طوبى "جنة طوبى"

الجزء الستون4

#طوبى "جنة طوبى"
#جمان_فريد
#الجزء_الستون"فلاش باك4"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
طلعت من مكتبها وسكراته..
ومشت بدير جولتها ع المدرسه وقت الحصص الدراسه..
دارت دورة ع الدور الاول..
بعدين ركبت الدور التاني..
وهي راكبه في الدروج..شمت ريحة تطييب استغربت...
وين وصلت فوق..شافتها ابله الاشراف انصدمت..
ناضت وقفت وهي تشوفلها..
وطوبى عقدت حواجبها لما شبحتله وقالت؛من وين جايه الريحه..
ابله الاشراف قعدت ساكته..
هي مررت عليها نظرها بعدين هزت راسها ومشت تبع في الريحه..
كل ماتقرب من المكان..كل ماتزيد تقوى الريحه..وتحس بالغثيان..
لما شافت المكان اللي جايه منه الريحه نست الغثيان اللي كانت تحس بيه..
كان حجرة المدرسات..
حطت يدها ع مقبض الباب وفتحاته بقوة..
لقت فيه ابلات..يقرضوا في ويخلطوا..
واللي مقعمزة حداهم تهدرز وتشرب في قهوة..
وغاز الشاهي "البريمس" فوق الطاوله وعليه طاجين..
هما لما خشت عليهم جمدوا في مكاناتهم..
وهي قعدت تمرر في نظراتها الصارمه عليهم...
~~~~~~~~~~
طوبى:وين كنتي ابله نجوى معقوله الشي هدا صاير وانت ماعندكش علم!..
النائبه وهي تحاول تخفي ارتباكها:انشغلت بموضوع الصحايف استاذه..
شبحتلها شويه بعدين قالت:هادم متعودات يديروا الحاجه هادي قبل؟
قالتلها؛بصراحه ايه ع أيام الاستاذة سدره..
شبحتلها وهي تفكر في كلامها بعدين قالت؛حاجه زي هادي تصير مرة حنتخد اجراءات في حقك وحقهم..
قعدت نجوى تشوفلها وهي ساكته..
طوبى؛تقدري تطلعي..
لفت ومشت طلعت وهي معصبه..
لاقتها وحده من الابلات وقالت:شن صار!؟
:هزبتني..فرخه زي هادي تكلمني اني هكي!؟
:الله يرحم ايام ابله سدره اللي كانت مش عاجبتنا..
:خلاص بري للاخرات قوليلهم يتريسوا ع رواحهم هادي مش ناويه ع خير راهو..
ومشت من طريق تانيه..
والابله مشت ركبت فوق وهي تقول:هالعزي شن جابها بس..
🍃وفي حجرة الاداره..
كانت طوبى دير في مكالمه هاتفيه مع وحده من الابلات في المدرسه نفسها..
طوبى:هما كانوا عابيين على اني بنعطل اليوم؟
"ايه استاذة"
هزت راسها بعدين تنهدت وضيقت عيونها وهي تقول:حق ع ايام ادارة ابله سدرة كانوا يديروا هكي!؟
"بصراحه الشهور الاخيره استاذه كانوا واخدين راحتهم استاذه سدره معاش ولت دقق زي قبل ودور وراهم وياما صاير وراها..وحده من الحاجات اللي صايره حكيتلك عنها"
طوبى:متابعه الموضوع وحنوصل لشي قريب ان شاء الله..المهم ابله هناء ردي بالك...
"ماتخمميش ابله.."
طوبى:السلام عليكم..
"وعليكم السلام"
سكرت طوبى وقعدت تفكر...
🍃وفي مدرسة تانيه عامه..
مديرتها كانت قادره وعندها خبرة طويله..
ولأنها غيرت نظام المدرسه وقاعده تمشي فيها صح هلبه من اللي كانوا دايرين مايبوا ايام الادارة الاولى ماعجبهمش الوضع وقعدوا يحفرولها بش يطيحوه..
لكن توفيق الله..ومن بعدهم الخبرة والحكمه خلوها ترد ع مكرهم بمكر اقوى منه
☘في مكتب الاداره..
نجاح؛اني كنت نبي نغض الطرف ونعدي اللي ديروا فيه من وراي بس لما وصل الموضوع للأذيه انجبرت نحطلكم حد وتفكروا ان انتم جبتوه لرواحكم
الابله ثقيلة الدم اللي ياما سممت نجاح بكلامها وهي تترجى توا وتتوسل:بالله استاذه بالله سامحيني اقسم بالله مادرت حاجه بإرادتي..
قاطعتها ابله تانيه وهي تقول؛ياكذابه انتي اكثر كنتي ناقمه عليها وماتبيهاش في الاداره..
هي قعدت تقول؛حسبي الله ونعم الوكيل فيك..
نجاح بصوت عالي بعض الشي؛خلاص انتي وياها...موضوعكم مش عندي توا..بروا لمكتب التعليم وحلوها معاهم..
جت هديكا الابله تتكلم..
اشرتلها نجاح ع الباب وقالت:تفضلوا...
هما فقدوا منها الامل ومشوا طلعوا وهما نادمات وناقمات ع بعض..
هي تنهدت بضيق وقالت؛ يقولوا قطع الاعناق ولاقطع الارزاق..لكن هما جبروني...
☘وفي بلادنا..في كل مؤسسة وفي كل مكان تكاد المكائد وتقوم الحروب المعلنه والسريه..البارده والحاميه وبدال ماينشغلوا في اداء وظيفتهم ع اكمل وجه..ولوا مشغولين في محاربة بعض والحفر لبعض بكل تفاني..
وهدا كله ع حساب هالبلاد اللي قاعده كل يوم تولي لتالي عشرة خطوات☘
🍃🍃🍃🍃🍃
"وهو هدا فستقتي"
اريج وهي تشوف للشيت؛فهمت..لكن كان جيت بنراجع ومافهمتش حاجه نكلمك..
هو قال؛تمام حبي..
ع جيه بنت كانت مش محجبه وملفته هلبه للإنتباه بلبسها وجمال شكلها..
قامت اريج عيونها وشافتها وقعدت معاها بنظرها لين جو عيونها ع نضال لقاته يشوف للبنت بربع عين..
هي قالت؛طرف ولا؟
ارتبك وشبحلها وهو يقول:عاديه..
اريج بضحكه؛قول رايك فيها عادي عجبتني حتى اني..
ضحك وقال؛الحق سكود..
اريج قعدت تضحك..
هو بإبتسامة استغراب؛منك جد اريج! ماتغاريش عليا ولاشنو يابنت انتي!..
اريج:عارفتها مستحيل تشبحلك اني رضيت بيك بالسيف..
