-منيير
-(بحب اسمي شديد لما هي تقولو )
-منير
-اي يا دينا معاكي انا قولي لي
-انا متضايقه شديد
-ليه في شنو
-اتكلمت مع ماما في الموضوع
-وحصل شنو؟
-زي ما انت كنت متوقع قالت لي ما شفتي عمل شنو في اخوكي ومستحيل اوافق وابوكي كمان ما حايوافق
-(اتضايق وكأنو كان حايعرسها بالجد) انا كنت عارف انو حيحصل كدا
-انا حكلمهم بالحقيقه وحقول ليهم حسن عمل شنو بالضبط عشان يعرفو حقيقتو وما يكون عندهم مشكله معاك
- لا يا دينا ما صح كدا ما كويس تشوهي سمعتو وتطلعي كعب قدام أمك وأبوك
-(وكمان خايف على سمعتو بعد العملو معاك ما قادره اتخيل انو منير دا كويس كدا يا رب يكون من نصيبي بس ما عايزه غيرو انا ) يستاهل انو يحصل معاه كدا
- لا ما تعملي حاجه عشاني ممكن نشوف حل تاني طيب
-حل تاني زي شنو
- ما عارفه والله يا دينا لكن انا بتصرف مستحيل اخليك تضيعي من يدي بعد لقيتك
-(بتبتسم) وانا ما عايزه غيرك
-(قلبو بدق) دينا انا بحبك
(هو ما قالها كلمه وبس لا هو قالها بالجد لانو حاسي بيها)
- وانا كمان
وقعد يتكلم معاها كتير واول مره يحس انو اي حاجه بقولها ليها هي حقيقيه فعلا وهو عايز يبدا الخطه خلاص بس في شي مانعو في حاجه بتقول ليه لا ما تعمل كدا اتراجع بس ما شايف انو في حل تاني ينتقم بيه من حسن غير الحل دا
في نهايه المكالمه قال ليها انو حاسي بحمى وكدا وما عارف مالو فجاه وهي قالت ليه خلاص ابلع بندول ونوم طوالي ريح نفسك قال ليها حاضر حبيبي انا وقفل منها وخلاها هي مبسوطه من المكالمه شديد
•
•
•
تسنيم،،،
جاء يوم الخميس
وهي اتجيهت اخر جيهة وكانت مبسوطه وبتغني
ولقتو منتظرها بره ( بعربية ابو) ركبت معاه قدام وقال ليها قدر شنو هي طالعه حلوه ويشيل ويتغزل بيها وهي مبسوطه سألتو من العربيه لانها فاكراها حقتو
-دي عربيه الحاج
-في سؤال عايزه اسالك ليه من زمان بس ما حبيت
-تسأليني طوالي اي حاجه حابه تقوليها قوليها
-يعني بس مستغربه انو ما عندك عربيه مع انو ماشاء الله وضعكم كويس جدا
-عدم العربيه دا عقاب من الحاج
-كيف انت عملت شنو؟
-والله يا ستي انا بالنسبه للحاج الشماسي قليل الادب الما بسمع الكلام فهو حالف انو ما يجيب لي عربيه وانا ما اشتري عربيه من قروشي الا بعد اخلص جامعه واسي العربيه دي الا سرقتها عشان اجي اسوقك
-يعني حصلت حاجه خلتو يعمل كدا ؟
-هو ما حصل شي معين بس بداية الجامعه لما كنا برالمه كان اشترى لي عربيه وانا كنت برجع البيت متأخر ومرات ما برجع البيت اصلا
-(حست باحساس مخيف) ليه كنت بتعمل شنو
-والله بس بكون مع اصحابي بنشرب جبنه وبنلعب كشتينه ولا ضمنه ولا شطرنج وكدا وفجأة بلقى الزمن اتاخر ونحنا الشباب عموما لما نكون سوا الزمن بمشي وما بنحس بيه
-اي صح
-يلا عشان كدا الحاج اخد موقف وحرم علي العربيه لانو قال هي السبب
-بالغ معاك في موضوع العربيه لانها مهمه
- اي والله لكن خلاص اتعودت بقيت اتصرف بأي حاجه
-وخليت الصياعه يعني وانك ترجع البيت متأخر؟
-أخليها وين بس لسه بس ما طوالي مره مره كدا بطلع مع الشباب
-بتعملو شنو؟
-ياهو بنشيش ونلعب ونتونس والجبنه وكدا
-ايوا
-عندك مشكله في الموضوع دا ولا حاجه؟
-لا م عندي مشكله
وتشيل وتسأل فيه وجاها احساس انو دا ما الزول الانا عايزاه لانها كانت فاكراه ملتزم شديد وما زول سهرات للصباح مع اصحابو وشيشة وكدا كانت فاكراه محترم شديد والنظارات والوش البرئ غشوها وقلبها قبضها وبقت ما قادره تتكلم معاه زي اول بس بتقول ليه اممم اممم وهو زاتو حس انها ما كويسه وسألها بس قالت ليه مافي شي وهو اصلا بس كان عايز يصلو البيت بسرعه وما مهم هي مالها ان شاء الله تموت ما بخصو
