اشرف عايز يمشي كدا ولدو سألو دي امي القلتها لي ؟؟
اشرف عاين لي وقال ليهو اي
الشافع جاني وقال لي انتي صحي ماما ؟
انا م عارفة احساسي في اللحظة دي كان شنو بالضبط بس هزيت ليهو راسي بمعنى ايوا وكانو دموعي ماليات وشي جا وحضني وقال لي انتي ماما
مسكتو علي شديد ، اشرف قال لي تصدقي يا اسلام ، عمري م شفت "علي "مبسوط للدرجة دي ، 4 سنوات م حصل شفتو بضحك بالطريقة دي
حرفيا انتي الانسانة الوحيدة الخليتيهو يضحك حتى بدون م تنطقي كلمة واحدة
قال لي رباب دخليهم جوه انا عندي مع امي كلام وراجع ، دخلت مع علي جوه ، كان قاعد في رجليني وقال انو م حينزل مني نهائياً
رغم انو ف الكلام في حاجات لسة م كان بنطقها كويس ، بس انا كنت بستمع ليهو بطريقة خيالية حتى مع كل كلمة ليهو انا بضحك في طريقة نطقو ليها كان كل مرة ببوسني وبقول لي من زمان م جيتي ، انا كنت منتظرك
حقيقي علي نسخة من اشرف
علي كان شايل سمار ابوهو وعيون ابوهو الكحيلة وشعر ابوهو ، سبحان من ابدع في خلقهم الاتنين جميلين شديد
وسبحان الله لانو م شال لون حبوبتو ولالون عمتو شال من ابوهو بس
جات رباب ولقتني سرحانة قالت لي عارفاك بتفكري في شنو بس نحنا كنا عايزين نوريك والله
لحدي اخر لحظة من ما تدخلي العملية حقت استئصال المبيض اشرف كان عايز يوريك ، قلتا ليها انتو كنتو عارفين ب انو عندي كانسر ؟ قالت لي البيت كلو الا امي رحاب ، قلتا ليهو والسبب؟ قالت لي رغم اني متأكدة انو حتشوفي الموضوع غريب لكن ح احكي ليك يعني من بعد وفاة ابوي قلتا ليها ابوكم متوفي؟ قالت لي ابوي متوفي لكن الشفتيهو يوم التعارف دا كان عمي ، نحنا اصلا من ما قمنا في الدنيا دي ابوي علمنا ننادي ل اعمامي ب ابوي فلان ، ممكن اقول ليك امي من بعد وفاة ابوي اتغيرت شديد ، بتخاف من اي شي وبتقول اي شي ، وديناها دكاترة ورقيات شرعية امي الحال في حالها قالو دي حاجة نفسية
زوجة اشرف الاولى اختارتها ليهو هي ومجرد م عرفت انها عيانة قلتا ليها انا م فضولية بس هي كانت عيانة عندها شنو ؟ قالت لي مرت اخوي دي ربنا يرحمها بالجنة م كان في مرض كدا م عندها قلب وكلى وفقر دم ومع الحمل جاها سكري ومع ذلك كانت بتتحمل كلام امي الذي السم
تطلع وتدخل امس تسمعها كلام م بتسمع يا اسلام ، ومع انو هي في الاول اختارتها لي اشرف واتزوجها عشان يرضيها بس من ما عرفت انها عيانة بدت تكورك وتخدمها وفي النهاية ماتت في الولادة قلتا ليها وخالتو رحاب مشكلتها شنو مع الناس المريضين ؟
قالت لي نحنا لحدي يوم الليلة بنحاول نفهم امي مالا خمسة سنوات وهي بالطريقة دي انا اقول ليك بتخاف من اي شي ، وبتقول اي كلام في يخطر على بالها ، لحدي يوم الليلة تتجيه وتتحن وما بتخلي رسمة وترسمها ، حاجات النسوان المتزوجات كلها امي بتعملها بدون م تتردد كان في دمتور نفسي متابعين معاهو قال لينا م تمنعوها خلوها
