من متشردة إلى زوجة الغني الوسيم ☺️❤️‍🔥

Part2

مو منين جات بقات غيييييير كتشوف فينا... حمزة طلق مني و أنا بعدت منو و بقيت كنخنزر فيه شوية قالت عمتي: اويلي.... اويلي نتوما اش كتديرو..؟
أنا: هانتي كتشوفي ا عمتي ... أنا كنت كنشقا حتى جا ولدك و مد يدو عليا...
حمزة ما قال والو بقا ساكت و كيشوف فأمو بحال زعما راني ظالماه...
عمتي مليكة ضربات فخاذها و قالت: اويييييلي على لعب الدراري!! معزولين بوحدكم فهاد الليل....و ا نتوما دويو اش كنتو كتديرو هنا بجوج فهد الوقت؟؟؟
حمزة: الواليدة... يك انا ولدك الكبير.... واش ولدك يدير هادشي لي قالت !!
عمتي ما قالت والو بقات غير كتشوف شوية هي تدور ليا أنا: ادوي... دوي يا بنت الحرام! (شداتني من ذراعي) أنا مدخلاك لداري و ساتراك و موكلاك و مشرباك و فاللخر باغية تخرجي ليا على الولد؟؟! ا دوي يا الغداااارة... هادي فعايلك!!!
انا: اويلي ا عمتي واش انا كنقول ليك مد يدو عليا و قال لي قال.... و قاس لي قاس و دورتيها ليا أنا!؟
مليكة: و هو سبحااااان الله غير جا و حط يدو عليك... و نتي لي نهار و ماطال و نتي كتساراي علينا و ڨاع دكشي لي عطاك الله باغية تبينيييه بزز .... و غي كتدوّري فدوك العينين و داك الفم .... (شوية شافت فولدها و قالت) يلاه دوز حتى نتا لبيتك هلي لهدرة تبقا بيني و بين هاد ال.... هاد الفاسدة!! يلاه سيرر.
حمزة مشا لبيتو و أنا بقيت تما مع عمتيي....
مليكة: دوي ها.... (ضرباتني لترمتي) دوي يا لقحبة... باغة تخرجي على الدري... حيت بان ليك تبارك الله زوين و بعقلو و خدمتو و الطوموبيل...بغيتي تدوري بيه... بالحق غير تهناي دكشي لي عمرك توصلي ليه يا الغداااااارة....
أنا: انا غدارة ا عمتي ياااك.... و كون كنت انا لي كندور بيه ݣعما تسمعيني اصلا غوتت.. كون مشيت معاه لبيتو و ميسمعنا حد!!!! ولكن نتوما لي باغين نديرو فيا لعيب حيت مكتحملونيييييش ما دايزااااش ليكم...!!
مليكة: و آش فيك ما يتحمل يا القحبة... باغية تديري لينا الحرام فالعائلة هادي فعايلك يا بنت الحرام!! بالحق راهم كيقولوووها: "قلب القدرة على فمها البنت تشبه امها"....
أنا: و مال ماما كي جاتك... الله يرحمها، أحسن منك و أشرف منك و من ديك بنتك لي فرحانة بيها!!
مليكة: ايهايهايهاااي وليتي ترادي معايا فالهدرة... ها ولا قد القب قد السطل....
أنا: ا عمتي راه والله ما درت شي حاجة علاش كتعايريني دابا فشرفي....!!؟؟!
مليكة: ايوا شنو ... نقولو راك مظلووومة مسكيينة... وا الولد شاف لي شاف و ما بقاش قاد يصبر .... راه نتي لي خاصك تستري راسك و تحشمي شويا!!!
أنا: و مالني شنو درت... مقزبة و لا عريانة... لابسة بحال البنات... و زيدون دكشي لي كتلبسو خولة راني كنلبسوو ا شنو الفرق..... اااااه...او لا حيت بنتك تبارك الله الجلدة على لعظم ما عندها ما تعري و ما تغطي...دكشي علاش مكتحملنييييش لا هي لا نتي براااسك!
