طوبى "جنة طوبى"

الجزء الحادي والستين3

#طوبى "جنة طوبى"
#جمان_فريد
#الجزء_الحادي_والستين"رسايل_وداع☆☆☆"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
ليبيا..طرابلس
الساعه 11:00صباحا..
كانت نبيله في الكوجينه تغسل في ماعين الفطور..
اليوم ماعندهاش مرافعات..
خش عليها عبد الرؤوف..
وجهه متغير لونه.. وباديه عليه ملامح الضيق..
مشي بياخد طاسه بش يشرب ميه...
بعدين حطها ع الرخامه..
شافتله نبيله بإستغراب وقالت؛خيرك؟
شبحلها شويه بعدين قال:مرت المهدي..
عقدت نبيله حواجبها بقلق..
عبد الرؤوف:توفت..
بدت ع وجهها ملامح الصدمه وقعدت ساكته..
وهو يقول بضيق؛كلمني بكري نضال وخبرني وقالي بيجبوها هني مع العصر يييني نرتبله الوضع..
هي قالت بصدمه؛انا لله وانا اليه راجعون..بس كيف توفت؟
هو قال:والله ماني عارف كل اللي قاله انها توفت في السعوديه وخلاص..
دمعوا عيون نبيله ومازالت مش مستوعبه الخبر بعدين قالت:الله يرحمها ويغفرلها مراة محترمه وطيبه..
ع خشة غرفه وفي يدها طاسة فاضيه..
سمعت شن قالت نبيله قلبها انقبض وقالت؛علي مني؟
التفت عبد الرؤوف وشافلها بقلق..
ونبيله قالت طول:عائشه مسكينه..
غرفه بصدمه؛من عائشه!؟
هو قعد مركز مع غرفه بخوف..
نبيله وعيونها معبيات دموع؛كنة عيت شنيبه مرت المهدي..
غرفه بصدمه؛صاحبة اختي سدره!!؟
جاها عبد الرؤوف وهو يقول:الله يرحمها كلنا ليها..وضمها طول بش يخفف من فجعتها..
وهي شدت فيها وقعدت تبكي بصدمه وتقول؛باهي كيف وامتى!؟
هو قعد يمسح ع شعرها ويقول؛توفت الصبح لكن كيف مش عارف..
ونبيله تشوفلهم بحزن وهي تمسح في دموعها اللي ينزلوا ورا بعض...
🍃ولعند اللحظه هادي في شارع القهوة..
ماوصلش الخبر لحد قبل حوش عبد الرؤوف...
حتى امها وكناينهم اللي معاهم ماعندهمش علم لكن بوها وخوتها اللي كانوا برا الحوش عرفوا والخبر كان فاجعه بالنسبه ليهم..
🍃🍃🍃🍃🍃
في حوش شنيبه...
كانت طوبى كيف جايتهم بعد ماروحت من المدرسه تسأل عن حال نجاة وولدها..
وكان موجودين معاها وقتها..
عزوزتها وحمواتها الزوز...
وصغار المهدي وعائشه كلهم في المدرسه..
🍃مغليه؛بكري اتصلت بيا تنشد عن الصغار..
خديجه؛مافيش اهدا منهم صغارها حتى معاذ مش متعب عطيته سيارته قعد يلعب ومعاش دور شي..
نسرين:ماضايقش منهم محي؟
خديجه؛بالعكس فرح بيهم هلبه يزن عليا هلبه المده الاخيره يبي صغار..
نسرين:وجيبيله علاش تحرمي فيه..
خديجه؛الحمل في السن هادي متعب يانسرين ماعنديش ليه جهد..
مغليه؛لامتعب لاشي اهي اختك كيف جابت ومرت خوك اللي قاعده تنسرف حتى هي حامل ودسدس..
طوبى بلعت ريقها وين سمعت الكلام الاخير..
خديجه بتهكم؛لاهديكا خليها بروحها من تونس لألمانيا لسعوديه بيخش عليهم الصيف هما ينسرفوا..
مغليه؛تخافي تقول مدام الصيف خش خش خل نمشوا للمالديف..
ضحكت خديجه وقالت؛تصير عادي وولدك يهز في دماغه وراها..
مغليه؛ديما نقول فيها هدا وهو مايحبهاش هكي يدير مالا كان يحبها كيف؟!
طوبى ربعت ايديها وهي مضايقه من اللي تسمع فيه..
ونسرين ضايقها كلامهم حتى هي لكن التزمت الصمت لان طوبى موجوده..
خديجه:حظوظ يام حظوظ وعيشه بنت جويده حظها من السمي لولايا اني ياكبدي هالعز ماراته وين كانت تعرفه قبل ولاتحلم بيه!..
شافتلها طوبى وهي مضايقه وتحاول تخفي غضبها اللي يبان من عيونها...
🍃نفسها نظرات الغضب اللي كانت في عيون نضال اللي جي وقف فم باب الصاله وهو يسمع في الجزء الاخير من حديثهم ويشوف لخديجه..
شافاته امه وخافت لما شبحت اثار الدموع في عيونه اللي كان لونهم احمر..
قالت بخوف:نضال خيرهم عيونك هكي!؟
كلهم شبحوله...وركزوا ع نفس الشي وخافوا..
هو شد الباب بيده اليمين وقعد يتكلم وهو يشوف لخديجه؛حاسدتيها لانها متفاهمه هي وراجلها وماقدرتيش ع قد مادرتي تفرقي بيناتهم..
انصدمت هي وامها واختها في كلامه..
وطوبى شبحتلها وهي رافعه حواجبها..
مغليه ركزت ع طوبى وقالت؛خيرك انت شن جاك شن القطاف اللي تقطف فيه؟!
هو اشر ع خديجه وعيونه ع امه وقال بإنفعال؛هدا الكلام اللي تستحقه بنتك اللي مش مخليه حد في حاله..
خديجه بغضب قالت؛هيييه انت احترم نفسك وتكلم كويس..
قعد يشبحلها بحده..
امه قالت؛خيرك انت شن جاك كيف تدوي مع اختك الاكبر منك هكي؟!
هو خدي نفس وطلعه بعدين قال لأمه بشي من الهدوء وبنبرة فيها حزن:تو كلمني المهدي..وسكت..
وهما يشبحوله..
غمض عيونه وفتحهم بعدين بلع ريقه..
مغليه بخوف ونرفزة؛قول الكلام كله في مرة وحده..
هو قال؛مرته توفت..
خبر كان صاعقه ونزلت عليهم كلهم..
في منهم شكك في سمعه..
زي نسرين اللي ناضت ومشتله وهي تقول؛شن تقول انت من هي اللي توفت!!!؟
هو شد دموعه بقوة وماردش عليها..
عيونه ع خديجه اللي كانت مصدومه لأبعد حد..
شداته نسرين من ذراعه وقالت؛قول من هي اللي توفت عيشه!؟
هو هز راسه وكان يمنع في روحه بقوة عن البكي..
ناضتله امه وهي تقول بصدمه؛ياربي شن يقول هدا!؟ كيف توفت ومن شني امس ولدها قال كلمتها وماقالش فيها حاجه!..
نسرين ودموعها نزلوا وهي تقول بعدم استيعاب:مايبصروش في الحاجات هادي يانضال ماتجيش البصارة في الموت عيب عليك..
هو معاش قدر يشد روحه قال لأمه:بيجيبها مع العصر يام..
ومشي وخلاهم..