بعد وصلو،،،
فتح ليها باب العربيه ونزلت وفجأة وقفت
-حبيبي مالك في حاجه؟
-حاسه نفسي تعبانه شويه احسن ارجع
-(اتخلع)ترجعي كيف يعني؟
-ما حاقدر اقعد معاهم كدا احسن اجي مره تانيه
-لالا والله كيف مره تانيه هم اسي بكونو منتظرنك وبعدين الليله الكرامه عشان زاتو تتعرفي على اهلي كلهم عايز اوريهم عروسة ولدهم حلوه كيف
-بس ما حاقدر اقعد كتير
-ما مشكله بس سلمي عليهم وبرجعك
-طيب
وفتح الباب بالمفتاح
وخشو وقفل الباب طوالي بالمفتاح وهي ما سامعه صوت أي جوطة مع انو قال ليها عندهم كرامه حست بخوف وحاجه غريبه
-وين ناس البيت؟
-بكونو جوه خشي تعالي
ومسكها من يدها
وهي ماشه وبترجع ل ورا لحدي ما دخلو جوه وبرضو ما لقت زول وخلاص خافت شديد وقلبها بدا يدق والخوف ظاهر في وشها
-مجتبى ناس بيتكم وين؟
-انا ما عايزك تزعلي مني
-في شنو؟
-مافي زول في البيت غيرنا
-كيف يعني كيف الكلام دا؟
-حبيت نكون برانا ومن غير ازعاج عشان اعاين ليك زي ما عايز لاني ما قادر اشبع منك بالتلفون وما قادرين نقعد كتير بره طوالي انتي بتقولي اتأخرتي او خايفه زول يشوفنا من اخوانك وفي الجامعه ما بقدر اكون معاك براك لازم تجي وحده من صحباتك وانا عايزك براك
-(بدت تهيج) دا ما عذر ليك وليه ما تكلمني وتكذب علي وتقول أمك وأخواتك قاعدين يا كضاب ي منافق انا راجعه بيتنا
وقامت من الكرسي عايزه تمشي قام طوالي مسكها من يدها لواها ليها
-اولا ما تصرخي فيني عشان ما اقطع ليك لسانك ثانيا انتي كنتي فاكره علاقتنا دي نهايتها وين يعني؟
-(مصدومه ومخلوعه) مستحيل تكون انت مجتبى الأنا حبيتو مستحيل ما قادره اصدق
-انتي ما حبيتيني انتي حبيتي الطلعات معي والهدايا والدلع ما حبيتيني انا وزي ما انا ما قصرت معاك في حاجه عايز مقابل
-(خايفه ودموعها جرت) خليني اطلع بس عليك الله والعايزو بعملو ليك
-لو طلعتي العايزو دا حتعملي لي كيف
جاها شريط كامل عن مجتبى وبدت تتذكر لما قال ليها انو كان صاحب منير ولما يعاين في جسمها وانا يقول ليها البسي لي الفستان دا والفستان بكون ضيق اصلا ولما يتكلم معاها كول وكلامو معاها كلو كعب اصلا كيف هي ما فكرت انو ممكن يكون كدا وانو ممكن يكون زي منير
بقت تقول ليه خليني عليك الله وتحاول تفك نفسها منو بس هو ماسكها شديد ،لزاها على الحيطه وقلع ليها الطرحه وبقى يهبش في شعرها ورقبتها ولسه بقرب منها اكتر وهي تبكي وهو لسه مستمر لحدي ما عاينت بالجنبه ولقت مزهرية وشالتها وضربتو في راسو من غير ما تحس وهو وقع في الارض وراسو نزف وهي طوالي شالت المفتاح فتحت الباب وجرت وجرت من غير ما تقيف لحدي ما وصلت محطة مواصلات وركبت والناس كلها تعاين في شكلها وهي باكية ومبهدلة وشعرها منكوش وما لابسه طرحه( افتكروها مجنونه) وقعدت وبقت تبكي بصوت عالي والناس كلهم بسألو فيها في شنو وحاصل شنو ويا بنتي مالك ان شاء الله خير بس هي بتبكي وبتبكي لحدي ما وصلت بيتهم والناس قالو ينزلو معاها ولا يودوها المستشفى بس هي نزلت سرعه وم اشتغلت بكلامهم وطوالي خشت البيت وكويس انو ما لقت زول بره بس طوالي خشت غرفتها وقفلتها وبقت تبكي
بتتذكر في وشو وهو يقرب منها وفي لمساتو وريحتو وتبكي اكتر.