نضال رفع حاجبه وقال؛تراهني توا لو ولت مرة تانيه ومشتيلها كلمتها تعطيني رقمها طول..
اريج:تمام شني بشني..!
هو بصدمه؛نهارك احرف يافرخه ! قولي الحق تحبيني انتي!.
اريج قعدت تضحك..
نضال؛جاوبي جاوبي ماتهربيش..
اريج هدت ضحك وقالت؛اكيد نغار عليك ياراس القومبالي مش زوزي..لكن في حاجات اني متصالحه فيها مع روحي ومع طبيعتك كراجل..انتم الرجاله عيونكم مايملاها شي.
حتى الشيخ الملتزم لو طيح عينه بالغلط ع وحده حلوه يقعد عشره دقايق يبلحق فيها بعدين يغير عيونه ويقول استغفر الله واعوذ بالله...مش حنواخدك ع نظر عيونك لانه بينك وبين ربي وانت وضميرك...اما لو مثلا لقيتك مصاحب عليا ولاتكلم في غيري هني يختلف الوضع ..
هو بإبتسامه كان يتأمل فيها ويقول؛انت واخده مني الحته الشمال كلها يافستق انت ان شاء الله يوقف كان دق لغيرك.
هي قالت؛ان شاء الله..وضحكت ضحكة طلعت فيها لسانها وعضاته..
هو ضحك وقال؛شمطاء الشمطاوات..
ع فوتة البنت مرة تانيه..
هي قعدت تشبحلها..
وهو قعد يشبح لاريج ويقول:نوض..
شبحتله وقالت؛نوض ترا..
هو جي بينوض شداته وقعمزاته وهي تقول؛تي قعمز وانت ماصدقت..
هو قعد يضحك من جده..
وهي تشوفله ع جنب وتقول؛ماتنعطوش وجه انتم..
هو هدا ضحك وقال:ووك ياربي..شبحلها وهو يقول..نحبك يافرخه انتي اقسم بالله نموت فيك..ااخ ياجنابي..
وهي قعدت تقلب في الشيت وهي مبتسمه بغرور مصطنع..
شويه تنهد وقال؛تعرفي روجتي جوي ولى مليح بعد مكالمتي مع المهدي امس..
شبحتله بإبتسامه وقالت؛تصدق حتى اني بعدحكيتلي عنها فرحت ونسيت اللي حني فيه..
نضال بإبتسامه؛ربك كريم..الحمد لله...
اريج؛ايه الحمد لله..ربي يزيدها من الشفي..
هو قال من قلبه:آمين..
🍃🍃🍃🍃🍃
الساعه 5:15عصرا..
في فيلا الجالي وطوبى..
طوبى؛حطيتلك هكي وهكي..شتوي ولبس خفيف شويه...
هو قعد يشبح للشنطه كيف مرتبه وكيف كل شي في مكانه ابتسم وقال:شكرا..
طوبى بإبتسامه مجامله؛مافيش بينا شكر واجبي هدا..
هو شبحلها وقال بإبتسامه؛تمام..نوصلك توا لماليك ولاتراجي لين نكمل مشاويري..
طوبى:توا خير بش تكمل مشاويرك ع راحتك..
هو قال؛خلاص وتي روحك..
🍃وفي شقة نجاه..
كانت ترتب في شنطتها وهي متحمسه ومتشوقه...
وبرا..
في الصاله..
كانت صابرين مقعمزة وحاطه ع رجليها قطوسه جوري تلعب فيها وهي مبتسمه وسرحانه..
والصغار في دارهم يتغدوا....وحداهم خوهم معاذ يلعب بألعابه...
🍃🍃🍃🍃🍃
وصل الجالي طوبى لحوش ماليها..
وبش يراضيها تمام الرضا..خش هدرز ع بوها شويه بعدين طلع..
🍃اريج؛روحت ع حوش خالتي غرفه طول ولتوا ماجتش..
طوبى:اتلم المتعوس ع خايب الرجا..اشبح شن تنصح فيها غرفه توا وهي عاد طبق طول..
اريج؛ان معاش عندي صبر ع هالبنت كان دارت فالطه بنقتلها..
دق باب الحوش الخارجي..
علت طوبى صوتها وهي تقول:عمتي برا؟
"ايه ايه تو نفتح"
🍃🍃🍃🍃
وفي جامع المنطقه..
كان عبد القيوم مقعمز في الجامع..
بعد تمت الصلاه اختار اليوم يطول في القعده وهو يذكر في الله..
بس كان عقله غايب في بعض الاحيان وهو يرد فيه..
شويه تحول تركيزه لبلال اللي كان شاد جزء من القرآن وكأنه يراجع ..
بلال؛اما من استغنى فأنت له تصدا..
عبد القيوم:تصدى..شدد ع الدال..
ابتسم بلال وعاود قراها..
اما من استغنى فأنت له..تصدى..
ومعا عليك ألا يزكا..
عبد القيوم؛يزكى..شدد ع الزين والكاف..
بلال؛لغة القران صعبه شويه..
ابتسم والتفتله بجسمله كله وقعمز وهو ثاني ركابه:ايه..بس تعرف ان اجرك زياده انت ولا؟
بلال؛هدا اللي مخليني نجاهد..لكي احفظ..
عبد القيوم بإبتسامه؛كم لك مسلم لعند لتوا؟
بلال:5شهور والحمد لله..ويارب لأخر العمر..
عبد القيوم؛امين اجمعين يارب..بلال نبيك تحكيلي كيف اسلمت امتى خش قلبك الاسلام؟
ابتسم وقاله؛من سنوات اخلاق الناس هني اثرت في قلبي..بالذات عيلة الواعر..عمي علي عمي لطفي وبنته توبا..توبا هي اكبر سبب..
خفتت ابتسامه عبد القيوم ودقات قلبه بدت تقوى..
وبلال مكمل يقول:كانت تحسبني في كل شي اكل ملابس هي ماكانتش الوحيده اللي دير هكي ناس هلبه..لكن الفرق..
ان هي تعطيني من احسن شي..ووالله لم تعطيني يوم بقايا اكل ولاملابس قديمه لاتصدق كم اثر في قلبي هدا التصرف..
تنهد بعدين قال..وبعدين بعتتلي كتاب عن الاسلام باللغة الفرنسيه..قرأته كاملا وبعد ماقرأته عرفت ان كل اللي شفته من الناس هني ومنها هي كانت اخلاق دينهم..ومن بعدها قررت ندخل الاسلام..
تنهد عبد القيوم من قلبه تنهيده كتمها في صدره..
وقوة الوجع اللي خلاته يحسه بانت ع وجهه...
وبلال لاحظ ع وجهه ملامح الضيق استغرب وقال؛تارقي خيرك؟
شبحله بعدين ابتسم وقاله؛شن رايك نساعدك في الحفظ؟.