مليكة: سكتي، سكتي.... سكتي يا لقحبة.... كتدوري بسيادك... و كتعايري لالياتك! و دابا كون ما حصلتكش مع ولدي .... كون غدا نلقاك في فراشي تحت راجلي.... ادويييي
أنا: ياك ا عمتي تشكي فيا نديييرها!!!؟
مليكة: نشك فيك و نخاااف منك... حيت بحالك هوما لي كيخربو الديور.... سمعيييييني دابا و خلي ودنيك بلا هدرة كثيرة.... غتجمعي حوايجك و الباب وسع من كتافك منلقاش فالصباح هنا كتسمعيييي!!؟ عطا الله الخدامات بنات ديورهوم و مكيهزوش العين... نتي قحبة بنت الحرام دارك هي الزنقة....
أنا: عمتي كتجري عليا!! كتجري عليا و زعما خوك الله يرحمو موصيك عليا!! .... ما خفتيش تطرا فيا شي حاجة و لا يتكرفسو عليا ايلا خرجت براااا!!! را ما عندي حد ا عمتي....
مليكة: سيري لوحي راسك و لا شوفي شنو ديري... المهم انا دااااري ما تعاوديش تحطي رجلك فيها و لا حسابك ديك الساعة غيكون ثقييييل!!!
أنا يلاه بغيت ندوي و هي تحبسني و دفعاتني و جراتني من شعري حتى للبيت فين كنعس و جبدات ليا واحد الصاك لاحتو عليا باش نجمع فيه حوايجي...
أنا من مورا ديك التجرجيرة لي دارت ليا صافي مبقيت قلت ليها والو بديت كنجمع حوايجي و كنبكي حيت عاااارفة شنو كيتسناني براا.... التشرد و الجوع و الضياااااع ....
ايوا كنجمع حوايجي و كنخبطهم فالصاك حيت معصبة و هي كتنݣر عليا شوية عاودات صرفقاتني فترمتي و قالت ليا: يلاه هاد الترمة لي فرحانة بيها و كتعوجي علينا بيها و طالقاها جمعيها و خرجي درقي وجهك راه كلشي عارفك اش كتسواي !!!!
أنا ما قلت والو و فاش جمعت الصاك حطيتو حدا الناموسية و نعست و هي خرجات من البيت و خلاتني...
و فالصباح ماااا عندي ماندير من غير أنني نهز الصاك و نخرج للزنقة.... خرجاتني على الريق بلا فطور.... شعري ما عرفتش حتى كيفاش جمعتو.... لبست غير واحد الجلابة كحلة عندي هادي شي 3سنين ولات كتجيني صغيرة ڨاع مزيرة و قصيرة سيقاني كلهم كتبينهم صافي هزيت حويجاتي و خرجت للزنقة.... تمااا عرفت الأهمية ديل العائلة و ديل الوالدين.... ها هوما مشاو بجوج و خلاوني بوحدي مني للزناقي!!!!
سيماااااانة و أنا غير غادية فينما كنوقف و يوصل الليل كنبات..... الماكلة غيييير كنعكل لي لقيتها ناكلها و كاين شي ناس كيحنو عليا و يشريو ليا ناكل... و فاش كنفيق مرا نلقا شي مسخ مليوح عليا... مرا نلقا شي جماعة ناعسين حدايا و .. صراااااحة داااااازت عليا... ذنوبي كلهم خلصتهم هدوك الأياااام ...
و فواحد النهار مع وقيتة ديل العصر لي كان آخر نهار ليا تما لقيت راسي بلااااما نعقل فواحد الشارع كالم و نقي واعر فيه غير الڤيلات و الديور الكبار و قدام كل دار حديدة فشكل!! كاين السقيييل و مكيتسمع حتى صوت من غير تنخسيس ديالي أنا... شوية حسيت براسي ضرني مع قلة الماكلة و مكنعسش مزيان فجلست جنب واحد الڤيلا بابها كبييير و منقوش ديال العود، بقيت جالسة و صاكي قدامي على فخادي شوية كنسمع صوت ديل شي طوموبيل جاية... شوية كانت غتخرج فيا... أنا نضت بالزربة!
