في غرفة متواضعة جداً بتتكون من سرير ودولاب بنفس اللون ومكتب صغير ملان بالملصقات والادوات المكتبية والدفاتر الملونة جمبو مراية مضيئة وتحتها ادراج عليهم القمر المضئ.
_رفاء يا رفاء رفاااااء .
=خمساية بس .
_مامشكلة قومي وتعالي تاني تمي نومتك.
=شوية شوية بس.
_الصبح ما بنتظرك .
=حاضر يا بوي قمت.
طبعاً صليت الصبح والنومة طارت لي ما عرفت زاتو اعمل شنو النعمل الشاي احسن غايتو ناس البيت ديل حظهم بتهم بت الهناء والسرور ، دخلت المطبخ لقيت امي هناك عملت الشاي بقيت ابحت و افتش في دولاب البهارات قلبتو كلو ومالقيت النسكافي اها انا اسي اعمل شنو .
_امييييييي .
=مالك من الصباح .
_النسكافي وين ؟
=ضروري؟ اسي لو شربتي الشاي دا ساي مع الناس مالو ؟
_يا أمي انتي عارفة ما بحب طعم الحليب ولا ريحتو بحاول اروحهم بالنسكافي.
=قاعد في الرف قدامك لكن مابتشوفي .
_هاتي بوسة ياقميل انت.
خلصت غسيل عدة الشاي وبدت معركة النضافة ناس البيت كلهم اتخارجوا على اشغالهم الا سيادة الأخت ، فجأة اسمع الباب بدق ابتسمت بإنتصار عارفين البجي من الصباح منو ما قصدي الهاملة ريما طبعاً .
_جيتي في وقتك ياعسل.
=صباح الخير.
_صباح النور شربتي الشاي .
=اي شربت لكن الحب القايم فيك دا شنو .
_من زمان بحبك بس انتي ما شغالة بي .
=اممم مهببة شنو .
_ننضف وبرويك.
=كويس يا رفاء انا كل ما اجيك تقعدي تشغليني كدا عندي كلام تاني مع خالتو .
_هاك اشتغلي وانتي ساكتة ، شغل بضمير بالله .
فكتني بالجردل البت السغيلة دي ولا كضبت مسكتو وبقيت اغني يا الله عرس لي البورة قامت بي يالله ماليزيا لو شهر يالله او جدة بالبحر يالله ، متنا بالضحك وقمنا تمينا شغلتنا والمطبخ جاك زول انا ظبط الفول وريما سلطة الدكوة معاها الشطة قالت لي انتي عارفة في حاجة ناقصة وغمزنا لبعض طوالي شلت جزلاني ولفحت العباية اول ما دخلت الدكان فتحت التلاجة انتي يا باغات البارد اقعي فيني واتدردقي خجلت خجل والدكان ملان ناس الجاي يشيل فول والجاي للفتة والجاي للطعمية الزمن زمن فطور طوالي شلت لي كولا وببسي من ورا عشان ما وقعوا الضحايا ديل خلاص بكونوا مسخوا رجعتهم محلاتهم حاسبت وشلت كيسي وانا طالعة قلت ليهو بكري صلح رفك دا ومشيت ، اول ما وصلت ريما قالت لي بعد طلعتي اتذكرت اني عايزة رصيد قلت ليها مامشكلة عندي في الجزلان هي هييي جزلاني وين اخخخخ شكلي نسيتو ما برجع تاني ولا شيء في الحر دا ، دخلنا وتمينا فطورنا وبقينا نتونس ومرة نغني ومرة نقرأ استشارات ومرة نفتح تيك توك ونضحك .
_رفو حبيبتي.
=ماتقولي لي رفو .
_حبيبتي .
=عايزة شنو.
_المساء ارح معاي .
=وين ؟
_العطارة عايزة اجيب زيت عرق السوس .
=يابت بطلي لخبطة .
_ما لخبطة ولا شيء بوريك الفوايد بتاعتو وحعمل بيهو شنو.
=والمقابل؟؟
_ماااادية .
=شنو ياريما ؟؟ قلتي شنو سمعيني.