ونسرين حاولت تشده وهي تعيط؛تعالى هني وين ماشي تعالى نقول نبصر عليكم تعالى هني ياكذاب..
ياكذاب..وقعدت تصرخ بأعلى صوتها وهي تقول..
ياكذاب...
ناضتلها خديجه من خوفها عليها وهي تقول؛نسرين اهدي!..
مغليه ودموعها تنزل:نسرين بنتي مش باهي ليك راك نافس ودايره عمليه..
دفتهم وهي تعيط؛حولوا حولوا..حولوا معاش تمسوني نكرهكم نكرهكم ياريتني ماجيت فيكم حولوا..
ومشت طلعت وهي تعيط وتقول..
ووه عليا عيشه..ياناري عليك ياصاحبتي ياناري عليك ياعيشه..
وهما طلعوا وراها بش يهدوها...
🍃وخلوا طوبى مقعمزه بروحها في الصاله..
تحت تأثير الصدمه..
مش مصدقه اللي سمعاته..
عائشه صاحبة اختها ماتت...
في الوقت اللي كانت فيه عايشه في خوف ورعب من ان يجيها خير اختها..جاها خير موت صاحبتها فجأه هكي وبدون سابق انذار...!
صغارها...كيف بيصير في صغارها!؟ كيف بيستوعبوا!؟
محمد..يزن...سدرة..
سدرة كيف بيصير فيها البنت مشتاقه لأمها وتراجي فيها تروح بالدقيقه والثانيه..!
طوبى وقتها لاقدرت تتحرك ولاتتكلم..
الفقد بينها وبينه قصه طويله ومؤلمه ماتتمنى لحد يعيشها..
بالذات فقدان الام..فقدان الام بالنسبه ليها..موت من نوع اخر..
موت مع وقف التنفيد...
🍃ومصاب الأم بضناها مصاب جلل عظيم..
تحس فيه الام انها فقدت جزء لايتجزأ منها..شي منها يمشي مع ضناها اللي فقداته...
مابالك لما يكون الابن اللي فقداته وحداني ماعندهاش زيه يعوضها حتى شويه...
وعائشه كانت البنت الوحيده لعتيقه ع خمسه ولاد..
ووين جاها خبر موتها كادت تفقد عقلها...
صوت صرخاتها انسمع في شارع القهوة كله..
خلت نساوين الشارع كلهم يطلعوا من حياشهم ويمشولها..
لقوها في حالة يرثى لها..
تبكي وتعيط وهي تقول..
ياروحي ع بنيتي...ياناري ع بنيتي...بنيتي..بنيتي..
وكلمة" بنيتي" اللي تردد فيها بكل ألم..
شقت قلوب كل اللي يسمعوا فيها ع قد ماكانت تطلع بوجع من وسط الروح طالع...
🍃سمع الجالي وسمع بوه والزوز طول مشول للحوش..
وصل الخبر حتى لعمر الموجود في اخر الدنيا..
وطول حجز لروحه ولمرته بش يروحوا في نفس اليوم..
🍃🍃🍃🍃🍃
الساعه 1:00ظهرا..
محمد كان مع خوه وواحد تاني من ولاد الشارع مروحين من المدرسه..
مايندروا ع شي..ولاع بالهم ولاجي في خاطرهم انهم حينفجعوا بعد شويه وينصدموا صدمة عمرهم...
ماكانوش بروحهم في الطريق..
كانوا قدامهم مروة وصفاء..
ووراهم سدرة ومعاها تاله...
اول ماوصلوا للشارع...
وخشوا..
لاحظوا ان كل الوجوه اللي يقابلوها يشوفولهم بنظرات غريبه..
صفاء؛كأن في دوشه وزحمه؟..
مروة؛صوت تقربيع حديد..
صفاء؛ايه وكانه في حد يركب في خيمه..
شافت مروة لصفاء بخوف وقالت:خيمه!؟ خيمة شني..
وقفت صفاء فجأة..
ومروة وقفت معاها وهي تقول؛خيرك وقفتي!؟
بعدين التفتت وشافت وين اختها تشبح..
لقت الخيمه قاعده ينصبوا فيها قدام حوش شنيبه..
سمعت صوت ولد شارعهم يقول..
"قدام حوشكم يامحمد"
قدموا يزن ومحمد وهما يشوفوا في الرجاله كيف يركبوا في الخيمه..
عيون محمد دور بالنظر عليهم وهو عاقد حواجبه بخوف..
يزن بخوف؛من مات؟!
ومحمد قاعد ع حاله وماتكلمش بكل..
ووراه بنات فايزة يشوفلهم..
شويه مروة تجرأت وقالت؛محمد شن في؟
التفت شافلها وقال:مش عارف؟
يزن مشي طول بش يعرف..
وهو لحقه...
شافوا عمهم الجالي طالع من جنب الخيمه جي بيتصل بحد..
بس لما شافهم نزل التليفون وقعد يشبحلهم..
هما مشوله ومحمد قال:خيمة شني هادي!؟
الجالي مش عارف كيف بيقوللهم..
حط يده ورا رقبة محمد واليد التانيه ع شعر يزن وقال؛لاإله الاالله..شباب شدوا حيلكم...
بلع محمد ريقه من الخوف..
ويزن قعد يشوفله بخوف وبدي يرجف..
الجالي بألم؛امكم توفت..
الزوز قعدوا يشبحوله بدون مايديروا اي ردة فعل..
وقلب الجالي تقطع عليهم ..
خداهم في حضنه وهو يمسح عليهم..
والزوز مازال مش مستوعبين..
🍃مروة حطت يدها ع ذقنها وقالت؛حي كان مايطلع عمي المهدي...ودموعها طاحوا..
وصفاء تشوفلهم ودموعها ينزلوا...تفكرت موت بوها وتفكرت كيف عرفوا بالخبر..
حطت يدها ع صدرها وقعدت تبكي..
ع جية سدرة ومعاها تاله..
تاله:خيركم تبكوا؟
وسدرة شافت جهة حوش جدها..
لقت خوتها واقفين مع عمها الجالي..
بعدين شافاته خداهم ودخلهم داخل..
هي طول مشت بتلحقهم..
وعيونها يشوفوا للخيمه وملامح وجهها كلها تساؤل...
🍃تاله؛قولوا علاش تبكوا من مات؟
مروة ببكي:مانعرفش؟
صفاء وهي تبكي؛شكله عمي المهدي..
ع خطمة وحده من الجارات ماشيه لحوش شنيبه..
شافتهم وقفت وقالت؛سمعت امكم يابنات؟
شبحولها وصفاء قالت؛مني مات؟
؛عيشه..
التلاته انصدموا وانفجعوا..
🍃الصدمه..الفجعه..
اللي قاعدين عايشينها محمد ويزن افقدتهم القدره ع النطق حاليا...
بعد مادخلهم عمهم للحوش وقعمزهم في المربوعه جابلهم ميه بش يشربوا..
محمد رفع يده بدون مايتكلم بمعنى مايبيش..
خلاه ومشي ليزن وقاله:اشرب..
خدي يزن الشيشه وقعد يشرب بعدين حولها وقال وهو يرعش:حقه ياعمي امي ماتت..ماتت خلاص معاش بنشوفوها قصدك...
الجالي حط يده ع عيونه وضغط عليهم وهو متألم ع الأخر بعدين حولهم وهز راسه وهو يقول:ايه..ادعيلها ربي يرحمها ويغفرلها..
