🌸زوجوني_منقبة_2🌸
Aicha_mos
🌸البارت -16🌸
صبح صباح جديد...وناضت العائلة كلا وشنو كيدير شي فالكوزينة كيوجد لفطور وشي كيلبس حوايجو غادي لخدمتو تا واحد مبقا ناعس من غير صفوان الصغيور...تحطات طبلة الفطور وتجمعو عليهاا تيفطرو
حفصة شافت ففرح الي غمزاتها ورجعات شافت فحليمة : ماما
حليمة كبات القهوة لتوفيق : نعم
حفصة : وخا نمشي عند خالتي فتيحة ؟
حليمة بتاسمات وشافت فتوفيق : ها الي قلت ليك
توفيق ضحك : ههه اوا خليها تمشي
حفصة بتاسمات بخجل : عافاك أ ماما
حليمة ضحكات : سيري راه هي نيت قالتلي صيفطيهاا
حفصة فرحانة : وخا نمشي ليوم يديني عبد الله
توفيق : إن شاء الله
جمعات الطبلة ومشاو الرجال لخداميهم...والعيالات لشقاهم وحدة تجمع دنيا وأخرى دير لغدا....داز النهار روتيني وكيف العادة...وصلات لعشية وتوادعو مع فرح الي جا راجلهاا يديهاا لدارهاا...عاد خرجات حفصة وعبد الله متاجهين لعند خالتهاا...الفرحة باينة من عينيهاا خالتهاا عزيزة عليها وبحال صاحبتها وكتر....مسافة الطريق حتى كانو فباب دار....دخلو بعدما سلمو وخرج عبد الله مبغاش يجلس راجع لدارو
حفصة دخلات لبيت من لبيوت وحطات صاكها وبدلات حوايجهاا وخرجات لابسة بيجامتها...وضافرها شعرهاا...عارفة بلي راجل خالتها مسافر كيف عادتو لشمال بحكم خدمتو.....مشات للكوزينة فين كانت خالتها تتوجد لعشا ومدات ايدها تعاونها
فتيحة مبتاسمة : احسن حاجة درتي ملي جيتي تونسيني
حفصة ضحكات : ههه ياك
فتيحة دارت الطجين فوق البوطة : اه اوا جمعتو روينة العرس
حفصة هزات خيزو تتاكل منو : فنهارها دغيا ساليناها
فتيحة سدات الطجين ديال الحوت : الحمد لله خوك وعروستو خليتيهم فدار؟
حفصة : لا مسافرين
فتيحة بتاسمات : اه مزيان مزيان (خرجو مشاو للصالة) اوا مقلتيش ليا شنو درتي فلافاك
حفصة حطات مخدة فوق فخادها : الحمد لله قريب ناخد الإجازة
فتيحة : إن شاء الله ازين...باقا تتخيطي ؟
حفصة بتاسمات : اه دابا ولا عبد الله يبيع داكشي الي تنخيط
فتيحة : واش غير الكساوي نيت ولا زدتي حاجات خرين
حفصة : لا غير لكساوي د المحجبات اصلا تيتباعو مزيان
فتيحة : اكيد غيتباعو ونتي الي مخيطاهم
حفصة تضحك : ههههه تتصبغيني
فتيحة : هههه حاشة
#يتبع~
أنت تقرأ
زوجوني منقبة 2( كاملة)
Short Storyزوجوني_منقبة : 2 💞الجزء الأول من القصة ، كان أول تجربة ليا فهاد النوع من القصص و لي فرحني أنها أثرات فبعض البنات إيجابيا ❤ 💞داكشي علاش قررت نجي بجزء ثاني... بأبطال جداد و أحداث جديدة و غاتكون نفس الستايل طبعا كانتمنى تعجبكم و غانفرح إلى غي...
