(١)
_ خدي يا بت بلاش فضايح!!!!
_ ابعدي عني يا يسرا
_ بطلي هبل يا ليلى الي بتعمليه دا هيوديكي في داهية
_ يسرا!!!!!
_ يا بت .. يا بت دا ظابط و..
_ وسعي!!!!
زقتها وبكل قوتي
مكنتش شايفة قدامي غير حق اخويا الي اتاخد في الرجلين
عيني كان عليها غيامة لدرجة اني طلعت بشعري ولبس البيت
كان واقف بغرور ونافخ صدره
مديني ضهره وعمال يديهم في أوامر .. دوروا هنا .. شوفوا هناك !
شديته من القميص الي كان لبسه
بمنتهى الغرور بص للقميص مكان ما شديته ورفع عينه ناحيتي.
_ حسبي الله ونعم الوكيل
ضحك بسخرية
_ اه .. انتي بقا أخت المدمن
_ اه انا اخت المدمن .. معاك اذن من النيابة ؟
سكت
_ لمهم واطلع برا
_ طب العبي بعيد يا شاطرة
شديته مرة تانية فبصلي بنفاذ صبر
_ لمهم واطلع برا بدل ما اصوت والم عليك الناس
صوت ضحكته عليِّ فجأة
لدرجة ان عينه دمعت
_ انا ممكن احبسك انتي .. والناس
بص للهدوم بتاعتي وشعري .. نظرة انا فكراها كويس.
_ ولا اقولك ؟ .. انا هحبسك انتي بس
جه واحد من وراه وقاله انهم ملقوش حاجة في البيت
اما هو عينه كانت متشعلقة عليا.
_ انا لقيت.
وشاور عليا
مش فاكرة من الي حصل غير مشاهد مقصوصة
يسرا وهي بتصوت وبتقولهم يسبوني!
انا وانا بحاول ابعد اديهم عني.
وهو بيبتسملي بشر بعد ما قفل باب العربية واتحركنا.
_ صباح الهنا
فتحت عيني بهدوء وبصيت حواليا
الصورة مش واضحة لكن انا حاسة.
ايدي الاتنين متعلقين في الهوا ومربوطين بحديد
رجلي نفس الكلام.
شعري مبلول وهدومي متبهدلة
وهو سحب كرسي وقعد قدامي
الاوضة كانت واسعة لكن عبارة عن فراغ بياكل اي حد يخشها.
باردة .. برودة تخلي الخوف يسري في الجسم من غير اي اسباب.
_ مش عاوزة تقوليلي أخوكي فين ؟
_ انت وانا عارفين كويس فين
_ فعلاً!!!!
سحب نفس من السيجارة وحط رجل على رجل
_ طب ما تقوليلي انتي كدا .. يمكن انا ناسي او حاجة.
_ لا انت مش ناسي .. اخويا عندكوا
_ عندنا فين
_ تحت الارض
_ مع العفاريت ؟
_ العن .. معاكوا انتوا
ضحك وقام .. قرب ناحيتي .. قرب اكتر
شم ريحة شعري ومسكه بقوة وشدني ناحيته.
_ انتي عارفة انا ممكن اعمل فيكي ايه لو متكلمتيش مش كدا ؟
_ وانت عارف لو فكتني ممكن اعمل فيك ايه