ضم يزن ايديه لبعض وهو يشوف لعمه والدموع عبوا عيونه وقال:باهي كيف ياعمي هي امس كلمت محمد هو قالي كلماته ولا يامحمد..وشبح لخوه..
ومحمد مازال في حالة صدمه..
الجالي:محمد..محمد...انت كبير وواعي وتعرف ربي وتعرف ان الموت حق علينا كلنا..كلنا بنموتوا في النهايه ماقاعد فيها حد..
ويزن دموعه بدوا ينزلوا..نزل عيونه لوطا وقعد يبكي ويضم فايديه لبعض بقوة..
قعمز الجالي جنبه وضمه لحضنه..
وهو يشوف لمحمد اللي كان يشوف لمكان واحد ومانزلتش منه دمعه..
🍃وداخل عند النساوين..
اغلبهم كانوا يبكوا بحزن شديد عليها..
بالذات نساوين خوتها اللي كانت بالنسبه ليهم اخت مش حمي..وخوات سدره...فردوس وغرفه...
واللي كانت قلوبهم مفطورة من الحزن عليها..
نسرين صديقتها...وامها اللي مرتين فقدت وعيها...وتوا قاعده شارده بنظرها في زاويه وحده ودموعها ينزلوا سيل..
هدا كان في الصاله..
وبرا منها..
في دار بنات شنيبه..
طوبى كانت حاضنه سدره بقوة وهي تبكي..
وسدرة تبكي في حضنها وتقول بصوت كله ألم يقسم القلب..
ماما..ماما..لاماما...لا..نبي ماما اني نبي امي..ماما..ماما..
وطوبى ضم فيها بقوة وهي تبكي معاها..
حاسه بيها..لأمها ذاقت من نفس الكاس وان كانت واعيه وقتها...
🍃🍃🍃🍃🍃
"مدام فايزة تليفونك من بكري يرن "
فايزة وهي لاهيه بالزبونه؛سكريه..
؛بنتك صفاء تتصل مدام..
تنفست بانزعاج بعدين قالت؛لحظه شويه..
ومشت للعامله اللي عندها خدت منها التليفون وخشت داخل..
فتحت الخط وردت..
فايزة؛نعم صفاء خيرك؟
"ماما"
خافت لما سمعت صوتها تبكي قالت..
خيره صوتك هكي شن صاير..
"ماما..خالتي عيشه توفت"
فايزة؛من خالتك عيشه؟
قعدت تبكي صفاء بدون ماتتكلم..
قلبها امها تسارعت نبضاته والدموع عبوا عيونها وهي تقول:من عيشه صفاء قولي مش عيشه صاحبتي عيشه مرت الحاج مليود ولا؟
"لالا ياماما..خالتي عيشه صاحبتك"
نزلت التليفون ومشت طول وين مافي شنتطها خدتها وطلعت تجري...
والعاملات يشبحولها وهما مصدومات..
طلعت من غير الطرف اللي كان لابساته فوق لبستها وكان رافعه كمامها فوق شويه لكن قاعده بحجابها..
🍃ماكانتش مستاقظه لشي بكل كل همها تمشي تتأكد بروحها لأن الخبر اللي سمعاته مايتصدقش..
هي اللي كانت خايفه تسمع خبر سو ع سدره..
جاها ع عائشه اللي عارفتها مسافرة تدهور وعايشه جو شهر عسل هي وراجلها...
🍃وهي تسوق في السيارة مش عارفه كيف وصلت للشارع..
وقفتها بقوة وهي تشوف الخيمه المنصوبه قدام حوش شنيبه..
نزلت منها وسكرت الباب ومشت جري لحوش شنيبه..
لاانتبهت للرجاله ولاحست بوجوهم..
تخطتهم وخشت داخل..
سمعت اصوات البكي وهي ماشيه للصاله..
وقفت في بابها..شافت لنسرين وقالت؛نسرين!..
كلهم شبحولها..
نسرين قعدت تبكي وهي تقول؛عويشه ياشراده عويشه ماتت ياشراده..
خشتلها ودموعها ينزلوا وهي تقول بعياط؛كيف كيف ماتت من شني ياربي امس امس بس الصبح كنت نكلم ع الماسنجر..مافيها شي..عاديه..كيف ماتت كيف..
ناضتلها نسرين وضمتها وهي تبكي بالعبره..
وفايزه اللي كانت مصدومه قاعده تقول؛ياربي مش مصدقه ياربي..عيشه..عيشه ووك عليا...ووك..
وقعدت تعيط..
وعتيقه قعدت تبكي معاهم وهي تقول:علاش ياربي جت في بنتي اني علاش..علاش بنتي هكي يصير فيها علاش تعيش عمرها كله في قهره وتموت قبل وقتها علاش..علاش مامات الا بنتي اني علاش اللي ماعنديش غيرها..سبحانك اللي بين الحياة الموت مخليها وبنتي اني اللي خديتها..
الكلام اللي قالاته صدم الموجودات..
وع راسهم نساوين عيلة الواعر..
ومش بس صدمهم..استفزهم..اغضبهم هلبه..
عيني عينك تقول ان بنتهم هي اللي تستاهل الموت..
ولأن مطيره دمها حار ماقدرتش تتحمل اللي سمعاته ناضت ومشت طلعت وسيبت العزي وفردوس وغرفه ناضوا طلعوا وراها..
ونساوين من الجيران لحقوهم وع راسهم مغليه..
اما فايزه ونسرين حرارة الفاجعه ماخلتهمش يركزوا ع كلام ام عائشه...
🍃برا....
نجمه؛صلوا ع النبي يامطيره المراة مفجوعه اعذروها..
مطيره ودموعها تنزل؛المفجوعه تقول كلام زي هدا نجمه!؟.
فردوس وهي تبكي:شن كانت تراجي في موتته سدره هي!؟
غرفه ببكي؛بعيد السو عليها ربي مايفجعنا فيها..
مغليه بحزن؛مطيره تعوذي من الشيطان وخشي ع خاطر سدره يامطيره عيشه كانت وخيتها..
قعدت تبكي وهي تقول؛يعلم الله قداش عيشه صامطتني فوسط كبدي هي عندي زي بنيات خوي بالزبط وع قد ماصار يامغليه وانتي تعرفي معزتها ماتحولت لكن كلام امها واعر والله مانقدر نتخطاه مانقعدش اني وياها في مكان واحد وهي تتمنى في الموت لبنية خوي..
مغليه؛باهي تعالوا قعمزوا في دار المعيشه..
وحده من الجارات؛هيا صلوا ع النبي وخشوا..
كلهم قالوا بأصوات متقطعه؛اللهم صل وسلم عليه..
ومشوا لدار معيشه وقعمزوا فيها وقعدوا معاهم نجمه وجارة من جيرانهم..
🍃وبحداهم بمسافه في دار بنات شنيبه..
كانت طوبى راقد وهي حاضنه سدره اللي من كثر البكي غلبها النوم ورقدت ودموعها مازال ينزلوا..
وحداهم راما وجوري اللي كانوا راقدات ع السرير التاني وهما يشوفولهم..
جوري بحزن؛ابله طوبى..
طوبى وملامح الحزن متمكنه من وجهها؛نعم..
جوري؛ابله عيشه ماتت زي بابا في حادث؟
طوبى رشفت وقالت؛مانعرفش ياعمري..
راما؛سمعت عمي الجالي وهو يتكلم بالتليفون قال علاش ماقالوش مريضه من الاول..
طوبى بإستغراب؛هو هكي قال مريضه؟
راما؛هدا اللي سمعته..
