بعد تعب اتفكيت منها ومشيت لفحت عبايتي وتلفوني وقفلت البيت وهي لسة تكشف ساي سقتها ومشينا شقتهم بعد صعوبة اقنعتها تمشي تجهز طوالي اتصلت على مروان ساكن جمبنا وبسوق ترحال رد علي بعد مسافة قال لي طلعت لكن برسل ليك اخوي قلت ليهو تمام شوية كدا واتصل رقم غريب ولا رديت عرفتو دا هو قلت لي ريما اتخارجي، قفلنا البيت وطلعنا لقينا واحد كدا قصاري حلبي شعرو افرو وكتييير مركب تقويم لابس ليهو تشيرت مع برمودة وسماعات احساس شهادة عربية كدا سلم علينا قال لي انا رسلني ليكم مروان عاينت ليهو مسافة كدا ماف اي مقارنة بينو وبين مروان المهم طلعنا قعدنا انا وريما نتعازم منو البقعد قدام في النهاية قعدت انا فقال لينا على وين قلت ليهو سوق بحري بقى ماشي ويتونس معانا ويهظر ودمو خفييييف قلت ليهو سبحن الله البشوفك ما يقول اخو مروان قال لي انا ولد خالتو الفترة دي قاعد معاهم لو احتجت لي اي مشوار ومروان مشغول اتصلي علي وملاني رقمو مع ان اخر مكالمة كانت منو هو زاتو قلت ليهو اسجلك بمنو قال لي مهند اتونسنا كدا لما وصلنا السوق قال لي انتظركم ؟ قلت ليهو لالا تقدر تمشي ولما نجي طالعين بتصل عليك قال لي زووولتي (بنفس صوت برهومي) وفحط فااات بقينا انا وريما ميتين بالضحك قلت ليها شايفاهو يكشف ليك ساي قالت لي خليهو دا لو عرف عمري بتجيهو صدمة عاطفية ، ودخلنا السوق طواااالي على زبوني بتاع محل الميك اب قلت لي ريما يلا عزي نفسك وانا لا خليت لاينر حايم لاخليت هايلايت لا قليتر لا فاونديشن لا شدو لا بلاشر لا كونسيلر لا بلاندرات لا اي شئ واشتريت فرش جديدة مع ان حقاتي ما طولوا لكن اشكالهم عجبتني يلا الارواج جربنا كل الدرجات والقلوسات ديل عشقي الأساسي عزلتهم عزيل شوية كدا وسيد المحل يطردنا لان نزلنا ليهو الرفوف دي كلها فوق راسو ، يلا انتهينا من الميك اب طوالي قبلنا على الزيوت و اللوشنات والإسكرابات والشامبوهات والبودي شاور وكل شئ من كل الأنواع بشرة وشعر عزينا روحنا شديييد واظرف حاجة جات بت صغيرونه كدا احساس برلومة استلمناها وريناها اي شئ في المحل والبنفع معاها في الميكب والبشرة عموماً واشترت وطلعت مبسوووووطة اها يلا جينا للحساب وانا اعجبكم راصة الدكان كلو قدامي بكل ثقة ومسكت تلفوني قلت ليهو وريني الحساب وهو ولا صدق مسك الآلة الحاسبة وبدأ بعد مسافة قال لي هاك عاينت للرقم جاتني أزمة مالية وحسيت بالفلس دخل حياتي واستقر سكت مساااافة كدا قلت ليهو احسب تاني قال لي ما مشكلة قام حسب وجاء نفس الرقم هنا بالجد انا شلت هم العدس الحنرجع نفطر بيهو وبقينا انا وريما نعاين لبعض طوالي كشفت كدااا لقيت في حاجات شايلنها مرتين مثلا لوشن الكاكاو انا شايلة واحد وريما شايلة واحد فرجعت واحد منهم طوالي والباقين نفس الحال كدا شوية الحساب خف واستخدمت مهاراتي في الحنك والمفاصلة وريما شغالة ليهو نحن سوقنا ليك البت الجات اسي عندنا فيها عمولة قام ضحك والحمد لله نقص لينا وهو زاتو ولد ظريف ومجامل بشتري منو من زمان وحاجاتو جديدة وسمممممحة قمت طلعت القروش عديتهم وحاسبت وفضل باقي دخلنا محل العطور الجمبو شلنا تراكيب كمييية وكلها متنوعة وادانا اتنين هدايا ونحن طالعين مشينا على ناس الهتش لا خلينا ليفة لا خلينا باندات خمييييينا والباقي اشترينا بيهو سفنجات ولهنا انتهت قصتنا وأعلنت افلاسي ودخلت لي دكان كدا ريما بقت تكشف في العبايات وانا قعدت اتصلت على ابوي رسل لي بي فوري واتصلت على مهند يجينا محل نزلنا قال شوية وبيصل المهم اتخمخمنا بي اكياسنا مشينا ليهو هناك واتأخر شوية ونحن خلاااص الجوعة والسخانة هلكونا ونفسنا قام شوية كدا وصلنا نزل شال مننا الأكياس خلاهم في ضهر العربية ودورها ومشينا كان مشغل موسيقى كدا رايقة ومع برودة المكيف ديك عاينت ورا لقيت ريما راقدة سلطة مهند انتبه ليها وابتسم كدا وطلع لي باقة موية باردة ومندية لكزت ريما ومديتها ليها بدل تشرب شالتها ختتها في جضمها ورقبتها وبقت حاضناها قعدت اضحك فيها وصورتها بعدها قلت لي مهند وقفنا في اي محل اكلو ظابط قال لي امرك يا كابتن اصلاً دا تخصصي يلا جاء بقدام محل شكلو ظابط لكن ملان ناس قال لينا تنزلوا ؟؟ عاينت لشكلي كداااا وريما شكلها مهبطة قلت ليهو لالا بنزل انا بس قال لي ما بحتاج فتح تلفونو ووراني المنيو قال لي اختاري قلت ليهو صحي تخصصك ابتسم لي ونزل من العربية اتكل على الطبلون لكزت ريما قلت ليها اختاري قالت لي اي شيء المهم اكل قلت ليها يعني ما عايزة شيبس ؟ حدرت لي كدا فهمت طوالي ان الوضع خطر وغير قابل للنقاش طوالي ناديت مهند و طلبت سندوتشات ومعاهم ميلك شيك لينا التلاتة اقل من عشرين دقيقة الطلب جاء ومعاهو الباركود حاسبت ومشينا كان ماشي على طريق البيت قلت ليهو لحظة لحظة الحوامة ما اكتملت قال لي تاني وين قلت ليهو انت امشي وانا بوصف ليك الساعة الوقفتو في شارع النيل قلت ليهو بالظبببط هنا يلا صحصحت بي فلانة ديك ونزلنا هو قعد في العربية حاكيتو طوالي وشغالة ليهو يا كبتن يا كبتن طوالي جاني قلت ليهو اقعد سكت كدا وقعد حسيتو مستغرب اديتو اكلو رفض واعتذر طوالي هددتو بي مروان عشان يقبل وهو زاتو ما صدق استلمنا ونسة وضحك وان مستغرب من تعاملنا لان معظم البنات البطلبوا عربات بلقاهم زهجانين ومتنرفزين فيهو وهو يحاكي فيهم وفلانة ديك تاكل وساكتة ساااي تعاين بس بعد خلصنا اكل عم الصمت والهدوء واي واحد استلم تلفونو شوية كدا واحس بالخالة بتقول لينا اتفضلوا يا بناتي.
writing by R.S.
