الأقدار الدامية

البارت الثالث

مرت الايام وكبرت ملوكه صارت بصف ثاني متوسط بنص هذا الظلم والعذاب الي ماشافت يوم راحه

صح مرت الايام نكتبها بسهوله بس على ملوكه ما كانت سهله ابد

ملوكه عاشت نوعين من العذاب وحرمان
انحرمت من الكلمه الحلوه
وانحرمت من الاشياء الجديده والزينه
جانت دائماً احذيه وملابس بنات عمها القديمات تاخذهن تلبسهن ممنوع احد يشتريلها جديد
جدها وجدتها ياخذون راتب ابوها وقراصه مايجيبولها كل همهم يجمعون الفلوس
من الايام الصعبه على ملاك هي ايام الشتاء
ملوكه كل شتاء تلبس قميص صيفي خفيف والجو ثلج والمعلمات والطالبات الوياها يحجون عليها
بس ملاك ما جانت تكول محد يجيبلها جانت دائماً تجاوبهم  (( عندي حساسيه ومااكدر البس ملابس ثخينه ))
بس هي بداخلها كلبها يرجف من البرد وايديها البيض الحلوات صارن عباره عن قطعه ثلج جانت تفرك بيهن حتى تدفى بس رغم هذا دراجاتها عاليه ومتفوقه وجانت اشطر وحده بالصف

مايهمها شنو تلبس وشنو تاكل كل هدفها تتفوق بدراستها وتكبر وتتخرج وتعين وتشوف امها

هنا ملاك كبرت ووعت عالدنيا عرفت امها ما ميته وعرفت سبب حب زهره مرت عمها سعد الها

سعد عم ملاك ذكرتلكم سابقاً ما عايش ويا بيت ملاك جان طالع وحده ابيت وبيته بغير محافظه بعيد جانو قليل يجون لبغداد وعمتي زهره جانت تحبني بس محد يخليها تكعد يمي وحدنه نسوان عمامي وبيبي وحتى عمامي يضلون يمنه
عرفت عمه زهره تصير عمة ماما الحقيقه ولهذا السبب حذرين من تزورنه لان مايريدون توصلي اخبار ماما ولا اعرف شي عنها
جانت عمه زهره تحبني ومن تجي تجيبلي دشداشه او قراصات وكلاده وسوارات هديه بطريقها
ودائماً تعيدها الي اخذج لاحمد ابني لان اول ماامج جابتج احمد شالج وحطيناج بحضنه وعمج سعد كال ملوكه لاحمد

ماعرف اكثر من هذا زهرة مرت عمي سعد تريدني لاحمد ابنها وتحبني جنت اخاف من تحجي ويايه او تلاطفني وتذكر احمد مااريد عمو جبار يسمع لان يذبحني ممنوع اجيب سيرة ولد على لساني  وممنوع احد يشوفني جان حريص هوايه عليه وحذر بشكل 

بأحد الايام جدو تمرض ووصل الخبر لعمو سعد (ابوك مريض ) وعمي سعد قرر يجي يشوف جدو ويطمئن على صحته

جنت بهذا اليوم اقرأ عندي امتحان انكليزي بصف الثاني متوسط ومن سمعت من بيبي بيت عمو سعد اجوي يمنه لازم اطلع اسلم عليهم بسرعه وارجع لغرفة بيبي اقرأ ماابقى اكثر من السلام  وانيوما جنت اكسر كلمتهم دخلت سلمت عليهم ورجعت بسرعه اكمل قراءه امتحاني

ب11 بل ليل كلهم نامو والبيت سنطه صار اني قررت اطلع بالطرمه عدنه كرويته اخذت كتابي ودفتر المسوده والقلم وطلعت حتى اقرأ لان مليت من كعدت الغرفه

طلعت للطرمه وبلشت اقرأ بصوت ناصي محد يحس عليه والكمريه تجنن مضويه كل الحوش والحديقه مره اقرأ ومره اباوع على القمر والنجوم واضل،احسب بيهن واخربط بالحساب وارجع لدراستي