سكتت طوبى وهي تفكر في كلام راما..
🍃🍃🍃🍃🍃
"حبيبي كنت في المحاضرة توا كيف طلعت"
هادي اريج تكلم في نضال اللي لقاته متصل بيها عشرة مرات..
هو رد يقول
"اريج.."
اريج بقلق؛شن في؟
"عائشه توفت"
حطت يدها ع خدها من الصدمه وقالت؛كيف!؟؟ نزلتها وقالت..مش قتلي ولى باهي وخلاص بتروح..
بنبرة مخنوقه رد يقول..
" شكلها يااريج راحة الموت"
هي نزلوا دموعها وقالت بوجع؛ياروحي ع صغارها ياروحي..
"هارب من الحوش مانبيش نشوفهم بالذات محمد تو بيكرهني عارفه"
اريج بنبرة باكيه:لاحول ولاقوة الا بالله..الله يرحمها ويغفرلها ويصبرهم يارب...
🍃🍃🍃🍃🍃🍃
"اليوم نروح الساعه 2"
وسام؛تمام لو كنتي فاضيه تنزلي معاي ناخدوا قهوة..
اميمه بإبتسامه جاده؛مانشربش في القهوة الا مرتين في اليوم صبح وعشيه بس..
هو رفع حاجبه بإبتسامه وقال؛باهي شاهي اخضر!
اميمه بنفس الابتسامه؛لاشكرا..
هو قال:اني بس نبي نهدرز معاك ع موضوع امتحان الزماله اللي تبي تخشيله حصلت من يزكيك..
هي بإستغراب وتهكم:حصلت من يزكيني؟! شريته من السوق!
هو ضحك وقال؛صلي رصاص مش ردود عاديه..
اميمه؛لا بالعكس ردود عاديه ع قد كلامك..
عقد حواجبه بتعجب..
اميمه تبدلت ملامح وجهها للامتعاض ومشت من حداه..
هو ضحك وعض شاربه بعدين مشي لحقها وهو يقول..
اميمه..دكتورة اميمه..ندوي جد راهو..
اميمه؛معليشي دكتور مش فاضيه عندي ماندير..
لحق عليها ووقف قدامها وقال؛خيرك هكي عصاب وديما حاده..خودي واعطي خليك مرنه...
هي كيف جت بترد عليه رن تليفونها..
طلعاته من جيب البالطو ومشت من حداه..
وهو واقف يشوفلها..
اميمه ردت وهي تقول؛ايوه روجه........
لاحظ ع وجهها ملامح الصدمه وهي تقول:كيف!!..
عقد حواجبه بقلق..
هي نزلت التليفون ومشت تجري للحجرة..
وهو وراها ويقول:خير اميمه شن في؟
وهي ماتسمع في شي..
مفجوعه ومصدومه ومش شايفه ولاسامعه شي..
وين قربت توصل للحجره..
انخبطت في الدكتور قصي اللي كان جاي مع الدكتور خالد..
قصي:خيرك اميمه!؟
هي فاتاته وخشت للحجره..
خدت شنطتها من ع الشماعه..
وطلعت تجري من حداهم..
وهما التلاته يشوفولها بإستغراب وقلق..
🍃🍃🍃🍃🍃
بعد ماوصلها المصعد لوطا طلعت تجري من المبنى لسيارتها..
وصلت فيها ركبتها وطلعت من المستشفى...
في الطريق حاولت تتصل بطوبى وفردوس..وعمتها مطيره..
ومافي حد رد عليها..
🍃🍃🍃🍃
وين وصلت لحوش شنيبه..
نزلت من السيارة ومشت خشت للحوش بدون ماتفكر في شي..
فجعتها ع عائشه خلتها تحط كل شي ع تركينه..
حبها واحترامها ليها كبير..وقفه عائشه معاها ومساندتها ليها تخليها ع خاطرها تتحمل تشوف وجوه ناس ماطيقش تشوفها...
واول وجه يقابلها وهي خاشه وجه خديجه..
خديجه لما شافتها انفجعت..وبان ع وجهها..
لكن هي شافتلها بإزدراء ومشت وخلتها وخشت للصاله..
بلعت خديجه ريقها وقعدت تساوي في شاربتها ومشت بإتجاه المربوعه الدخلانيه بش تشوف ولاد خوها..
وين وصلت فيها..
وقفت في الباب..
وشافت يزن راقد...
ومحمد قاعد ع حاله..
والجالي يتكلم بالتليفون....
تمام تمام..تو نرفعهم غادي...وسكر..
والتفت شاف خديجه في الباب..
جاها وهو يقول؛معقوله ماعندكمش علم بكل بمرضها؟
خديجه ودموعها في عيونها؛والله مانعرفوا حاجه ومش عارفه اصلا كيف يدسوا حاجه زي هادي..المرض يندس ياناس لاوعلى مني ع ماليهم وصغارهم معقوله!؟
شاف الجالي لمحمد بعدين مشي لأخته طلعها وهو يقول؛ماتزيدهاش..
هي قالت؛شن نزيد فيها هي كبيره بروحها يالجالي..
هو سكت وع وجهه باديه ملامح الضيق..
وهي كملت تقول؛كيف يفكروا هادم مش عارفه...معقوله هكي يديروا في صغارهم!؟ عابيين عليهم يدهوروا سدرة تقولي امي بتروح الجمعه ياعمتي تقولي فيها وهي فرحانه ومتشوقه..وامهم شن دارت صدمتهم وبتروحلهم في صندوق..
🍃الكلام يسمع فيه محمد اللي قاعد في حالة
الصدمه..
الجالي:المراة توا ماتت ياخديجه ماتت قولي الله يرحمها وخلاص..
خديجه؛ايه ماتت وارتاحت وخلت الشقا لصغارها..
ومشت وخلاته..
وهو قعد يشوفلها بضيق..بعدين ولى وقف فم المربوعه يشوف لمحمد لقاه قاعد ع حاله..
وزاد خوفه عليه..
فجأة رن تليفونه قامه وشاف مني المتصل بعدين رد طول..
ايوه بوي..
"اني برا اطلع"
الجالي:طالع..وسكر..
شاف لولد خوه شويه..بعدين مشي طلع من حداهم...
🍃وتطلع مرته من دار حمواتها بتمشي للصاله..
وين قربت توصل فيها تجي خديجه من الجهة التانيه..
لما شافتها وقفت فم باب الصاله وقالت..
شن صار فيها؟
طوبى بحزن؛بكت لين خداها النوم..
تنهدت خديجه بحزن وقالت؛لاحول ولاقوة الا بالله..
وخشت للصاله..
شافت اميمه لقتها مقعمزه جنب نسرين وفايزة وتبكي معاهم..
غيرت عيونها عنها ومشت قعمزت حدا امها..
اما طوبى وين خشت شافتها تفاجئت..
ومشتلها...
وعيون عتيقه عليها..كانت تشوفلها بحده وحقد ودموعها تنزل وقالت..
ناري ع بختك يابنتي..ناري عليك يارويحتي..ماهنوكش يابنيتي قداش تبغددتي يارويحتي..والموت خلت اللي ع فراش الموت وجاتك انتي..الموت ديما تجي للي مايستاهل..
وكل الموجودات شبحولها..
وهالمرة نسرين وفايزة استاقظوا لكلامها وقعدوا يشبحولها وحتى بكاهم وقف..
واميمه وقفت بكي وعقدت حواجبها بإستغراب وهي تحاول تبعد اللي فهماته من كلامها عن تفكيرها..
