بعد مرور شهر ،،،
علي،،
ممكن اقول كدا اني رجعت للحياة تاني واني اتولدت من جديد كانت فترة صعبه علي شديد مرات كتيره اتمنيت اني اموت فيها ضعفت وكنت حارجع تاني بس كل مره بتحمل وبتحمل عشان نفسي اولا وعشان أمي وأختي ثانيا وعشان ابوي ربنا يرحمو ، الفتره دي اتعلمت منها حاجات كتيره اتعلمت اني مهما يحصل ما مفروض استغنى عن الناس الجابوني على الدنيا لانهم عايزين مصلحتي ومهما يعملو عشان بحبوني اتعلمت انو الواحد ممكن يكون ب برة صديقك بس ب جوة عدوك واني ما ادي ثقه لأي زول لاني اتخذلت من سوسكا الكنت فاكرو اخوي اتعلمت انو مهما يحصل ما استسلم لنفسي وشهواتي مهما مريت بظروف بس ألجأ ل ربنا هو كفيل انو يصلح كل الاتخرب اتعلمت كتير واكتشفت اني قوي لاني اتحملت كل الفتره الفي مركز التأهيل والحمدلله مرت على خير ،،،
رجعت الحلة ورجعت بيتنا اول ما طلعت مشيت قبر ابوي وشلت الفاتحه وقريت قرآن واتكلمت كتير وقلت حاجات كتيره ليه واعتذرت وبكيت واتمنيت انو يسامحني على اي حاجه يمكن انا لحدي الان ما سامحت نفسي على الحصل بس قاعد احاول اسامحها وان شاء الله بعد وضعي المادي يتصلح شويه حاعمل عمرة لي و لأبوي واعمل بير ماء صدقة ليه مستعد اعمل اي شي وكل شي مادام ما عملت حاجه عشانو وهو في الدنيا ححاول اعمل اي شي عشانو وهو في قبرو مع انو في فرق فرق كبير جدا بس مافي حاجه ممكن ترجع تاني،،،
علاقتي مع أمي وأختي الحمدلله رجعت كويسه لانو مهما يحصل الام بتسامح ولدها بس لسه مع اهلي وناس الحي بحاول اصلح علاقتي معاهم لانهم ما قصرو من أمي وأختي لما انا كنت في السجن ولما دخلت مركز التأهيل
بقيت شغال في ركشة الحاج والحجة شغاله بتعمل كسرة زي ما كانت اول وبتقعد بيها قدام الباب مع اني ما رضيت ليها تشتغل وقلت ليها انا بوفر ليكم كل طلباتكم بس هي رفضت وقالت لازم تساعدني واختي طبعا مع المدرسه
انا بشتغل بالركشة من الصباح والمساء بشتغل في صالون حلاقه في الحي الجنبنا
في يوم كنت راجع بالركشه البيت عشان امشي الصالون ولمحت بنت طالعه من بيتهم لابسه عباية وقفت ساعه أتأمل فيها البنت دي معقوله ساكنه في حلتنا وليه ما حصل شفتها وكانت وين من زمان وطوالي مشيت سألت منها الحجه قالت لي دي رحيق بنت سكينه جارتنا وقلت ليها مافي بنت غير البنت دي حتبقى مرتي
•
•
•
حسن،،،
الفتره دي كلها انا كنت بحاول اني اتغير من كل النواحي وابقى زول كويس واصلح من نفسي الحمدلله انو دينا اختي رجعت معي كويسه وأمي وأبوي كمان نسو الحصل وأم مآب وأبوها برضو سامحوني وعدو الموضوع وصديقي الصدوق منير الحمدلله انو علاقتنا رجعت احسن من اول وبدينا نتغير مع بعض وبدل نمشي نفتش بنات مع بعض بقينا نمشي الجامع مع بعض ونقرا جزء من القرآن مع بعض وانا عمري كلو ما عشت ايام زي الايام دي ولا حسيت اني بعمل في حاجه كويسه غير الايام دي
بكره عرسي من مآب
الفتره الفاتت دي عملنا خطوبة وبدينا نتعرف على بعض من اول وجديد اتفقنا انو ننسى اي شي ونتعرف على بعض من الاول والحاجه دي فادتنا وانا وهي اتغيرنا للاحسن واعتبرنا اي حاجه فاتت عملناها غلط كانت درس نستفيد منو في باقي حياتنا الجايه وفي حاجه حلوه كمان اني بديت احبها ويمكن اول مره في حياتي قلبي يدق لوحده ويا سلام على دقة القلب دي يا سلام
