دائما اشوف تعليقاته بصفحة ست اشواق ام القانونية وتعليقاته دائما مرتفعة بكمية اعجابات عالية اخذني الفضول اعرف منو ( ابو بغداد ) ودخلت اشوف صفحته .. عجبني المحتوى قصص قصيرة ، انطيت اعجاب للصفحة وطلعت لكيته ثاني يوم راد الاعجاب
كل يوم تطلعلي قصصه اقراها بالليل، انطي لايك واطلع ... صار يتابع ستورياتي يوميا .. بادر وكام يرد على ستورياتي .. ارد واجاوبه كل جواب ياخذ مناقشة فد ربع ساعة المناقشة صارت حديث يطول ساعات الحديث تحول لصداقة قوية .. يحجيلي كل شي مر بيه سابقا .. واحجيله عن حياتي
ينصحني .. يرشدني .. يصححلي جان عبارة عن طاقة ايجابيه عالية .. كل مشكلة يهونها بعيني وكل تعب يخففه بكلامه واهتمامه
صح عايش بأوربا ومتوفر عنده كلشي بس حياته جامدة مثل الجليد يوم يشبه يوم .. وحياتي كلها احداث ومشاوير وقصص .. مشاكلي ازماتي مسؤلياتي. اطفالي كلها محط اهتمامه بشكل عجيب .
دائما يطلب مني اترك الاتصال مفتوح بنص اطفالي يحاجيهم يشاقيهم وهم يضحكون وياه.
صار مهتم بكل تفاصيلي وتفاصيلهم مرات من اطلع مشوار قريب يكولي اتركي الاتصال يمهم مفتوح حتى اسمعهم بدون ميحسون شيسوون وراج وهم اخلي بالي يمهم خاف يصير شي اوجههم شيتصرفون واخابرج
يكعد وياهم بالساعات ينصحهم ويرشدهم هذا يصير وهذا عيب .. حسيت يستمعوله وياخذون منه .. غايب ويبعد عنا قارة بس صار نفر كلش مهم بعائلتي .. اذا نص يوم انشغل عنا وما خابر اطفالي يستفقدوه قبلي .
ما وعدني ولا حجه براسي سوالف حب ولا سمعت منه كلمة احبج ، بس كل افعاله تكولي احبج .. وبالمقابل اني صعب افتح كلبي لأي شخص بوضعي ، لازم احسب احساب لما اريد انطي كلبي لشخص يكدر يتحمل يشيل مسؤلية عائلة .. لإن اللي يريد يرتبط بيه هو ديرتبط ببنية و٣ اطفال جزء لا يتجزء عن الأخر .
ايام مرضي اكثر ايام ثبتتلي حبه والإنسان بالمواقف تعرفه .. لما جنت اتخربط واهلي يحتارون بيه، الكاع تضيق بيه شغل ميعرف يشتغل يبقى يخلص اليوم كله متوتر وتعبان وكل دقيقتين يتصل بس حتى يعرف اني بخير .. كام يطلب افتح اتصال وابقي الاتصال مفتوح وافعل خاصية ضوضاء حتى ميسمع اصوات اهلي بس حتى يطمئن اني بخير .
يوم عمليتي جان اصعب يوم مر عليه لما دخلت العملية وهو بعيد عني .. حسيت الدنيا وكفت بعينه ، احتار بيمن يتصل ويسمع اخباري واني بالعمليات .. متواصل ويا صفحة الصالون مال صديقتي حاطة رقم الشغل .. اتصل يتعذر منها ويطلب ان تجي للمستشفى بس حتى تتصل بيه مناك وتشوفله وضعي
اني تحت تاثير البنج وصديقيي تطلب مني احجي وياه مجنت بوعيي بس اون وابجي من الالم وابعدها مني ..
وقتها ذاك الرجال الجامد اللي ميهزه شي ولا يهتم لشي كام يبجي بحرگة لان اني بهالوضع وهو بعيد .. من ساعتها قرر يترك هولندا ويرجع للعراق من بعد ٢١ سنة غربة.
الدكتور منعه يسافر لان عنده التهاب حاد بالاذن الوسطى ، مهتم ورجع اباص مر بسبع دول من هولندا لبغداد حتى يجي ويوكف كدامي ويصارحني ويكولي ( اني احبج واريدج ومشتريج انت واطفالج واني رايد هذه العائلة اللي انت مكونتها واريد اصير جزء منها واحتويها )
خلق لكلبي فراشات .. ختمت اغاني الحب على عيونه
بس احلامنا شي وواقعنا شي اخر انصدم بمجتمع يقلل منه لما يطلب منهم يجون وياه يخطبون ..يكلوله من كل عقلك تتزوج وحدة مطلكة وعدها ٣ جهال ؟ الف وحدة تتمناك .. وكل واحد منهم يعرضله اسامي بنات صغار وممتزوجات .. ولما يكولهم احبها يحسسوه هو زوج وان اني لاعبه بعقله لو مسويتله سحر وكل واحد بيهم يكعدله ناصح حتى ينردع عن هالقرار .
اعتزلهم كلهم وراح لبيت اهلي وحده ووكف كبال ابويه وكاله ( عمي اني هيج وهيج وضعي ومشتريها هي واطفالها ومتكفلهم قانوني واجتماعي واوعدك اكون سندها واسعدها واعوضها عن كل مر هي مرت بيه )
بابا راح سال عن اهله بالمنطقة القديمة والجيران كلهم يعرفوهم ومدحو بوالده الله يرحمه ومدحوه بيهم فرجع وكال ( القرار الج بابا اذا انت راضية ومتأكدة من قرارج الله يسعدج )
وافقت وراح جاب اصدقائه وترس ديوان اهلي زلم وطلبني وعقد زواجنا بفضل الله وأهل البيت .
هذا جزء مختصر من قصتنا وربي يهنيكم ويسعدكم واشكركم على كل الدعوات ومشاعر الحب الصادقة والامنيات اللي بادرتوا بيها من البارحة لليوم .. اشكركم ❤️
Abo Baghdad
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