هو ينزل من ديك mercedes كحلة واحد الراجل طويل و عريض لابس بذلة فالأسود باين هو شيفور ديل مول الدار، هو يجرني من يدي و قال ليا: يلاه حيدي من هنا... شنو جابك لهاد الدار... يا ربي السلامة كثرتو... يلاه منبغيش نشم ريحتك فهاد الشارع غبري من قدامي!!! مزيان تبارك الله!
أنا ما قلت والو ديك الساعة هزيت صاكي و شداتني البكية و بقيت غادية بشويا مكنقدش نزيد من كثرة الجوووع لي فيا! حتى كنسمعو عيط ليا عاوتاني و قال: أجي .... اجي!!!
أنا درت لقيت هذاك الراجل كيشير ليا و رجعت لعندو فين كنت.... و أنا جاية كيبان ليا راجل آخر نزل من اللور كان لابس قميجة بيضة و تجين فالأزرق زوين و داير نضاضر كحلين ديل الشمس..
فاش وصلت لعندهم هداك الراجل حيد النضاضر و شاف فيا و قال: سلام ابنتي!
أنا: س....سلام! (و عيني فالأرض..)
هو: شنو كتديري هنا ابنتي؟ ...... بعدا... شنو سميتك!
أنا: نورة!
هو: نورة!..... وجهك مااااشي ديل الزنقة... اش خرجك من داركم؟؟!!!
أنا: وا غير الدنيا اسيدي!! راك عارف! مرة ليك و مرة عليك...
هو: (ابتسم و مد يدو ليا) أنا سميتي عثمان! عثمان العمراني ..
أنا (سلمت عليه) متشرفين اسي عثمان!
ابتسم ليا و دار عند شيفور ديالو و قال: شوف ا جلال ها السوارت... دي الطوموبيل للاڨاج، و من بعد رجعها هنا حيت غنبغي نخرج!
جلال: واخا هي اللولة اسي عثمان!
أنا بقيت ساكتة و كنشوف فيهم حسيت بالحشماااااا معرفتش و أنا واقفة قدام ناس نقيين و أنا حالتي هكاك حااااالة!.....
جلال هز الطوموبيل و مشا.. من بعد دار لعندي عثمان و قال ليا: ايوا ما قلتيش ليا شحال و نتي دابا برا؟
أنا: (تنهدت) سيماااانة سيييماااااانة هادي و أنا مشردة فالزناقي... من زنقة لزنقة و شارع يلوحني لشارع!! حتى الماكلة.. الماكلة هي اللخرة وليت كناكل مرة وحدة فالنهار كامل!! (تنهدت) اااااااهح! بالحق الله ياخذ الحق فلّي كان سبب!
ابتسم مرة أخرى و حط يدو على كتفي و خدا من عندي الصاك هزو و قال ليا: مديريش فبالك كلشي كيفووت بلاما تقلقي راسك! يلاه دابا..... أجي معايا!
أنا بعدت منو و عقدت حجباني و قلت: فييين!؟
عثمان: (بتعجب) ههه معندك مناااش تخافي غير أجي! .... أنا.... غير بغيت نعطيك تاكلي...باينة غيكون فيك الجوع ياك!!؟؟
أنا: اويلي راه مسارني كيتقطعو من البارح ما طاحت ليا النعمة فكرشي!!!
عثمان: هههه فهاد الكريشة هادي!؟ ايوا يلاه نعمروها! صافي أجي معايا! .... أجي غير كولي و سيري ايلا بغيتي!!
أنا: و.... بالصح!؟
عثمان: اه.
أنا صافي دك الساعة ماكنت كنفكر فوالو من غير الماكلة... لدرجة كنت كنبكيي بكثرة ما ضرني الجوووع!!!
صافي مشيت معاه و بقا هاز عليا الصاك حتى دخلنا
حل الباب و... بشااااااااااخ كيدايرة ديك الڤيلا.. ها لاپيسين قداش! ها الجردة تبارك الله يجري فيها الخيل! وا غييير الباب بوحدو بقيت حالة فيه فمي هههه..
بلاتي بلاتي.... خليني نوصف ليكم هد سي عثمان: ﴿هو طويل بالطبع أطول مني ما غليض ما رقيق عاااادي ولكن لاطاي ديالو زوينة مقادة و عينيه زرقين... و هو راجل كبير فالعمر يكون هكاك عندو شي 50 عام و لا أكثر، و صراااحة حسيت بيه ضريف و حنيييين هه﴾
فاش دخلنا للدار لداخل أنا بقيت بحال شي دري صغير غير تابعاه هو حيت ما عارفاش فين غنمشي...
