حًمًدٍيَهّ

البارت 3

بذاك اليوم اللي باسني بي مهدي من خدي ولا جاني نوم, بقيت اتگلب بفراشي لنص الليل . اباوع على النجوم, بس اخاف احسبهن, لان سمعت مرت خالي تگول:- ميصير الواحد يعد النجوم ..

ليش ؟ ما اعرف .. 13

كل ما اشوف نجمة تخر من السما ابقى اتبّعها واراقب نزولها ليما تتلاشى وتنتهي .

اول ما اشوف نجمه تبرگ, اتخيَل بيها وجه مهدي . اتمنى لو ينزل وي النجمة على سطح بيت خالي, ويتقرب مني ويبوسني مرة ثانية من خدي . اخلي ايدي على خدي بالمكان اللي باسني منه , احس استوه بايسني, يتهيأ لي بوسته بعدها مرسومه على خدي, وحرارته تشع . واتخيل  حرارة انِفاَسَه من قرَّب وجهه عليَ . أرِدْ اگول لنفسي:- هسه لو كان وحده اليوم بالبيت ..كان ؟؟.. اوووف.. اووووف ... هسه انتي يا ام مهدي, الا ذيچ اللحظة صحتي بمهدي... كان بقيتي شويّه يالَّه صحتي ...
مرات يشت فكري وروح بعيد .. بعيد ... ابقى اتابع النجمه اللي تخر وخصوصا اللي تروح على جهة الطارمية, وي نفسي اگول هاي يمكن وگعت بالبستان .. يم ابويا . اتمنى لو توگع على مرت ابوي وتحرگها حرگ . حرمتنا من ابونا وما عاد حتى يجي على بالنا , ولا جينا على باله فد يوم, وفكر يزورنا . من عافنا ابيت خالي بعد ما شفنا ولا شافنا . +

اول ايام اللي جينا بيها للكاظمية كنت كل يومين او ثلاثة اسأل خالي:- اشو ابويَّ ما يجي ياخذنا, مو گال لك بعد كم يوم اجيهم اخذهم .

كان خالي يگول لي :- ماما أبوكم مشغول بالبستان من يخلص شغل يجيكم ..

بعدين گام يجاوبنا ويگول:- هسه انتو شرايدين منه, آني ابوكم وآني امكم وشتحتاجون گولوا لي وانطيكم . 3

بمرور الوقت نسينا ابونا . مرات قليلة يجي طاريَّه على البال . مثلا مرة فتنا اني ومرت خالي, من عند علوة المخضر بالكاظمية, وكانت هوايه سيارات بيكب محملة عنب ورمان وفواكه, اشكال وارناگ . گالت مرت خالي:- بالله هذا الگواد ابوكم, ما فد يوم نزل للكاظمية وگال خلي اذكُرْهُم بكم رمانه, بعنگود عنب .. والله مع الاسف على هيچ رياجيل .

اني كنت اضحك على سوالفها, من تجيب طاريه وتگوم تسب وتفشر عليه, بس ويه نفسي اموت من القهر . اتذَكَر من كانت امنا طيبه شلون كان يلاعبنا ويحضِّن ويبوِّس بينا, وشلون من ماتت كان كل الليل يبچي, خصوصا من اساله عنها. مرات دموعي تطفر من عيوني واغص ابِّلعومي, واحس بحسره بگلبي . بس ابقى مبتسمة , حتى لا تگول عليَّ مرت خالي ... بَذّات وناكرة جميل . حسبالها انقهرت لان سبَّته لابويَ وفشَّرت عليه . كنت انقهر على نفسي وعلى اخويَ . مهما تكون مدارة خالي ومرته النا زينه, بس الأب يبقى أب وما يتعوض . حتى ريحته وريحة اهدومه اتذكّرها . من كان يجي من الشغل وتلگا وهو عرگان ومطَّين واشتم ريحته چني شامَّه ريحة مسچ وخضيره.

***

تعودوا خالي ومرتي ينامون بالليل بالركن مالت السطح, واني وكريم انام قريب من باب البيتونه . همَّ مسوين ستر وحايفينه بچرچف عتيگ . حتى الصبح من تطلع الشمس ما تضرب عليهم , وهماتين حتى لا يبينون من سطوح الجوارين . لان كانت السطوح الحوالينا اعلى من سطحنا .