تعالوا نثرثر سوا عن رحلة الروايات الورقي اللي في الصورة دي 👇🏻👇🏻
واحكي لكم رحلتي مع ابداع
اللي بالمناسبة هتم ١٠ سنين موجودة كدار نشر بتنشر وترجم وتطبع وتسوق كتب من مختلف المجالات
اولا دي مش رواياتي الورقية الوحيدة
انا قبل كدة كان عندي تجربة نشر مع دار نشر مكنتش موفقة اوي
وخصوصا انا اللي بدات الكتابة من ٢٠١٠ فجريت انشر ورقي ٢٠١٤ و٢٠١٥ كمان
لكن محصلش نصيب مع الدار وانفصلت عنهم وفسخت العقود كمان
ايه الاسباب مش مهم دلوقتي
ومش مشكلة
ومش حابة اتكلم فيها
لانها تجربة بمرها او حلوها عدت واتعلمت منها دروس حلوة اوي
المهم ان بدايتي مع أبداع كانت برواية #القلادة
واصلا الرواية دي رواية صعبة المخاض ومتعسرة الانطلاق وانا كتبتها بدل المرة ٣ مرات
ايوة والله وحصل اني كنت عايزة انزلها في معرض الكتاب ٢٠٢٠ ومتوفقتش اتاخرت والرواية مكنتش متظبظة
وانا شخصيا كان عندي مشكلة شخصية كبيرة
فكل الظروف كانت ضدها وضدي انا كمان
وقضيت بفترة صعبة كدة
وبعدين في لحظة ما معرفش تواصلت مع بدر عشان ايه ومكنش اول تواصل بيني وبين بدر ودكتور عيد وراحت قيلالي بقولك ايه نتوكل على الله وتنزل معرض اسكندرية
كان ساعتها معرض اسكندرية تقريبا فضله اسبوع او ١٠ ايام
فاتخضيت اللي هو الكلام ده بجد ولأ ايه
المهم يالا بسرعة دكتور عيد مستنيك وهوب روحت المكتبة وهوب نمضي عقد
وهوب دكتور عيد يقولي بقولك الاعلان نازل يوم الخميس
خميس مين 😯
دي الرواية الجملي اللي مكنتش لا نافعة تكتب ولا تنتشر
بس ربك لما يريد
وبدات بقى علاقتي مع دكتور عيد اللي بجد مجتهد جدا
موهوب جدا
ومحترم جدا في التعامل وعشري وجدع وابن بلد بجد
والصفة الاهم انه ابن سوق قاري وفاهم
وده بالنسبة لي حلو
لان حد بالمواصفات دي
بيسعى دائما يطور نفسه ويطور اللي معاه
جينا بعد كدة معرض القاهرة اللي كان في يونيو
الصراحة دكتور عيد تواصل معايا ايه يا بنتي معانا قلت له مش هلحق
قالي تمام بس اعملي حسابك معانا المعرض اللي جاي
قلت له عندي خط جديد وفكرة جديدة
ربنا يوفقني فيها لانها تيمة مش زي اللي بكتبه دائما قالي معاكي
مقدار الثقة اللي دكتور عيد بيكلم بيه يخلي الواحد يكتب عن غزلان بتطير وهو مستريح بجد ياعني
المهم جهزت واتواصل مع بدر اللي بجد
انا ممتنة ليها جدا مش على الصعيد الشخصي بس
لا على الصعيد العملي كمان
لانها كفؤ جدا في تعاملها وادارتها وطولة بالها
وجات مكالمة الدكتور بعد ما سلمت #ارض_البُشرى
بيقولي ايه
قلت له سلسلة يا دكتور
قالي متفقناش على كدة هتنزل على بعضها
قلت له لا متصل منفصل
قالي سامعك
وبعد ما دردشنا شوية وحكيت مختصر الفكرة برؤوس الاقلام
قالي قوليلي شخصية بارزة عندك
قلت له المُبشر
قالي ينفع يبقى اسم الجزء الاول
قلت لا الثاني
قالي على بركة الله
قلت له هستنى رايك وفعلا قالي رايه واحنا بنراجع الpdf
وفيه جملة عمري ما هنساها
قالي طلعتي كالعادة لحته جميلة بتاعتك وختمتي حلو اوي
وانا الصراحة انبسطت
ومش هنسى ابدا يوم قاعدة كدة لا بيا ولا عليا
دكتور عيد ينادي عليا ويقولي
جاهزة هنعلن وهبدأ بيكي
فرحة لا ع البال ولا ع الخاطر
بس كانت مفاجاة حلوة اوي
وعدينا المعرض والرواية لاقت قبول حسن والحمد لله
وبعدها قالي من قبل رمضان
سلافه معانا معرض القاهرة
قلت له ان شاء الله
ننزل الجزء الثاني من السلسلة
ومش عايزة اقولكم ان #المُبشر دي اتكتبت في ظروف عاملة ازاي
انا وصحتي اللي مكنتش في افضل ظروفها
شغلي اللي مضغوطة فيه
ولاد بتدرس وتمتحن بنت شهادة
وولد بنجرب فيه مناهج جديدة
وظروف كتير كتير
بس في الاخر طلعت المُبشر
في وسط ده كله كانت بدر ونعم الداعم بصراحة وهي كل ما نتكلم تطمني
اقولها مش هلحق 🥺😩
تقولي عيب عليكي
هنلحق
بصي بس خلصي وهندقق
بصي نعمل الغلاف وانتي بتكتبي
ونجهز
والصبر والدعم والتفهم بصراحة ياعني احلى من كدة مافيش
الغلاف مش ظابط
تقولي نشوف حاجة تانية ولا يهمك الى ان خلصت وسلمت اخيرا 💃🏼💃🏼
وكان اعلانها خير ختام لسنة لم تكن الافضل
ولكنها اصبحت الافضل باعلان المُبشر
وبفرحة المُبشر
وجات مكالمة دكتور عيد بتاعت كل سنة واتكلمنا في اللي جاي
وبصراحة المكالمة كانت مفرحة جدا ليا
بصراحة دكتور عيد مش مجرد صاحب دار نشر
هو صديق برتبة اخ
داعم جدا ومساند جدا وجدع جدا
على الصعيد الشخصي والعملي
وبدر صديقة واخت قبل اي حاجة
عشرتي معاها من كتير
وعشرتي مع ابداع اللي انا معاها للسنة الثالثة على التوالي خلتها مش مجرد دار نشر وانا كاتب بينشر فيها
لا علاقة اعمق من كدة بكتير
سعيدة بالتعاون معاهم
وسعيدة بوجودي معاهم
وسعيدة بابداع اللي يارب تكبر كل سنة وتبقى افضل وافضل
وعقبال سنين جاية كتير ابداع في تقدم
واحنا معاها طيبين وحلوين وموفقين
وتفضل دائما #إبداع_عشرة_سنين
#رواياتي_الورقية
#جاهزين_للي_جاي
#كونوا_بالقرب_دوما
أنت تقرأ
المُبشر ( رواية ورقي )
Fantasyانهض وأنت المبُشر الجديد لأرضنا الغالية، أرض البُشرى أمانة بين كفيك. نهض واقفًا ليحييه برأسه التي رفعها بشموخ وعنفوان زين ملامحه قبلما يدور على عقبيه وهو يفرد ذراعيه على وسعهما هاتفًا بصوت جهورى حماسي: - وهاك أنا أمام أرض البُشرى بجميع أطيافها.. سا...
