرت اكثر ودخلت المدرسه جنت بنيه حلوه ونظيفه وبريئه والاقي قبول الناس الاصادفهم بحياتي

من دخلت للمدرسه كونت علاقات هوايه وصداقات حتى المعلمات جانو يحبوني وكل خميس اطلع بالاصطفاف لان اني شاطره واطلع الاولى بالصف وجنت مرتبه عمتي سهاد تمشط شعري يوميه وتغسل صدريتي وقميصي وترتب جنطتي حتى اكل جانت تسويلي ومن ارجع من المدرسه تصبلي غده اني جنت احبها رغم عصبيتها وتغلط على امي دائماً

بدت مأساة ثانيه بحياتي بعد ما صرت بصف الثالث ابتدائي عام 1989
بهاي السنه تزوجت عمتي سهاد وراحت من بيتنا
هي الشخص الوحيد الي جان صدك يهتم بيه بهذا البيت
بيبتي انسانه جبيره بالعمر وماعدها خلك الي ونسوان عمامي مايهتملي ابد

صرت اروح للمدرسه وملابسي وصخه وشعري مخربط محد يمشطلي

جنت ارجع من المدرسه ومالكى اكل الي ومحد ينطيني لفه اخذها للمدرسه جنت اروح للمطبخ انزل الجداري من على الطباخ واكعد بالكاع بالمطبخ واكل مره جنت كاعده اكل واجتي زينب بنت عمي شاهر

زينب ..... ايع تاكل بالجداري وصخه

ملاك ... انتي مو حرام تكولين ايع على الاكل

زينب ..... ايع انتي وصخه وباعي جواريبج

علياء ..... لج ملاك اطلعي بسرعه من المطبخ تره ملابسج وصخه شنو ماتعرفين تغسليهن

ملاك..... عمه اني مااكدر اغسلهن علميني شلون اغسلهن

علياء .... اووووي اعلمج شنو وخري من يمي تعالي حبيبتي زنوبه امشي حميت الغده تعالي بالهول تغدي

طلعن للهول واني باوعت صحيح صدريتي متربه ومتوسخه وجواريبي هم وحتى شرايط ماعندي وشعري مبهذل صح شعري طويل وناعم واصفر بس محد يمشطليا صار مو حلو