بلال:تحفظ قرآن؟
عبد القيوم؛نصه مش كله..امتى خلوتكم؟
بلال؛بعد المغرب..
عبد القيوم؛خلاص بعد العصر لو كنت فاضي نراجعوا مع بعضنا..خل حتى انا نذكر اللي نسيته..
بلال؛نسيته؟
عبد القيوم؛مش بالزبط..هو القران سبحان الله كان ماتقعد تراجعه بعد تحفظه يفلت منك..
بلال؛صحيح..
عبد القيوم؛هي ترا جيب ياشيخ خل نشوفوا وين واصل..
بلال؛قبل ان اعطيك اختبرك..
ضحك عبد القيوم وقال؛بتسألني شن هي السورة اللي كنت تقرا فيها..
بلال؛وماهي؟
عبد القيوم بإبتسامه؛عبس..
بلال مدله الجزء وقال؛كويس..
ضحك عبد القيوم وخدي الجزء وقعد يشوف للسورة...
🍃🍃🍃🍃
خشوا الاربعه لدار المعيشه..
وهي خامستهم قالت..
مطيره؛هونا اللي مسندات ع الحيط..
كان فيه شي يبان زي اللوحات مغطيات بغلاف من ورق ومسندات ع الحيط...
مروة بتعجب؛قصدك هدوكا!؟
تاله بدهشه؛حيي!! دارلهم برواز!!..
ومشتلهم ومروة لحقتها..
وطوبى واريج ومطيره يتفرجوا عليهم وهما يحولوا في الغلافات .
رفعوهم فوق بالشويه..
وقعدوا يبانوا عليهم براويز الوسايل اللي داروهم..
حطت تاله يدها ع فمها وقالت؛ياربي محلاها!..
ومروة وهي مبتسمه بفرح؛شوفي متاعي اني..
شوفي اسمي كيف كاتبه..
مروة احمد محجوب...
تاله؛حتى اني..محلاه الخط اللي كتب بيه اسمي..
اريج؛سهفوني نشوف..
مشتلهم..
وطوبى لحقتها..
وقفوا وراهم..
وعيون طوبى ع وسيلة مروة...
اريج؛الله يبارك الله يبارك..شغل تحفه
مروة؛احرجني بالحركه اللي دارها حني ماقلناش بروزهم هو بروزهم بروحه..
اريج رفعت حواجبها وقالت؛حقه!
تاله بفرحه؛متشوقه لغدوة امتى يجي ونسمع الابله شن تقول عليها لما تشوفها..
مروة؛حتى اني متأكده اني حنكون الاولى ع البنات كلهم..
اريج؛هادي من غير كلام..الرسم خيال والخط زادها حلاوة ع حلاوتها..
مطيرة بإبتسامه:الله يبارك..
مروة؛مش عارفه كيف نشكره عمو عبد القيوم..
مطيره؛ربي يحفظه الوليد هدا محترم وخدوم واخلاقه الله يبارك عليه..
طوبى وهي تشوف لوسيلة مروة ابتسمت وقالت؛ربي يكثر من امثاله..
اريج؛تو نقول لنضال يضيفه بلاش في القهوة ويقوله ع حساب مروة وتاله عربون شكر..
قعدوا يضحكوا...
🍃🍃🍃🍃🍃🍃
وفي حوش غرفه..
غرفه؛خلاص عاد سادك بكي درهتيلي كبدي..
مسحت الاء دموعها وقالت:تو انتي تحبي رؤوف ولا؟
غرفه؛عمري ونموت فيه..
الاء؛وكان جاك يوم وانجبرتي تفارقيه شن يصير فيك!
غرفه بنرفزة؛ عليك الفال !!سكري فمك ترا..
آلاء؛هاه شفتي ردة فعلك..مفروض تحسي بيا..
غرفه؛جديات تحبيه للوش؟
الاء بضيق؛حتى انتي شاكه زيهم..علاش كلكم تشوفوا فيا عديمة احساس.؟
غرفه بضيق؛مش قصدي حبيبتي..بس الحق ماتوقعتكش تحبي واحد زي مهند مش موديلك..
الاء:علاش رؤوف كان موديلك! هاك ميته فيه..
غرفه؛والله ماعارفه شن نقولك..هو هكي ولاهكي انتم مشروع فاشل معاش يصير منكم بالذات وولد عمك هدا قاعد وراك..
توسعوا عيون الاء بخوف وهي تقول؛تتوقعي يديرها ويمشي يقوله؟
غرفه؛يديرها مختل ولد عمك هدا..
حطت الاء يدها ع صدرها وهي خايفه..
فجأه..
رن تليفون غرفه..شافت المتصل بدت ع وجهها ملامح الضيق..سكرت الصوت..
دق باب دارها..
هي قالت؛مني؟
"اني"
غرفه؛البسي وشاحك..
لبست الاء وشاحها ومازالت تفكر بخوف..
غرفه؛خش روفا..
فتح عبد الرؤوف وقال؛اوو الاء شن جو..
الاء ابتسمت مجامله وقالت؛الحمد لله..
هو جي لغرفه حط قدامها الكيسه وقال؛هي خودي ياستي طلبيه خاصه هادي راهو لمرت عبد الرؤوف بن موسى..
ضحكت وطلعت العلبه اللي فيها..
فتحتها..وابتسمت بفرح وقالت؛يجنن..سلمك جياب..تعالي للوشه شوفي..
الاء جاملت خالتها مجامله ومشتلها وقفت حداها وشافت لطقم الفضه اللي خداه عبد الرؤوف لغرفه..
ابتسمت وقال؛حلو هلبه الله يبارك تبيديه بالهني..
غرفه؛كان عجبك للوشي قولي نوصيلك ع واحد تاني مادوري شي..
ضحك عبد الرؤوف ضحكه خفيفه..
الاء بإبتسامة مجامله؛صحيتي خويله..
"هي خشوا "
كلهم شافوا للباب..
دقت طوبى وهي مبتسمه وخشت وهي تقول:السلام عليكم..
وين شافتها غرفه فرحت ع الآخر...
وماكانتش جاية بروحها..كانت معاها اريج..
سلموا ع عبد الرؤوف بعدين هو انسحب من حداهم..
وخلاهم مع نبيله..
هدرزوا شويه..
بعدين نبيله مشت بدير الضيافه واريج لحقتها بش تساعدها..
آلاء:ماشيه للحمام..
ومشت طلعت من حداهم..
لحقت طوبى بعيونها لين طلعت بعدين التفتت لغرفه وقالت بصوت منخفض:حكتلك..
غرفه بنفس الصوت؛ايه..
طوبى؛ان شاء الله ماعطيتهاش نصيحه مقربعه زي عادتك..
