__🌸🌸__
طيبة وعلئ عكس عادتها ، قامت بكري ...صلت صبحها حاضر لاول مرة ...النوم نهارتها فارق جفونها قبل وقتو ...ورغم دفا فرشها غلبتها رغبة ماتتقاومش انها تقوم تصلي وكان بالنسبة ليها تحدي وانجاز بما انها من يوم مابدات تعطي حق ربي...لا نهار قامت للصبح و صلتو حاضر .
بعد الصلاة تكفلت تعمل فطور الجماعة وتحضر مالازمو ... وقت قامت مسكية ولقاتها واقفة في الكوجينة ماصدقتش وفرد وقت مامنعتش روحها من التنبير " شنوة بث تجريبي للعرس ...حتئ هو سيد الشيخ لازمو وحدة كيف هكا تقوم بكري تتلهئ بيه و تعيشو سلطان "
ضحكت طيبة وهي تريڨل الطاولة " صباح النور يا مسك الدار "
حطت مسكية يدها علئ قلبها بتمثيل " امانك شوية شوية علئ قلبي خليه يصدق انك قمت بكري ...وبعد في عقلو يصدق انك حضرت لخديمة الدار القهوة وزيد تتربج بيها "
ضربتها طيبة علئ كتفها معاتبتها " آخر مرة نسمع كلمة خديمة "
قعدو نفس القعدة متاع كل يوم...وشوي آخر انضملهم بوها ...ضحكو ونبرو كيف عادتهم وكانو متفقين ثلاثتهم أنو هاك اليوم باش يكون احلئ يوم بما أنو بدا بنشاط وبجو و بضحكة .
النشاط متاعها ماوقفش عند قضية الكوجينة ...شمل زادا خدمتها ..عندها قداش ماتفقدتهاش وماسألتش عليها وأكيد راو كوم ايمايلوات و بلونات يستنو فيها ...اتكت بالطول علئ بنك بيت الصالة و حطت البيسي فوق ركايبها وبدات تشوف شفمة يستنئ في خدمتها ...ماهزت راسها من الايكرون الا علئ حس كرهبة تاقف لوطة ...قلبها خبرها أنو ايلي لبرا هو ايلي متمنيتو وشاغل بالها من يوم يومو .
قامت للشباك تزرب ، هزت ريدوه تطل و ضلوعها ايلي طالبتو نطقت باسمو ...تبسمت فرحانة بصدق احساسها ومستبشرة بشوفتو هاك الصباح ...فيسع مارجعت الريدو واتخبت وراء الحيط وقت شافتو يهز راسو ناحية بلكونتها .
حطت يدها علئ قلبها تستشعر في نبضاتو المتلاحقين ...توسعت تبسيمتها اكثر و تحسست خدودها الحارين ...يعني حتئ هو لوج عليها وهي في بالو ...حست روحها بها الفكرة طايرة طيران وبلا جوانح .
لازم تشوفو...غلبها احساسها وفرض عليها تلبس جيلاي ع البيجامة متاعها وتهبط لعند زبير لأي سبب ...المهم تشم ريحة المسك الفايحة منو والمخلطة ببرفانتو ايلي عاطية عنوان لرجوليتو .
حلت الباب بالسرقة و هبطت الدروج علئ اطراف صوابعها عين علئ الدرجات وعين علئ الشباك والبلكونة تشوفهاش مسكية ... وقتها الا ما تفضحها .
صوت مرا في الحانوت خلاها تركز سمعها وتمد وذنيها ...حرارتها زادت وقت خممت انها نادية ...غيرة شعلت في داخلها فرضت عليها تزرب خطواتها باش تتأكد ...الكلام صار واضح ومفهوم ...تأكدت منو أنو المرا موش ايلي تخيلتها...انما كانت نفسها ايلي طاحت في السوق اك اليوم .
أنت تقرأ
🌸 💚سَــلاَمُ قَــوْمٍ ( باللهجة التونسية : مكتملة) 💚🌸
Phiêu lưu🦋الاسم : سـلامُ قَـومٍ ( مكتملة ) 🦋الكاتبة : نودا 🦋النوع : اجتماعي ،عائلي ،ديني ،رومنسي 🦋تاريخ النشر : 10/1/ 2022 🦋تاريخ نشر آخر فصل : 20/07/2023 🦋عدد الفصول : 78 🦋القصة " شابة تتبع والدها في زيارة قصيرة لمسقط رأسو تلقئ روحها وسط اسر...
