منير ودينا ،،،
شغاله تبكي قبل ما تعرف اي شي لانها فهمت قصدو
-جايبني هنا ومثلت انك عيان عشان الفي بالك صح ؟
يعني انا في النهايه طلعت في نظرك كدا؟
كان بس همك تنتقم من حسن اخوي ؟
دا السبب المخليك عامل فيها بتحبني وانا الغبيه صدقتك وافتكرت انك كويس وحنيت عليك ووقفت جنبك دا جزاي على العملتو معاك يا منير
انت شايفني زي حسن يعني؟ او ممكن اكون زيو ؟ نحنا اخوان بس انا ما كدا
واصلا من البدايه كنت متردده اني اجي براي لواحد غريب بالنسبه لي وهو ساكن براه
انا مصدومه منك شديد والله ومستغربه انك طلعت كدا ي خساره على أي حاجه عملتها عشانك انا كرهت اخوي بسببك انا حبيتك بالجد يا منير وكنت حابه اعوضك عن العملو اخوي فيك بس انت ما بتستاهل اي حاجه والله بالجد ما بتستاهل
وطلعت طوالي وهو جاري وراها يا دينا دينا اقيفي افهمك عليك الله اقيفي انا حفهمك اي حاجه دينا دينا
بس للاسف ما قدر يلحقها ودموعو جات جاريه وحس بقرف شديد من نفسو انو فكر فكرة زي دي اول مره يحس انو بحب بنت بالجد وبخاف عليها وم عايز يخسرها ومستعد يعمل اي حاجه عشان هي تسمعو وعشان تكون معاه
"لن يتغير شيء منّي.
لن يتوقّف نهر الحبّ عن الجريان.
لن يتوقف نبض القلب عن الخفقان. لن يتوقف حجل الشعر عن الطيران. حين يكون الحب كبيراً.. والمحبوبة قمراً.. لن يتحول هذا الحبّ لحزمة قشّ تأكلها النيران... ليس هنالك شيء يملأ عيني لا الأضواء.. ولا الزينات.."
حسن بتكلم مع أمو بعد أم مآب طلعت منهم
-(وهي لسه مصدومه وما مصدقه وبتبكي) ما قادره اصدق انك عملت كدا يا حسن عمري كلو ما اتوقعت انك ممكن تعمل كدا انا ربيتكم تربية كويسه وانا وابوك ما قصرنا منكم في حاجه في النهايه تطلع كذاب وقليل ادب كمان وتكذب على بنات الناس وعلى اهلهم اسي دينا اختك دي عمرها كلو ما نزلت راسي ولا عملت حاجه تخليني اخجل ما عارفه ابوك حيحصل ليه شنو لما يعرف بالموضوع دا
-(وهو خجلان من نفسو شديد) انا غلطان وعارف اني غلطان واسف والله اسف على اي حاجه واسف لاني وطيت راسك وخليت الناس تتكلم معاك كدا انا غلطان وحصلح غلطتي
وباسها في راسها ويدها
بعدين طلع بره وفكر يتصل على مآب لانو عايز يقول ليها حاجات كتيره بس متردد وقال الا هم يصلو البيت ويتقدمو حتى يتكلم معاها وممكن منير ما يوافق او ابوها وما معروف يحصل شنو بس ف النهايه اتصل
وهي ردت
سلم عليها وخش في الموضوع
-مآب اولا انا اسف عارف اني جريتك للموضوع دا ولعبت براسك وكذبت عليك وعلى ناس بيتكم
-انت ما غلطان يا حسن لاني كنت بكامل عقلي لما عملت كدا وكنت راضيه وانت ما غصبتني على حاجه وما هددتني بس انا كنت ضعيفه واسفه على العملو منير فيك
-لا انا بصراحه بستاهل العملو منير لو ما هو انا ما كنت صحيت على نفسي وما كنت عرفت اني غلطان فكويس انو منير عمل كدا
-بصراحه انا عارفه انك من البدايه فاكرني شنو وفاكر اني ما بنت ناس وبس عايزه قروشك بس يا حسن والله انا ما زي ما انت فاكر فعلا انت عريس لقطه بالنسبه لشغلك وقروشك بس دا معناه اني وافقت عليك عشان كدا
-عارف يا مآب انا فاهمك وانتي ما مضطره تشرحي لي الحاجات دي
-طيب
-ناس البيت عرفو ولا لسه؟
-منير ماما كلمتو بس لسه ما جاء البيت وما قال حاجه وبابا برضو لسه ما عرف
-طيب ممكن لما منير يجي البيت تكلميني عشان اجي اتكلم معاه
-طيب حاضر
-ان شاء الله ربنا يقدم الفيه الخير
-حسن انا ما عايزاك تتزوجني عشان اهلي واهلك ولا عشان ما تحس بالذنب وممكن نحنا نطلق طوالي بعد العرس عشان ناس بيتنا بس مثلا
-لا ما حنطلق وانا اخدت القرار دا بكامل ارادتي وما عشان زول وان شاء الله ححاول اسعدك بقدر ما اقدر