غرفه بضحكه؛لالا..قلتلها تسيبه..
تنهدت وقالت:مافيش غير هكي اصلا..احسن ليها وليه..
غرفه؛لكن تحبه راهو..
طوبى؛مش قادره نصدق..
غرفه؛اني نعرفها اكثر منكم تحبه صدقيني..
مطت شواربها بعدم اقتناع..
رن تليفون غرفه مرة تانيه..
هو كان مكفي ع وجهه والصوت مكتوم بس طوبى شافت الضي متاعه باين وقالت..
تليفونك يرن..
غرفه؛عارفه فوتيه وقوليلي شن تحكي مرت عمي ع سدرة..
🍃وبرا في الشارع..
الظلام بدي يحل..
والمغرب خلاص آذن..
مشوا رجالة الشارع اللي يصلوا في الجامع للجامع..
وع راسهم لطفي وبوه...
وعبد الرؤوف كان اخرهم..طلع من حوشه
بالسيارة بسرعه...
بس وقف..
لما شاف سيارة كبيره مظلمه مدرسه قدام حوشه..
نزل منها واحد ومشي فتح الباب السحاب..
وهو في سيارته يشوف في كل شي..
ولما شاف اللي نزل من السياره قال؛ختمت...
~~~~~~~
طوبى وهي مربعه ايديها وتشوف لغرفه بضيق؛قالك بيجي؟
غرفه وهي متوتره؛لا..
نبيله؛خلاص نوضي اطلعيله..
غرفه تنهدت بضيق وقالت؛باهي..
وناضت ومشت طلعت من الدار..
ونبيله وراها..
اريج؛كأنها ماتبيش تشوفه!؟
طوبى؛لاحظت وشكله هو اللي يتصل بيها بكري وماتردش عليه..
اريج؛شن غيرها عليه!؟.
آلاء؛وانتي ديما هكي ماعاجبك شي..
شبحتلها بإزدراء وقالت؛هادي خيرها! من كلم جدك هداكا!؟
طوبى:من جدها هداكا؟
اريج:اللي في تاجورا..
الاء بنرفزة؛معاش تجيبي سيرته..
اريج؛حاضر..جدي حسن جدي حسن جدي حسن..
الاء بإزدراء؛تافهه..
طوبى فنصت فيهم وقالت؛خلاص انتي وياها اسكتوا...
سكتوا وهما يشبحوا لبعض بإزدراء..
☘وفي المربوعه..
خشت غرفه عليهم..
ناضلها مختار وقال:اهلا اهلا اهلا..
لما جاته ضمها وهو يقول:تي وينك ياناسينا..
بعدت عنه وقالت؛كيف حالك؟
قعمز وقاللها؛قعمزي جنبي..
قعمزت حداه..
وعبد الرؤوف مقعمز مقابلهم ع اعصابه..
هو شبح لغرفه بإبتسامه وقال؛كان يهمك حالي راك نشدتي عني ولا رديتي ع اتصالاتي..
سكتت وهي منزله عيونها بضيق
هو شبحلها شويه بعدين قال؛غرفه..كأنك موطيه عليا العين..
قعدت ساكته وهي مضايقه هلبه..
وعبد الرؤوف يشوفلها..
مختار بإبتسامه؛غرفه نكلم فيك..
تنهدت وقالت:بصراحه..
مختار؛ايوه نبي الصراحه..
هي بدون ماتشوفله؛سامحني مانبيش نخسر بابا .
خفت ابتسامته..
وعبد الرؤوف مركز معاه..
وهي مكمله تقول؛مانبيش خواتي يقاطعوني ونبي بابا يرضى عليا..قالب عليا المده اللي فاتت كلها لأني نواصل فيك..واني مانبيش بابا يغضب عليا ع خاطر حد..سامحني..
ابتسم مرة تانيه..ومرر نظره ع المكان.
ثبت نظره ع عبد الرؤوف وقال؛تتفكر اول مرة تلاقينا فيها..تتفكر الكلام اللي قلته..شفته بعينك اليوم..
عبد الرؤوف غير عيونه عنه وماباش يرد عليه..
غرفه ودموعها في عيونها؛سامحني مختار ..
شبحلها شويه وقال؛مش مشكله..تعودت..
بعدين ناض وقف وهو يقول؛ان شاء الله تنوضي بالسلامه..الهدايا اللي جبتهم رجاءا مايردهم حد عليا..
هي قعدت تشبحله بحزن ودموعها نزلوا..
شبح لعبد الرؤوف وقال؛في عيونك..
ناض عبد الرؤوف وهو يقول:ماتوصنيش ع غرفه..
ضحك نص ضحكه وهز راسه ومشي طلع من المربوعه..
وعبد الرؤوف وراه...
وين طلعوا برا..
مختار وهو ماشي للباب؛خليك مرتاح نعرف الطريق..
وقف عبد الرؤوف وهو يشوفله بإمتعاض..
وهو فتح الباب وطلع بعدين سكره وراه..
تبدلت ملامح وجهه للغضب..
ومشي طول بيركب السياره..
لما وصل في الباب وقف مكانه لما شاف بوه جاي
ووراه جده علي يهدرز مع واحد من الجيران
لطفي وين قرب يوصل للحوش
بنظرة عابرة عيونه شافوا لحوش غرفه
وجو عليه...
قعد واقف في مكانه وهو يشوفله بنظره غضب..
اما النظرة اللي في عيون مختار كانت نظرة نقمه واضحه..
وترجع بيهم الذاكره للخلف فوق عشرين سنه...
🔺️في وقت سابق...
تحديدا في دار نوم امه وبوه..
لطفي؛وشن تبي تاني هالمرة فلوس معنديش..
مختار:طبعا ماهو اني اللي طلبت..
لطفي؛هاك عارف بروحك..
خشت عليهم ورده وهي تشوفلهم بقلق..
مختار؛مش عارف علاش انت ديما هكي مش قابل مني كلمه ولاعاجبك اي شي نديره..
لطفي؛وشن هو اللي درته بش يعجبني ولامايعجبنيش..شن هو الكلام اللي تعرف تقوله انت!؟
ورده؛لطفي..
لطفي بحزم؛ارجوك ماتدخليش..
هو هز راسه وقال؛مانيش مكثر دوة..اني جيتك بش نقولك نبي نهاجر..
وردة بصدمه؛شني!؟
لطفي ضحك بهزوة..
مختار؛بوي افهمني بالله عليك..اني مش لاقي روحي هني..في البلاد هادي عمري ماحنفلح..اصلا شن فيها هي!؟..التعليم منتهي..
خدمه مافيهاش..والحصار كمل عليها..مافيهاش مستقبل..
لطفي:والمستقبل متاعك انت يراجي فيك برا!..
