هو فقط

4

#هو فقط(4)
بقلمي : زينب أمير

يلا الشئ الكويس اني كنت مدياهو ضهرى في الساعه ديك اخدتا لي نفس طويل وعديت ل خمسه حتى تاني قبلت عليهو عاينت ليهو المره الأولى غلبني تاني اعاين ليهو شدت م متوتره ي جماعه الزول ده يوم بكتلني بسمااحتو دي عاين لي باستغراب زي كأنو مشبهني ع زول معقوله للدرجه دي اتغيرت انا ؟؟! قال لي معليش بس عايز قبلي م يتم كلامو جات ريهام داخله عاينت ليهو وغمزت لي  تاني قالت ليهو أمجد أتلفت عليها قالت ليهو م عرفتها؟! عاين لي وتاني عاين ل ريهام سكت ثواني تاني عاين لي مسافه وقال لجين !! ريهام قالت ليهو yes. Yes (بحماس كده) قالت ليهو م اتخيلتك تعرفها طبعا انا ساكته بس عيني تاني م رفعتها من الارض جاهو اتصال رد وقال ثواني بس وبجيكم يلا التفت ع ريهام قال ليها عايز صينيه عشاء سريع بالله معاي ضيوف بجي اشيلها بعد شويه وبعد تخلصي اضربي لي ريهام قالت ليهو طيب قام طلع طوالي جاتني ريهام طقطقت لي أصابعها وقالت لي هيي وين سرحانه قلت ليها ولا مكان ويلا نجهز العشاء سريع ورانا يوم طويل بكره قالت لي ارح ارح سخنا باقي الاكل ورصيناهو في الصحانه قامت ريهام اتصلت ع أمجد جا شال الاكل وفات بدون م يقول اي حاجه قلت ليها يلا بعده نطير ننوم وفعلا دخلنا الغرفه ننوم بس النوم نهائي م جاني فضلت صاحيه زمن حتى تاني قدرت انوم صحيت ع صوت ريهام بتكركب في الدولاب بتفتش ليها في حاجه شكلها قلت ليها صباح الخير قبلت على وقالت هاا صحيتي صباح النور حبيبتي يلا صحصحي بعده خلينا نخلص باقي شغلنا ونجهز ل صلاه العيد قلت ليها تمام بعد صليت وكده طلعنا شربنا الشاي بالبسكويت العملناهو أمس واي زول يشكر فيهو ساي الجو كان رهيب الساعه كانت زي 5 ونص كده ياداب بدت تفتح الواطه؛ يلا قمنا نحنا البنات فرشنا وضايرنا وباقي بس نتجهز لبست لي عبايه شكل فستان النوع البكون فيهو حزام لونها جوافي مع شبط جوافي واطي ومرطب شفايف وبقيت مارقه جات ريهام وطلعنا مشينا بعد الصلاه وكده الناس بقت تبارك اصلا ناس البيت كلهم مشو الصلاه ف سلمنا عليهم هناك تاني الناس بقت في موال كل سنه وانتو طيبين وكده جا ابوي وعمي وكم راجل كده معاهم باركوا وطلعوا شويه جا داخل أمجد ومعاهو أصحابو اتنين انا الساعه ديك كنت في الهول بقدم الضيافه للنسوان ف م شفتو لمن جا،،، طبعا الضهريه كانت حنه العروس عاملين نظام قعده دلوكه والبنات بغنوا بعد العروس اتحننت خلاص جات ريهام قالت لي رأيك شنو نتحنن قلت ليها م جاده طبعا كيف يعني مش ح نرسم!؟ قالت لي طبعا ح نرسم بس نحنن الشمال ونرسم اليمين قلت ليها لا الفكره م ظابطه قالت لي ح نتحنن حنه رجاليه زي حقت العريس يعني عاينت ليها وقلت ليها م جاده طبعا قالت لي قمه الجديه قلت ليها لا م عايزه قالت لي خلاص براحتك مشيت اشرب وقفت جنب الكولر كبيت لي مويه لقيتها واقفه جنبي قلت ليها مالك م اتحننتي قالت لي ي سوا ي لا قلت ليها صدقيني م عايزه قالت لي عادي هاا م مشكله مره تانيه قلت ليها بس م تكوني زعلتي مني عاينت لي كده وقالت لي اي قلت ليها على كيفك ضربتني وقالت لي سخيفه،،، العصر جا داخل امجد ومعاهو كم نفر شايلين الخضروات والزيت والحاجات الزي دي عاينت ليهو مسافه جات وقفت جنبي ريهام قبلت عليها قلت ليها مالك قالت لي ولا حاجه عاينت تاني ل أمجد لقيتو بعاين باتجاهنا طوالي قبل وطلع فات وجو اليوم التاني برضو الصباح حفروا الصيواان في الحوش لأنو خلاص العرس كان بكره،،،،طوالي بعد الفطور مشينا انا وريهام ل ناس رؤى طبعا رجعت تاني بيت صحبتها من أمس لقيناها برسمو ليها طوالي قعدنا رسمنا يدينا الاتنين وبقينا