عيط للخدامة 'مريم' هي اللي دات ليا الصاك ديالي طلعاتو لفوق و قاليها تديني معاها للكوزينة تعطيني ناكل!
و هو بقا جالس فواحد الصالة تما زويييينة و فراشها عصري!
أنا منين دخلت مع مريم للكوزينة تفاجأت أنها ما قالت ليا والو، تصرفات بحال كتعرفني... كتطبق الأوامر ديل عثمان بواحد الطريقة رهيييبة! حطات ليا الماكلة لي كانت عبارة عن: بيض مسلوق و واحد طبسيل ديل الدجاج كيشهييي و طبسيل آخر فيه اللحم و واحد الكيكة ديل الشكلااااااط غير شفتها سالو ريووگي! و عاد الفواااكه لي مشكليييين!!
ايوا اش غنقول ليكمممم!! حنيت راسي و بقيت كنخشي فوجهي نخشي فوجهي نخشييي حتى سخفت!!! و عاد هي مزال جابت ليا العصير و شلاضة كليتهم حتى هما حتى حسيت بكرشي عمراات و شبعت الحمد لله... صافي فاش ساليت نضت غسلت يدي و فمي و مسحت و خرجت من الكوزينة!
غير شافني عثمان قفز و جا عندي قال : شبعتييي!! ايوا بالصحة! (قرصني من حنيكاتي ) شو شو الدم كي رجع ليك فوجهك تبارك الله!
أنا: الحمد لله شبعت مزيااان ☺️ ... الله يخلف عليك اسيدي!!
(10 ثواني تقريبا من الصمت)
عثمان: اشنو دابا زعما! ههه ناوية تمشي!
أنا (مخلوعة شوي) ا... اه، صافي كملت الماكلة!
عثمان: و فين غتمشي زعما!
أنا: غنمشي ن..... ندبر على راسي.... اش عند زهري العووج ما ندير!!!
عثمان: ههه لا! لا! ما غتمشي فين!..... هنا ان شاء الله غتبقاي حتى تعاودي توقفي على رجليك ان شاء الله!
أنا: اويلي ا سيدي على نبقا هنا! زعما بصفتي شكون؟؟
عثمان: عاااادي! انا بغيت نتعاون معاك فيها شي عيب!
أنا : وا...... مفيهاش العيب من واحد الجهة، جهة أخرى.... را ميمكنش تدخل بنت لدارك ماشي حرام! و انا ما بنتك ما خدامة هنا ما كنجيك حتى حاجة....
عثمان (بقا كيشوف فيا و قرب لودني و قال و هو كيهمس) ولكن تقدري تولي.....
أنا (الصمت+صدمة....)
شوية خلاني تما و مشا للكوزينة عند مريم و عاود رجع عندي و جرني معاه لهاديك الصالة.... أنا تخلطو فيا ڨاع الأحاسيس الفرحة و الخلعة و الشبعة و الحشمة كلشيييي هههه!
منين جلسنا قال ليا: ها هي مريم غتجيب ليك واحد كويس ديل أتاي تقادي بيه راسك!!
أنا: أتاي؟؟ ا..... اه ..... واخا!
عثمان: ايوا دابا غتعاودي ليا شنو طرا ليك.... و اش مخليك خارجة للزنقة سيمانة على قدها!!!
أنا تنهدت بعمققق!!!! و قلت: خلييييها على الله و صافي! أنا بنت قراااية باغية نقرااا و كنقرا مزيان ديما كنت اللولة فقسمي.. و... يتيمة ميت ليا با و حتى مي و ما عندي لا خوت لا خواتات لا على من نحط الراس! من غير واحد عمتي اسمها مليكة...
وصاها با الله يرحمو عليا و من نهار مات و أنا ساكنة معاها!
عندها بنت و جوج ولاد... بنتهاااا هادييك خولة مكتحملنييييش مكنتصرطش ليهاااا كتغييير مني! و ولادها بجوج... نهار كاااامل و هوما مجبديييين حاضييني خصوووصا واحد فيهم و هو لي سباااابي!