عقد مختار حواجبه بضيق..
لطفي؛انساها الحكايه هادي طلعها من راسك..
وردة ودموعها في عيونها؛ايه وليدي بالله عليك لمن بتخلينا..لمن بتخلي وخياتك!..
هو بعصبيه؛شن تبيني ندفن روحي جنبكم ولاشنو..
لطفي بحده؛تكلم مع امك كويس..
هو قال؛بوي اسمعني..اغلب شباب البلاد هجوا وبيهجوا منها..
ولاد الشارع كلهم يفكروا في الهجرة..ربيع العباني بوه سفره..
لطفي؛وانت تقارن في روحك بربيع!؟ الولد ناشط ودماغه يخدم ينعبى عليه..بوه يطلعه برا وهو مطمن عليه وعارفه قد المسؤوليه..
مختار:حتى اني قدها وقدود..
لطفي؛ياراجل خبزة الصبح تطلع تجيب فيها سدره وانت راقد..
هو شبح لأمه..وامه هربت بعيونها عنه..
ولطفي مكمل يقول؛مافي شي حطيتك فيه ولقيتك تقدها فاشل في كل شي..وتبي كل شي يجيك واتي..
قولي واحد زيك انت يقدر ع الغربه!..يقدر يخدم عامل نظافه ولايغسل ماعين!..شن تحسابهم برا يرجوا فيك تجيهم ويعطوك مستقبل واتي!؟..
قعمز هني وخليك حدانا خير..
مختار؛وشن ندير حداك نشد المطحن!؟
لطفي؛كبيره عليك راهو وهلبه..برا شوف المهدي شنيبه من ندك هونا شاد المطحن مع بوه ويقرا في الجامعه..شوف محي الدين الصيد كيف يوقف في دكان بوه من الصبح لليل ويقرا معاها في الجامعه حتى هو...قداش واحد من ندك وفي جيلك ماقدرتش دير ربع اللي داروه وفوق هكي تتكبر ع الخدمه في المطحن!..
مختار ودموعه في عيونه؛تسهوك وقول اللي يعجبك..اني بنهاجر يعني بنهاجر..توا ولابعدين..
ومشي طلع من حداهم وهو في قمة الغضب..
🔺️في الوقت الحاضر..
هداكا اليوم ماانمسحش من ذاكرته نهائي..
ونفس اليوم اللي تفكره لطفي وكأنخ صار في هاللحظه..
🔺️بعد ماطلع من حداهم..
التفتت ورده ع لطفي وقالت ودموعها تنزل؛كثرتها عليه يالطفي..
لطفي بضيق؛هو اللي كثرها عليا وهد حيلي..ولدك اني خلاص معاش متأمل منه شي..بديت ندعي ربي يكفيني فضايحه بس..
ورده باستغراب؛فضايح شني!.
هو تنهد بضيق وقال؛جارنا السايح شافه في ليله مروح سكران..
خبطت بيدها ع صدرها وقالت؛نهاري اسود!
وهو مكمل يقول؛خش للحوش من الباب الوراني يحساب ماحد شافه..فضحني وكشف بيا ولدك هدا..
ورده بنبرة باكيه؛علاش يامختار علاش ولدي!؟.
لطفي بقهر؛فسدناه بالدلال ياورده..ولد واحد ع بنات..ولد واحد وماعرفتش نديره راجل...
🔺️في الوقت الحاضر..
غير مختار عيونه عنه وركب السياره..
سكر السواق الباب ومشي ركب..
شغل السياره وتحرك بيها طول..
فاتت من قدام لطفي اللي قعد معاه بعيونه اللي كانت نظراتهم كلها غضب..
وبوه واقف حداه ويشوفله..
هو غير عيونه عن الطريق لف ومشي فتح باب الحوش وخش وخلاه مفتوح..
علي قال بأسف؛لاحول ولاقوة الا بالله..
بعدين مشي خش بعده وسكر الباب....
🍃🍃🍃🍃🍃
في المستشفى..
كانت اميمه مع صديقتها حسناء يجهزوا في ارواحهم للمرواح..
وهما في الحجره..
اميمه وهي تساوي في وشاحها؛خلاص..نزلت ايديها وقالت..غدوة اخر يوم..
حسناء وهي تلبس في جاكيتها؛زعمه شن يدير دكتور قصي؟
لبست اميمه شنطتها وقالت؛ولا هامني...
حسناء:لكن تعرفي حظك حلو وربي يحبك اللي مجموعة الدكتور خالد فيها مكان فاضي..
اميمه:ايه الحمد لله..في البدايه قالولي مافيش راهو بس بعدين ربك سخرها وطلعت في مجموعه يبوا طبيب..ومجموعه منو الدكتور خالد..
حسناء:مش قتلك حظك حلو..
اميمه ابتسمت وقالت؛الحمد لله..شني واتيه؟
حسناء؛ايه..هيا..
🍃ومشوا الزوز طلعوا مع بعض من الحجره..
ومنها من مبنى المستشفى..
برا الليل ليل..والدنيا زحمه..
قعدوا يمشوا وهما يهدرزوا لين وصلوا في موقف السيارات..
شافت حسناء حسين واقف ع سيارته ويستنى..
حاولت تخفي ابتسامتها وهي تقول؛خوك جي..
شافاته اميمه وقالت:ايه عارفه بكري كلمني..
ومشوا الزوز..
حسناء مشت لسيارتها وهي تسرقله في النظر..
واميمه وصلت فيه وقالت؛حسونه..
هو نزل تليفونه وقال؛هيا اركبي..
مشت اميمه لسيارتها..
وهو جي بيركب لسيارته بنظرة عابرة شاف حسناء وهي راكبه سيارتها..
التفت طول لأميمه وقال:اميمه..
شبحتله وقالت؛نعم؟
حسين؛قولي لصاحبتك طالعين وراها..
وركب سيارته..
ابتسمت اميمه بعدين ركبت سيارتها واتصلت بحسناء اللي طول ردت عليها..
"هاه ميمو"
اميمه؛حسنا بنطلعوا وراك نوصلوك..
"مش لازم اميمه ماتعبوش ارواحكم"
اميمه؛سكري سكري..وسكرت عليها وهي تضحك..
شافت للمرايه..بانت عليها سيارة حسناء وهي طالعه..
وهي طلعت بعدها...
وحسين لحقهم..
☘طول الطريق كانت حسناء تسوق وهي فرحانه..
ومشغله في سيارتها اغنيه تحكي عن حالتها..
وكانت مشاعرها متحركه معاها..
كانت تتمنى الطريق تطول وماتمش...
وين وصلت للحوش تمنت لو تقدر تشكره...