معقوله تبي الموت تجي في بنت عمها وتقول فيها ع الملأ!؟
هالكلام لما سمعاته مطيره حكمت عقلها و اختارت الانسحاب..
لكن بنت خوها طوبى في أي شي يخص عيلتها وبالذات سدرة المنتهى...
تغيب حسابات العقل..ويغيب العقل نفسه..
التفتت ع عتيقه وهي تشوفلها بغضب وقالت...
هكي تعيطي ع بنتك انتي هدا حزنك عليها!؟
مغليه:طوبى..
طوبى بغضب؛تبي الموت تجي في اختي عيني عينك وتقولي فيها قدام الناس!..
قعدت عتيقه تشوفلها بحده بدون ماترد..
خديجه؛طوبى خلاص..
بغضب قالت؛احترمي موتة بنتك حرام وعيب اللي تقولي فيه في حقها هي قبل غيرها بدال ماقاعده تقولي فهالكلام الفارغ نوضي فرشي صلايتك وادعيلها..
ناضتلها اميمه وخدتها وهي تقول؛خلاص تعالي..
طوبى وهي وتجبد في ذراعها من اميمه:اختي معاش تجيبوا سيرتها لا من قريب ولا من بعيد..
مغليه بنبرة امر:طوبى اطلعي..
سكتت طوبى وهي تشوف لعتيقه بحده..
بعدين لفت ومشت طلعت من الصاله واميمه لحقتها..
عتيقه وهي تشوف للباب بحده ودموعها ينزلوا قالت بنبرة كره:عليك ربايه..
مغليه شبحتلها شويه بعدين ناضت ومشت طلعت من الصاله..
والنساوين بدوا يتهامسوا بين بعضهم..
وخديجه تمرر في نظرها عليهم وتسمع في بعض همساتهم..
اما فايزة ونسرين كانوا يشوفوا لعتيقه بعدم رضا وهما ساكتات..
🍃وفي دار المعيشه..
اميمه؛غلط اللي درتيه ياطوبى غلط..
طوبى وهي منفعله؛غلط ولاصح طز..
مطيره:هادي مش اول مرة يااميمه..
شبحتلها طوبى .
واميمه قالت:كيف مش اول مرة؟
غرفه بنرفزة؛حتى بكري قعدت تفتفت..
شبحت طوبى لاميمه وقالت؛تفضلي!..
نجمه؛استهدوا بالله ماتخلوا حد يحط الحق عليكم عزي هدا راهو..
ع خشة مغليه؛شن اللي درتيه هدا ياطوبى معقوله انتي يطلع منك هكي!؟
طوبى وهي تحاول تهدي روحها:سامحيني ياعمتي لكن كلامها مايتحمله حد عيني عينك تتمنى لأختي الموت!..انتي بروحك عمتي بكري كنتي شاهده وين جيتها بنعزيها كيف دفتني..
اتفاجئوا عمتها وخواتها وبنت عمها..
مطيره؛دفاتك؟!
طوبى ودموعها ينزلوا؛والله هدا اللي صار وعمتي شاهده وخالتي نجمه ومع هدا بلعتها وعطيتها عذر ومشيت..
مغليه؛وخيرك مامشيتي توا؟.
طوبى شبحتلها وقالت؛اللي تجي فيا شن ماكانت نفوتها ياعمتي وندير روحي طرشه وعميا لكن في سدره لا والله مانفوت لو من كان يكون..
مطيره؛عندها الحق يامغليه معليشي تلقيح كلام والناس تسمع وفي عزي بنتها!..
طوبى بإزدراء ودموعها تنزل:هادي اللي تقهر دارت عزي بنتها مكان تصفيه حسابات..
مغليه تنهدت وقالت؛خليك هني ومعاش تطلعي لين تهدي..
هزت طوبى راسها وقالت؛حاضر..
مغليه حركت راسها يمين ويسار ولفت بتطلع..
وتجي في وجهها نبيله خاشه..
رفعت حاجبها وشافتلها من فوق لتحت بعدين طلعت..
نبيله تجاهلتها وخشت وهي تقول:طوبى خيرك شن جاك..
تنفست بقوة وغمضت عيونها وهي تحاول تهدا..
قعمزت حداها وهي تقول:حاولي تضبطي اعصابك طوبى هي يلقولها ميه عذر لكن انتي ماحد يعذرك بينحط عليك اللوم كله..
اميمه:هدا اللي كنت نبي نقوله ياطوبى..
شافتلها طوبى..
اميمه هزت راسها مرة وحده بمعنى..
"اهدي"
وطوبى تنهدت وقعدت ساكته..
جارتهم:عندهم الحق يابنتي تصرفاتك محسوبه عليك انتي بالذات..
كلهم شبحوا لبعض لما فهموا قصدها من كلامها..
🍃بنت الواعر توا قدام الناس اي تصرف ديره محسوب عليها🍃
وطوبى قعدت تفكر في الكلام هدا هلبه...
🍃🍃🍃🍃🍃
طلعت من القاعه بعد ماتمت محاضرتها...
شافت رساله جتها تبلغها فيها باللي صار..
هي لما قرتها..انصدمت وتأثرت ودمعوا عيونها..
وفي من يراقب فيها وشافت حالتها..
فحب يتسلى شويه..
"للوشه"
رفعت حاجبها ومسحت دمعتها وشبحتلها بكبر..
اكابر بإبتسامة ساخره:خيرك تبكي سويتي؟!
قعدت تمرر عليها في نظرها من فوق لتحت من غير ماترد..
هي قالت:تشبح فيك تشوفي لتليفونك شكله مهند بعتلك هزيبه جديده ولا..
والاء مازال ساكته وهي تشوفلها بنفس النظرات..
اكابر:بعد ماسيبك قدام ليبيا كلها مازال تجري في جرته ولا نعرفك تحبي اللي يستكردك..
الاء:هديكا انتي حبيبتي مش اني..وانتي تعرفي كويس ان اني نسيب ومانتسيبش..يللا خليتهولك حاولي معاه وندعيلك ان شاء الله يديرك بنادمه ويعبرك..
ومشت وخلتها وهي تقول بغل..
مريضه..تافهه..
واكابر تشوفلها وهي مبتسمه بشماته وتقول:سيبك سيبتيه المهم تفارقتوا..
جتها وحده من البنات وقالت؛شن صار؟!
اكابر وهي مبتسمه بنصر:امشي للكافتيريا خل ناخد حاجه ناكلها ونحكيلك..
ومشوا مع بعض وهما يحكوا عنها...
🍃وهي توجهت لسيارتها ولما وصلت فيها وجت بتركب..
جاها اتصال من وليد..
فصلت المكالمه وركبت..
لما سكرت الباب وصلتها رساله..
(الاء ارجوك ردي)
هي بدت تكتب في الرد بعدين بعتتاته..
(رضوا بوك وامك)
شويه وبعتلها..
(الاء بالله حبيبتي ردي)
هي سكرت تليفونها مرة وحده وحطاته جنبها بعدين شغلت سيارتها وتحركت بيها وطلعت من الجامعه..
🍃🍃🍃🍃🍃
"عظم الله اجرك ياشيخ جويده"
جويده بتجهم:اجرنا واجرك يالطفي..
لطفي بحزن:كنت نجيب في بضاعه للمطحن وسمعت لما جيت هني يعلم الله قداش كانت تعز عليا زي بناتي..الله يرحمها ويغفرلها ويجعل مثواها الجنه..
