طيب كلامي من وجهه نظري انا كملك
الموضوع بيكبر بشكل مريب ومخيف
الفجوه اللي بقينا فيهاا بقت لا تطاق
السوشيال ميديا استولت حرفياا علي حياتنا بطريقه غبيه، حياتنا كلهاا بقت متمثله في السوشيال فقط لا غير، علاقات سوشيال، جواز من السوشيال، صداقه سوشيال، المشكله ان كل العلاقات السامه دي بتحصل بجهل، يعني انت مثلا كراجل ممكن ترتبط بواحده سوشيال من بلد وانت من بلد تانيه خالص وتبقي مطمن؟؟ اعتقد لاا مش هتكون مطمن؟؟ علاقه الصداقه اللي نشأت من تعارف علي جروب كومكس غبي واكتسبتوا منهاا صديق، هل صديقك داا هتأمن علي اسرارك ليه؟؟ هتآمن تدخله بيتك في يوم؟؟ برضو اعتقد لاا، بقوا بيجمعوا حب الناس بعدد الـ comments اللي جيت علي post معين، حب بقااا عباره عن love، اعجاب عباره عن follow، نقطع علاقتنا بحد اديله Block ، انت متخيل ان Block داا معناه خلااص ان كل شخص فينا في حاله؟ انتو بجد دا اللي مقتنعين بيه حالياا؟؟
ادخل اي بيت مصري هتلاقي كل شخص منعزل لوحده مع موبايله في اوضته او في الـ Corner بتاعه كأنه في عالم منفصل، وياريت مثلاا الاطفال والمراهقين؟؟ تؤتؤ دا الاب والام قبلهم، طب اقعدوا وسط ولادكم، علشان مترجعوش تزعلوا انتو لما تلاقي بنتكم في علاقه مع شاب وهي في سن اصلاا مش فاهمه فيه هي بتعمل اي بالظبط، انت كأب راجع من شغلك مهدود وقاطع النفس عارفين دا والله ومقدرينه جداا وربنا يعينك ي رب علي الدنيا، بس انت بترجع ترتاح بالموبايل؟ ارتاح مع ولادك طيب، اقعد وسطهم اضحك والعب وهزر واعرف مشاكلهم، ولادك ليهم حق عليك، المفروض انت تكون الحبيب الأول لبنتك، تتكلم معاها وتصاحبها يكون بينكم مساحه صداقه، دايما سمعهاا كلام حلو علشان مش من اول كلمه حلوه تسمعها من بره تاخد علي قفاها بسبب نقصك انت ناحيتها، راقب ابنك مش قله ثقه فيه، بس دا دورك ان عينك علي ولادك، مش خانقهم اه بس في حاجه اسمهاا جد، مراتك ليهاا حق عليك كماان بدل ما تقعد في وسطهم تحط وشك في التليفون وترجعوا تشتكوا من زياده نسب الطلاق ، اي يمنعك سيدي العزيز انك تكون صاحب ولادك بدل ما يلجأوا لصداقات سامه براا؟ هيحصل حاجه لو صاحبت ابنك؟ وانتي ي ست الكل الغاليه، المفروض انتي مدرسه، فين داا؟؟ سايبه ابنك علي التليفون ليل نهار علشان ميصدعكيش بزنه، بتديله التليفون تشغليه بيه من سن سنتين وبعدين ترجعي تقولي الواد مش بيتكلم، الواد عنده توحد، الواد مش اجتماعي، ماهو طبيعي، انتي ادتليه قنبله موقوته وترجعي تزعلي لما تنفجر؟ مقلتش نمنع التليفونات بس بمقدار معين، الاطفال االي عمرها ميعديش بضعه سنين دي مينفعش تمسكه اصلاا، يكبروا شويه من حقهم وقت محدد، عينك علي موبايل ابنك، بيكلم مين بيتفرج علي اي، اي نوعيه الحاجات اللي بتشده علي موبايله علشان كدا عايز يمسكه فتره اطول، حابه تشغلي ابنك عنك هاتيله لعبه مفيده يلعب بيهاا، يكبروا شويه عوديهم علي القراءه، قدميلهم في مسابقات او رياضات كاراتيه او كوره سباحه طايره اي حاجه، لكن والله بالتليفونات دي هتطلع جيل فاااشل
من فتره ظهرلي فيديو لطفل صغير بيغني اغنيه بهوايا للرائع العالمي حسن شاكوش ، مش دي المشكله ولا ان شخصيه زي دي استولت علي عقول الأطفال ، المشكله بقااا ان والد الطفل دا هو اللي بيغني والولد بيغني والله، الكلمه اللي تتقال لاب زي داا " حسبي الله ونعن الوكيل فيك، خساره فيك كلمه بابا والله لان غيرك بيتمني ضُفر عيل وهو هيخليه قمه في الفخر وانت بتطلع عيل سوابق بيغني اغنيه قذره وانت مساعده، مساعده انه يقول بكل فخر" عينيكي لياا مرايه ي جمال مرايه العين "، عيل مش فاهم حاجه وبيقول كميه قذارات، المشكله بقااا اصبحت تكمن في الاغاني كماان، قمه في الانحطاط والوطو والله، من كام سنه فاتوا ظهر اغاني كتير سرسجيه بطريقه مرعبه مكنتش فاهمه المعني وقتها لان كنت نوعا ما صغيره، حالياا سمعت الاغاني دي تاني اتصدمت من كميه الانحدار اللي فيها، معاني قمه في القذاره ببواطن اقذر، وزي ما بيقولوا المعني في بطن الشاعر،مختصر الاغاني تشكيك في اهل وصحاب وعارفين بيلعبوا ازاي علي النقطه دي في عقول المراهقين، وصف جسدي دقيق لجسم البنت، مثلا يعني لما تكون في فرح ومعاك والدتك او اختك او حتي مراتك وانت بكل سرور بتغني " عودك مش طبيعي مش فاهمله ــــ ايوا عليا غاليه متشاله علي الراس" صراحه مقدرش اقول الجمله اللي بعدها اساسا من سوءهاا،" اي انت كداا بتعمل اي؟ مكنتش عايزه اقولهالك صريحه بس انت كداا مش راجل حضرتك، اقل لفظ يتقال عليك انك ديوث، لان الراجل اللي يتفنن بغناء اغاني زي دي بالمعاني دي قدام مئات الناس دا ملوش وصف الصراحه
حياتنا الخاصه اصبحت معرض للجميع، وللأسف حاجات خاصه جداا بتتنشر بكل جرأه وبكل وقاحه، واحده اتجوزت لازم تعرف الدنيا كلها، واحده ربنا كرمها واصبحت حامل تعرف الدنيا كلهاا لاا كماان متكتفيش بـ post بس لا لا طبعاا دا لازم تتصور وبطنهاا بارزه بسبب الحمل مع تفاصيل مينفعش تظهر في جسمهاا كبنت مسلمه ، اللي يغيظ ان جوزهاا قدامهاا عاادي ومبسوط جداا ومتصور معاها، خطوبه اعلنوا فيس، قرايه فاتحه اعلنوا انستجرام، كتب كتاب اعلنوا تويتر، جبت عربيه صور ونزل بسرعه، بقيت بحس اني في بيت كل شخص شويه بدون اي قيود
النقطه اللي وصلنا ليهاا صعب نرجع منهاا والله بس ربنا يسترهاا علي الجميع
ملك الكفراوي
