اشرف قال الا يمشي معي وفعلا ركبنا ف العربية واتحركنا انا طول الطريق شايلة هم اول م وصلنا لقيت امي قاعدة جمبو وبتخت ليهو في كمادات ، جيت عليهو ولمست جسمو فعلا حار شديد ، قلتا ليها امي ورح الدكتور ، اشرف قال لينا خلوهو شوية يمكن تنخفض
فضلنا نعمل ليهو كمادات وبعد عشرة دقايق كدة حتى ابوي اتحسن شوية حتى بعدها بشوية بقى كويس قمتا سألتو وقلتا ليهو ابوي انت حاسي ب حاجة تاني؟
قال لي لا
قلتا لي اشرف الحمة دي بتكون من شنو؟ اشرف قال لي م تخافي لانو احتمال ارهاق عادي
امي قالت لي احسن نطلع نخليهو يرتاح قلتا ليها بس امي قالت لي اطلعي يا اسلام خلي ابوك يرتاح
طلعت وقلتا لي اشرف انت متأكد دي حمة عادية قال لي عادي يا اسلام م تشيلي هم والله ماف حاجة بتخوف
بكون ساهر م نام ارهق نفسو حاجة بالشكل دا
بقينا قاعدين انا وامي واشرف ورقدت علي في السرير ، وبحرك في رجليني امي قالت لي ثبتي رجلينك وم تتوتري ماف شي حيحصل ل ابوك
بعد مسافة اشرف قال لينا عن اذنكم يا جماعة انا مفروض امشي بعد دا لانو الشغل والمستشفى وانتو عارفين لكن بغشاكم بليل
قبل علي وقال لي اخلي علي ولا اسوقو معي ؟
قلتا ليهو دا سؤال ليك خليهو اكيد يا اشرف، قال لي تمام بجي بسوقو بعدين المهم خلي التلفون جمبك لاني ح اتصل اتطمن على عم ازهري طلعت معاهو عشان اقدموا ، قال لي م تشيلي هم م حيحصل ليهو شي صدقيني
ركب عربيتو واتحرك وانا عايزة ادخل خلاص على البيت نادت علي منال قالت لي خلي باب بيتكم فاتح انا جاياكم هسي خليت ليها الباب فاتح وبعد مسافة كدا جات داخلة علينا
قلتا ليها مالكم قطعتوهو مننا كدا سمعتو ولا جابو ليكم ضحكت وقالت لي بري والله الجامعة بس يا اسلام
قلتا ليها ايوا
انا حقيقي حاسة بيها متوترة اول م شافتني يعني منال م كانت طبيعية ، وانا في نفس الوقت بقيت مترددة بين اني اسألها من منار ولا لا ، عايزة اقوم كدا قالت لي تعالي م تجيبي لي اي شي دايرة اقول ليك كلمتين وقايمة ، انا حرفيا بقيت خايفة قلتا ليك كلمتين بخصوص شنو يا منال؟
قالت لي
نحنا والله عمرنا م عديناك الا اخت لينا والله يا اسلام ، وانا حقيقة خجلانة منك شديد قلتا ليها منو شنو يا منال؟ خجلانة من شنو
قالت لي م عارفة اقولها ليك كيف بس كرم .. قلتا ليها كرم؟ قالت لي خطيبك الزمان اتقدم لي منار
ونحنا هسي مترددين نوافق ولا لا ، انا طوالي عرفت لي منار وكرم هم كان متوقفين هناك جمب الشجرة الفي الشارع ، قلتا ليها طيب حلو انتي خجلانة من شنو؟ قالت لي لانو هو كان خطيبك وكدا ، قلتا ليها لا والله زي م انا شفت حياتي هو كمان يشوف حياتو ، دي م حاجة بتخجلكم والله افرحوا ليها وانبسطو والله ، ومدام هم اخدو خطوة وجادين فيها تماما يبقى مبروك ليهم بالجد ،، قلتا ليها دا السبب الانتو م بتجوني عشانو نزلت راسها وقالت لي نعمل شنو قلتا ليها بتبالغو عديل كدا
