من دون سابق إنذار جا كرم داخل وكان نفسو قايم قال لي إسلام !
قلتا ليهو كرم ؟ قال لي اسلام انا .. امي قاطعتو قالت ليهو دخلت كيف انت اصلا ؟ الجابك شنو
قال ليها خالتي حلفتك خليني اتكلم مع اسلام قالت ليهو عايز تقول ليها شنو يعني ؟
قلتا ليها امي خليهو قال لي كيفك انتي كويسة ؟
قلتا ليهو انسانة مرقدة داخلة عملية في اقل من ساعة م عارفة روحها حتموت ولا ح تحيا
كيف تسألني كويسة
قال لي انا اسف شديد بس حبيت اطمئن عليك قلتا ليهو شكرا ليك قال لي انتي مضايقة مني صح امي قالت ليهو كرم انت انسان م نصيح البت دي داخلة على عملية كيف تجي تفتح ليها مواضيع زي دي ؟
قلتا ليهو عايز شنو يا كرم في شنو الجابك قال لي جاي اطمئن عليك بس ودايرك تعفي لي انا م كان اتهور واجي تاني يوم طوالي وافسخ الخطوبة قلتا ليهو انت م قلت شي غلط على فكرة دا حقك وانا م مضايقة منك اطلاقا
ابوي جا داخل ومعاهو دكتور اشرف قاطع كلامنا وقال ليهو انت كيف تدخل هنا منو السمح ليك اصلا وتجي وتشوف بتي؟ انا بتمنى انك تطلع من هنا بدون م نعمل مشاكل انا بتمنى انك تطلع من حياتنا كلها
انا م عايز اتهور واعمل ليك شي يضرك ويضرني ف اطلع من هنا ب التي هي احسن
كرم طلع ومشا وانا متأكدة انو كرم جا وعندو موضوع في راسو مستحيل يخاطر المخاطرة دي كلها ويدخل يشوفني وهو عايز يطمئن بس
دكتور اشرف سألني قال لي جاهزة؟؟
هزيت ليهو راسي قال لي حلو شديد زحي اي فكرة سيئة من راسك ارخي جسمك وحوقلي كتير من هسي لحدي العملية اي سورة انتي حافظاها اقريها وم بحصل الا الخير
------------------------------
بعد مرور تلاتة ساعات
------------------------------
بعد م خلصت العملية كنتا مفتكرة نفسي انو م ح اعيش مع انو العملية ساهلة شديد بس دايما الموت م كان بطلع من بالي
الوجع كان شديد م بقدر اتحرك ولا اي شي لانو العملية كانت استئصال عن طريق البطن
جا اشرف وقال لي كيفك ؟
هزيت ليهو راسي بس لاني م قادرة اتكلم
قال لي ارتاحي هسي انا بجيك بعد ساعة كدا ،،
بعد ساعة كدا جاني وقال لي حتقعدي تاني يومين ف المستشفى عشان نراقب حالتك بعد العملية وتاني ياستيي بدعي ربنا انو ما تشوفي حاجة اسمها مستشفى وتشوفي الا السمح في حياتك دي قولي امين
ابتسمت وقلتا ليهو يعني تاني م عندي جية ؟ قال لي م اظن حنكتب ليك مسكنات وشوية ادوية كدا وبعدها بإذن الله تطيبي بس عليك الله شهر الزمي السرير م تحاولي تتحركي كتير الا الجرح يبرا تماما