جويده هز راسه وهو يقول:آمين آمين..
سكت لطفي وهو يمرر في نظره ع خوت عائشه..
مااستغربش برودهم اللي كان واضح عليهم ولاكأن اللي ماتت اختهم..عارف عقليتهم والجفاء اللي تربوا عليه تجاه اختهم اللي كانوا ديما يشوفولها بنظرة دونيه..
يشوفولها ع انها خدامه تحمل اسم زي اسمهم وبس مافيش علاقة اخوه بيناتهم..
حالهم من حال خوت فايزة....
وحال هلبه خوت في وقتنا هدا...🍃
غير نظره عنهم وشاف بوه وين مقعمز مشاله..
تقابل في طريقه مع محمد شنيبه والجالي عزاهم بعدين كمل طريقه لبوه وقعمز جنبه..
لطفي بحزن؛فجعني الخبر اقسم بالله..
علي:فجعنا كلنا..عيشه هادي ربيناها مع بناتنا رحمة الله عليها..لكن هنيئا ليها توفت في الكعبه..
لطفي وهو متأثر:الله...!خاتمه حسنه..الله يجعلها خاتمتنا يارب
علي هز راسه وهو يقول:آمين..آمين..
🍃وبرا من الخيمه...
درست سيارة عبد القيوم قدام الحوش وهو مروح من الخدمه..
وين شاف الخيمه استغرب وقال؛يالطيف..!
ونزل من سيارته وسكرها بعدين مشي للخيمه..
خش من فتحتها وشاف للي فيها..
شافه ربيع ناضله ومشاله طول..
عبد القيوم؛مني؟!
ربيع بأسف؛عيال المهدي..
عبد القيوم بصدمه؛لاحول ولاقوة الا بالله..!
مرر نظره حواليه وقال:عويله وين؟
ربيع :والله ماني عارف..
عبد القيوم بوجع؛إنا لله وإنا إليه راجعون الله يرحمها ويغفرلها..
ومشي بيعزي بوها وخوتها..
وربيع مشي ولى لمكانه وقعد يشوف لعبد القيوم..
بعد ماعزا جويده وولاده مشي لمحمد شنيبه اللي كان حداه الجالي..
صافح ع القيوم الحاج شنيبه وقال:عظم الله اجركم..
محمد شنيبه:اجرنا واجرك..
عبد القيوم؛امتى يردوا؟
الجالي قعد يشبحله بكبر وهو رافع حاجبه اليمين..
محمد شنيبه؛مع العصر الدفينه اليوم بعد صلاة العصر في المقبره متاع المنطقه..
هز عبد القيوم راسه بعدين قال؛باهي..عويل المهدي وين محمد ويزن؟..
غير الجالي عيونه عنه وهو مش طايقه..
محمد شنيبه بحزن؛داخل الزوز منصدمين ع الاخر ان شاء الله مايصيرلهم شي..
عبد القيوم بألم؛لاحول ولاقوة الا بالله..تنهد بعدين قال..ربي يصبر الجميع..
هز محمد شنيبه راسه وقال:اللهم امين..
ومشي عبد القيوم وقعمز جنب ربيع...
🍃🍃🍃🍃
وتمر الساعات...
ويقرب موعد وصول المهدي ومعاه ثابوت عائشه...
اثقل واطول ساعات يمروا ع المهدي في حياته..
تعبه اللي صار...لكن قاوم وقعد متماسك هو توا لازم يكون قوي..ويقعد واقف ع رجليه..ويتماسك ويتمسك..
يتمسك في الحياة بقوة ع خاطر صغاره الأمانه اللي خلتها عائشه..اللي توا هما بحاجته اكثر من قبل بهلبه..
الشي الوحيد اللي خايف منه المهدي توا هو مواجتهم وتبرير موقفه وموقف امهم قدامهم..
الموضوع مش حيكون ساهل نهائيا...
🍃وولاده..
محمد ويزن في سيارة عمهم الجالي بطريقهم للمكان اللي حيشوفوا فيه أمهم لأخر...
الزوز قاعدين بلبس المدرسه...
الزوز قاعدين مش مستوعبين شي ومازالوا في حالة انكار...
🍃فهالوقت..
وصل عمر هو ومرته دنيا لمطار معتيقه...
دنيا كان يراجي فيها واحد من خوتها استقبلها وروح بيها طول لحوش عمتها..
وقعد عمر مع نضال اللي استقبله والزوز كانوا يراجو في المهدي...
عمر:قصدك انت كنت عارف؟
نضال هز راسه وهو مضايق ومهموم..
عمر سكت وهو يحرك في راسه يمين ويسار بعدم رضا..
نضال ودموعه في عيونه؛المهدي حلفني ماقدرتش نطلع سره..
عمر:اصلا المهدي بروحه غالط وغلطه كبيركيف يدرق حاجه زي هادي ؟!..
نضال؛ليهم اسبابهم ياعمر..
عمر بنرفزة وتهكم:اشرحوها لصغارها وان شاء الله يتفهموها..
قعد نضال ساكت وصدره ضاق اكثر...
🍃🍃🍃🍃
ووصلوا المهدي وجثمان عائشه...
واستقبلوه خوته وخوت عائشه وهما يعزوا في المهدي..
بعدين طلعوا ثابوت عائشه للسيارة الخاصه اللي بتنقله..
وهما ركبوا السيارات وتحركوا معاها...
🍃طول الطريق والمهدي ساكت رافض يقول كلمه..
وخوته موجوعين لحاله...
🍃وفي مكان قريب من المقبره اللي حتدفن فيها عائشه..
كانوا صغارها يستنوا ومع عمهم الجالي وجدهم اللي لحق بعدين...
محمد شنيبه كان في قمة القلق ع احفاده بالذات محمد اللي مانزلش دمعه وماطلعتش منه كلمه ع قد ماحاولوا فيه...
وجت اللحظه المرتقبه المؤلمة لحد الموت...
اللي الكل يتمناها تعدي بسرعه...
اللحظه اللي بيشوفوا فيها الولاد امهم لأخر مره...
🍃الجالي وع وجهه ملامح الالم؛محمد..يزن تعالوا..
شبحله محمد..بعدين ناض..ومعاه يزن..
والزوز مشوا ورا بعض وجدهم وراهم..
🍃محمد كان يمشي وهو يشوف لرجليه..
وكأن يسأل فيهم انتم وين رافعيني!؟...
وفي نفس الوقت مايبيش يعرف الاجابه..
شبح القدام لما عمه قاله؛خشوا..
وخشوا الزوز لدار كان مفرش فيها بساط ومن غير اثاث...
محطوط فيها تابوت لونه بنى...محول عنه الغطا متاعه...
....
خلوهم يخشوا برواحهم...
حتى بوهم ماباش يخش معاهم...
اساسا ماكانش يبيهم يشوفوه قبل ليشوفوا امهم...
🍃قرب بخوف يزن هو الاول..
بان عليه الكفن...بعدين بان وجه امه..
كان حلو..حلو هلبه..ماكأنش وجه انسان ميت ليه ساعات..
قال بنبرة وجع وبكاء...
امي...!
وحط يده ع فمه وقعد يبكي..
محمد رفعوه رجليه ليها..وين قرب..
وشافها...قعد يتأمل في وجهها...
ويجي بين عيونها ملامح وجهها وين يروح للحوش متأخر ويلقاها راقده ع الكرسي تراجي فيه..
دف خوه بالشويه..وقعمز ع ركابه..