روحوا هو واخته طول اول ماوصلوها..وخلاها وهي في حالة حلوة اي حد يعيشها يتمنى مايطلعش منها..
🍃🍃🍃🍃🍃
الساعه 11:00ليلا..
في حوش لطفي الواعر..
تحديدا دار المعيشه..
كانوا فيها مطيره وفردوس وطوبى..
مطيره راقده بالجنب ومتغطيه ..
وفردوس مقعمزه ومغطيه رجليها بالبطانيه..
وطوبى مربعه رجليها ولافه روحها بشال سدره وهي تهدرز...
طوبى؛طلعت من المربوعه وجهها اصفر..وبعدين زي اللي صار نقاش بينها وبين راجلها المهم تنكدت وانقلب جوها..
فردوس بكره؛وين مايمشي يجيب معاه الخراب والبلي..
سكتت طوبى وهي تفكر في كلامها بقلق..
مطيره وهي تشبح في الفراغ:من صغره وهو هكي مصيبه انبلي بيها وخيي ربي يصبره..
شبحت طوبى لعمتها والقلق واكل قلبها...
🍃ومن دارهم...
لدار بنات لطفي اللي خدوها حفيداته..
كانت اريج مكسده ع الفيس..
وآلاء تسمع في اغاني الوجع والفراق ودموعها ع خدها..
شويه خطر ع بالها تخش ع صفحة مهند وتشوف كان نزل حاجه جديده..مانزل شي من الصبح..
وين خشت عليها لقاته منزل اعلان من نص..
وهالاعلان كان عن موضوع الحلقه الجديده من برنامجه اللي يجي كل خميس في اليل..
كان منزل انه غير عنوان حلقه غدوة...
من "عشرة طيبه"..ل"علاقات سامة"
قلبها فجأه قعد يدق بخوف..
حولت سماعاتها وقالت لأريج؛اريج..اريج..
اريج بدون ماتشوفلها؛شن تبي!؟
الاء ودموعها في عيونها؛اريج مهند غير عنوان الحلقه متاع برنامجه..شوفي شن خلاه..
شبحتلها اريج..لقتها مادتلها التليفون وايديها يرعشوا..
خداته منه وشافت المنشور..
شبحتلها وقالت؛تلاقيتوا اليوم..
هزت راسها بإيجاب ودموعها ينزلوا..
اريج؛شن صار باهي؟!..
🍃وحكت آلاء لأريج ع اللي صار كله..
اريج:تمام يعني هو مشي وخلاك بدون ماتسيبوا بعض..
الاء بخوف؛ايه والله العظيم..تعرفي يا اريج شكله الح.قير هداكا مشاله وكلمه..
سكتت اريج وهي تشوفله بخوف..
الاء بنبرة باكيه؛ولا؟ واضح ..
تبدلت نظرات اريج للحده بعدين لوحتلها التليفون وقالت؛تستاهلي..
وولت رقدت وعطتها بالظهر..
هي قعدت تفكر لو فعلا وليد حكي لمهند ع كل شي..
كيف كانت ردة فعل مهند..وشن قال عليها!!؟
كيف ولت نظرته ليها توا!!؟
بدت تبكي بوجع..
واريج تسمع فيها وبرغم غضب عليها الا ان حالها وجعها هلبه...
🍃🍃🍃🍃🍃
"زي مانبهتك نجاة انتي في تركينه واني في تركينه لين نوصلوا لمطار اسطنبول"
نجاة؛ياودي باهي فهمت والله فهمت..
"باهي قوليلي عن شن اتفقتي انتي وخواتك "
نجاه؛مسافرة مع خالتي لتونس علاج...
"على شني ترا"
نجاة؛مسالك..
"يللا ماشي الحال"
بضيق قالت؛مانيش عارفه لأمتى هالحال لأمتى بنقعد زي العشيقه نتلاقوا بالدرقه..نسافروا مع بعض بالدرقه..كل شي بين وبينك في الظلام...
"نفوته السفرة ماعنديش مشكله كان بتبدي في النكد من توا"
تنهدت بضيق وقالت؛خلاص خلاص انسى..
سكت شويه بعدين قال..
"نجاه حبيبي..ياروح قلبي..والله والله..كل شي حيمشي زي ماانتي تبي واحسن.."
هزت راسها وقالت وهي تساير فيه؛ان شاء الله..
"انتي حطي في بالك حاجه وحده بس..القلب والعقل معاك انتي بس..لو يخيروني نختارك انتي هادي خليك واثقه منها مستحيل نفرط فيك..انتي اول واخر حب في حياتي انتي نصي التاني انتي بس.."
نجاه ودموعها في عيونها؛وهديكا؟
"خلينا منها بالله عليك انسيهالي اني هارب من نكدها ونكد عيلتها كبدي درهت"
ابتسمت نجاه بفرح لما حست في نبرة كلامه نفور واضح من طوبى وقالت:تمام معاش نجيبوا سيرتها بكل..
"ايوه خليك فينا حني وبس"
🍃🍃🍃🍃🍃
وعدت هالليله..
وجي اليوم اللي بعده..
الخميس...24..فبراير..سنة 2018..
بعد الفجر..
درس الجالي سيارته قدام عمارة نجاه..
وهي كانت واقفه قدام باب الشقه توصي في اختها..
نجاة؛زي ماقتلك صابرينه..
صابرين والنوم في عيونها؛باهي ياودي باهي..بري..بالسلامه..
ضحكت وقال؛سلام..
هي قالتلها؛طمنيني عليك..
طلعت نجاة وهي تقول:إن شاء الله..
سكرت صابرين وراها الباب ومشت لدارها..
🍃اما هي نزلت لوطا..وطلعت من العماره..
حطت شنطتها في السياره..وشغلتها وتحركت طول..
طلعت بيها من العمارة شافت الجالي يراجي فيها..
حياته وهي مبتسمه وهو ردلها التحيه..
تحركت بالسيارة..وهو وراها...
🍃في الطريق..
خدي تليفونه وسكره...
🍃وطوبى في هالوقت..
طلعت للجنان واتصلت بيه بش تشوفه ركب الطيارة ولامازال..
لقت رقمه مسكر..
نزلت تليفونها وقالت بأسف؛شكله ركب الطياره....
🍃🍃🍃🍃
وبعد ماقطعوا مسافه لاباس بيها..
وصلوا لمطار معتيقه..
حطوا سيارتهم في المطار...
وكل حد مشي بروحه..
داروا الاجراءات كلها..
ومعارف الجالي في المطار سهلوا عليه وعليها هلبه حاجات..
مااستنوش هلبه..بعد الموعد الرسمي للرحله بنص ساعه..
ركبوا الطياره..
وكل حد فيهم في مقعد...
واقلعت الطيارة...
وكل حد فيهم كان بعيد عن التاني..بس يراقبوا في بعض..
