حًمًدٍيَهّ

البارت 5

#حمديه

بقلم روكيان عبدالله

المراهقة
_ 3 _
عافني ورجع لفراشه .. واني شلت الطشوته ونزلت . ما كنت مصدگه بحالي .. يعني مهدي طلع يحبني مثل ما احبه ؟ معقوله ..؟ لچ صدگ چذب حمديه مهدي يحبچ .. ما كنت افكر لا بزواج ولا بغير زواج .. ما كان ابالي غير أمر واحد .. هوه شلون اگدر اشوف مهدي مرت اللاخرى . نزلت اتعثر بالدرج . ما ادري من الفرحه ولا من الحيره ولا من اللهفة على شوفته مرت اللاخرى .. وله من فراگي اله .. تمنيت لو ابقى طول العمر بحضنه ..
بيني وبينكم .. سبيت مرت خالي ويه نفسي , لان سمعها مهدي تصيح وتركني اصحى من احلا حلم حلمته .
نزلت جوه وطببت الطشوته للحمام . باوعت بالمرايه شفت نفسي غير شكل . حتى صورتي بالمرايا العدهم تختلف عن صورتي بالمرايا اللي ابيت خالي . بقيت صافنه گبال المرايه .. صاحت بيَّ مرت خالي من المطبخ :- يله بنيتي تعالي عاونيني دا نخلص غراض المطبخ .. قبل ما يحكم الظهر , حتى نرجع نتغده اليوم ويه ابوچ.
:- أي يمه جيتچ .
كلما تصيح مرت خالي بيه افز .. صوتها كمت اسمعه عالي ووز ابذاناتي وز .
نزل مهدي من السطح وصاح على امه حتى تسويله ريوگ . مكان يقبل ياكل الريوگ الا من ايد امه .
گعد بالمطبخ .. كلما اندار عليه يغمزلي بعينه وخشمه .
طلعنا من بيت ام مهدي , عبالك عفت گلبي ابيتهم . موبس گلبي , عيوني واذاني ورجليَّ وكل جسمي , ما عاد اشوف الناس اللي تمشي بالشارع . من تحچي وياي مرت خالي اسمع صوتها حسبالك غاطس ابير . .. ورجليه ما احس بيهن يمشن على الگاع . منين طبينه ومن طلعنا وشلون وصلنا للبيت ما اعرف .. لكينه خالي وكروم ينتظرونا . مرت خالي بالطريق اشترت اربع نفرات كباب سفري , من فلوس البخشيش اللي انطتنياها ام مهدي . گعدنا نتغده بالحوش . ما شفت طعمه بالأكل . فكري كله يم مهدي . المصيبه آني من انفعل آكل هوايه , بلا ما ادري بنفسي . يعني اكلت حصتي ورجعت على حصة كريم , وهمّه بعدهم ينگنگون . آكل وفكري يم مهدي .. شلون راح اشوفه مرة اللاخرى .. واذا شفته هم راح تصير فرصة ويحضني مثل ما حضني اليوم .

بلا ما ادري كانت نص اللگمه بحلگي ونص اللاخرى بيدي .. سرحت ..ورحت بعيد. لا عاد الوكها للگمه ولا ابلعها ,ولا انزل ايدي من حلگي . حسيت بمرت خالي مدت ايدها عليَّ وندستني من رجلي :- هي ... هي .. وين رحتي . گومي اذا شبعتي , خلي الولد يكمل غداه .
اخويَ كريم مكان شاطر بالمدرسة , ولا واحد بالبيت يقرا ويكتب حتى يعلمه , لا اني ولا خالي ولا مرته . كان معتمد على نفسه , اللي يعلموهيَا بالمدرسة يجي يقراهن ويكتبهن بالبيت . ويطلع يلعب ويَّ ولد الدربونه . هاي كل النهار مگضيها بلعب الدعبل . الحلو بي مرتبهن لكتبه ولدفاتره ومعتني بيهن .. من يجي من المدرسة , يفتح الجنطه ويطلعهن ويحطهن على الرف اللي سوالهيا خالي بغرفتنا .. غرفتنا ... هههه .. مو غرفة مثل الغرف اللي اشوفهن بالبيوت اللي اشتغل بيهن .. هوَّ كُلْ البيت بي غرفتين , غرفة خالي , والغرفة اللي احنا بيها , غرفة خالي شويه چبيره وبيها شباك على الشارع وشباك زغير على الحوش . وغرفتنا كانت قبل ما يجيبنه ابويَ على بيت خالي , مسويها مطبخ . يعني حاطين بيها طباخ نفط ابو العينتين , وبريمز وجدوره ومواعين فافون , المواعين مسويلهن رف فوگ الطباخ ومخليهن عليه . من اجينه يمهم فرغوها وگعدونا بيها , وحَولوا الطباخ والغراض بالحوش . بالشتا من يصير مطر , مرت خالي تحول الطباخ جوا الدرج من تحتاج تشعله , حتى لا يطفِّي مي المطر . يعني الغرفة كلها متره ونص بالعرض باربع مترات بالطول . ما كنا نطبخ هوايه بالبيت . اكثر اكلنا من اللي ينطونيا الناس اللي نشتغللهم . بس الريوگ نشتري من السوگ . والچاي .. هذا ما بيها مجال .. لازم نسوي بالبيت .. ها .. وكانت عندنا منقله مال فحم ... مرات خالي يشتهي چاي على الفحم ويشعلها ويخدر الچاي عليها , وخصوصا بالشتا , حتى هم اتدفي للبيت , وهماتين چايها ما ينشبع منه . ابين غرفة خالي وغرفتنا ممر ضيگ ياله يفوت نفر ,.. يعني مثل المجاز , والحوش كلَّه ياله بگد اللحاف .. بالبداية كانوا مخلين بنصة حنفية ومسويلها حوض وساگيه حتى يطلع المي للدربونه . قبل سنه جبنه مغسله زغيره وخليناها ما بين ركن الحوش وغرفة خالي . احلى شي بالبيت هوَّ الحوش , هيچ كنت اشوفه .. مطبگ بكاشي زغار .. اخضر واصفر .احلى من كل الكاشي اللي اشوفه ببيوت الناس .
بعد ما خلصنا غده , گلت لكريم:- فدوه كرومي وين الكُتُب والدفاتر مالتك ؟
گال لي :- شلچ بيهن .. ؟ ما تدرين سلمتهن للمدرسة من دا انعطِّل ؟ ما بقن غير بس الدفاتر ..
گتله :- اريد اتعلم قراية وكتابه .. كل الناس .. البنات والنسوان تعلمن بالامية , واني ما رحت سجلت .
:- هاي شلچ بيها . . متروحين اتسجلين احد لازمچ .
:- يگولون راح تخلص .. وبعدين ما عندي جنسية .. ما شفت اشسوو بينه بالمدرسة من وراك , لان ما عندك جنسية ..