عثمان: كيفاش سبابك! وااش....... دار ليك شي حاجة؟ ضحك عليك؟؟؟
أنا: ضحك عليا! كااااان باغي يضحك عليا! بالحق والله لا حلم بيها و لا كانت ليه... واحد اللييلة شدني فالكوزينة بغا يـ....... يقضي غرضو! و منين أنا كنت كنحبسو و ما خليتوش يقيسني مو لي هي عمتي سمعات غواتنا و ناضت لعندنا! ايوا منين لقاتنا هكاك يسحاب ليها أنا باغية ندور ليها بولدها و حتى براجلهااا و شكات فيا و جرات عليا، زعما راني باغية نخرب ليها دارها!
ايوا من تما و أنا فالزنقة حتى حن عليا ربي و لقيتيني.... بعدا عتقتيني سير الله يعتقك من النار!!!
عثمان: آميين! ...... ههه وا راه هاااااااز هداك القليب ا نورة!
أنا: هو غير هاااز.... راه هاز و متقل حتى تقطعععع! ههه غير صابرة ...
عثمان: شحال فعمرك ا نورة...
أنا: 19 عام هههه.... و لكن قرب عيد ميلادي... قربت ندخل لعشرين عاااام!
عثمان: فرحااانة ليها هههه.... بطولة العمر ان شاء الله! ولكن صراااحة كتبان فيك 20 عام من دابا!
أنا: هههه... وا... غير شوية و صافي!
عثمان: لا لا تباااااارك الله ما شاء الله عليك....
أنا: و نتا.... شحال عندك من عام!!
عثمان: أنا فعمري 59 سنة ..
أنا: مممم مزيان! كون دابا الوليدات حتى هما غيكونو كبروووو تبارك الله..
عثمان: الوليدات؟!! ههه... أنا معنديش الولاد...
أنا: اه... سمح ليا! (و بقيت عاقدة حجباني)
عثمان: ههه.... باين قاتلك الفضول! كيفاش راجل قد هذا معندوش الولاد؟
أنا: هههه
عثمان: بغيتي تعرفي ياك؟
أنا حركت ليه راسي بالإيجاب..
عثمان: ايوا أنا ألالة تزوجت عادي ... بحال ڨاع الناس في الفترة ديل الشباب.. بواحد البنت زوينة لي هي مراتي الله يرحمها.. واخا كانت اكبر مني ولكن الحب خلااااني نواجه كلشي و نتزوج بيها حيت هي المرا لي كنبغي! تزوجنا عاااادي... و بقينا عامين و حنا مزوجين و بلا ولاد... أنا جاتني فشكل حيت كنت شوياا... احم.... شويا..... مجهد معاها بزاف فالفراش.... يعني ميمكنش متحملش... انا شكيت واش كانت كتاخد الموانع ديل الحمل من مورا ضهري و ماباغياش تولد معايا!! ولكن.... منين مشيت لطبيب قال ليا باي أنا لي مكنولدش ... و خبيتها عليها! باش متخلينيش و تمشي.... ولكن بعد منها بشويا قالت ليا باي راها حاملة!!! أنا تصدمت حيت كيما قلت ليك انا عارف بلي مكنولدش، و كيفاش هي غتحمل و أنا أول واحد قاسها!!؟؟ إذن كانت كتخونني مع شي حد فهاد العامين.... و المصيبة الكبيرة أن هذاك الحد صدق..... صدق با!! أنا مشكيييتش فالواليد ديالي يدير هادشي .... و منين هدرت معاها و عقت بهديك الخيانة ديالها...بدات كتعايرني زعما أنا عاڨر و حارمها من الولاد و من الأمومة.. و بلي هادشي بزز عليها تمشي تنعس مع با و تخونني معاه ففراشي... فاش كنكون أنا اكثرية مسافر برا المغرب!!
