الأقدار الدامية

البارت الخامس

وافقت على الزواج من صقر بس بدون رغبه وبدون حب بس حتى اخلص من الضغوطات الصارت عليه كل بيت جدي موافقين ويقنعوني وكلام هاجر وتحريضها على احمد من جهه ثانيه قررت اوافق بعناد احمد مثل ما هو راح يتزوج اخت صديقه

تصرفت بغباء وبلحظه غضب ما مالمفروض هيج اتصرف هذا القرار دمر كل حياتي وضيعني عشت مظلومه ومغبون حقي وماشفت يوم راحه

زواجي من صقر كان من اكثر القرارات خطأ بحياتي 

كل الي بالبيت يمي فرحو يخلصون مني ومن مسؤوليتي
اتصلو وبلغو عمتي صبريه ملاك موافقه وحددو موعد تجي حتى اتم الخطوبه

اني كل هاي الخطط تصير كدامي بس ماادخل بيها وماتعنيلي شي اساساً اني صقر مطايقه اباوع بوجهه

بعد ايام قليله صحى صقر وصار زين وسمع الخبر الي يثلج صدره او ينتظره من سنين ( ملاك موافقه تزوجك يله كوم على حيلك حتى نروح نخطبها )

بلغو عمامي راح نجي الخميس نجيب زلم ونعقد لملاك وصقر
بيت جدي استعدو لهذا اليوم كلهم بس اني جنت اباوع عليهم واسايرهم من يحجون بصقر والخطوبه بس بداخلي نار وتشتعل مرات اتمنى هذا كابوس وينتهي اخلص منه بس للأسف هاي جانت حقيقتي وواقعي

صار يوم الخميس واجو زلم هوايه اهل صقر وعمامه وعقدولنه

----
صقر جان يجي بس اني اتهرب منه ومااطلع يمه بس الشي الي لاحظته عمامي يسمحولي ادخل يم صقر او اطلع اسلم عليه عكس احمد خطوبتنه 5 اشهر جان ممنوع اطلع كدامه علكد السلام وارجع للغرفه

اكثر من مره حاولو يدفعوني حتى اكعد يم صقر واسولف ويا بس رفضت وبقيت نفس اسلوبي من يجي اتهرب وادخل لغرفة بيبي واقفل الباب

____

اذكر بيوم من الايام كاعده يم بيبي بالغرفه تسولفلي على ايام قبل وبالاخص على بابا وشنو جان يحب او يكره اني احب هاي المواضيع كلشي يخص ابويه جنت اعرفه واسأل عنه لحوحيه بشكل مااحب تفوتني شغله او معلومه تخص ابويه لهالسبب جنت ادوخ بيبي من اكعد يمها ومااكتفي بالمواضيع دائماً اطرح اسئله هوايه حتى تبقى تسولفلي ...

اجتي علينه علياء كالت عمه تره صبريه وصقر بالهول اجوي عليكم

الجده ..... اي جايه هسه
يله ملوكه كومي يمه نروح على صبريه عيب عمتج وام زوجج لا تضلين تختلين من احد منهم يجي

ملاك..... ايي بيبي جايه

الجده... كومي ويايه يله سلمي على عمتج وخطيبج شويه وكومي

ملاك .... اي بيبي بس شويه واكوم لا تجبروني ابقى

الجده .... لا يمه شويه واطلعي يله بنيتي االحلوه يله عروستنه

كمت لخاطر بيبي ودخلنه للهول صقر جان كاعد ومن دخلت وكف على حيله ويضحك طاير من الفرحه

ملاك.... شلونج عمه