ويتبادلوا في الابتسامات...
🍃وبعد ثلاثه ساعات..
وصلوا لمطار اسنطبول...
وغادي..كملوا الاجراءات مع بعض وطلعوا مع بعض من المطار وهما في قمة السعاده والحماس..
وقفوا تاكسي وركبوا فيها بشناطيهم..وتوجهت للفندق اللي بيقعدوا فيه قبل ليسافروا لأنطاليا اللي بيقضوا ايام السفر فيها...
🍃🍃🍃🍃
الساعه 11:00صباحا..
بعد مادرس ونزل من سيارته قدام المدرسه..
مشي خش داخل...
تصادف هو وحده من موظفات الادارة في المدرسه..
قال:السلام عليكم..
هي ردت؛وعليكم السلام..تفضل..
هو حط ايديه ورا ظهره وقال:انا مهندس كهرباء جيت بخصوص المبنى الجديد اللي عندكم هنا..
هي قالت:ايه ايه..صح مزبوط..والتفتت وقعدت دور بعيونها بعدين قالت؛استاذ فتحي..
جاها الاستاذ وقف حداهم وقال:خير ابله عاتكه..
هي قالت؛مهندس الكهرباء اللي جاي ع خاطره المبنى متاع معامل الحاسوب..
:اها..اهلا وسهلا..
هو بإبتسامه؛اهلا..
صافحه وقال؛كيف الحال..
هو قال؛الحمد لله..هي تفضل معاي عن اذنك ابله عاتكه..
هي ابتسمت مجامله ومشت..
والاستاذ خدي معاه عبد القيوم وهو يقول:تو نوريك المبنى من داخل ..
هو قاله؛كامل هو؟
؛ايه كامل..تشوفه انت وبعدين تجي الاستاذه نتفاهموا في حضورها..
هو هز راسه وقال؛تمام..
وطلعوا للساحه هما الزوز..متوجهين لمبنى المعامل الجديد...
🍃وتنزل طوبى من الدور التاني..
وهي ماشيه لمكتب الاداره صادفتها نفس الابله اللي تلاقت مع عبد القيوم لما خش..
وقفتها وهي تقول:استاذه..مهندس الكهرباء جي وطلع مع استاذ فتحي للمعامل..
طوبى:تمام طالعه نشوفهم..
"بيبو"
التفتت وهي مبتسمه وقالت؛جيتي..
عبير ؛لاقاعده في الطريق..
طوبى قلبت عيونها بملل.
ضحكوا عبير والابله اللي قالت؛عن اذنك استاذه..
طوبى :اذنك معاك..
مشت الابله لمكتبها.
وطوبى؛جبتي الشيتات
عبير؛ومأشرتلك ع اللي بيخش في الامتحان..
طوبى:باهي اني طالعه توا عندي شغل ضروري سريع.
تعالي معاي..
عبير؛Ok..
ومشوا طلعوا مع بعض للساحه.
عبير وهي تمرر في نظرها ع المكان؛كبيره مدرسة اختك..
طوبى بإبتسامه حزن:بعد ماتوفى راجلها جابولها نصيبها من الورث..فتحت بيه هالمدرسه وبوي عاونها شويه..كبرتها سنه وسنه..لين ولى ليها اسم كبير ومعروفه ومن احسن المدارس الخاصه..
عبير:المكتوب باين من عنوانه..
طوبى:هدا علاش شديت مكانها بعدها وضغطت ع روحي بش نحافظ ع تعبها..رغم انه مش ساهل بكل بالذات على وحده زيي اني ناقصة خبره..بس ندير في جهدي كله..
عبير بإبتسامه:ربي يعاونك حبيبي..
"استاذة طوبى"
شافوا الزوز لأبلة الرياضه اللي جت تكلم في طوبى ع شي يخص النشاط الرياضي في المدرسه..
عبير قعدت تشوف لطوبى كيف واقفه وتسمع في الابله وهي مبتسمه بإعجاب..
بعدين غيرت عيونها عنها وقعدت تمرر فيهم ع الساحه..
لين ثبتوا ع شخص بعينه..
كان واقف يشوف للمبنى الجديد..
عاطي بالجنب..
لابس بنطلون اسود جينز وفوقه بالطو للركبه لونه رمادي..
حست روحها شايفاته قبل..وين زادت دققت فيه عرفاته..
وتفاجئت ع الآخر..
🍃وهو كان يقول؛بياخد وقت..
الاستاذ:قداش تقدره هكي..
عبد القيوم؛مانقدرش نحدد...بس مش طويل واجد..
الاستاذ:ع العموم لما تجي الاستاذه تفاهم انت وياها..
🍃كملت طوبى كلامها مع الابله ومشت من حداها..
سمعت عبير وهي تقول..
حيي! هدا!!!
طوبى بآستغرارب:مني!؟
عبير وهي تأشر ع التارقي:تي هدا اللي واقف غادي ولابس رمادي..هو نفسه التارقي اللي جي خطبني..!
شبحتله طوبى...
🍃الأستاذ؛اها نحسابك من الشرق من اللكنه اللي تدوي بيها..
عبد القيوم بإبتسامه؛عشت مدة كويسه في بنغازي..
؛ايوه قول هكي من الاول كلامك قريب ع كلامهم..
وشاف طوبى وقال:اهي الاستاذه..
ويلتفت عبد القيوم ويشوف الاستاذة اللي من اول ماخش وهو يسمع فيهم يتكلموا عنها...
وشاف اخر وجه توقع يشوفه اليوم ع الأقل..
ويخش في حالة صدمه..
خلاته يشوفلها ومايحولش عيونها وهو مش مستوعب..
مش مستوعب اللي قاعد يصير معاه..
مش فاهم معناه..
علاش يصير معاه هكي..!؟
علاش قاعد ينحط في هالاختبارات الصعبه..
وكل اختبار اصعب من اللي قبله..
بالذات هالاختبار صعب هلبه..هلبه...
🍃هي قالت؛دقيقه شويه عبير تو نجيك..
ومشت ناحيتهم..
هو لما شافها جايه استاقظ..ولف وجهه عنها بطريقه غير ملحوظه وبانت طبيعيه جدا..
ما يشوفش فيها..بس كان قلبه يحسس بقرب خطواتها..
وتوصل فيهم وتقول..
"السلام عليكم"
هو رد بصعوبه..الرد طلع منه بصوت شبه مختفي...
"وعليكم السلام"
الاستاذ؛استاذه طوبى الواعر مديرة المدرسه..
طوبى:لو اني مش غالطه..انت جارنا عبد القيوم صح؟
ويسمع صوتها..وتكلم فيه هو تخاطب فيه..
وقالت اسمه...وسبقاته بكلمة جارنا!...
