ولنا لقاء آخر ( قيد الكتابه )

اقتباس

اسيل ( ببكاء هستيري وهي تعدد على اصابعها بانهيار ) : هتفضل غبي ... حاولت معاك كتير حاولت اعالجك حاولت اكسبك حاولت ارضيك انا مبطلتش محاوله انا اتنازلت عن كرامتي وحطتها تحت جزمتي عشانك 

مدحت : اسيل انتي مش قادرة تفهميني 

اسيل : ومبقتش عارفه افهمك انت مريض انت مش عارف انت عاوز ايه اصلا وبتلعب بيا وكأني متسخره ليك وهفضل ادي على طول 

مدحت : اكيد مش بفكر ف كده انت ليه بتقولي كده 

اسيل : انا تعبت ...بجد تعبت انا حرقت اعصابي بما فيه الكفايه انا زعلت بما فيه الكفايه انا اديت مشاعر حب بما فيه الكفايه انت استهلكتني انا مش هقدر احب تاني ...لا انت ولا غيرك 

مدحت : برضوا بتحكمي غلط انتي مش قادرة تفكري 

اسيل : افكر ف ايه يا مدحت !! افكر ف ايه تاني افكر ازاي هنت نفسي ؟ افكر ازاي عشمت نفسي بوعود كدابه ..افكر ازاي كنت بتحمل وبحاول اني مخسركش ... قول لي مين زيي يقبل ال قبلته ( ثم تابعت بصراخ ) : قولي مين تقبل على نفسها ال انا قبلته

مدحت : انا مقدر تضحيتك دي والله

اسيل ( وهي تنتحب بشده ) : انت مش مقدر حاجه .. انت مش مقدر نفسك حتى عشان تقدرني انا 

مدحت : خلاص متعيطيش انا مستاهلش دموعك دي 

اسيل : ياريتني اقدر اقولها واقولك انك فعلا متستهلش... بس مصيري ف يوم هقدر مصيري ف يوم هعرف اتخطاك وانساك للابد وساعتها مش هتلاقيني ببعد بالعكس هتلاقيني قريبه برضوا بس مش عشان بحبك ..لا عشان تتعذب بقربي يا مدحت عشان لما الغمامه تتشال من على عنيك تندم وندمك يزيد كل ما تشوفني 

مدحت : انا هريحك مني خالص يا اسيل وهسافر وابعد 

اسيل : ابعد ... ابعد خلاص انت بعدت فعلا انت بعدت ومش هتقرب تاني انت ال عملت كده ف نفسك وفيا 

مدحت : انا مقصدتش ابدا اني اجرحك انا كاره نفسي بجد ومش طايقها 

اسيل ( وهي تنظر له بنظرة  ساخره حزينه ) : لا وعلى ايه تكره نفسك انت عندك حق برضو انا ال مهزقه وانا ال بطلب ال مش ليا 

مدحت : انتي غاليه اوي عندي بجد 

اسيل : دي مكانه جديده طلعت  ملهاش معنى ... مش فارقه غاليه ولا ..ولا رخيصه ... انتهى 

مدحت :  عمرك ما كنتي رخيصه ومتقوليش كده تاني انا بجد مش قادر اعرف انا بحس ايه ناحيتك كان ممكن لو ادتيني شوية وقت اجاوبك 

اسيل : اسفه... طاقتي خلصت خلاص قدرتي على التحمل انتهت 

مدحت : انا ..

اسيل ( بمحاولة التماسك ) : متقولش حاجه خلصت وكان لازم يبقى ليها قفله وانا راضيه بالنهايه 

مدحت : براحتك يا اسيل انتي حره 

اسيل : مبقاش ليا راحه ..وانا فعلا حره كان لازم من الاول مفكرش استغنى عن الحريه دي عشان حد 

مدحت : انا اسف ليكي بجد انا مش هوريكي وشي تاني 

اسيل :  تبقى بتعاقب نفسك مش بتريحني ... لأن انا اوعدك اني هعمل كل ال اقدر عليه عشان امسح حبك من قلبي ...انا متكسرتش ف حياتي قد كسرتي النهارده وانت السبب .

مدحت : انا اسف يا اسيل ... حقك عليا معلش

 اسيل ( وهي تمسح دموعها بيديها ) : خليها لنفسك انا مش محتاجه مواساه انا بعرف اراضي نفسي 

( تركته وذهبت بعيدا وهي تحاول كبح دموعها بشده وتركته يقف مكانه ينظر في اثرها بمشاعر مختلطه لم يستطع فهمها ابدا ولاكن ما الفائده الان فقد كانت فرصه وهو من خسرها ...لاكن ايمكن ان يكون هناك لقاء آخر ؟؟! )

🔆🔆🔆🔆🔆🔆🔆🔆🔆🔆🔆🔆🔆🔆🔆🔆

رأيكم ف الاقتباس يهمني اكملها ولا لا ؟؟

رواية ولنا لقاء آخر ....🖤

بقلمي : منه هاني ..