كنت في بدايه العشرينات من عمري سافرت اليابان في منحه دراسيه تابعه الكليه بتاعتي ، كنت متخصص في دراسه السياحه عشان كده كان جزء من المنحه أننا نسافر 6 دول مختلفه في 5 شهور متتاليه ، اليابان كانت الرحله التانيه خلال تاني شهر
و كان ليا ذكريات كتير في اليابان بتمني لو اقدر انساها
.
في يوم خرجت عشان اتعشي مع مجموعه من اصدقائي في مطعم حلو بيعمل سوشي محلي ممتاز ، و بعدها رحنا بار مشهور عشان نشرب شويه مشروبات يابانيه زي الساكي و غيره ، بعد شويه الحوار تحول و اخد مجري غريب شويه
كان معانا صديق مهتم جدا بالارواح و الاشباح و الماورائيات اسمه جاستين ، كان بيحكلينا عن لعبه مشهورة في اليابان اسمها هيتوري كاكورينبو أو استغمايه الرجل الواحد ، قالنا أن الناس مختلفين بخصوص اللعبه دي ما بين أنها أسطورة تراثيه مش حقيقيه و ما بين أنها حقيقه تماما ولا مجال للشك فيها
من شروط اللعبه انك تاخد دب أو لعبه و تفرغها من الحشو بتاعها و نحشيها رز ني و نخيطها بخيط احمر بيرمز للاوعيه الدمويه ، بعدها بنملا حوض الاستحمام ميه و بنبدا طقوس اللعبه جوا حوض الاستحمام ، و بمجرد الانتهاء من الطقوس الخاصه باللعبه بنرمي الدب جوا الميه و بكدا بتبتدي اللعبه
من شروط اللعبه انها لازم تبدأ الساعه 3 بعد منتصف الليل و بتنتهي بطريقه من 2 :-
اول طريقه:-
اننا نقول كلام خاص بإنهاء اللعبه
تاني طريقه:-
اننا نستني ضوء الشمس
لما جاستين خلص كلامه الصمت سيطر علي المكان شويه ، بعدين كلنا انفجرنا من الضحك ، كلام جاستين و شروط اللعبه كانت مضحكه و خياليه جدا ، كان باين اوي أن جاستين بيحاول يخوفنا مش اكتر ، لكن انا لاحظت الخوف اللي كان في عينين جاستين و هو بيتكلم ، كان خوف حقيقي ... خوف خام !
و بسرعه غيرنا الموضوع و بدأنا نتكلم عن دراستنا و منحتنا الدراسيه مرة تانيه و نسينا كل حاجه بخصوص اللعبه
.
لما خلصنا و رجعت البيت كانت اللعبه و تفاصيلها مسيطرة سيطرة تامه علي تفكيري ، نمت في السرير بعد ما حطيت أكل للكلب بتاعي و التفكير في الموضوع دا كان مسيطر عليا ، برغم عرابه اللعبه و شروطها الخياليه اللا أن قلبي بيقول أنها لعبه حقيقيه 100% ، كمان خوف جاستين و هو بيتكلم اكدلي الموضوع دا
قررت اقطع الشك باليقين و اما اني اثبت ان كلام جاستين و خوفه كانوا حقيقيين أو اني اثبت لنفسي أن جاستين مجرد كداب مش اكتر كداب ... قررت العب !
جبت دب قديم من عندي و قطعت رأسه و فرغته من الحشو بتاعه ، رحت المطبخ و حشيته كله رز ني و بعدها خيطت رأسه مرة تانيه بخيط احمر زي ما شروط اللعبه بتقول ، قفلت انوار الشقه بالكامل و مشيت وسط الظلام بتحسس طريقي عشان اوصل للحمام ، لما وصلت مليت حوض الاستحمام مياه و وقفت جواه ، الساعه كانت 3 بعد منتصف الليل
قلت التعويذه الخاصه بيدايه اللعبه بصوت واطي هامس ، و بعدها رميت الدب في المياه و شفته من خلال ضوء القمر اللي داخل من الشباك و هو بيغرق في المياه بدون اي حركه ، بس شعور غريب بالخوف و عدم الارتياح كان مسيطر عليا ، قررت انهي اللعبه دي بطريقتي ، خرجت اجري من الحمام وسط الظلام لحد ما وصلت للمطبخ ، اخدت سكين تقطيع اللحم الكبيرة و جريت تاني ناحيه الحمام
فتحت باب الحمام و صرخت بتوتر «انا لقيتك»
شروط اللعبه بتقول كدا لكن اللي شروط اللعبه مقالتهوش هو أن الحمام كان سخن جدا لدرجه اني شهقت اول ما دخلته ، جريت ناحيه الميه اللي كانت سخنه لدرجه غريبه و خرجت الدب و انا بقول بتوتر للمرة التانية «انا لقيتك»
طعنته 15 طعنه بالسكينه لدرجه ان الرز بدا يخرج برا و الدب بدأ يفضي
كدا الجزء الاول من اللعبه انتهي و انا اللي فزت ... بس باقي الجزء التاني ... الاصعب منه بمراحل !
.
.
.
* هنوقف لحد هنا و هكتب الجزء التاني بس الله اعلم امتي هينزل ممكن بعد تلات أيام
* احنا وصلنا سنه «2024» و انا فرحانه كتير و كل عام و انتم بالف خير و بصحه يارب 🦋🌸✨🌼