متحكرين منتظرينها تنشف طبعا بعد العصر كان في حفله قلت ل ريهام ح تلبسي شنو قالت لي فستاني العنابي قلت ليها طيب انا م عارفه البس شنو محتاره عديل كده البركه في امي كانت بتختار معاي أسي م بقدر امش بيتكم واجي ي ريت بس لو سمعت كلامها كانت بتقول لي فتشي براكي واختاري بتلقي بعدين بتسوي شنو لو كنتي براك ريهام قالت لي لجين بطلي م تخليك دراما كوين  وقعدت تفكر قالت لي سمح دقيقه بس مشت طلعت لي فستان سماوي يديهو تلات رباع وفيهو دوائر بالأبيض صغار شكل خرز في منطقه الصدر م ضيق شديد من الخصر ومعاهو طرحه رماديه غامقه مع شبط وشنطه صغيره بالجوافي قلت ليها شكره حبيبتي م عارفه كنت عملت شنو لولاك قالت لي م ح اقول ليك حاجه غير بطلي بكش ضحكتا وقلت ليها معقوله؟! للعصر كده قمنا اتجهزنا وعملت ميكب بسيط وحلو غايتو دي الحاجه الوحيده البعرف اظبطها جاتني ريهام قالت لي آها ي إرتست شوفي شغلك قلت ليها الكلام ده بقروش م ساي قالت لي سمح ببقى ليك بمبي بعدين تاني تعالي اختار ليك حاجه تلبسيها تمام؟ قلت ليها معقوله ياخ نحنا عندنا كم ريهام ضحكت وقالت والله ي موده في ناس م بجو الا كده رؤى قالت لي عرفو ليك لكن ي لجين وقعدوا يضحكوا بعد خلصت من ريهام قمت ضفت باقي لمساتي الاخيره من اكسسوار وغيرو وبقينا مارقين،،، الحفله كانت في الساحه والزفاف في صاله ح يكون،، طبعا انا من النوع البكون قاعده في الكرسي ساي وكان بالغت ورقصت بقيف وبطقطق أصابعي.. الناس ديل كانو كميهه شغاله أتلفت عسى ولعل ألمح أمجد بس م لقيتو قلت ل ريهام ارح ل ناس امي نقعد معاهم قالت لي تمام يلا بقينا نتلفت م شفناهم اتصلت على لمياء قلت ليها انتو وين قالت لي قدام ع الطرف جنب الساون لابسه طرحه كحليه انا قلت ليها تمام مشيت عليهم لقيت امي ومرت عمي وكم مره كده وطبعا لمياء وصحباتها ديلك لكن م قاعدين طوالي معاهم شويه كده منهم... لمحت أمجد مع العريس شغال يبشر بقيت شغاله اعاين فيهو بس ومتابعه تحركاتو لحدي م جا بجهتنا ومعاهو العريس واصحابو وبقوا يبشروا ل ناس امي وخالتو ساميه والنسوان المعاهم شغالات يزغردتن ساي،، الناس عملو دايره في النص وبقوا يرقصوا فيها  ريهام اصرت علي اقوم ارقص معاها وانا حلفت كان اقوم بخجل عديل كده ياخ مشت زعلانه مني وفجأة من غير مقدمات القى ليك أمجد بأشر لي نظام اجي وكده والله من دون م احس لقيت روحي هزيت ليهو راسي وكمان مشيت وقفت جنبو لمن خجلت من روحي اداركت الموقف وعايزه امش كده جات ريهام وقفت جنبي قالت لي ي هبله اسي مش قلتي م جايه قلت ليها ده اخوك ده براهو ناداني م أظنها سمعتني زاتو من صوت الحفله لأنها م ردت علي والا كان شغلتها لي واستفسرت بقيت واقفه جنبها وبطقطق بأصابعي ساي بس قبلت اشوف أمجد لقيتو بعاين ل زول وبأشر ليهو نظام يجي قبلت لقيتو ولد شاب والزول ده شغال ليهو برأسو لا وااي من الاحراج وانا العويره قايلاهو معاي أسي من الصدمه قرب يغمى على قلت ل ريهام انا ماشه اقعد تعبت وسريع مشيت قعدت في أقرب كرسي وخلفت تاني كان ااقوم المهم انتهت الحفله ورجعنا طوالي ناس موده شربنا عصير وصلينا المغرب وقعدنا نتونس وبسألو فينا من الحفله كانت كيف طبعا موده م مشت قالت م ليها جو في الحفلات وكده لقينا قاعدين معاهم بنات شكلهم صحباتهم من الجامعه وكده،،، آها بعد صلاه  العشاء زي 8 مساء كده مشينا بيت العرس اشتغلنا معاهم حاجات خفيفه كده اصلا الاكل جايبين ليهو طباخين نحنا م علينا غير ننضفها ليهم البطاطس والبصل والأسود باختصار شديد الخضروات * رجعنا زي الساعه 12 ناس موده و طوالي دخلنا نومنا واصبح يوم العرس..

يتبع....