اسكريبت
انا اسمي ندى عمري 27 سنة مؤهل متوسط واتمرنت كاراتيه وكنت مجتهدة فيه جداً ودلوقتي بقيت مدربة في النادي اللي كنت بتمرن فيه، مرتبطة بشاب من ست سنين هو مؤهل متوسط ذيي وفي نفس عمري عنده أختين وأخ وهو اكبرهم، تعالو نشوف ايه هي حكايتي
في صباح يوم جديد في بيتنا على الفطار
ناهد(أمي): يلا ياندوش تعالي ساعديني في الفطار
دخلت المطبخ وبدأت اخد الاطباق اخرجها على السفرة وفي خروجي كان بابا خارج من اوضته: صباح الخير يابابا
حسن(أبويا): صباح الخير ياحبيبة بابا
قعدنا نفطر وبعدها دخلت اوضتي عشان البس وانزل للنادي ذي كل يوم وفي الوقت دا ماما دخلت ورايا الاوضة ناهد: مش هتسمعي الكلام بقى
بصتلها بنظرات هي فهماها واتكلمت: باردوا ياماما؟ انا قولت رأيي في الموضوع دا خلاص
ناهد: تقدري تقوليلي ايه هو عيبه المرادي
قعدت على سريري واتكلمت: مفهوش عيب محدد بس انا مش موافقة وحضرتك عارفة السبب ايه
ماما اتعصبت وصوتها بدأ يعلى: وهتفضلي لحد امتى تستنيه العمر بيجري وانتي واقفة مكانك الاصغر منك اتجوزوا وعندهم بيت وانتي لسة
كلامها في كل مرة كان بيضايقني وخصوصا ان ماما ذي أي ام عاوزة تفرح ببنتها وانا البنت الوحيدة واخويا متجوز وعايش في بيت لوحده، بصتلها بدموع: وانا مش فارق معايا كل دا ولا فارق معايا ان العمر بيجري ولا انا كل اللي عاوزاه حياة مستقرية مع انسان انا اللي اختاره
بعد ماخلصت كلامي ظبطت حجابي وخرجت من البيت وكنت مضايقة جداً ولاقيت تليفوني بيرن حاولت اهدى شوية عشان حبيبي مايحسش بحاجة ورديت عليه: صباح الخير
محمود: صباح الخير ياحبيبتي نزلتي ولا لسة؟
= ايوا خلاص نزلت انا في الشارع اهو
محمود: ماشي ياحبيبتي اما توصلي طمنيني
= حاضر
قفلت المكالمة معاه واخدت تاكسي ورحت النادي دا اكتر مكان بلاقي نفسه فيه طول ما انا بعمل الحاجة اللي بحبها بكون مرتاحة، قابلت صديقتي المقربة علا
علا: صباح الخير ياندوش
= صباح الورد يالولو
علا: يلا عشان تبدأي شغلك ونتقابل في وقت البريك
= حاضر
سبتها ورحت ابدأ شغلي وانا مبسوطة
محمود في بيته قاعد مع عيلته، اللي موجود منهم أبوه واخوه ووالدته متوفية من خمس سنين واخواته البنات متجوزين
محمود بيتكلم مع ابوه: مش ناوي بقى تخطبلي
عارف(ابوه): بزمتك مش مكسوف من نفسك وانت بتقولي كدا
محمود بعصبية: حضرتك طول الوقت مش واقف جمبي جوزت اخواتي ونستني
عارف بغضب: وطي صوتك وانتي بتتكلم معايا وبعدين انت راجل تعتمد على نفسك
محمود وقف واتكلم بعصبية وصوت عالي: هو انت سبتلي اي حاجة اقدر اعمل بيها حاجة؟ حتى الكام شغلانة اللي اشتغلتها اخدت فلوسها عشان تحطهم في جهاز اخواتي
عارف وقف وضربه بالقلم: انت ازاي تتكلم معايا بالطريقة دي فوق انت بتتكلم مع ابوك، وبعدين ابقى شفلك شغلانة ثابتة الاول وبعد كدا تعالى اتكلم وروح اخطب
