__🌸🌸__
بعد يومين ..وفي صباح غيمت فيه السماء و تحركت معاه نسايم الخريف بأكثر برودة ...وقفت مسكية لاصقة جنب طيبة ...الزوز يخزرو لهاك البلاكة المزينة ومخطوط عليها اسم بالعريض مسبوق بكلمة "" الروحاني""
خزرو لبعضهم كل وحدة تستنئ من الاخرئ تقويها وتثبتها ...خذاو نفس طويييل ...بيه قللو من التوتر والضغط ايلي حاسينو علئ اعصابهم و دخلو ...القاعة كانت تملئ وتفرغ بالعباد...شي صغار وشي كبار...شي باينة عليهم امراض عضوية واخرين معلولين الروح ...شي نساء وشي رجال ...والكل راغبين في بركة هاك الشيخ ذايع الصيت.
قعدو وعيونهم مليانة شك وريبة ...الكل يخزرولهم يثبتو فيهم كان هوما من دون الحاضرين ..شي زاد وترهم ...موش عارفين قبلهم فاش كانو مثبتين ...زعمة هوما موش نرمال ؟! فيهم شي غريب يجلب الانتباه ؟!...جاب ربي طيبة لبست جلباب من جلابيب مسكية وغطت راسها وشعرها..وين الغريبة مالا في ااحكاية؟ كيفهم كيف الموجودين ،علاه محسسينهم انهم جايينهم من المريخ ؟!!.
ماوصل تورهم الا بطلوع الروح...لو جاء طبيب مشهور ماكانتش العباد عليه بالصف هكاكا...زعمة الناس تعبت من طبة البدن ...ولجأت لطبيب الروح لعل تلقئ بيه ثنية ثابتة تخفف عليهم؟!
دخلو شادين كفوف بعضهم ...واول ماتحطت ساقيهم ...ريحة بخور طيب دغدغت خشومهم ...من الأول جاهم قوي ويحرق الڨراجم...أما ثواني قليلة وتبننو ريحتو ...قابلهم راجل متوسط العمر...بين الشيب والشباب...طالق لحيتو موصلها لتحت رقبتو...عليها حمرة حنة ناصعة وفي جبينو طابع مستزرق عرفت منو مسكية علامة السجود ...الحمد الله انهم بين يدين واحد عاطي حق ربي وموش دجال ...لابس عادي ..شوميزة وسروال قماش ...لكن رامي علئ اكتافو برنوس أبيض صيفي .
من أول خطوة خطوها فم وهو هز راسو مستشعر هواء طلتهم...عقد حواجبو مثبت فيهم بعيون ماترمشش ...تمتم وهو يغرف شوية من البخور ويرميه في المبخرة جنبو " باسم الله ...ماشاء الله ...اللهم أنعمت فزد "
عينو ماتهزتش من عليهم رغم انهم حاولو علئ قد مايقدرو يخبو ملامحهم بطرفة خماراتهم ...شاورلهم يقعدو وهو يزيد يحط بخور من جديد " اتفضلوا...مرحبا ..."
كيف ماكانو واقفين لاصقين بعضهم...قاعدو ضامين بعضهم ...كل وحدة خايفة تبعد علئ الاخرئ ..كملت عليهم تعابير وجهو ايلي كل مرة تتبدل وعيونو بين الثانية والاخرئ توساع و تضيق ...يثبت فيهم بسكوت زادهم احراج وخوف ...قعد وقت علئ هاك الحال وهو كل شوية يزيد البخور للمبخرة حذاه ...وقت تكلم الزوز تنخزو برعب وهو ضحك علئ حالهم " زارتنا البركة يا حراير...باش يقدر ها العبد الضعيف يعاونكم "
مسكية حبت تعرف بروحها " أنا ايلي حكيت من يو..."
ضربتها طيبة بمرفقها سكتتها وخذت عليها الحديث " عندنا شوية اسئلة حابين نلقولهم اجابات ...هذا ماكان "
أنت تقرأ
🌸 💚سَــلاَمُ قَــوْمٍ ( باللهجة التونسية : مكتملة) 💚🌸
Aventura🦋الاسم : سـلامُ قَـومٍ ( مكتملة ) 🦋الكاتبة : نودا 🦋النوع : اجتماعي ،عائلي ،ديني ،رومنسي 🦋تاريخ النشر : 10/1/ 2022 🦋تاريخ نشر آخر فصل : 20/07/2023 🦋عدد الفصول : 78 🦋القصة " شابة تتبع والدها في زيارة قصيرة لمسقط رأسو تلقئ روحها وسط اسر...