عبد القيوم..
من عبد القيوم!؟..
في حضورك تبيني نقعد عقلي..واعي للدنيا..
ومتفكر اسمي...!
تي اني نسيت من نكون وشن نكون...
في حضورك..التغي حضوري...
كل اللي نعرفه في اللحظه هادي..
اني عبد راد عليه ربه امر مش عارف خيره من شره
مش عارف كيف حتكون نهايته...
☘وهادي كانت اجابة عبد القيوم لسؤال طوبى اللي قالها قلبه ومستحيل تترجم ع لسانه☘
اما الاجابه اللي طلعت من عقله وترجمها لسانه؛صح..
طوبى:اهلا..
هو؛وبيك..
طوبى:المهم..اني المعامل تكون جاهزة قبل نهاية السنه ضروري..
رفع يده لحاجبه اليسار وحكه وهو يقول؛نحاولوا مانطولوش..
طوبى؛تقدروا تبدوا الخدمه من اليوم بعد نهاية الدوام؟
هو سكت شويه بعدين هز راسه وقال:ان شاء الله..
طوبى:شن ماكلف ماعنديش مشكله المهم عندي تكون خدمة صح..
هو قال؛بإذن الله..
🍃ومن بعيد شويه عبير واقفه تشوفله..
كيف واقف ويتكلم مع طوبى بدون مايشوفلها وعقدة حواجبه ماتحولتش..
تفكرت لما شافاته في اخر مرة جي فيها لحوشهم..
وين قالتلها امها ان هو اللي جاي..
ضربهم الفضول هي وخواتها يشوفوه..
ووقفوله كلهم في روشن الصاله اللي مايبينش شن فيه وراه..
لما جي طالع وبوها مسقده..
شافاته...
لفت انتباهه..بس كون اصله تارقي خلاها ماتشوفش فيه ولى ميزة تجذبها..
عكس توا..
شكله ولى جذاب هلبه وهو واقف وعاطي طوبى بالجنب ويكلم فيه بدون مايحرك عيونه بالغلط ويشوفلها..
🍃طوبى:خلاص استاذ فتحي الموضوع عندك..
:حاضر استاذ..
هي قالت؛نستأذن..السلام عليكم..
ولفت ومشت وهو يرد عليها..
وعليكم السلام..
شاف للأستاذ وقاله؛خود رقمي..
🍃وصلت طوبى في عبير وقالت؛اييه وقت استراحتهم الفلاليس..
التفتت عبير شافت صغار الروضه طالعين يجروا وكلهم حماس ونشاط..وبراءة..
كانوا حلوين هلبه..
طوبى وين تشوفهم تنسى الدنيا ومافيها..
🍃وعبد القيوم بعد مانهي كلامه مع الاستاذ..
مشي بسرعه.
يبي يطلع من المدرسه..مش قادر يقعد فيها..
بس وهو ماشي..
الصغار كانوا يجروا ورا بعض..
واحد منهم دف بنيه بالغلط طيحها..
جت قدامه..وقعدت تبكي..
🍃طوبى بفجعه؛نهاري!..
ومشتلها بسرعه..
وين قربت توصل فيها..وقفت..
لما شافاته رافع البنيه وهو يسكت فيها؛خلاص ياسمحه خلاص ماصار شي..خلاص..وقعد يمسح في دموعها ويساوي في شعرها وهو يقول...محلاه شعرك..من دارهلك؟
البنيه بدت تهدي وجاوباته؛ماما..
هو ضحك وقال...
يحفظكون مسينغ"ربي يحفظكم"...
🍃هني طوبى حست بحاجه غريبه..
حست وكأن المشهد هدا صار من قبل...
صور ناقصه في عقلها من مشهد كامل..
نفس الدوشه والزحمه..
صغار صغيرين..
بنيه تبكي وواحد رافعها في حضنه ويسكت فيها..
بس المشهد اللي صار توا خلاها مش شايفه غيره..
الساحه...صغار الروضه..بنيه منهم تبكي وجارهم التارقي رافعها في حضنه ويسكت فيها..وقال كلمه مش مفهومه في اخر كلامه معاها..
جت الابله المسؤوله عنها وقالت؛ميرا حبيبتي..
هو نزلها وهويقول؛عدي للأبله متاعك.
هي قعدت تشبحله..مسح ع شعرها وابتسملها بعدين مشي كمل طريقها..
وطوبى بعيونها معاه..وقاعده تفكر في نفس الشي..
🍃وهو كان حاس بيها وين جت وقفت حداه بمسافه بدون ماتتكلم..
هو تفكر هدا اليوم بتفاصيله..لايمكن ينساه حافظه لقطه لقطه..
وسبحان من خلاه يتكرر مرة تانيه لسبب مش معروف ولا واضح لتوا..
وهو ماشي طالع من الساحه..
فات من قدام عبير اللي شافاته عن قرب اكثر وماقدرتش تحول عيونه من عليه لين ادرق من قدامها..
جذبها هلبه..هلبه...لدرجة انها استغرب في روحها...
🍃"ماصارلها شي استاذه"
طوبى استاقظت وغيرت عيونها للبنت بعدين هزت راسها وهي ساكته..
جتها عبير وقالت؛طوبى هيا عاد بش نعطيك الشيتات ونتسقد..
شبحتلها بنظرات استغربتهم عبير..
عبير:خيرك ؟
ضحكت طوبى بإستغراب وقالت:صارت توا لقطه حسيتها تعاودت.
عبير بضحكه؛كأنها صارت معاك من قبل عرفتها..ياما تصيرلي نقول اللقطه هادي متعاوده وهي عمرها ماصارت معاي قبل..
طوبى بإبتسامه؛ايوه هي هادي..ماعرفتش شن تفسيرها العلمي..
عبير:ياحنه قالوا في عالم موازي للعالم متاعنا فيه نفس البشر..يعني اني وياك في منا نسخه نسخه غادي.اللي يصير معاهم نفس اللي يصير معانا غير هما سابقين في الوقت..
طوبى؛المصدر جارتنا خالتي الجزيرة ..
قعدت تضحك عبير بعدين قال:تي هيا شوفي معاش الشيتات..
طوبى؛بري قدامي..
مشت عبير وطوبى معاها متوجه بيها لمكتب الإدارة..

#فلاش_باك
#طوبى

(ملاحظه مهمه اقروها اكثر من مرة..
الروايه طويله..ومازال مطوله بإذن الله واني معروف عني لو كتبت روايه طويله نقعد فيها عام..اللي مايقدرش ع الروايات هادي يفوتها من سكات..
من كان منكم يؤمن بالله واليوم الآخر فليقل خيرا او ليصمت..ليصمت....
وصلوا ع الحبيب🌷)

يتبع....