عارف سابه ودخل اوضته ومحمود واقف مخنوق ومضايق من كل اللي بيحصل دا ومش عارف يتصرف ازاي ورن على صاحبه يحاول يلاقي اي شغل وفعلا قاله في شغل في شرم الشيخ يكون حارس امن ووافق على طول وقال هيعرف ندى بكل حاجة
علا قابلتني في وقت البريك وقعدت تتكلم معايا
علا: تقدري تفهميني كابتن علي في ايه يترفض؟
= يعني انتي مش عارفة رأيي؟
علا بعصبية: لحد امتى ياندى احنا العمر بيجري بينا لازم تفوقي لنفسك
رديت عليها بدموع وحزن: انا بحبه اوي ومش هقدر اكون لغيره معقول بعد ست سنين حب اكون لغيره دا انا حفظاه من غير ماهو يتكلم
علا: يابنتي انا فاهمة كل دا بس هو بقاله سنين بيقول كلام ومش بيعمل بيه كل سنة بتسمعي حاجة وبيتعمل عكسها
انا عارفة ان كلهم صح وانا اللي مش شايفة دا بس صعب عليا: عادي اكيد ظروفه هتبقى احسن ان شاء الله
علا: انتي حرة
روحت البيت في آخر اليوم كنت محتاجة اكون هادية او اي حاجة تحصل تخليني كويسة بس للأسف اول ماوصلت لاقيت أمي قاعدة وباين عليها انها زعلانة
قعدت جمبها وسألتها: مالك ياماما؟
لاقيتها بتبصلي وبتقولي: تعرفي ان نادية جارتنا اتحطبت؟
انا رديت بفرحة: بجد الف مبروك بس يعني محدش قال
امي بصتلي بغضب واتكلمت: عشان هما اصلا مخبيين على الكل وطبعا خايفين من الحسد عشان هي صغيرة وفيه اكبر منها لسة قاعد
طبعاً هي كانت تقصدني وبدأت اعيط واتكلمت بإنهيار: مش هتبطلي كلامك دا بقالك كام شهر مافيش غير موضوع الجواز انا بجد تعبت والله وزهقت انا مش فارق معايا كل دا سبيني في حالي بقى
سبتها ودخلت أوضتي وانا منهارة ولاقيت محمود بيرن عليا ماكنتش عاوزاه يحس بأي حاجة ورديت عادي: الو
محمود: وصلتي امتى؟
= دلوقتي ياحبيبي
محمود بحب: حمدلله على السلامة
ابتسمت ورديت: الله يسلمك
محمود: عندي ليكي خبر حلو
رديت بسرعة: ياريت انا محتاجة اسمع اي خبر حلو
محمود: حسن صاحبي جابلي شغل في شرم الشيخ
حسيت نفسي فرحانة وان خلاص حلمنا بيقرب: طب كويس ياحبيبي هتروح امتى؟
محمود: بكرة آخر اليوم ان شاء الله ولازم اشوفك قبل ما امشي
رديت عليه بكل حب: حاضر ياحبيبي
اتكلمت معاه كتير هو الوحيد اللي قادر يخرجني من حزني ومعاه بجد بضحك من قلبي
محمود قفل وأبوه دخل اوضته يتكلم معاه
عارف قعد ادامه على الكرسي: ماتزعلش مني بس انت عارف الظروف وجوازات اخواتك وكمان فلوس القرض
محمود: بابا انا مش زعلان بس انا من حقي اخاف حبيبتي تضيع مني
عارف: هي لو بتحبك هتستنى شوية لحد ما الظروف تكون كويسة
محمود: انا خلاص محمد جابلي شغل في شرم الشيخ
عارف: طب كويس هتروح امتى؟
محمود: هروح بكرة آخر اليوم
عارف: طب بص انا هقولك حاجة ساعدني في سداد فلوس القرض لمدة سبع شهور وبعدها اتقدم لحبيبتك
محمود: بس سبع شهور دي كتير اوي يابابا
عارف ضحك: يعني انتوا مستنيين ست سنين مش قادرين تستنوا كمان سبع شهور
محمود: ماشي يابابا ربنا يسهل
عارف خرج وراح اوضته ومحمود يفكر في اللي جاي
يتبع…….
#إختيار_القدر
#بقلم_إيمان_جمال
