Snowless Winter Dream [Completed]

Chapter 21

ရန်ကုန်မြို့၏ ရှုပ်ထွေးသော လမ်းတွေကြား၌ သူတို့၏ သခင်လေးကို မျက်ခြေပြတ်သွားကြတာကြောင့် ယခုကိစ္စတွေအား ကိုင်တွယ်ခွင့် အာဏာ အပြည့်အဝ ရနေသော ဆက်ခွန်းသစ်ထံ ပြန်ဆက်သွယ်ကြရသည်။

သခင်လေး၏ အစ်ကိုက သူတို့အား သခင်လေး၏ အိမ်ထောင်ဖက်ဖြစ်လာမည့်သူ၏ စကားကိုသာ နားထောင်ကြဖို့ မှာထားခဲ့သည်။

ဆက်ခွန်းသစ် ထိုသတင်းကြောင့် ဒီတစ်နေ့လုံး ပေါက်ကွဲနေရတာတွေက မပြီးဆုံးနိုင်သော ပြဿနာတွေလိုပင်။

"ကားတောင် တွေ့ပြီး လူမတွေ့ဘူးဆိုတော့ မင်းတို့ကို ဘယ်လို ဆက်အားကိုးရတော့မှာလဲ။ အခုချက်ချင်း မရရအောင် ထပ်ရှာခဲ့။ နောက်ပြီး မင်းတို့ကို ရေးခေတ္တရာရဲ့ အိမ်ရှေ့မှာ မလှုပ်ရှားဖို့ မှာထားခဲ့တယ်မလား။ အလကား အသုံးမကျတဲ့ကောင်တွေ။ အခု အစီအစဉ်နှစ်ခုလုံး သွားပြီလေ"

သခင်လေး၏ ကားကို လမ်းဘေးတစ်နေရာ၌ ရပ်ထားတာတွေ့လိုက်ရပေမယ့် ကားပေါ်၌ လူနှစ်ယောက်လုံးကို မတွေ့ရတော့သလို ထိုနားက ဟိုတယ်တွေ၊ တည်းခိုခန်းတွေအပြင် ပုန်းအောင်းနေနိုင်မည့် နေရာတွေကို ပိုက်စိပ်တိုက် ရှာဖွေခဲ့သော်ငြား နှစ်ယောက်လုံးကို အရိပ်တောင် မမြင်ရတော့။

"ကျွန်တော်တို့အမှားပါ"

"ဒီမင်္ဂလာပွဲပျက်ခဲ့ရရင် မင်းတို့အားလုံး သေဖို့သာ ပြင်ထား"

ဖုန်းကို အားနဲ့ ပစ်ထုတ်လိုက်ရင်း သူ့လမ်းလာလာပိတ်နေသည့် မကောင်းဆိုးဝါးကောင်ကို သတ်ဖြတ်လိုက်ချင်စိတ်တွေ တဖွားဖွားပေါ်နေလေသည်။

ထို့နောက် သူ ဖုန်းကို ဝရန်တာဖက် ထွက်ပြောနေခဲ့တာမို့ အိမ်ထဲပြန်ဝင်ဖို့အလှည့် သူ့အား ရပ်ပြီး စိုက်ကြည့်နေသော မာန့်ကို မြင်လိုက်ရတာကြောင့် လန့်သွားမိသည်။

"မင်္ဂလာပွဲဆိုပဲ၊ မင်းနဲ့ အဲ့ကောင်ရဲ့ မင်္ဂလာပွဲလို့တော့ ငါ့ကို လာမပြောနဲ့နော်"

ဆက်ခွန်းသစ်၏ ဒေါသတွေက ပုံချစရာ လူရှာနေသည့်အလားပင်။ သူ ထိုမျှော့လိုကောင်ကို လုံးဝသည်းမခံနိုင်တော့။