أنا: وااااا.... هادشي خطير!!! بحال كتعاود ليا شي فيلم!! ههه
عثمان: شفتي... ولكن هدشي راه بالصح ههههه
أنا: ايوا و شنو طرا فاش حصلتيها كتخونك!؟؟؟
عثمان: منكدبش عليك دك الساعة!!! خرجت على السيطرة ديالي مبقيتش عارف شنو كندير... بقيت كنضربها و كنصرفقها و كنغووووت عليها!
و دكشي مكفانيييييش و أنا ن..... ، و أنا.....
أنا: شنو درتي!!؟
عثمان: جيت.... جيت فوق منها و درو معاها..
أنا (قاطعتو): اه صافي صافي....
عثمان: فهمتيني!! بديت كندير شي حوايج عمرني درتهم بوحشية!!!! باش نوريها دكشي لي عمرها ما شافتو و لا غتشوفو فشي حد آخر من غيري!!
أنا بقيت ساكتة و كنشوفو كيفاش كان كيشوف فيا و هو كيعاود و عينيه مقلوووبيين! صراحة حسيت شوية... بالخوف من جهتو! أنا بقيت حشمانة و مبلوووكية فبلاصتي حتى قفزت فاش هدر معايا!
عثمان: ايوا و نتي شنو قصتك!!!؟؟؟
أنا (تنهدت) : قصتي قصة!! ما عالم بيها غير الله! كيفما عاودت ليك قبيلا!!! .... ولكن دابا غنقول ليك هدوك التفاصيل كاملة!! بغيت غير نشكي على شي حد منخليش دكشي كيكوي فيا من الداخل!!!
عثمان (بقا تيشووووف شحال و هو يقول): عاودي... خوي قليبك... متخليهش ي.... (و همس ليا) يتكوى... و يتشوى...
أنا (الصمت)
عثمان قاسني فذراعي و قال: يلاه عاودي ليا!!!
أنا : اش غنقول ليك أسي عثمان، أنا كنت بنت دااااارنا كيف قلت ليك! كنقرا مزيان و عايشة مع با فدارنا لي كنا كارينها... واخا كنا ناس دراوش و مافحالهمش ولكن با يلاه يلاه مكافي مع الزمان و التشجيع ديالو كيخليني نزيييد نقرا و نجتهد حيت كان الحلم ديالي صراحة نكون أستاذة هههه....
عثمان: مزيااان..... و ماماك؟؟
أنا: ماما؟ .... ماما عمرني شفتها! ماتت و هي كتولدني... راك عارف أغلبية ديل العيالات و هما كيولدو كيموتو على يد القابلات...
عثمان: علاش نتي مولداك قابلة؟؟
انا: اه... معندناااش فلوس سبيطار!! و ها أنا بسبب الفقر اول نهار ليا فهاد الدنيا كنخسر ماما.... أعززز شخص عند كلشي....
عثمان: صافي الله يرحمها... بغاها الله، داها الله!!!
أنا: هههه، الحمد لله! ربي خدا مني ماما و بابا!!! الله يرحمهم ..
عثمان: باباك حتى هو ميت!
أنا: آآآه... مات هادي... 3سنين... و خلاني لعمتي حيت هي بوحدها لي عندنا فهاد المدينة... مكتبغينيش مكتحملنييييش رداتني خدااامة فدارها... و حبساتني على القراية ... و سكتت و صبرت و خليييييتها كتحرقني فقلبي كل دقيقة!! قلت ماكاين باس.... ربي غيفرج عليا مهما كان!! ....... عندها جوج ولاد بحال العودان كل واحد قدو قداش راني قلت ليك واحد فيهم كان عينو فيا! كيبقى حاضييني و كيدير شي حركات... أنا حسيت بيه حااااااط عينيه عليا!
ايوا و راك عارف الكمالة... و شنو طرا ديك الليلة الكحلة!!!
عثمان: متديريييييش فبالك ا نورة! دااااابا يصاوب ليك الله!
أنا: كنتمنى☺️!
-فهاد الوقيتة جات مريم و جابت معاها صينية ديل أتاي، تبارك الله شوف غير التاويل الصينية كيف دايرة و الكويسات و البراد ... عاد زيد واحد الحليوات شحال تيشهيييو، واخا يلاه واكلة و تشهييتهم!! هههه.. صافي حطات لينا الصينية و مشات ... -

* يتبع ...... *