مد يده وحطها ع خدها وهو يقول؛يام..يما..يما نوضي اني روحت..يام..امي..نوضي هيا بالله عليك..
🍃بوه وقف الباب وقعد يشوفله بنظرات كلها وجع..
ويسمع وقلبه يتألم هلبه..
اطلق محمد سراح دموعها اللي نزلوا بغزارة وهو يقول؛يام نوضي ولانقيمك راهو..نوضي...
يزن نزل ايديه وضمهم لبعض وهو يبكي بشده..
وخوه يقول:يام تسمعي في يزن يبكي..يزن يام يبكي تصدقيها انتي!!..يزن اللي نقولوا عليه زيه زي الحيط مايحسش يبكي هلبه تسمعي فيه...خلاص نوضي خليه يسكت وفكينا من دوشته..
حط يزن يده ع عيونه وهو يبكي بألم..
والمهدي غمض عيونه بألم وشد ع قبضة يده اليمين..
محمد ؛قصدك مش نايضه خلاص..معاش تنوضي يام..ايه معاش تنوضي..اللي يرقد زيك توا معاش ينوض يام..
وبدي يبكي وهو يقول:علاش يام..علاش هكي..علاش ديري فيا علاش ياعمري علاش..علاش يام بالله عليك نوضي قوليلي علاش بس هدا اللي نبيه بس يام..بعبرته قال..يام امس كلمتك اني يام..امس بس يام..علاش يام ديري في روحك كويسه ومافيك شي علاش...
رشف وكمل يقول..يما..تعذبتي هلبه؟..انوجعتي هلبه..شن صار فيك يام وحني مش معاك...
ومن قلبه طلعت آه..
سمعوها الموجودين برا وداخل شقت قلوبهم...
بعدين قال:الله يسامحك يام..الله يسامحك..
وقرب منها اكثر وطبس عليها..وباس خدودها وجبينها...
وطول وهو يبكي...
وصوت عبراته واصل للكل...
نضال ماقدرش يتمالك نفسه دموعه قعدت تنزل غصبا عنه..
🍃وخر محمد عن امه وهو يحاول يهدي بكي وقال لخوه؛تعال سلم عليها..
وناض وقف..
يزن كان يرعش من البكي..
وين قرب وطبس ليها باس جبينها بعدين قال..
مع السلامه امي..
غمض محمد عيونه بألم وهو يبكي..
ويزن يبكي معاه..
وبوهم يشوفلهم ودموعه محبوسات في محجر العين..
شويه مسح محمد دموعه بإيديه وقال؛تعالى نغطوها..
هز يزن راسه ومشي مع خوه..
الزوز رفعوا غطا الثابوت وحطوه عليها..
بعدين قعدوا واقفين يشوفوا للثابوت بألم..
يزن لف ومشي وطلع...
ومحمد مشي للخلف كم خطوه وهو يشوف للثابوت..
بعدين لف وطلع من الدار...
ويقابل بوه قدامه كان حاضن يزن..
والمهدي وهو حاضن يزن قعد يشوف لمحمد..
قدمله محمد وقاله:تو اني مش كلمتكم امس!!؟..مش شفت وجه امي..امي وجهها كان كويس مش وجه مرض..كيف اليوم تموت نبي نفهم كيف اليوم تموت وهي مريضه قولي..
عمامه وجده يشوفوله بقلق..
الولد كان منفعل هلبه وباين عليه الغضب..
وبوه يشوفله بنظرات ألم وماردش عليه بكلمه..
محمد بإنفعال؛تكلم جاوبني..مش صغير اني راني كبير وواعي ونفهم..كيف درقوا عليا ان امي مريضه مرض موت كيف ومانكونش حداها وتموت وهي بعيده كيف!!؟
والمهدي مش قادر يتكلم....حس لسانه وكانه انعقد..
محمد صمت بوه وصل لأقصى مراحل الانفعال..
خبط ع رجليه الزوز بقوة وهو يقوله..
تكلم..تكلم..خبط ع رجليه مرة تانيه وجي قدامه بالزبط وهو يقول بغضب الدنيا كلها..
جاوبني..تكلم..
جاه نضال شده وهو يقول؛محمد صل ع النبي..
محمد دفه بقوة وقال بانفعال:خليني خليني..مانبي حد يقولي اسكت..مانبي حد يقولي اهدا..
اللي ميته داخل هادي امي..وخبط ع صدره وهو يقول..امي..مرضت وماتت واني غافل مش عارف شن فيها..
ناكل..ونشرب..ونضحك وندهور ونلعب وعايش حياتي..
وهي تتعذب وتتوجع وماتت قبل هالموته الف موته..
الجالي مسح ع وجهه وهو متأثر ع الاخر..
وعمر يشوف لمحمد بألم وهو حاط يده اليسار
ورا ظهره..
اما نضال كان يشوفله بوجع ودموعه زي السيل..
وبوهم..واقف يشوف لحفيده بحزن ومايبيش يدخل يبيه يطلع كل اللي كان داسه..
قرب محمد من بوه وقاله؛كانت تاخدي في الكيماوي ولا..كانت تاخد فيه ولا..هدا علاش وين تكلموا فيا فيديو تكونوا برا بش تقعد هي حاطه خمارها ومانشوفش وجهها ولا..
هرب المهدي بعيونه عنه وهو يسكر في يده ويفتح فيها..
محمد ودموعه ينهمروا انهمار وبإنفعال شديد يقول:تي تكلم قول حاجه بالله عليك تكلم..تكلم ..
ولف بوجهه للحيط وخبط راسه عليه وهو يقول..
علاش درتوا فينا هكي..
وشدوه عمامه الجالي وعمر وهما يقولوا...
"لايامحمد مش هكي..صل ع النبي يامحمد"
ومحمد يبكي بالصوت وهو يقوللهم..
امي اللي ماتت راهو امي..امي..
ويجيه جده وياخده في حضنه وهو يقول؛امر الله هدا ياجدي امر الله...قول لله يرحمها ياجدي الله يرحمها..ادعيلها بالرحمه ياجدي..قول الله يرحمها..
والمهدي معاش قدر يتحمل اكثر من هكي سيبهم ومشي طلع من حداهم ووجع الدنيا كلها في قلبه..
وضاقت عليها الواسعه...وتمنى لو كان هو في مكان عائشه راهو صغاره ماتألموش لهالحد...
🍃🍃🍃🍃🍃
وجي وقت صلاة الجنازة..
اللي ماغاب عنها حد من الجيران والمعارف..
حتى المحجوب حضرها..
ومش هو بس...حتى...
مختار...
كان ضمن المصلين..ومدرق عيونه بنظارات سودا...
ويسمع زي ماكل المصلين كانوا يسمعوا في صوت عبرات يزن...ابن 12 عام...
عبراته اللي ادمت كل قلب حي ويحس...
لكن محمد وقت الصلاة كان هادي تماما حتى دموعه معاش نزلوا...
🍃لعند ماجت لحظة الدفن...
وسط الزحمه...
كان مختار واقف بعيد شويه يشوف للمشهد بوضوح...
يشوف لحالة المهدي اللي كان طول الوقت صامت وقليل جدا مايتكلم..
وع وجهه ملامح الحزن مع الهم واضحات...
لما رفع مرته ونزلها لقبرها...
هربت دمعه من عينه حاول يداريها عن الحاضرين..
بس شافوها عبد القيوم وعبد الرؤوف...
بعدين عبد القيوم غير عيونه لمحمد..
لقاه يشوف بنظرات غريبه لبوه وهو ينزل بأمه لوطا...
