__🌸🌸__
كانت متخوفة تعيش اللحظات ايلي حكالها عليهم ... تتعبد و تستفرد بروحها...تناجي ربها وتتقربلو ...موش عارفة كيفاه الوقت باش يتعدئ وهي حابسة ع الدنيا وتعمل في حاجة وحدة ...مترددة كيفاش تبدا وباش تبدا.
جبدت هاك الهدية ايلي أول ماعرفت طريق الحق كانت بين يديها منو ...خذات السبحة وبما تعرف من اذكار عدّت بحباتها المرات ...فكرها كان مصبوب ع الوقت كيفاش باش يتعدئ وهي ايلي تكره الحصرة بين الحيوط ...جاء الزمان وكانت سجان لروحها .
حلت كتاب قرآنها وقرات منو ايات حست بروحها تهجيهم ...عبارة أول مرة تقراه ...سكرتو وفرشت سجادتها تصلي ...وبعد ركعتين سلمت وقامت تمشي وتجي ...وقفت قدام الباب و يديها ترددت تحلو ...عندها فضول تعرف شقاعد إلياس يعمل و كيفاه متحمل الوضع؟ ...لعل تاخذ منو طريقة تحطها ع الجادة ..
حلت الباب بلا ماتعمل صوت و علئ اطرف صوابعها مشات لعندو...بابو كان مسكر ...وصوتو بالكاد مسموع ...غير العادة وين كان يرتل وحيوط الدار ترد معاه ...طبست شوية وخزرت من نقبة الباب ...دوب مارات خيالو لداخل...وشافت كتاب القرآن بين يديه ...قربت عينها اكثر حابة تشوف كل الزوايا و مايغيب عليها شي ...ثبتت مليح علئ يمينو ويسارو بما سمحتلها النقبة ...ثواني قليلة وحست ببرودة في عظامها ...فركت ذراعتها مدفيتهم و بعدت من بحذا الباب راجعة لوين كانت ...ريح باردة باقية تهب وموش عارفة منين مجرئ الهواء هاكي ...خزرت للشباك المسكر وراقبت البيبان المقفولة مليح ...منين دخلت هاك النسمة ايلي تجمد الاطراف ...هزت اكتافها موش هاممها ...و رجعت لكتاب القرآن ...محددة عدد صفحات لازم تكملهم ...قبل ماتغرب الشمس ويليل الليل ...تربعت ع السجادة و ركزت بكل حواسها مع الايات ...حتئ لو هرب منها فكرها في بعض اللحظات فهي كل مرة تجبرو يرجع و تشدد تركيزها ...كانت كل مرة تلقئ حكاية ...فيهم ايلي سمعت بيها قبل وفيهم ايلي أول مرة تسمعها .
قلبها رف لقصة سيدنا موسئ وقاتل الروح ايلي شهدت عليه ضحيتو ...و وساعت عينها علئ وسعهم وقت تحكات حكاية مريم والصغير ايلي تبث في رحمها بلا والد ..تحمست لشجاعة سيدنا ابراهيم وقت واجه قومو ..وماخافش من اذيتهم...قشعر بدنها لكفر قوم لوط و غاضها تكذيب أهل نوح لرسالتو ...دمعت عينها من حديث جهنم و الناس ايلي فيها جلودها تتجدد مع عذاب مايوفاش...ناس ترمي في الذنب علي بعضها وكل واحد يتذلل لخالقو ويقول ع الآخر هو السبب ...تنشلت من غم جهنم وحست بريح الجنة من الوصف ...وكاينها قدامها هاك الارائك والولدان ايلي يطوفو بابريق الفضة بمشاريب حست بلذتها علئ اطرف لسانها ...حست بساقيها فوق ارض الخير الموروثة ...و عيونها رسمتلها حركة الكواكب السابحة في فلك عظيم ...حست بانتماء كبير للخالق ايلي رحم الناس وبما طلبو عطئ ...حتئ فرعون الكافر المتجبر وقت بعثلو موسئ وهارون امرهم يقولو لين الكلام ويناقشوه بالحقيقة والبرهان ..موش بالغطرسة والقوة...حكمة تسيير الاكوان وترتيب الليالي والأيام كانت عظيمة...العلم تجلئ في ايات قليلة فيها من المعاني ماتكتب مكاتب عظيمة...
قلبت الصفحة الأخيرة ...وين غابت الايات ولقات دعاء ختم القرآن ..معقول هاك اللذة توفئ وجناحاتها ايلي سافرت بيهم يتقصو ؟!
أنت تقرأ
🌸 💚سَــلاَمُ قَــوْمٍ ( باللهجة التونسية : مكتملة) 💚🌸
Aventura🦋الاسم : سـلامُ قَـومٍ ( مكتملة ) 🦋الكاتبة : نودا 🦋النوع : اجتماعي ،عائلي ،ديني ،رومنسي 🦋تاريخ النشر : 10/1/ 2022 🦋تاريخ نشر آخر فصل : 20/07/2023 🦋عدد الفصول : 78 🦋القصة " شابة تتبع والدها في زيارة قصيرة لمسقط رأسو تلقئ روحها وسط اسر...