مجتبى جو ناس بيتهم ولقو غارق في دمو افتكرو مات بقو يصرخو.
•
•
•
منير كان مختفي اليوم كلو ودينا بتتصل ليه ما برد ليها وبترسل ليه ما برد وما فاتح نت من الصباح وخافت عليه قالت معناها تعب لانو امس كان مصدع ومحموم وطالعه وداخله ومتوتره خايفه عليه لحدي ما رسل ليها مسج مكتوب فيها
(حبيبي معليش لقيت رسايلك ومكالماتك لكن كنت تعبان من الصباح ما قادر اتحرك ولا اتكلم )
- طيب معاك منو ؟
-ما معي زول
-كيف ما معاك زول ؟ طيب شوف واحد من اصحابك يجيك عشان تمشي الدكتور
-لا ما عايز حابقى كويس
-لا ما حتبقى كويس لازم تمشي الدكتور
-ما عايز يا دينا خليني
-منير ما تعمل فيني كدا ياخ اسمع الكلام
-طيب تعاليني انتي انا ما عارف اعمل اي حاجه وما قادر اتحرك حتى
بقت واقفه مسافه بتفكر
-امشي ليه يا ربي ؟
-هو قاعد معاه وما معاه زول اكيد كدا حيتعب لو مافي زول جاه
- امشي ولا لا؟
-هو عايزني اكون جنبو
-ما ممكن اخليهو براه هو قال ما قادر يعمل حاجه
-لكن كيف امشي ليه وهو براه ؟ ما صح كدا؟
-بس برضو ما ممكن اخلي كدا
قررت تمشي مع انها كانت متردده
-طيب حجيك رسل لي اللوكيشن
-الباب بتفتح عادي خشي طوالي لما تجي
-طيب
ومشت لبست سريع سريع وطلعت مشت ليه
هي طلعت بيجاي وأم منير جات خاشه بيتهم بيجاي
لقت أم حسن قاعده وقالت ليها أنا أم منير وأم حسن عاينت ليها بنظره استفزاز لانها زعلانه من العملو ولدها بس برضو قالت ليها اتفضلي خشي
وجات قعدت وقالت ليها خير؟
-(وهي انتبهت لنظراتها)
واتكلمت معاها بنفس طريقتها
-جايه اتكلم معاك في العملو ولدك
-ولدي ؟ انا المفروض اتكلم معاك في العملو ولدك
-(مستغربه) شنو؟
-ولدك جاء اتهجم على حسن وقرب يقتلو لو ما لحقناه في اللحظه الاخيره كان مات
-عندو حق يعمل فيه كدا واكتر كمان
-نعععم ؟ حسن ولدي طلع مصاحب واحد من اسرة كلها عصابه
-لو نحنا عصابه عشان بندافع عن شرف بنتنا يبقى ايوا نحنا كدا
-انتي بتتكلمي عن شنو في شنو اصلا وحسن عمل شنو؟
-(وحكت ليها الموضوع كلو )
وهي مصدومه
-لا انتي اكيد كذابه عايزه تبرري العملو ولدك بس حسن مستحيل يعمل كدا انا عارفاه كويس
وحسن جاء طالع من غرفتو وقال ليها ايوا انا عملت كدا وكلامها كلو صح
أمو مصدومه وم مصدقه السامعاه وفجأة جات واقعه وبحاولو يصحو فيها وأم منير رشتها بمويه ودلكت ليها يدينها وقالت ليه جيب ريحه شممتها ليها وبعد زمن صحت
وهي ما مستوعبه السامعاه حاسه كانها بتحلم
(أم حسن وابوهو كانو بهتمو بيهم هو ودينا اختو وأي حاجه بعملوها ليهم بس كان الدعم بتاعهم مادي فقط ما كانو بقيفو معاهم لما واحد تكون حاصله ليه حاجه
او يعرفو درجاتهم في المدرسه او مشاكلهم مع اصحابهم او احتياجاتهم الخاصه كانو فاكرين انو القروش بس كفايه حاتأمن ليهم اي شي وفاكرين انو كدا خلاص ربوهم تربية صح حسن اختار الطريق الخطأ وما لقى زول يقول ليه كدا غلط فاكر انو مادام في قروش معناها تاني مافي مشكله مع انو دينا اختارت الطريق الصح وما حصل غلطت وهم الاثنين اتربو نفس التربيه وفي نفس البيت بس هي مشت في طريق وهو مشى في طريق تاني)
اتكلم مع أمو ومع أم مآب وانو فعلا غلطان وحايصلح غلطو بإنو يتزوج مآب مع انو عارف انو غلط غلطة كبيره بس هو حايحاول يكون كويس معاها ويعوضها عن اي شي وحيثبت ليهم انو كويس وانو اتغير.
#يتبع