🍃محمد وقتها كان يمر قدام عيونه..
شريط حياته مع امه..
يشوف في حركاتها وضحكتها..
تفنيصها وقت الغضب..ونظرات الزعل والفرح..والحنان..
واكثر شي كان يتفكر فيه وقت يطلب منها ديرله حاجه وهي بشن كانت ترد عليه..
"يام..
نعم..
ديريلنا مقروض..
في عرسك...
......
يام..
نعم..
الجو يبي سفنز ديريلنا سفنز..
في عرسك..
.......
يام
محمد فوتني مش فاضيتلك..
يام خاطري في الكاكاويه ارجوك خودي بخاطري وديرها وماتقوليش في عرسك..
في تخرجك.."
🍃ضحك ودموعه ينزلوا..
بعدين وين شاف بوه طلع بروحه..
بدت ع وجهه ملامح الصدمه..ومشي يجري طاح عند قبرها وهو يشوفلها كيف محطوطه فيه وقعد يقول وهو يصرخ ويبكي...
يما..يما...
وجوه عمامه رفعوه وهو يبكي بقوة ويشوف فيهم كيف يحطوا عليها في التراب..
غمض عيونه بش مايشوفش المنظر وهو يبكي ويقول..
لالا..ياربي..امي..
والموجودين تأثروا ع الاخر..رجاله بقدرهم بكاهم معاه ماقدروش يتمالكوا انفسهم..
حتى من مختار اللي قعد يشوف لمحمد..
كانت دموعه تنزل وامه خاطره عليه...
حتى هو امه ماتت بعيد عنه..بس الفرق بينه وبين محمد..
انه لاشافها ولاحضر جنازته..
بوه كان يسرقله في النظر..
شافه وهو يمسح في دموعه ويرفع في راسه شويه بش معاش ينزلوا دموعه..وعيونه مختفيات ورا النظارات...
🍃الوحيد اللي تأثر هلبه بالموقف..
بس دموعه العنيده رفضت تنزل وتخفف عنه شويه..
هو عبد القيوم..
وحتى هو تفكر موت امه..وتفكر عزاها..
🍃🍃🍃🍃
وشويه شويه..الناس بدت تروح والزحمه خفت..
وماقعد حد في المقبره مع محمد الا المهدي والجالي والحاج محمد شنيبه..ومعاهم لطفي وعبد القيوم وعبد الرؤوف..
وقاعد مختار يراقب من بعيد..
يراقب في محمد وهو مقعمز حدا قبر امه..ويشوفله وهو ساكت ودموعه بس اللي تنزل..
المهدي بألم؛هادي رغبتها يابوي هي هكي كانت تبي الله يرحمها ماقدرتش نخالفها..
بوه قاله بحزن؛لاحول ولاقوة الابالله..والله ماعارف شن نقول..
لطفي طبطب ع كتفه..
وهو تنهد وقعد ساكت..
عبد الرؤوف؛براله اقعد حداه..
المهدي بألم؛مش طايق يشوف وجهي ياعبدالرؤوف...
عبدالرؤوف؛ماتقولش هكي هو قاعد مصدوم مسكين يبيك حداه حتى لو بان العكس..
المهدي بعجز؛والله ماعندي جرأة نمشيله بالله..
عبد القيوم؛معليش نقدر نعديله ونحاول معاه..
شافوله كلهم..والجالي قعد يشوفله وهو عاقد حواجبه..
المهدي هز راسه وهو يشوف لولده ..
عبد القيوم مشي لمحمد...
وهما يتبعوا فيه بعيونهم...
🍃لما وصل في محمد قعمز جنبه ع روس صباعه وقال..
لما امي توفت كان عمري سته سنين تقريبا..امي ماتت مريضه..كنت واعي بيها..وشهدت عليها لما تعذبت في مرضها..وين كانت تتعب وجدتي الله يرحمها تطلع تخبط ع الجيران بس يشيلوها المستشفى..
منظرها والنساوين شايلاته وطالعات بيها من الحوش اكثر شي قاعد نذكره لعنده توا..وحتى وهي راقده في الفراش وتعبانه...واعره يامحمد لما مايقعد في عقلك لأمك كان هالذكريات اللي توجع..واعره اكثر من الموت..انا موتها مانذكرش فيه زين كيف مانذكر فيها وهي مريضه..امك يامحمد تحبكم واجد اللي مابتش تخلي في عقولكم هالذكريات الصعبه لأنها عارفه ان اكثر شي حيقعد في عقولكم تعبها وعذابها وشكلها كيف صارله من المرض..ماكانتش تبيكم تعيشوا عذاب اوعر بواجد من العذاب اللي انت عايشه توا..عذاب الخوف من كل دقيقه وكل ساعه وكل يوم يعدي وانت مترقب لخبر يفجعك فيها..راهو هذى بروحه موت بطيء..امك الله يرحمها مابت تخليكم تعيشوا منه شي...
بدت ع وجه محمد ملامح البكاء..
عبد القيوم كمل يقول..خلاص توا امر الله وكان يامحمد..امك توفت وعدت في الطريق اللي كلنا في الاخير بنعدوا فيها وهي توا بين ايدين اللي خير منك ومن كل هلها وناسها افرحلها راهي ماتت موته تبشر بمكانها بعدين وين بيكون خليك مطمن عليها..واشقى بالحيين..بخوتك راك خوهم الكبير ..بباتك الراجل المريض اللي يبي من يسنده ويقويه يامحمد..عارف ان باتك مريض قلب يامحمد اللي قاعد يصير معاه كله مش كويس لحالته تبي تخسره حتى هو لاقدر الله!..
تنهد محمد بألم وقعد ساكت..
عبد القيوم؛صبي يامحمد صبي ادعي لأمك..بعدها عدي لباتك صبي معاه وادعمه وقويه وربي معاه خوتك مالكم كان بعضكم يامحمد...
وقف عبد القيوم ع حيله..
ومحمد ناض بعده...وقف ورفع ايديه وقعد يدعي لأمه سرا..
وبعد ماكمل دعاء..
نزل ايديه..وشبح لعبد القيوم..
عبد القيوم اشر براسه لجهة بوه وقال؛هيا..
نزل محمد راسه ومشي..
وهو وراه...
وهما يشبحوا لمحمد اللي كان جاي ناحية بوه..
وين وصل فيه..
المهدي كان يشوفلها بنظرات ألم..
هو حط يده ورا راس بوه وقرب جبيته وباسه بعدين قال..
سامحني..
المهدي ضمه بقوة..
وهو ضم بوه بقوة وتمسك بيه وكأنه يقوله..
"رد بالك حتى انت تسيبنا"...
🍃عيون مختار كان يشوفوا للموقف بنظرات كلها الم..
غير عيونه لبوه..تفاجئ وين لقاه يشبحله..
غير لطفي عيونه عنه طول..
وهو لف ومشي وطلع من المقبره..
وبوه تنهد تنهيده ألم غير واضحه وعيونه ع محمد والمهدي...
بس في عيون صاحبهم قلبه مش صافي..
كانوا يشوفوا للتارقي بكره وحسد..ومش قادر يتحمل وجوده معاهم..
🍃🍃🍃
ولحظات وتفضى المقبرة ومايقعد فيها حد...
ويطلع محمد منها وهو دافن سعادته مع اغلى انسانه ع وجه الارض بالنسبه ليه..ليوم القيامه...

#رسايل_وداع
#طوبى

....يتبع....