_مادية لكن ما مشكلة بعزمك .
=اي اتعدلي + عازماني شنو.
_بتعرفي لو مشيتي معاي .
=عارفة مواسيرك لكن المرة دي ماف ليك رحمة .
_طيب طيب .
المغرب كدا طلعنا مشينا العطار ودخلنا البوتيك الجمبو سلمنا على صحبتنا شغالة فيهو وطقينا الونسة لما طردتنا ونحن راجعين وقفت ريما قدام بتاع درداقة شالت لينا تسالي قالت لي هاك وتاني الله يقدرك وتقولي علي ماسورة ، اتلفت يمين شمال ماف زول مسكتها قرصتها قلت ليها دي ياها عيزومتك مقطعاني المشوار دا كلو لي تسالي خلينا نصل البيت ، قالت لي معليش يارفو هو الواصل معاك منو واتفكت مني مسكت حجر جلا منها والتاني جاها في راسها قلت ليها :
_ريما تووووبي .
=مابتوب .
_خااافي.
=ما بكاااف.
وانشرطنا بالضحك في الشارع جات مرا جمبنا شايلة أكياس عاينت لينا بطرف عينا واستغفرت ، جيتها براحة قلت ليها ريما انتي بت اخر زممممن .
وعديناها ماشغلات لما وصلنا دكان بكري ريما انتظرتني برة في عربية واقفة اتكلت فيها وانا دخلت اشيل الجزلان وملاحظة في واحد واقف مديني ضهرو ماطويل وما قصير لكن مايل للطول اكتر لابس قميص بيجي وبنطلون جينز داكن وساعة وجزمة كحلية قريبة للبنطلون انتظرت مساااافة الزول دا واقف ساي وشايل تلفونو قلت انا مالي ومالو عاملة فيها برستيج .
_بكرررري .
=اي.
_شفت جزلاني ؟ اظن الصباح حاسبت ونسيتو عندك .
=لالا ما بتذكر .
_كيف يعني انا عارفة ان هو هنا جيت بيهو ورجعت بدونو.
=خلاص بسأل ليك مصعب (الولد الشغال معاهو).
_تمام .
=ولا اقول ليك....
في اللحظة ديك انا طلعت وسقت ريما وماشين وانا بحكي ليها في مواصفات الولد المع بكري وهي ما فاضل ليها الا تبكي عشان ترجع تشوفو .
_يا آنسة لو سمحتي انتظري دقيقة .
=رفاء في شنو ورانا ارح نجري وااااي سجمنا ارررح .
~ريما انتي عويرة نجري لشنو نشوف الزول عايز شنو اول شيء.
وقفت وريما الخوافة وقفت مني بعيييييد واخدت وضعية الجري .
_ايوا نعم.
=اسف أن خوفتكم.
_مامشكلة ادخل في الموضوع.
=بتاع الدكان قال لي اديك دا .
في اللحظة ديك انا يادوب ركزت على ان دا نفس الولد الفي الدكان ملامحو عشرينية لونو قمحي انفو حاد ومربي دقن خفيف وعيونو واسعة سرحت فيهو للحظات لما سمعت.
_يا آنسة.
=ايوا.
_اتفضلي .
=شكراً ليك .
_العفو.
مشيت على ريما براحة وانا ماسكة الجزلان بيدي الاتنين لقيت عيونها بيطلع منهم قلوب وبتتكلم معاي وانا ما سامعة وفي نص حماسها ووصفها مسكت يدي قالت لي رفاء انتي كويسة ؟؟ قلت ليها ايوا قالت لي متأكدة ؟؟ لان يدك باردة شديد قلت ليها اي اي كويسة قالت لي طيب يلا البيت ومشينا وهي بتتكلم وانا ما سامعة خالص لما وصلنا انا دخلت البيت وهي طلعت بيتهم هم ساكنين فوقنا طوالي .
بعد اسبوع جاتني ريما كالعادة من الصباح اول مافتحت الباب حضنتني وقالت لي رفاء ماااااشفتي الحصل...
writing by R.S .
