اشترينا البيت ده أنا و مراتي من حوالي 5 سنين ، بيت كبير ، دورين علي مساحه واسعه ، جنينه اماميه و جنينه خلفيه ، و قبو واسع فيه مساحه كبيرة لتخزين النبيذ ، وجهة نظري كانت ان احنا فَرْدِين بس فمش محتاجين مخزن نبيذ ولا محتاجين القبو الكبير ده في حاجه
.
من حوالي شهر اقترحت علي مراتي أننا ننضف القبو و نفضّيه و نستغل المساحه الكبيرة دي في حاجه لها لازمه بدل ما هو مقفول ، نعمله جيم صغير او صاله العاب أو حتي سينما صغيرة نقضي فيها وقتنا سوي ، نزلنا أنا و هي و بدأنا فعلا ننضّفه
نضّفنا الارضيه لكن حيطان القبو كانت مِتْغَطِيَه كلها بورق حائط لونه اصفر و قديم و شكله بشع جدا ، بصّينا لبعض و بعدين بدأنا نشيل الورق من علي الحيطان ، و ... و لقينا باب !!
.
باب خشب داخل لجوة زي ما يكون محفور في الحيطه ، متغطي تماما من ورق الحائط بطريقه مخلياه مش باين ، حتي اكرة الباب متشاله علشان متبانش ، حسيت بحماس مش طبيعي خصوصًا أن أنا اللي اكتشفته ، بصيت لمراتي و علي وجهي ابتسامه كبيرة من شده الحماس
في البدايه فكرت الباب ده باب ممر سري بيوصل بين بيتي و البيت اللي جنبي ، كنت عاوز اكلم جاري في الموضوع ده و لو فعلا ده ممر بين البيتين كنت هقفله لاني مش برتاح لفكرة ان حد يقدر يدخل بيتي و أنا مش عارف و اعتقد أنه مكانش هيمانع حاجه زي كده !
.
مكان اكرة الباب اللي اتشالت فيه فتحه ، مراتي حاولت تبص منها عشان تشوف ايه اللي ورا الباب ، الدنيا ضلمه جدا و الضلمه مسيطرة علي الموضوع فتحت كشاف الموبايل بتاعها و نورت بيه و بصت تاني ، رجعت لورا و هي بتقولي بقلق إن ده مش ممر سري بين البيتين ، صممت اني لازم ابص بنفسي ، اللي شفته كان سلم حجري منحوت نازل لتحت ، ده مش ممكن يكون ممر خالص ، الباب ده وراه سر
جبت كشاف كبير و فتحت الباب ، بمعني اصح كسرته و نزلت اشوف السر اللي ورا الباب ده
و ياريتني ما نزلت !
.
نزلت السلم ببطء ، الهوا كان مكتوم و السلم مش مظبوط ، الكشاف بيترعش في ايدي و أنا بنزل ببطء السلم مكانش طويل و اخره و قدام نور الكشاف باب تاني خشب قديم مقفول بسلسله !
.
مراتي قالتلي انها هتروح لجارنا تشوف الموضوع ده ايه و لو هو كمان عنده باب سري في القبو بتاعه ، مسكت القفل بإيدي و حاولت أشده ، القفل كان قديم لدرجه انه اتفتح في ايدي علي طول !
فكيت السلسله و فتحت الباب ببطء و دخلت الاوضه الصغيرة اللي ورا الباب ، الباب ده كان المدخل و المخرج الوحيد للاوضه ، مشيت بالكشاف جوا الاوضه
و فجأه وقفت !
جسمي اترعش ، جسمي كان بيتنفض ، ايدي اترعشت لدرجه اني مقدرتش اسيطر علي الكشاف !
قدام عيني و في ركن من أركان الأوضه كان واقف راجل قصير لابس اسود ، باصص في الأرض و مش بيتحرك ، باصص لركن الاوضه كإنه متعاقب ... شكله كان مرعب اوي
كنت مفكر أنه تمثال أو مانيكان ... لحد ما اتحرك !
.
ببطء شديد رفع رجل من رجليه و بدأ يرجع بيها لورا ، ببطء كإن جسمه متصلب من قله الحركه ، بطء مخيف ... مرعب
جسمي كله اتشل من الخوف ، مكنتش قادر اتحرك ، كنت براقبه و هو بيحرك رجله لورا في الهوا ببطء لحد ما حطها علي الارض ، جسمه كان متشنج و هو بيتحرك بطريقه غريبه اوي
حط رجله علي الارض و ثبت لدقيقه تقريباً ، جسمه بيترعش و جسمي مشلول من الخوف ، بعد شويه رفع رجله التانيه ، بنفس الطريقه و بنفس البطء
كنت حاسس ان الدنيا بتلف بيا ، جسمه متشنج و بيتحرك بطريقه غريبه زي ما يكون ناسي الحركه !
حط رجله التانيه عل الأرض
كده كان رجع خطوة لورا
صوت ضحكه شريرة خرجت منه لثانيه و هنا فقت من الصدمه ، حسيت بالخوف بيجتاح جسمي كله ، بدأ فجاه يتحرك بسرعة ، كان بيجري لورا و ضهره ليا بسرعه مخيفه ، مفيش حد يقدر يجري بالتشنج ده السرعه دي ، ضحكته كانت بتخلي قلبي يترعش من الخوف ، جريت !
.
قفلت الباب ورايا بسرعه بس من غير السلسله و جريت علي السلم ، قفلت الباب التاني (اللي قفله مكسور) و طلعت برا القبو خالص و قفلت بابه هو كمان ورايا ، سمعت صوت الخطوات التقيله طالعه السلم و صوت الباب السري بيتفتح ، قفلت باب القبو كويس و أنا سامع صوت الضحك المجنون المخيف بتاعه بيقرب ، خرجت من البيت ولقيت مراتي بتكلم جاري ، جريت عليهم ، طلعت تليفوني من جيبي و كلمت 911 و حكيتلهم كل حاجه !
.
ملقوش اي حد في البيت ، باب القبو كان مكسور و باب البيت الخلفي كان مفتوح ، خطوات مقلوبه ماشيه لحد نص الحديقه الخلفيه قبل ما تتقطع تماما و كإن صاحب الخطوات اختفي !
نزلوا للاوضه اللي تحت لقو علي الباب مكتوب حاجه زي تعاويذ أنا مكنتش شايفها ، جوا الاوضه الحيطان كانت مليانه رموز محفورة عليها بلغه لحد دلوقت محناش عارفينها خالص !
.
الشيء اللي جوا ا كان محبوس لسبب و أنا حررته !
أنا خايف جدا ... أنا حاسس أنه هيرجع تاني عشاني !
.
.
.
شرح القصه :
بصراحه وصفه للشيء اللي لقاه و كونه محبوس من فتره كبيرة ... علي الاقل هو شاري البيت من 5 سنين ... كون الشيء ده محبوس لمدة 5 سنين بدون اكل ولا شرب ... وصفه لطريقه حركته و ضحكه ، التعاويذ اللي علي الباب و الكتابه اللي علي الحيطان أنا مش عارفه ده ايه بس والله فعلا من الحاجات اللي قلقتني ... أنا مقتنع أنا المرة دي إن ده كيان شرير و بطريقة ما حد حبسه هنا و لما الراجل ده فتح الباب قدر يخرج ... الله اعلم ايه ده بس هو فعلا مخيف
.
#قصص_لمحبين_الرعب
#قصص_رعب
#حدث_بالفعل
#قصص_حقيقيه_حول_العالم
.
